1 Kings 5

Shan

← Chapter 4 Jump to: Chapter 6 →

1ႁီႉရမ်ႇ ၶုၼ်လူင် တူႉရူႉ လႆႈငိၼ်းလွင်ႈဢၼ် ၶဝ်ဢွၼ်ၵၼ်ပၼ်ၽိၵ်ႈသိၵ်ႈတီႈ သေႃးလမုၼ်ႇ ႁႂ်ႈပဵၼ်ၶုၼ်ႁေႃၶမ်းတၢင်တူဝ်ပေႃႈမၼ်းၼၼ်ႉသေယဝ်ႉ၊ ပွႆႇၸႂ်ႉၶႃႈမၼ်းၵူၼ်းမၼ်းမႃးတီႈ သေႃးလမုၼ်ႇ ၵွပ်ႈပိူဝ်ႈဢၼ် ႁီႉရမ်ႇ ၼၼ်ႉ ပဵၼ်ၵေႃႉပဵၼ်သေႈၵၼ်တင်း တႃႇဝိတ်ႈ ၼၼ်ႉဢေႃႈ။-

2လႆႈသမ်ႉ သေႃးလမုၼ်ႇ ၵေႃႈ ပွႆႇၸႂ်ႉၵႂႃႇတီႈ ႁီႉရမ်ႇ သေလႄႈဝႃႈ၊-

3ၶုၼ်လူင်ႁူႉလွင်ႈဢၼ်ၸဝ်ႈပေႃႈၵဝ် တႃႇဝိတ်ႈ ၼၼ်ႉဢမ်ႇလႆႈတႄႇလႆႈႁဵတ်းႁိူၼ်းၸဝ်ႈပုၼ်ႈၼႃႇမႃႉၸိုဝ်ႈသဵင်ထႃႇဝရႃႉၽြႃး ၽြႃးပဵၼ်ၸဝ်ႈမၼ်း ၵွပ်ႈပိူဝ်ႈဢၼ်မၼ်းလႆႈႁဵတ်းသိုၵ်းႁဵတ်းသိူဝ်ၵူႈတီႈၵူႈလႅၼ်တေႃႇထိုင်ႁွတ်ႈထႃႇဝရႃႉၽြႃး ဢဝ်ရၢၼ်ႇသူႇမၼ်းတင်းလၢႆၶျႃးတူၵ်းၵႃႈတီႈတႂ်ႈၽႃႇတိၼ်မၼ်းၼၼ်ႉၼၼ်ႉယူႇဢေႃႈ။-

4မိူဝ်ႈလဵဝ်ၼႆႉၸမ်ႉ၊ ထႃႇဝရႃႉၽြႃး ၽြႃးပဵၼ်ၸဝ်ႈၵဝ် ၸီႇယၢင်ႇႁႂ်ႈသိုၵ်းထၢတ်ႇသိုၵ်းယဵၼ်သေတီႈၵဝ်ဢေႃႈ။ ဢမ်ႇမီးၵေႃႉဢၼ်ႁဵတ်းရၢၼ်ႇသူႇၽၢႆႇၼိုင်ႈတင်းၵဝ် ဢိၵ်ႇတင်းလွင်ႈတၢင်းဢၼ်ဢမ်ႇလီဢမ်ႇငၢမ်းဢၼ်ႁႄႉဢၼ်ၶႅၼ်ၵဝ်။-

5မိူဝ်ႈလဵဝ်ၼႆႉၸိုင်၊ ၵဝ်မီးတၢင်းၵျၢမ်ႇတၢင်းပွင် တၵ်းတႄႇႁဵတ်းႁိူၼ်းၸဝ်ႈ ပုၼ်ႈၼႃႇမႃႉၸိုဝ်ႈသဵင်ထႃႇဝရႃႉၽြႃး ၽြႃးပဵၼ်ၸဝ်ႈၵဝ် မႅၼ်ႈၸွမ်းၵႃႈၼင်ႇဢၼ်ထႃႇဝရႃႉၽြႃးလၢတ်ႈတီႈၸဝ်ႈပေႃႈၵဝ် တႃႇဝိတ်ႈ လႄႈဝႃႈ၊ လုၵ်ႈၸၢႆးမႂ်းဢၼ်ၵဝ်တၵ်းဢဝ်တၢင်ႇၵႃႈၼိူဝ်ရႃႇၸႃႉပလၢင်ႇမႂ်းတၢင်တူဝ်မႂ်းၼၼ်ႉ တၵ်းလႆႈတႄႇႁဵတ်းႁိူၼ်းၸဝ်ႈ ပုၼ်ႈၼႃႇမႃႉၸိုဝ်ႈသဵင်ၵဝ်ဢေႃႈ၊ ဝႃႈၼင်ႇၼႆဝႆႉၼၼ်ႉဢေႃႈ။-

6မိူဝ်ႈလဵဝ်ၼႆႉ၊ ၸီႇယၢင်ႇႁႂ်ႈၶဝ်တီႇပမ်ႈတႅပ်းၽၼ်းတူၼ်ႈ ဢႃႇရိတ်ႉ တင်းလၢႆၵႃႈၼိူဝ်လွႆ လေႇပၼုၼ်ႇ ပုၼ်ႈၵဝ်သေၵမ်း။ ၶႃႈၵဝ်ၵူၼ်းၵဝ်တၵ်းဢွၼ်ၵၼ်ၸွႆႈထႅမ် လူၺ်ႈၵၼ်တင်းၶႃႈၵူၼ်းၶုၼ်လူင်ဢေႃႈ။ ၵဝ်တၵ်းပၼ်ၵႃႈမၼ်းၶၼ်မၼ်းတီႈၶႃႈၵူၼ်းၶုၼ်လူင် ၸွမ်းၵႃႈၼင်ႇဢၼ်ၶုၼ်လူင်ၸီႇယၢင်ႇၼၼ်ႉဢေႃႈ။ ၶုၼ်လူင်ႁူႉလွင်ႈဢၼ်ၵႃႈၼႂ်းႁဝ်းၼႆႉ ဢမ်ႇမီးၵေႃႉဢၼ်မေႃပမ်ႈမေႃၽၼ်းသေၵေႃႉသေၵူၼ်း မိူၼ်ၸိူဝ်ႉၼင်ႇဢၼ်ၵူၼ်းမဵဝ်း ၸီႉတုၼ်ႇ တင်းလၢႆမေႃပမ်ႈမေႃၽၼ်းၼၼ်ႉယူႇဢေႃႈ၊ ဝႃႈၼင်ႇၼႆဢေႃႈ။

7ၶုၼ် ႁီႉရမ်ႇ ငိၼ်းၵႂၢမ်း သေႃးလမုၼ်ႇ ၼၼ်ႉသေယဝ်ႉ၊ ၸူမ်းသိူဝ်းၼႃႇလူင်လၢင်လႄႈဝႃႈ၊ ႁႂ်ႈထႃႇဝရႃႉၽြႃး ဢၼ်ပၼ်လုၵ်ႈၸၢႆးဢၼ်မီးပိင်ႇၺႃႇလႄႈ လႆႈဢုပ်ႉပိူင်ႇၵူၼ်းမဵဝ်းလူင်ၼႆႉတီႈ တႃႇဝိတ်ႈ ၼၼ်ႉၼၼ်ႉ မီးမင်ႇၵလႃႇဝၼ်းမိူဝ်ႈၼႆႉသေၵမ်းလူၺ်ႈ၊ ဝႃႈၼင်ႇၼႆသေလႄႈ၊-

8ႁီႉရမ်ႇ ပွႆႇၸႂ်ႉၵူၼ်းမႃးတီႈ သေႃးလမုၼ်ႇ လႄႈ ၶိုၼ်းလၢတ်ႈလႄႈဝႃႈ၊ ၵဝ်ၶႆႈၸႂ်ဝူၼ်ႉၸႂ်လူၺ်ႈလွင်ႈတၢင်းဢၼ်ၶုၼ်လူင်သင်ႇလၢတ်ႈမႃးတီႈၵဝ်ၼၼ်ႉယဝ်ႉ။ ၵဝ်တၵ်းႁဵတ်းၸွမ်းၵႃႈၼင်ႇဢၼ်ၶုၼ်လူင်မီးဢလူဝ်ႇၶႂ်ႈလႆႈမႆႉ ဢႃႇရိတ်ႉ ဢိၵ်ႇတင်းမႆႉပႅၵ်ႇၼၼ်ႉဢေႃႈ။-

9ၶႃႈၵူၼ်းၵဝ်တၵ်းဢဝ်ၵႃႈတီႈၼိူဝ်လွႆ လေႇပၼုၼ်ႇ လူင်းၸူးၵႃႈတီႈပၢင်ႇလၢႆႇသေလႄႈ ၶၢတ်ႈႁဵတ်းပႄးလႄႈ ဢဝ်ၸွမ်းသဵၼ်ႈတၢင်းပၢင်ႇလၢႆႇမႃးၸူးၵႃႈတီႈဢၼ်ၶုၼ်လူင်ၸီႇယၢင်ႇဝႆႉၼၼ်ႉသေလႄႈ ၵႄႈလိတ်ႈၵႃႈတီႈၼၼ်ႈသေယဝ်ႉ၊ ၶုၼ်လူင်တၵ်းလႆႈႁပ်ႉၶၢမ်ႇဢဝ်ဢေႃႈ။ ၶုၼ်လူင်တၵ်းလႆႈပၼ်ၸရိပ်ႈတၢင်းၵိၼ်ပုၼ်ႈၵူၼ်းႁၢင်ႈၵူၼ်းႁေႃၵဝ်တင်းလၢႆလႄႈ ႁႂ်ႈဢလူဝ်ႇၵဝ်လႆႈပျေႉၸုမ်ႇဢေႃႈ၊ ဝႃႈၼင်ႇၼႆဢေႃႈ။

10ၼင်ႇၼၼ်လႄႈ ႁီႉရမ်ႇ ၼၼ်ႉ ပၼ်မႆႉ ဢႃႇရိတ်ႉ တင်းမႆႉပႅၵ်ႇတီႈ သေႃးလမုၼ်ႇ ၸွမ်းၵႃႈၼင်ႇဢၼ်မၼ်းမီးဢလူဝ်ႇၶႂ်ႈလႆႈၼၼ်ႉဢေႃႈ။-

11သေႃးလမုၼ်ႇ ၵေႃႈဢဝ်ၶဝ်ႈသၢၼ်ၵျုင်ႇသွင်မိုၼ်ႇ ၵေႃးရႃႉ ၊ ၼမ်ႉမၼ်းဢၼ်ၸႅတ်ႈယဝ်ႉထွင်ယဝ်ႉသၢဝ်း ၵေႃးရႃႉ ပၼ်တီႈ ႁီႉရမ်ႇ ဢေႃႈ။ ၼင်ႇၼၼ်လႄႈ သေႃးလမုၼ်ႇ ပၼ်တီႈ ႁီႉရမ်ႇ ပုၼ်ႈယေႈပီႊယေႈပီႊဢေႃႈ။-

12ထႃႇဝရႃႉၽြႃးၵေႃႈ ပၼ်ပိင်ႇၺႃႇတီႈ သေႃးလမုၼ်ႇ ၸွမ်းၵႃႈၼင်ႇဢၼ်ၵတီႉၸဝ်ႈမီးၼၼ်ႉဢေႃႈ၊ ႁီႉရမ်ႇ တင်း သေႃးလမုၼ်ႇ သွင်ပႃးၼၼ်ႉဢမ်ႇပဵၼ်သိုၵ်းပဵၼ်သိူဝ်တီႈၵၼ်လႄႈ ႁဵတ်းမိၵ်ႉသႃႇႁႃယႃႉၵၼ်ယူႇဢေႃႈ။

13ၶုၼ်လူင် သေႃးလမုၼ်ႇ ၵေႃႈၽႃႇၵဵပ်းဢဝ်ၵူၼ်းၵႃႈၼႂ်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်လႄႈ ၵူၼ်းဢၼ်ၽႃႇၵဵပ်းဢဝ်ၸိူဝ်းၼၼ်ႉမီးသၢမ်မိုၼ်ႇဢေႃႈ။-

14မၼ်းပွႆႇၸႂ်ႉၶဝ်ၵႂႃႇၵႃႈတီႈလွႆ လေႇပၼုၼ်ႇ ပဵၼ်လႄႉပဵၼ်ၵမ်း ယေႈလိူၼ်ယေႈမိုၼ်ႇလႄႈ ၶဝ်ၼၼ်ႉလႆႈယူႇၵႃႈတီႈၼိူဝ်လွႆ လေႇပၼုၼ်ႇ ယေႈလိူၼ်ၵႃႈတီႈႁိူၼ်းၶဝ်သွင်လိူၼ်ဢေႃႈ။ ဢတေႃးၼီႉရမ်ႇ လႆႈဢုပ်ႉၵႃႈၼိူဝ်ၶဝ်ၸိူဝ်းဢၼ်ၽႃႇၵဵပ်းဢဝ်ၼၼ်ႉဢေႃႈ။-

15သေႃးလမုၼ်ႇ ၸႂ်ႉသွႆၶဝ်ၸိူဝ်းဢၼ်လႆႈႁၢပ်ႇလႆႈႁၢမ်ၼၼ်ႉၸဵတ်းမိုၼ်ႇ ဢိၵ်ႇတင်းၶဝ်ၸိူဝ်းဢၼ်လႆႈပမ်ႈမႆႉၽၼ်းမႆႉၵႃႈၼိူဝ်သၼ်လွႆၼၼ်ႉ ပႅတ်ႇမိုၼ်ႇလႄႈ၊-

16ၼွၵ်ႈသေၶုၼ်ဢရႃႇသီႉဢၼ်ဢုပ်ႉၶျုၵ်ႈၸိူဝ်းၼၼ်ႉ၊ ၶဝ်ၸိူဝ်းဢၼ်လႆႈၸီႇယၢင်ႇၵႃႈၼိူဝ်ၵူၼ်းဢၼ်သၢင်ႈဢၼ်ႁဵတ်းၸိူဝ်းၼၼ်ႉၼၼ်ႉ မီးသၢမ်ႁဵင်ပၢႆသၢမ်ပၢၵ်ႇဢေႃႈ။-

17ၶဝ်ဢွၼ်ၵၼ်ဢဝ်မၢၵ်ႇႁိၼ်ဢၼ်ယႂ်ႇ၊ မၢၵ်ႇႁိၼ်ဢၼ်ထိူၵ်ႈၵႃႈထိူၵ်ႈၶၼ် ထၢၵ်ႇသပ်းႁႂ်ႈလႆႈဢဝ်မၢၵ်ႇႁိၼ်ဢၼ်ထၢၵ်ႇဢၼ်သပ်း တႄႇႁဵတ်းငဝ်ႈႁၢၵ်ႈတိူၵ်ႈႁိူၼ်းၸဝ်ႈ ၸွမ်းၵႃႈၼင်ႇဢၼ်ဢမိင်ႉၸဝ်ႈၶုၼ်လူင်မီးၼၼ်ႉဢေႃႈ။-

18ၼင်ႇၼၼ်လႄႈ လၢၵ်ႈသမႃး သေႃးလမုၼ်ႇ ဢိၵ်ႇတင်းလၢၵ်ႈသမႃးၶုၼ် ႁီႉရမ်ႇ ၸိူဝ်းၼၼ်ႉ ဢိၵ်ႇလူၺ်ႈၵၼ်တင်းၵူၼ်း ၵေႇပႃႇ တင်းလၢႆ ဢွၼ်ၵၼ်ပွင်ႁဵတ်းပွင်ႁႅၼ်းမႆႉၸိင်၊ တင်းမၢၵ်ႇႁိၼ် ပုၼ်ႈဢၼ်တၵ်းတႄႇႁဵတ်းႁိူၼ်းၸဝ်ႈဢေႃႈ။

← Chapter 4 Jump to: Chapter 6 →