2 Chronicles 10

Shan

← Chapter 9 Jump to: Chapter 11 →

1မိူဝ်ႈၼၼ်ႉ ရူဝ်းပုမ်ႇ ၵႂႃႇၵႃႈတီႈဝဵင်း သေႇၶိမ်ႇ ဢေႃႈ။ လွင်ႈမၼ်းၸမ်ႉ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်ၵႂႃႇ ၵႃႈတီႈဝဵင်း သေႇၶိမ်ႇ ႁႂ်ႈလႆႈယုၵ်ႉယွင်ႈမၼ်းဝႆႉၵႃႈၼႂ်းဢရႃႇၶုၼ်ႁေႃၶမ်းဢေႃႈ။-

2မိူဝ်ႈဢၼ် ယေႇရူဝ်းပုမ်ႇ ၊ လုၵ်ႈၸၢႆး ၼေႇပတ်ႉ ဢၼ်ဢွၵ်ႇပၢႆႈသေၵႃႈတီႈ ၶုၼ်လူင် သေႃးလမုၼ်ႇ ၵႂႃႇၵႃႈတီႈမိူင်း ဢေႇၵိပ်ႉတူႉ ၼၼ်ႉ ငိၼ်းလွင်ႈတၢင်းၼၼ်ႉၸိုင်၊ ယေႇရူဝ်းပုမ်ႇ ၼၼ်ႉ လုၵ်ႉသေၵႃႈတီႈမိူင်း ဢေႇၵိပ်ႉတူႉ ၶိုၼ်းမႃးဢေႃႈ။-

3ၶဝ်ပွႆႇၸႂ်ႉၵႂႃႇႁွင်ႉဢဝ်မၼ်းၼၼ်ႉမႃးသေယဝ်ႉ၊ ယေႇရူဝ်းပုမ်ႇ ၼၼ်ႉ ဢိၵ်ႇတင်းၵူၼ်းတင်းသဵင်ႈတင်းလူင် ဢွၼ်ၵၼ်ၶဝ်ႈၸူး ၵႃႈတီႈ ရူဝ်းပုမ်ႇ သေလႄႈ၊ လဝ်ႊလၢတ်ႈလႄႈဝႃႈ၊-

4ၸဝ်ႈပေႃႈၸဝ်ႈႁဝ်းၼၼ်ႉ ဢဝ်ၵၢၼ်းဢၼ်ၼၵ်းၼႃႇတၢင်ႇသႂ်ႇၵႃႈၼိူဝ်ၶႃႈၸဝ်ႈႁဝ်းတင်းလၢႆတီႈၶႃႈယဝ်ႉ။ ၸဝ်ႈႁဝ်းၶႅၼ်းတေႃႈ ႁႂ်ႈဢမူႉတၢင်းဢၼ်လႆႈၵိုတ်ႉႁၢပ်ႇ ယၢပ်ႇၸႂ်ၼႃႇလူင်လၢင်တီႈၸဝ်ႈပေႃႈၸဝ်ႈႁဝ်း ဢိၵ်ႇတင်းၵၢၼ်းႁၢပ်ႇဢၼ်ၼၵ်းၼႃႇ ဢၼ်မၼ်းတၢင်ႇသႂ်ႇၼၼ်ႉ မဝ်မႃးသေၵမ်းတီႈၶႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၶႃႈၸဝ်ႈႁဝ်းတင်းလၢႆတၵ်းဢွၼ်ၵၼ် ၵိုတ်ႉႁၢပ်ႇဢမူႉၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

5မၼ်းၵေႃႈမီးဢမိင်ႉလႄႈဝႃႈ၊ ပူၼ်ႉသၢမ်ဝၼ်းယဝ်ႉၸင်ႇၶိုၼ်းမႃးလူးၵွၼ်ႇတႃႉ၊ ဝႃႈၼင်ႇၼႆ သေယဝ်ႉ၊ ၵူၼ်းတင်းလၢႆဢွၼ်ၵၼ်ဢွၵ်ႇၵႂႃႇသေဢေႃႈ။

6မိူဝ်ႈၼၼ်ႉၶုၼ်လူင် ရူဝ်းပုမ်ႇ တိူင်ႇပၢင်ႇၵၼ်တင်း ၶဝ်ၸိူဝ်းဢၼ်ဢသၢၵ်ႈယႂ်ႇဢၼ်ၶႃးၸႃးၵႃႈတီႈၸဝ်ႈပေႃႈမၼ်း သေႃးလမုၼ်ႇ ၼႂ်းမိူဝ်ႈဢၼ်မၼ်းဢသၢၵ်ႈယင်းလိပ်းယူႇၼၼ်ႉၸိူဝ်းၼၼ်ႉလႄႈ ထၢမ်ဝႃႈ၊ သူတၵ်းပၼ်တၢင်းၵျၢမ်ႇတၢင်းပွင်ၸိူဝ်ႉၼင်ႇႁိုဝ်တီႈၵဝ် ႁႂ်ႈၵဝ်လႆႈၶိုၼ်းလၢတ်ႈတီႈၵူၼ်းတင်းလၢႆၸိူဝ်းၼႆႉ၊ ဝႃႈၼင်ႇၼႆသေယဝ်ႉ၊-

7ၶဝ်ဢွၼ်ၵၼ်လဝ်ႊလၢတ်ႈလႄႈဝႃႈ၊ ပေႃးၸဝ်ႈႁဝ်းႁဵတ်းၵျေးၸူးတီႈၵူၼ်းတင်းလၢႆၼႆႉသေလႄႈ ႁဵတ်းႁႂ်ႈထုၵ်ႇၸႂ်ၵျိူၵ်ႈၸႂ်ၶဝ်လႄႈ ၶိုၼ်းလၢတ်ႈၵႂၢမ်းဢၼ်လီဢၼ်ငၢမ်းတီႈၶဝ်ၸိုင်၊ ၶဝ်တၵ်းဢွၼ်ၵၼ်ၶၢမ်ႇႁဵတ်းၶႃႈၸဝ်ႈႁဝ်းယူႇသေႇသေႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

8ၵူၺ်းၵႃႈ မၼ်းဢမ်ႇၸွမ်းတၢင်းၵျၢမ်ႇတၢင်းပွင် ဢၼ်ၶဝ်ၸိူဝ်းဢၼ်ဢသၢၵ်ႈယႂ်ႇၸိူဝ်းၼၼ်ႉပၼ်ၼၼ်ႉလႄႈ သမ်ႉတိူင်ႇပၢင်ႇတွင်ႈထၢမ်ၵၼ်တင်းၵူၼ်းၼုမ်ႇၵူၼ်းၵမ် ဢၼ်ပဵၼ်ၵေႃႉသေႈမၼ်းလႄႈ ၶႃးၸႃးယူႇၵႃႈတီႈၽၢႆႇၼႃႈမၼ်းသေႇသေႇၸိူဝ်းၼၼ်ႉလႄႈဝႃႈ၊-

9သူတၵ်းပၼ်တၢင်းၵျၢမ်ႇတၢင်းပွင်ၸိူဝ်ႉၼင်ႇႁိုဝ် ႁႂ်ႈႁဝ်းလႆႈၶိုၼ်းလၢတ်ႈတီႈၵူၼ်းတင်းလၢႆ ဢၼ်လဝ်ႊလၢတ်ႈတီႈၵဝ်လႄႈဝႃႈ၊ ၸဝ်ႈႁဝ်းၶႅၼ်းတေႃႈ ႁႂ်ႈၵၢၼ်းႁၢပ်ႇဢၼ်ၸဝ်ႈပေႃႈၸဝ်ႈႁဝ်းတၢင်ႇသႂ်ႇဝႆႉ တီႈၶႃႈၸဝ်ႈႁဝ်းတင်းလၢႆၼၼ်ႉမဝ်မႃးသေၵမ်းတီႈၶႃႈ၊ ဝႃႈၼင်ႇၼႆၼၼ်ႉ ၸိူဝ်းၼႆႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

10ၵူၼ်းၼုမ်ႇၵူၼ်းၵမ်ဢၼ်ပဵၼ်ၵေႃႉသေႈမၼ်းၸိူဝ်းၼၼ်ႉ ဢွၼ်ၵၼ်ၶိုၼ်းလဝ်ႊလၢတ်ႈလႄႈဝႃႈ၊ ၸဝ်ႈႁဝ်းၶႅၼ်းတေႃႈၶိုၼ်းလၢတ်ႈတီႈၵူၼ်းတင်းလၢႆ ဢၼ်လဝ်ႊလၢတ်ႈလႄႈဝႃႈ၊ ၸဝ်ႈပေႃႈၸဝ်ႈႁဝ်းၼၼ်ႉ ႁႂ်ႈၵၢၼ်းႁၢပ်ႇၼၵ်းၼႃႇတီႈၶႃႈၸဝ်ႈႁဝ်းတင်းလၢႆတီႈၶႃႈယဝ်ႉ။ ၶႅၼ်းတေႃႈႁႂ်ႈမဝ်မႃးသေၵမ်းတီႈၶႃႈ၊ ဝႃႈၼင်ႇၼႆၸိူဝ်းၼၼ်ႉလႄႈဝႃႈ၊ ၼိဝ်ႉၵွႆႈၵဝ်ၼႆႉယဵင်ႈၶႅၼ်းတၵ်းယႂ်ႇၼႃႇသေဢႅဝ်ၸဝ်ႈပေႃႈၵဝ်ဢေႃႈ။-

11ၸဝ်ႈပေႃႈၵဝ်ၼၼ်ႉဢဝ်ၵၢၼ်းႁၢပ်ႇဢၼ်ၼၵ်းၼႃႇတၢင်ႇသႂ်ႇၵႃႈၼိူဝ်သူယဝ်ႉ။ ၵဝ်ၵေႃႈတၵ်းထၢပ်ႈလႄႈတၢင်ႇသႂ်ႇထႅင်ႈဢေႃႈ။ ၸဝ်ႈပေႃႈၵဝ်ၼၼ်ႉဢဝ်တင်းၶွၼ်ႉဝၢႆပေႃႉယႅၼ်ႉသူယဝ်ႉ။ ၵဝ်ၵေႃႈတၵ်းဢဝ်တင်းမႅင်းၵူၼ်ႈငေႃး ပေႃႉယႅၼ်ႉသူထႅင်ႈဢေႃႈ၊ ဝႃႈၼင်ႇၼႆသေၵမ်းတီႈၶႃႈ၊ ဝႃႈၼင်ႇၼႆဢေႃႈ။

12ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ ယေႇရူဝ်းပုမ်ႇ ဢိၵ်ႇတင်းၵူၼ်းတင်းသဵင်ႈတင်းလူင် ဢွၼ်ၵၼ်ႁွတ်ႈမႃးတီႈ ရူဝ်းပုမ်ႇ ၸွမ်းၵႃႈၼင်ႇဢၼ် ၶုၼ်ႁေႃၶမ်းမၵ်းၶိၼ်းဝႆႉလႄႈဝႃႈ၊ ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ သူသမ်ႉဢွၼ်ၵၼ်ၶိုၼ်းမႃးထႅင်ႈလူးၵွၼ်ႇတႃႉ၊ ဝႃႈၼင်ႇၼႆၼၼ်ႉဢေႃႈ။-

13မိူဝ်ႈၼၼ်ႉၶုၼ်ႁေႃၶမ်းၶိုၼ်းလၢတ်ႈႁၢဝ်ႈၵျၢမ်းၼႃႇလူင်လၢင်တီႈၶဝ်ဢေႃႈ။ ၶုၼ်လူင် ရူဝ်းပုမ်ႇ ၼၼ်ႉ ပႄႇပႅတ်ႈတၢင်းၵျၢမ်ႇတၢင်းပွင် ဢၼ်ၶဝ်ၸိူဝ်းဢၼ်ဢသၢၵ်ႈယႂ်ႇၸိူဝ်းၼၼ်ႉ ပၼ်ၼၼ်ႉသေလႄႈ၊-

14ၸွမ်းဢဝ်တၢင်းၵျၢမ်ႇတၢင်းပွင် ဢၼ်ၵူၼ်းၼုမ်ႇၵူၼ်းၵမ်ၸိူဝ်းၼၼ်ႉပၼ်ၼၼ်ႉလႄႈ ၶိုၼ်းလၢတ်ႈႁၢဝ်ႈၵျၢမ်းၼႃႇလူင်လၢင်လႄႈဝႃႈ၊ ၸဝ်ႈပေႃႈၵဝ်ၼၼ်ႉ ဢဝ်ၵၢၼ်းႁၢပ်ႇဢၼ်ၼၵ်းၼႃႇ တၢင်ႇသႂ်ႇၵႃႈၼိူဝ်သူယဝ်ႉ။ ၵဝ်ၵေႃႈတၵ်းထၢပ်ႈလႄႈတၢင်ႇသႂ်ႇထႅင်ႈဢေႃႈ။ ၸဝ်ႈပေႃႈၵဝ်ၼၼ်ႉ ဢဝ်တင်းၶွၼ်ႉဝၢႆပေႃႉယႅၼ်ႉသူယဝ်ႉ။ ၵဝ်ၵေႃႈတၵ်းဢဝ်တင်းမႅင်းၵူၼ်ႈငေႃးပေႃႉယႅၼ်ႉသူဢေႃႈ၊ ဝႃႈၼင်ႇၼႆဢေႃႈ။-

15လွင်ႈဢၼ်ၶုၼ်ႁေႃၶမ်းဢမ်ႇထွမ်ႇဢဝ်ၵႂၢမ်းၵူၼ်းတင်းလၢႆၼၼ်ႉၸမ်ႉ၊ ပဵၼ်ဢွၵ်ႇသေၵႃႈတီႈၽြႃးပဵၼ်ၸဝ်ႈမႃး လွင်ႈၼင်ႇႁိုဝ်ထႃႇဝရႃႉၽြႃး တၵ်းႁႂ်ႈၵႂၢမ်းဢၼ်မၼ်းၸဝ်ႈဢဝ် ဢႁီႉယႃႉ ၵူၼ်းဝဵင်း သီႉလေႃႇ ၼၼ်ႉ မီးဢမိင်ႉဝႆႉတီႈ ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ၼၼ်ႉလႆႈပျေႉၸုမ်ႇဢေႃႈ။-

16ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ႁူႉႁၼ်လွင်ႈဢၼ်ၶုၼ်ႁေႃၶမ်း ဢမ်ႇထွမ်ႇဢဝ်ၸွမ်းဢဝ်ၵႂၢမ်းၶဝ်ၼၼ်ႉသေယဝ်ႉ၊ၵူၼ်းတင်းလၢႆဢွၼ်ၵၼ်ၶိုၼ်းလၢတ်ႈတီႈၶုၼ်ႁေႃၶမ်းလႄႈဝႃႈ၊ ႁဝ်းၼႆႉၸၢပ်ႈသႅင်ႇၵၼ်တင်း တႃႇဝိတ်ႈ ၸိူဝ်ႉၼင်ႇႁိုဝ်။ ႁဝ်းဢမ်ႇၶၢမ်ႇဢမူၺ်ႇလူၺ်ႈၵၼ်တင်းလုၵ်ႈၸၢႆး ယေႇသႄး ၵူၺ်ႉ။ မဵဝ်း ဢီႉသရေႇလႃႉ ဢိူၺ်း၊ ဢွၼ်ၵၼ်ၵႂႃႇၸူးၵႃႈတီႈမူဝ်းၵႃႇတီႈယူႇသူႁင်းၽႂ်ႁင်းမၼ်းသေတႃႉ။ တႃႇဝိတ်ႈ ဢိူၺ်း၊ လူတူၺ်းႁိူၼ်းမႂ်းတႃႉ၊ ဝႃႈၼင်ႇၼႆသေလႄႈ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ဢွၼ်ၵၼ်ၶိုၼ်းမိူဝ်းၵႂႃႇၸူးၵႃႈတီႈမူဝ်းၵႃႇတီႈယူႇၶဝ်သေဢေႃႈ။-

17ၵူၺ်းၵႃႈ ၵူၼ်းမဵဝ်း ဢီႉသရေႇလႃႉ ဢၼ်ယူႇၵႃႈတီႈ ဝၢၼ်ႈဝဵင်း ယူႉတႃႉ ၸိူဝ်းၼၼ်ႉၸိုင်၊ ရူဝ်းပုမ်ႇ ယင်းလႆႈဢုပ်ႉပိူင်ႇယူႇဢေႃႈ။-

18မိူဝ်ႈၼၼ်ႉၶုၼ်လူင် ရူဝ်းပုမ်ႇ ပွႆႇၸႂ်ႉ ႁႃႇတေႃးရမ်ႇ ဝုၼ်ႇၵဵပ်းၶွၼ်ႇၼၼ်ႉၵႂႃႇလႄႈ ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်ဢဝ်မၢၵ်ႇႁိၼ်ထိမ်ႈမၼ်းထၼ်ႈပေႃးတၢႆဢေႃႈ။ ၶုၼ်လူင် ရူဝ်းပုမ်ႇ ၼၼ်ႉ ႁိပ်ႈၼႅတ်ႈၶိုၼ်ႈၶီႇလေႃႉရထႃးၸဝ်ႈသေလႄႈ ပၢႆႈၸူးၵႃႈတီႈဝဵင်း ယေႇရူႉသလႅမ်ႇ ဢေႃႈ။-

19ၼင်ႇၼၼ်လႄႈ မဵဝ်း ဢီႉသရေႇလႃႉ ပုင်ႇၵၢၼ်ႇမဵဝ်းၸိူဝ်ႉၶိူဝ်းၶုၼ် တႃႇဝိတ်ႈ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။

← Chapter 9 Jump to: Chapter 11 →