1 Kings 14

Shan

← Chapter 13 Jump to: Chapter 15 →

1မိူဝ်ႈၼၼ်ႉ ဢၽီႉယႃႉ လုၵ်ႈၸၢႆး ယေႇရူဝ်းပုမ်ႇ ၼၼ်ႉ မီးတၢင်းၶႆႈတၢင်းပဵၼ်လႄႈ၊-

2ယေႇရူဝ်းပုမ်ႇ သင်ႇလၢတ်ႈတီႈမေးမၼ်းလႄႈဝႃႈ၊ မႂ်းလုၵ်ႉလႄႈႁဵတ်းႁၢင်ႈၽၢင်ဢၼ်လၢၵ်ႇပိူင်ႈ ႁႂ်ႈၽူႈလႂ်ဢမ်ႇလႆႈႁူႉလွင်ႈဢၼ်မႂ်းပဵၼ် မေး ယေႇရူဝ်းပုမ်ႇ ၼၼ်ႉသေလႄႈ ၵႂႃႇၵႃႈတီႈဝဵင်း သီႉလေႃႇ ပုၼ်ႉတႃႉ။ ပရေႃးၽႅတ်ႈ ဢႁီႉယႃႉ ဢၼ်ၼႄပျႃးလွင်ႈဢၼ်ၵဝ်တၵ်းလႆႈဢုပ်ႉပိူင်ႇၵူၼ်းမဵဝ်းၼႆႉၼၼ်ႉ တီႈၵဝ်ၼႆႉၼၼ်ႉ မီးယူႇၵႃႈတီႈဝဵင်းၼၼ်ႉဢေႃႈ။-

3ပႃးဢဝ်တင်းၶဝ်ႈမုၼ်းသိပ်းႁူၺ်ႇ၊ ၶဝ်ႈမုၼ်းၶႅပ်းၵမ်ႈၽွင်ႈ၊ တဝ်ႈၼမ်ႉၽိုင်ႈသေလႄႈၵႂႃႇၵႃႈတီႈမၼ်းၼၼ်ႉတႃႉ။ မၼ်းတၵ်းႁေႃးလၢတ်ႈလွင်ႈဢၼ်တၵ်းပဵၼ်ၸိူဝ်ႉၼင်ႇႁိုဝ်တီႈလုၵ်ႈဢွၼ်ႇၼႆႉၼၼ်ႉဢေႃႈ၊ ဝႃႈၼင်ႇၼႆလႄႈ၊-

4မေး ယေႇရူဝ်းပုမ်ႇ ၼၼ်ႉ ႁဵတ်းၸွမ်းၸိူဝ်ႉၼင်ႇၼၼ်လႄႈ လုၵ်ႉသေလႄႈၵႂႃႇၵႃႈတီႈဝဵင်း သီႉလေႃႇ လႄႈ ႁွတ်ႈထိုင်ၵႃႈတီႈႁိူၼ်း ဢႁီႉယႃႉ ဢေႃႈ။ မိူဝ်ႈၼၼ်ႉ ဢႁီႉယႃႉ ၼၼ်ႉ တႃဢမ်ႇႁၼ်ၵွပ်ႈပိူဝ်ႈဢၼ်ဢသၢၵ်ႈမၼ်းယႂ်ႇလႄႈ တႃမၼ်းမူဝ်းၵႂႃႇၼၼ်ႉဢေႃႈ။

5ထႃႇဝရႃႉၽြႃးမီးဢမိင်ႉတီႈ ဢႁီႉယႃႉ လႄႈဝႃႈ၊ တူၺ်းလူး၊ မေး ယေႇရူဝ်းပုမ်ႇ ၼၼ်ႉမႃး ႁႂ်ႈလႆႈယွၼ်းထၢမ်သေၸိူဝ်ႉသေပိူင်တီႈမႂ်း ပုၼ်ႈလုၵ်ႈၸၢႆးမၼ်း ၵွပ်ႈပိူဝ်ႈဢၼ်မၼ်းၼၼ်ႉ မီးတၢင်းၶႆႈတၢင်းပဵၼ်ယူႇၼၼ်ႉဢေႃႈ။ မႂ်းတၵ်းလႆႈၶိုၼ်းလၢတ်ႈဢၼ်ၸိူဝ်ႉၼင်ႇၼႆ ဢၼ်ၸိူဝ်ႉၼင်ႇၼၼ်တီႈမၼ်းဢေႃႈ။ မိူဝ်ႈဢၼ်မၼ်းမႃးၼၼ်ႉၸိုင်၊ မၼ်းတၵ်းႁဵတ်းၼင်ႇႁၢင်ႈမၼ်းပဵၼ်မႄႈယိင်းတၢင်ႇၵေႃႉဢေႃႈ၊ ဝႃႈၼင်ႇၼႆဢေႃႈ။-

6ဢႁီႉယႃႉ ငိၼ်းသဵင်တိၼ်မၼ်း ၼႂ်းမိူဝ်ႈဢၼ်မၼ်းၶဝ်ႈၵႃႈၼႂ်းၽၵ်းတူမႃးၼၼ်ႉသေယဝ်ႉ၊ လၢတ်ႈလႄႈဝႃႈ၊ မေး ယေႇရူဝ်းပုမ်ႇ ဢိူၺ်း၊ ၶဝ်ႈမႃးတႃႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းႁဵတ်းၸိူဝ်ႉၼင်ႇႁၢင်ႈမႄႈယိင်းတၢင်ႇၵေႃႉၼၼ်ႉၼင်ႇႁိုဝ်။ ၵဝ်လႆႈၶၢမ်ႇတၢင်းဢၼ်မၼ်းၸဝ်ႈ ပွႆႇၸႂ်ႉႁႂ်ႈလႆႈမွၵ်ႇလၢတ်ႈသတၢင်းသဵင်ၶၢဝ်ႇဢၼ်ၶီၸႂ်ၶူမ်ၸႂ်တီႈမႂ်းဢေႃႈ။-

7မႂ်းၵႂႃႇလႄႈလၢတ်ႈတီႈ ယေႇရူဝ်းပုမ်ႇ လႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ မီးဢမိင်ႉလႄႈဝႃႈၸမ်ႉ၊ ပိၵ်ႉသမ်ႉၵဝ်ဢဝ်မႂ်းၵႃႈၼႂ်းမုၵ်ႉၵူၼ်းၸိူဝ်းၵူၼ်းလႄႈ ယုၵ်ႉယွင်ႈႁႂ်ႈပဵၼ်ၵေႃႉဢၼ်ဢုပ်ႉပိူင်ႇၵူၼ်းၵဝ်မဵဝ်း ဢီႉသရေႇလႃႉ လႄႈ၊-

8ၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းၵႃႈၼႂ်းမိုဝ်းၸိူဝ်ႉၶိူဝ်း တႃႇဝိတ်ႈ သေလႄႈပၼ်တီႈမႂ်းသေၵေႃႈ၊ မႂ်းဢမ်ႇပဵၼ်မိူၼ်ၸိူဝ်ႉၼင်ႇၶႃႈၵဝ် တႃႇဝိတ်ႈ ဢၼ်ပႂ်ႉၵမ်ပႂ်ႉၵျၢင်ႉပိင်းၺၢပ်ႈၵဝ်တင်းလၢႆလႄႈ ပႃးတင်းႁူဝ်ၸႂ်သဵင်ႈသဵင်ႈသေလႄႈ ႁဵတ်းၸွမ်းဢၼ်လီဢၼ်ငၢမ်းၵူၺ်း သိုဝ်ႈၼႃႈတႂ်ႈတႃၵဝ်ၼၼ်ႉ။-

9မႂ်းႁဵတ်းတူႉၸရိူၵ်ႈလိူဝ်တွၼ်းၼႃႇသေၶဝ်ၸိူဝ်းဢၼ်ပဵၼ်ၵႂႃႇယဝ်ႉမိူဝ်ႈဢွၼ်တၢင်းမႂ်းၼၼ်ႉလႄႈၵႂႃႇႁဵတ်းၽြႃးတၢင်ႇသူႇတၢင်ႇပႃး ဢိၵ်ႇတင်းရုၵ်ႈထူႉဢၼ်လေႃႇသွၼ်းႁဵတ်းတင်းလၢႆ ပုၼ်ႈမႂ်းႁႂ်ႈလႆႈတိုၵ်းယူင်းတၢင်းၸႂ်မႆႈၶႆႈၸႃႉၵဝ်လႄႈ ဢဝ်ၵဝ်ပႅတ်ႈဝႆႉ ၵႃႈတီႈၽၢႆႇတၢင်းလင်မႂ်းယဝ်ႉ။-

10ပိူဝ်ႈၼႆလႄႈ ၵဝ်တၵ်းႁႂ်ႈၽေးဢူႉပၢတ်ႈႁွတ်ႈထိုင်ၵႃႈၼိူဝ်ၸိူဝ်ႉၶိူဝ်း ယေႇရူဝ်းပုမ်ႇ လႄႈ ပႄႇတႅပ်းပႅတ်ႈၵူၼ်းၸၢႆး ၸိူဝ်ႉၶိူဝ်း ယေႇရူဝ်းပုမ်ႇ ၵူႈၵေႃႉဢၼ်ဝႃႈ ၸႃႉၸဵမ်ၶဝ်ၸိူဝ်းဢၼ်ၶၢမ်ႇတၢင်းဢၼ်ၶျုၵ်ႈဝႆႉလႄႈ ၶဝ်ၸိူဝ်းဢၼ်လွတ်ႈၵႂႃႇ ၵႃႈၼႂ်းဝၢၼ်ႈဝဵင်း ဢီႉသရေႇလႃႉ ၼၼ်ႉဢေႃႈ။ ၵဝ်တၵ်းပႄႇၽဵဝ်ႈၸိူဝ်ႉၶိူဝ်း ယေႇရူဝ်းပုမ်ႇ ပႅတ်ႈ မိူၼ်ၸိူဝ်ႉၼင်ႇဢၼ် ၵူၼ်းၵွပ်ႇဢဝ်ၵွင်ၶီႈဝူဝ်းၵႂႃႇထၼ်ႈပေႃးသဵင်ႈပေႃးမူတ်းၼၼ်ႉဢေႃႈ။-

11ၸိူဝ်ႉၶိူဝ်း ယေႇရူဝ်းပုမ်ႇ ဢၼ်တၢႆၵႃႈၼႂ်းဝဵင်းၼၼ်ႉၸိုင်၊ မႃတၵ်းၵိၼ်လႄႈ ဢၼ်တၢႆၵႃႈတီႈၼွၵ်ႈတီႈပၢင်ႇၸိူဝ်းၼၼ်ႉၸိုင် ၼူၵ်ႉၵၢင်ႁၢဝ်တင်းလၢႆ တၵ်းၵိၼ်ဢေႃႈ၊ ထႃႇဝရႃႉၽြႃးမီးဢမိင်ႉဝႆႉၸိူဝ်ႉၼင်ႇၼႆဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆတႃႉ။-

12ပိူဝ်ႈၼႆလႄႈ မႂ်းလုၵ်ႉလႄႈမိူဝ်းၵႂႃႇၵႃႈတီႈႁိူၼ်းမႂ်းတႃႉ၊ မိူဝ်ႈဢၼ်တိၼ်မႂ်းၶဝ်ႈၵႃႈၼႂ်းၽၵ်းတူဝဵင်းၼၼ်ႉၸိုင်၊ လုၵ်ႈဢွၼ်ႇၼၼ်ႉတၵ်းတၢႆဢေႃႈ။-

13ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် တၵ်းဢွၼ်ၵၼ်ႁဵတ်းတၢင်းဢၼ်ႁႆႈႁွင်ႉပွင်ႉၶၢင်းသေလႄႈ ဢဝ်မၼ်းသၢင်းၵျူဝ်ႇဢေႃႈ။ ၼႂ်းၸိူဝ်ႉၶိူဝ်း ယေႇရူဝ်းပုမ်ႇ ၼၼ်ႉ ၵေႃႉၼၼ်ႉၵေႃႉလဵဝ်ၵူၺ်းတၵ်းလႆႈၶၢမ်ႇတၢင်းဢၼ်သၢင်းၵျူဝ်ႇဢေႃႈ။ လွင်ႈမၼ်းၸမ်ႉ ၼႂ်းၸိူဝ်ႉၶိူဝ်း ယေႇရူဝ်းပုမ်ႇ ၼၼ်ႉ လႆႈထူပ်းလွင်ႈတၢင်းဢၼ်လီဢၼ်ငၢမ်း ဢၼ်ဢူၼ်ႈၼူပ်ႈၵွမ်းၸူးၵႃႈတီႈထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ၼၼ်ႉ တီႈလုၵ်ႈဢွၼ်ႇၼၼ်ႉဢေႃႈ။-

14ပိူဝ်ႈၼႆလႄႈ ထႃႇဝရႃႉၽြႃးတၵ်းႁႂ်ႈၶုၼ်ႁေႃၶမ်း ဢီႉသရေႇလႃႉ ဢၼ်တၵ်းပႄႇတႅပ်းပႅတ်ႈၸိူဝ်ႉၶိူဝ်း ယေႇရူဝ်းပုမ်ႇ ၼၼ်ႉ ပႃးၼိုင်ႈပေႃႇဢွၵ်ႇပဵၼ်မႃးပုၼ်ႈမၼ်းၸဝ်ႈဢေႃႈ။ တၵ်းပဵၼ်ၶိင်ႇလႂ်၊ တၵ်းပဵၼ်မိူဝ်ႈလဵဝ်ၼႆႉဢေႃႈ။-

15ထႃႇဝရႃႉၽြႃးတၵ်းပၼ်တၢမ်ႇတီႈမဵဝ်း ဢီႉသရေႇလႃႉ မိူၼ်ၸိူဝ်ႉၼင်ႇဢၼ် တူၼ်ႈမႆႉဢေႃႈသၼ်ႇၶွၼ်း ၵႃႈတီႈၼႂ်းၼမ်ႉၼၼ်ႉလႄႈ ၼုၵ်ႈထူၺ်ႈဢဝ်မဵဝ်း ဢီႉသရေႇလႃႉ ဢွၵ်ႇပႅတ်ႈသေၵႃႈၼႂ်းမိူင်းဢၼ်လီဢၼ်ငၢမ်း၊ ဢၼ်မၼ်းၸဝ်ႈပၼ်တီႈပူႇမွၼ်ႇၶဝ်ၸိူဝ်းၼၼ်ႉၼႆႉသေယဝ်ႉ၊ တၵ်းဢဝ်ၶဝ်ၸၢတ်ႇပိုၼ်ပႅတ်ႈၵႃႈတီႈၽၢႆႇပုၼ်ႉၼမ်ႉႁွင်ႈလူင်ၼၼ်ႉ ၵွပ်ႈပိူဝ်ႈဢၼ်ၶဝ်ဢွၼ်ၵၼ် တႄႇႁဵတ်းတူၼ်ႈ ဢႃႇသရႃႉ တင်းလၢႆလႄႈ တိုၵ်းယူင်းတၢင်းၸႂ်မႆႈၶႆႈၸႃႉထႃႇဝရႃႉၽြႃးၼၼ်ႉဢေႃႈ။-

16မၼ်းၸဝ်ႈတၵ်းၸုၼ်ႉပႅတ်ႈ မဵဝ်း ဢီႉသရေႇလႃႉ ၵွပ်ႈပိူဝ်ႈဢပႅတ်ႈ ယေႇရူဝ်းပုမ်ႇ ဢၼ်တူဝ်မၼ်းၽိတ်းပိူင်ႈ ဢိၵ်ႇတင်းမၼ်းႁႂ်ႈမဵဝ်း ဢီႉသရေႇလႃႉ ၽိတ်းပိူင်ႈၸိူဝ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။

17မေး ယေႇရူဝ်းပုမ်ႇ ၼၼ်ႉ လုၵ်ႉမိူဝ်းၵႂႃႇလႄႈၽႅဝ်ၵႃႈတီႈဝဵင်း တီႉရၸႃႉ သေယဝ်ႉ၊ မိူဝ်ႈဢၼ်မၼ်းႁွတ်ႈထိုင်ၵႃႈတီႈၶူင်ႇၽၵ်းတူႁေႃၼၼ်ႉၸိုင် လုၵ်ႈဢွၼ်ႇၼၼ်ႉတၢႆဢေႃႈ။-

18ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ဢွၼ်ၵၼ်ႁဵတ်းတၢင်းဢၼ် ဢဝ်မၼ်းသၢင်းၵျူဝ်ႇလႄႈႁႆႈႁွင်ႉပွင်ႉၶၢင်းမႅၼ်ႈၸွမ်းၵႃႈၼင်ႇဢၼ်ထႃႇဝရႃႉၽြႃးဢဝ်ၶႃႈမၼ်းၸဝ်ႈ ပရေႃးၽႅတ်ႈ ဢႁီႉယႃႉ မီးဢမိင်ႉဝႆႉၼၼ်ႉဢေႃႈ။

19လွင်ႈတၢင်း ယေႇရူဝ်းပုမ်ႇ ဢၼ်ယင်းၵိုတ်းယင်းၵျၢၼ်ႇတင်းလၢႆဢၼ်ဝႃႈ တၢင်းဢၼ်မၼ်းတိုၵ်းသိုၵ်း၊ တၢင်းဢၼ်ဢုပ်ႉပိူင်ႇၸၢမ်ႇၸႃးၼၼ်ႉၸိူဝ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ဢီႉသရေႇလႃႉ ဢေႃႈ။-

20ယေႇရူဝ်းပုမ်ႇ ၼၼ်ႉဢုပ်ႉပိူင်ႇၸၢမ်ႇၸႃးသၢဝ်းပၢႆသွင်ပီႊသေယဝ်ႉ၊ ၼွၼ်းလပ်းလူၺ်ႈၵၼ်တင်းပူႇမၼ်းမွၼ်ႇမၼ်းသေလႄႈ ၼႃႇတပ်ႉ လုၵ်ႈၸၢႆးမၼ်းၼၼ်ႉၼင်ႈႁၢင်ႈၼင်ႈႁေႃတၢင်တူဝ်မၼ်းဢေႃႈ။

21ရူဝ်းပုမ်ႇ လုၵ်ႈၸၢႆး သေႃးလမုၼ်ႇ ၼၼ်ႉဢုပ်ႉပိူင်ႇၸၢမ်ႇၸႃးမိူင်း ယူႉတႃႉ ဢေႃႈ။ ရူဝ်းပုမ်ႇ ၼၼ်ႉမိူဝ်ႈဢၼ်ၸႃႉ ၼင်ႈႁၢင်ႈၼင်ႈႁေႃၼၼ်ႉၸိုင်၊ ဢသၢၵ်ႈလႆႈသီႇသိပ်းပၢႆဢဵတ်းပီႊလႄႈဢုပ်ႉပိူင်ႇၸၢမ်ႇၸႃးၵႃႈတီႈဝဵင်း ယေႇရူႉသလႅမ်ႇ ဢၼ်ထႃႇဝရႃႉၽြႃးလိူၵ်ႈၵဵပ်းဢဝ် ၵႃႈၼႂ်းၼမ်ႉၼႂ်းလိၼ်မဵဝ်း ဢီႉသရေႇလႃႉ ၵူႈမဵဝ်းပုၼ်ႈဢၼ်တၵ်းႁႂ်ႈၼႃႇမႃႉၸိုဝ်ႈသဵင်ၸဝ်ႈတႄႇယူႇၼၼ်ႉ သိပ်းၸဵတ်းပီႊဢေႃႈ။ မႄႈမၼ်းၸမ်ႉ၊ ပဵၼ် ၼေႇမႃႉ မဵဝ်း ဢမ်ႇမုၼ်ႇ ဢေႃႈ။-

22ၵူၼ်းမဵဝ်း ယူႉတႃႉ တင်းလၢႆဢွၼ်ၵၼ်ႁဵတ်းတူႉၸရိူၵ်ႈ ၵႃႈတီႈၽၢႆႇၼႃႈထႃႇဝရႃႉၽြႃးလႄႈ ဢဝ်တင်းဢပႅတ်ႈဢၼ်ၽိတ်းပိူင်ႈလိူဝ်တွၼ်းၼႃႇသေ ၵႃႈဢၼ်ပူႇမွၼ်ႇၶဝ်တင်းလၢႆၽိတ်းပိူင်ႈၼၼ်ႉ တိုၵ်းယူင်းတၢင်းၸႂ်မႆႈၶႆႈၸႃႉၸဝ်ႈဢေႃႈ။-

23ၶဝ်ဢွၼ်ၵၼ်ႁဵတ်းထႃႇၼႃႉတီႈသုင်လႂ်၊ သဝ်တီႈၵူဝ်းၵႂၢႆႇလႂ် တင်းတူၼ်ႈ ဢႃႇသရႃႉ လႂ် ၵႃႈတီႈၼိူဝ်လွႆဢၼ်သုင်ၵႃႈမီးဢိၵ်ႇတင်းၵႃႈတီႈတႂ်ႈတူၼ်ႈမႆႉဢၼ်ၶဵဝ်ၵႃႈမီးဢေႃႈ။-

24ၶဝ်ၸိူဝ်းဢၼ်ၸၢင်ႈၸွမ်းဢလူဝ်ႇၵူၼ်းၸၢႆးၼင်ႇၵၼ်ၼၼ်ႉၵေႃႈ မီးၵႃႈၼႂ်းမိူင်း ယူႉတႃႉ လႄႈ ၶဝ်ဢွၼ်ၵၼ်ႁဵတ်းၸွမ်းလွင်ႈတၢင်းဢၼ် လီႁင်ႈဢဵတ်ႇသဵတ်ႇၵူႈၸိူဝ်ႉၵူႈပိူင် ဢၼ်ၵူၼ်းမဵဝ်းဢၼ်ထႃႇဝရႃႉၽြႃးႁေႃႈဢွၵ်ႇပႅတ်ႈသေ ၵႃႈတီႈၽၢႆႇၼႃႈၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉၸိူဝ်းၼၼ်ႉႁဵတ်းၼၼ်ႉလူင်ပႄႇ။-

25ၼႂ်းပီႊဢၼ်ၶုၼ်လူင် ရူဝ်းပုမ်ႇ ၸၢမ်ႇႁၢင်ႈၸၢမ်ႇႁေႃႁႃႈပီႊၼၼ်ႉ၊ သီႉသၵ်ႉ ၶုၼ်ႁေႃၶမ်း ဢေႇၵိပ်ႉတူႉ ၶီႇသိုၵ်းၶိုၼ်ႈၵႃႈတီႈဝဵင်း ယေႇရူႉသလႅမ်ႇ သေလႄႈ၊-

26သိမ်းဢဝ်ဢုၵ်ႉၸႃႇၽၼ်ႇတႃႇႁိူၼ်းထႃႇဝရႃႉၽြႃး ဢိၵ်ႇတင်းဢုၵ်ႉၸႃႇၽၼ်ႇတႃႇႁေႃၸဝ်ႈလႄႈ ဢဝ်ၵႃႈမီးတင်းသဵင်ႈတင်းလူင်ၵႂႃႇဢေႃႈ၊ ၶိူင်ႈႁႄႉလၢၵ်ႈၼၢၵ်ႈၶမ်း ဢၼ် သေႃးလမုၼ်ႇ ႁဵတ်းၵႃႈမီးၼၼ်ႉၵေႃႈဢဝ်ၵႂႃႇဢေႃႈ။-

27ၶုၼ်လူင် ရူဝ်းပုမ်ႇ ၼၼ်ႉႁဵတ်းၶိူင်ႈႁႄႉလၢၵ်ႈၼၢၵ်ႈတွင်းတၢင်တူဝ်ၶိူင်ႈႁႄႉလၢၵ်ႈၼၢၵ်ႈၶမ်းၸိူဝ်းၼၼ်ႉလႄႈ ဢၢပ်ႈပၼ်ၵႃႈၼႂ်းမိုဝ်း ၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ် ၵူဝ်ႇရမ်ႇဢွၼ်ႇၸၢႆးဢၼ်ပႂ်ႉၽၵ်းတူႁေႃၸဝ်ႈၸိူဝ်းၼၼ်ႉဢေႃႈ။-

28ယၢမ်းမိူဝ်ႈဢၼ်ၶုၼ်ႁေႃၶမ်းဢွၵ်ႇၸူး ၵႃႈတီႈႁိူၼ်းထႃႇဝရႃႉၽြႃးၼၼ်ႉ၊ ၵူၼ်းၵူဝ်ႇရမ်ႇဢွၼ်ႇၸၢႆးၸဝ်ႈတင်းလၢႆဢွၼ်ၵၼ်ပႃးဢဝ် ၶိူင်ႈႁႄႉလၢၵ်ႈၼၢၵ်ႈၸိူဝ်းၼၼ်ႉလႄႈ လိုၼ်းၼၼ်ႉသမ်ႉဢွၼ်ၵၼ်ၶိုၼ်းဝႆႉ ၵႃႈတီႈလုၵ်းတီႈဢၼ်ၶဝ်ပႂ်ႉၼၼ်ႉဢေႃႈ။

29လွင်ႈတၢင်း ရူဝ်းပုမ်ႇ ဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ယူႉတႃႉ ဢေႃႈ။-

30ရူဝ်းပုမ်ႇ ဢိၵ်ႇတင်း ယေႇရူဝ်းပုမ်ႇ ၼၼ်ႉ ပဵၼ်သိုၵ်းပဵၼ်သိူဝ်ၵၼ်ယူႇသေႇသေႇဢေႃႈ။-

31ရူဝ်းပုမ်ႇ ၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ ၶၢမ်ႇတၢင်းဢၼ်သၢင်းၵျူဝ်ႇလူၺ်ႈၵၼ်တင်းပူႇမွၼ်ႇမၼ်းၸိူဝ်းၼၼ်ႉ ၵႃႈၼႂ်းဝဵင်း တႃႇဝိတ်ႈ ဢေႃႈ။ မႄႈမၼ်းၸမ်ႉ၊ ပဵၼ် ၼေႇမႃႉ မဵဝ်း ဢမ်ႇမုၼ်ႇ ဢေႃႈ။ ဢၽီႉယႃႉ လုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။

← Chapter 13 Jump to: Chapter 15 →