2 Chronicles 31 — Shan

1မိူဝ်ႈဢၼ်လွင်ႈတၢင်းၵႃႈမီးၼၼ်ႉယဝ်ႉတူဝ်ႈယဝ်ႉၼၼ်ႉၸိုင် ၵူၼ်း ဢီႉသရေႇလႃႉ ဢၼ်မႃးၸူႉၵၼ်တုမ်ၵၼ်ၵႃႈမီးၼၼ်ႉ ဢွၼ်ၵၼ်ဢွၵ်ႇၸူး ၵႃႈတီႈဝဵင်း ယူႉတႃႉ တင်းလၢႆလႄႈ ႁၵ်းႁဵၵ်းသဝ်တီႈၵူဝ်းၵႂၢႆႇလႂ်၊ ပမ်ႈလူမ်ႉတူၼ်ႈ ဢႃႇသရႃႉ လႂ်၊ ၵိူၼ်ႇယႃႉထႃႇၼႃႉတီႈသုင်လႂ် တင်းယိတ်ႈပလၢင်ႇလႂ်ပႅတ်ႈသေ ၵႃႈၼႂ်းမိူင်း ယူႉတႃႉ ၊ မိူင်း ပိၼ်ႇယႃႇမိၼ်ႇ ၊ မိူင်း ဢေႇၽရိမ်ႇ ၊ မိူင်း မၼႃႇသေႇ ၵူႈတီႈၵူႈလႅၼ် တေႃႇထိုင်ႁွတ်ႈထၼ်ႈပေႃး ၶဝ်ယႃႉပႅတ်ႈၵႃႈမီးၼၼ်ႉမူတ်းမူတ်းသဵင်ႈသဵင်ႈဢေႃႈ။ လိုၼ်းၼၼ်ႉၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈ ဝၢၼ်ႈဝဵင်းတီႈယူႇဢၼ်ၶဝ်ပိူင်ႇႁင်းၽႂ်ႁင်းမၼ်းၼၼ်ႉသေဢေႃႈ။

2ႁေႇၸၵီႉ ၶၢၼ်းဝႆႉ မုၵ်ႉၸိူဝ်းယိတ်ႈပရေႃးႁဵၵ်ႈလႂ်၊ တင်းၵူၼ်းမဵဝ်း လေႇဝီႉ လႂ် ၸွမ်းၵႃႈၼင်ႇဢၼ် ၵူႈၵေႃႉၵူႈၵူၼ်းတူၵ်းလႄႉတူၵ်းၵမ်းတီႈဢမူႉၶဝ် ႁင်းၽႂ်ႁင်းမၼ်းဢၼ်ဝႃႈ ယိတ်ႈပရေႃးႁဵၵ်ႈလႂ်၊ တင်းၵူၼ်းမဵဝ်း လေႇဝီႉ လႂ် ၸိူဝ်းၼၼ်ႉ ပဵၼ်မုၵ်ႉပဵၼ်ၸိူဝ်း ႁႂ်ႈၶဝ်လႆႈႁဵတ်းဢမူႉတၢင်းဢၼ်ပုၵ်ႈၸေႃႇယိတ်ႈ ဢၼ်တုတ်ႇၽႆးလႂ်၊တင်းယိတ်ႈမိၵ်ႉသႃႇႁႃယႃႉလႂ်၊ တၢင်းဢၼ်ၵိုတ်ႉႁၢပ်ႇဢမူႉၸဝ်ႈ၊ တၢင်းဢၼ်ႁပ်ႉတုင်းဢဝ်ၵျေးၸူးၸဝ်ႈ၊ တၢင်းဢၼ်ႁဵတ်းၵႂၢမ်းထေႃးပၼႃႇ ၵႃႈတီႈၼႂ်းၽၵ်းတူတပ်ႉထႃႇဝရႃႉၽြႃးၼၼ်ႉၸိူဝ်းၼၼ်ႉဢေႃႈ။-

3မၼ်းၸီႇယၢင်ႇဝႆႉလွင်ႈဢၼ်တၵ်းလႆႈဢဝ်ၵႃႈၼႂ်းၽၼ်ႇတႃႇၶုၼ်ႁေႃၶမ်းၼၼ်ႉပုၼ်ႈၼိုင်ႈ ဝႆႉပုၼ်ႈဢၼ်တၵ်းပုၵ်ႈၸေႃႇယိတ်ႈဢၼ်တုတ်ႇၽႆးဢၼ်ဝႃႈ ယိတ်ႈဢၼ်တုတ်ႇၽႆး ၶိင်ႇႁူဝ်ၼႂ်၊ ၶိင်ႇႁူဝ်ၶမ်ႈ ဢိၵ်ႇတင်းယိတ်ႈဢၼ်တုတ်ႇၽႆးဝၼ်းၵမ်သိၼ်၊ ဝၼ်းလိူၼ်မႂ်ႇ၊ ဝၼ်းပွႆးထမ်ႇမႃႉၸိူဝ်းၼၼ်ႉ ၸွမ်းၵႃႈၼင်ႇဢၼ် တႅမ်ႈဝႆႉၼႂ်းၵျၢမ်းလိၵ်ႈပိင်းၺၢပ်ႈတီႉထႃႇဝရႃႉၽြႃးၼၼ်ႉဢေႃႈ။-

4လိူဝ်သေၼၼ်ႉ ယိတ်ႈပရေႃးႁဵၵ်ႈ ဢိၵ်ႇတင်းၵူၼ်းမဵဝ်း လေႇဝီႉ ၸိူဝ်းၼၼ်ႉ၊ မၼ်းမီးဢမိင်ႉလွင်ႈဢၼ် ၶဝ်ၸိူဝ်းဢၼ်ယူႇၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉ တၵ်းလႆႈဢဝ်ဢၼ်ပဵၼ်ပုၼ်ႈပုၼ်ႈၼိုင်ႈ လူႇတၢၼ်းႁႂ်ႈၶဝ်လႆႈၵျူဝ်းၸႃးလႄႈ ၵိုတ်ႉႁၢပ်ႇဢမူႉၸွမ်းတြႃးထႃႇဝရႃႉၽြႃးၼၼ်ႉဢေႃႈ။-

5မိူဝ်ႈဢၼ်ဢမိင်ႉၸဝ်ႈၼၼ်ႉ ဢွၵ်ႇၵႂႃႇၸွတ်ႇတူဝ်ႈယဝ်ႉၼၼ်ႉၸိုင် ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်ဢဝ်မၢၵ်ႇလိၼ်ႁူင်းလိၼ်ဢၼ်မၢၵ်ႇဢွၼ်တၢင်း တီႈၶဝ်ႈပိူၵ်ႇ၊ ၼမ်ႉၸပိတ်ႈ၊ ၼမ်ႉမၼ်း၊ ၼမ်ႉၽိုင်ႈၸိူဝ်းၼၼ်ႉ ဢိၵ်ႇတင်းၵႃႈၼႂ်းတၢင်းဢၼ်ယႂ်ႇၽႄႈတူဝ်းတွၼ်းမႃး တီႈႁႆႊတီႈၼႃးမႃးၼမ်ၼႃႇလႄႈ ဢဝ်ဢုၵ်ႉၸႃႇတၢင်ႇၸိူဝ်ႉတၢင်ႇပိူင် ၵႃႈမီးသိပ်းပုၼ်ႈပုၼ်ႈၼိုင်ႈမႃးၼမ်ၼႃႇဢေႃႈ။-

6ၵူၼ်းမဵဝ်း ဢီႉသရေႇလႃႉ ဢိၵ်ႇတင်းၵူၼ်းမဵဝ်း ယူႉတႃႉ ဢၼ်ယူႇၵႃႈၼႂ်းဝဵင်း ယူႉတႃႉ ၸိူဝ်းၼၼ်ႉၵေႃႈ ဢွၼ်ၵၼ်ဢဝ်သူဝ်းဝူဝ်းသိပ်းပုၼ်ႈပုၼ်ႈၼိုင်ႈ ဢိၵ်ႇတင်းဢုၵ်ႉၸႃႇဢၼ်ပုၵ်ႈၸေႃႇလႄႈမူတ်းၸၢင်ႇတီႈ ထႃႇဝရႃႉၽြႃး ၽြႃးပဵၼ်ၸဝ်ႈၶဝ်ၼၼ်ႉ သိပ်းပုၼ်ႈပုၼ်ႈၼိုင်ႈၸိူဝ်းၼၼ်ႉမႃးလႄႈ ၵွင်ဝႆႉႁင်းၽႂ်ႁင်းမၼ်းဢေႃႈ။-

7ၶဝ်ဢွၼ်ၵၼ်ၸႃႉဢဝ်ၵွင်ဝႆႉ ၼႂ်းလိူၼ်တႃႉတီႉယႃႉလႄႈ ယဝ်ႉတူဝ်ႈၼႂ်းလိူၼ်သတ်ႉတမႃႉဢေႃႈ။-

8မိူဝ်ႈဢၼ် ႁေႇၸၵီႉ ဢိၵ်ႇတင်းမူးမၢတ်ႈၽွင်းမိူင်းတင်းလၢႆ မႃးလႄႈႁၼ်ၵွင်ၸိူဝ်းၼၼ်ႉၸိုင် ၶဝ်ဢွၼ်ၵၼ်ပၼ်တၢင်းလီတီႈထႃႇဝရႃႉၽြႃး ဢိၵ်ႇတင်းၵူၼ်းမၼ်းၸဝ်ႈ ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉဢေႃႈ။-

9ႁေႇၸၵီႉ ထၢမ်လွင်ႈၵွင်ၸိူဝ်းၼၼ်ႉတီႈယိတ်ႈပရေႃးႁဵၵ်ႈတင်းၵူၼ်းမဵဝ်း လေႇဝီႉ ၸိူဝ်းၼၼ်ႉသေယဝ်ႉ၊-

10ၶုၼ်ယိတ်ႈပရေႃးႁဵၵ်ႈ ဢႃႇၸရီႉ မဵဝ်း ၸႃႇတုၵ်ႉ ၼၼ်ႉ လဝ်ႊလၢတ်ႈလႄႈဝႃႈ၊ ၸႃႉၸဵမ်ၵူၼ်းတင်းလၢႆၸႃႉဢဝ်ၶိူင်ႈပုၵ်ႈၸေႃႇမႃးၵႃႈတီႈႁိူၼ်းထႃႇဝရႃႉၽြႃးၼၼ်ႉ လူၼ်ႉလိူဝ်သေတၢင်းဢၼ်ၶႃႈၸဝ်ႈႁဝ်းၶဝ်ၵုမ်ႇၵိၼ်ပေႃးၵိၼ်ၼၼ်ႉၵူၺ်းဢမ်ႇၵႃး ယင်းၵိုတ်းၵျၢၼ်ႇဝႆႉၼမ်ၼႃႇတီႈၶႃႈဢေႃႈ။ ၵွပ်ႈပိူဝ်ႈဢၼ်ထႃႇဝရႃႉၽြႃးပၼ်တၢင်းလီတီႈၵူၼ်းမၼ်းၸဝ်ႈတင်းလၢႆလႄႈ ဢုၵ်ႉၸႃႇဢၼ်ၵွင်ဝႆႉၸိူဝ်းၼႆႉၵိုတ်းၵျၢၼ်ႇလႄႈ မီးယူႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။

11မိူဝ်ႈၼၼ်ႉ ႁေႇၸၵီႉ မီးဢမိင်ႉႁႂ်ႈပွင်ႁဵတ်းပွင်မႄးလုၵ်းၽၼ်ႇတႃႇ ၵႃႈၼႂ်းႁိူၼ်းထႃႇဝရႃႉၽြႃးလႄႈ ၶဝ်ဢွၼ်ၵၼ်ပွင်ႁဵတ်းပွင်မႄးလႄႈ၊-

12ဢဝ်ဢုၵ်ႉၸႃႇဢၼ်လူႇတၢၼ်း၊ ဢုၵ်ႉၸႃႇဢၼ်သိပ်းပုၼ်ႈပုၼ်ႈၼိုင်ႈ၊ ဢုၵ်ႉၸႃႇဢၼ်ပုၵ်ႈၸေႃႇၸိူဝ်းၼၼ်ႉသႂၢင်းသႂ်ႇဝႆႉ မႅၼ်ႈၸွမ်းၼင်ႇတြႃးဢေႃႈ။ ၵေႃးၼၼီႉ ၵူၼ်းမဵဝ်း လေႇဝီႉ ၼၼ်ႉ ပဵၼ်ၵေႃႉဢၼ်ဢုပ်ႉမၼ်း၊ သီႉမီႉ ၼွင်ႉၸၢႆးမၼ်းၼၼ်ႉပဵၼ်ၸရေးမၼ်းဢေႃႈ။-

13ယေႇႁေႇလႃႉ၊ ဢႃႇၸၸီႉ၊ ၼႃႇႁတ်ႉ၊ ဢႃႇသႃႇႁေးလႃႉ၊ ယေႇရီႉမုတ်ႉ၊ ယေႃးၸပတ်ႉ၊ ဢေးလေႇလႃႉ၊ ဢီႉသမၶီႉ၊ မႃႇႁတ်ႉ၊ ပေႇၼႃႇယႃႉ ၸိူဝ်းၼၼ်ႉ ပဵၼ်ၵေႃႉဢၼ်ၸွႆႈၵမ်ႉၸွႆႈထွၵ်ႈတႂ်ႈမိုဝ်း ၵေႃးၼၼီႉ တင်းၼွင်ႉၸၢႆးမၼ်း သီႉမီႉ ၼၼ်ႉ ၸွမ်းၵႃႈၼင်ႇဢၼ်ၶုၼ်လူင် ႁေႇၸၵီႉ တင်း ဢႃႇၸရီႉ ၵေႃႉဢၼ်ဢုပ်ႉႁိူၼ်းၽြႃးပဵၼ်ၸဝ်ႈၼၼ်ႉၶၢၼ်းဝႆႉၼၼ်ႉဢေႃႈ။-

14ၵေႃးရႃႉ လုၵ်ႈၸၢႆး ဢီႉမၼႃႉ ၵူၼ်းမဵဝ်း လေႇဝီႉ ၵႄႇၽၵ်းတူၼႃႈတၢင်းဝၼ်းဢွၵ်ႇၼၼ်ႉ ပဵၼ်ၵေႃႉဢၼ်ဢုပ်ႉၵႃႈၼိူဝ်ၶိူင်ႈပုၵ်ႈၸေႃႇ ဢၼ်ပႃးတင်းၸႂ်ၸေႇတၼႃႇသေလႄႈပုၵ်ႈၸေႃႇတီႈၽြႃးပဵၼ်ၸဝ်ႈၸိူဝ်းၼၼ်ႉလႄႈ ပႂ်ႉဢမူႉဢၼ်လႆႈမႅင်ႇၽႄဢုၵ်ႉၸႃႇဢၼ်လူႇတၢၼ်း ပုၵ်ႈၸေႃႇထႃႇဝရႃႉၽြႃး၊ ဢုၵ်ႉၸႃႇဢၼ်မူတ်းၸၢင်ႇၼႃႇလူင်လၢင် ၸိူဝ်းၼၼ်ႉဢေႃႈ။-

15ဢေႇတိၼ်ႇ၊ မိၼ်ႇယႃႇမိၼ်ႇ၊ ယေႃးသူႉ၊ သေႇမႃႇယႃႉ၊ ဢႃႇမရီႉ၊ သေႇၶၼီႉ ၸိူဝ်းၼၼ်ႉ၊ ပဵၼ်ၵေႃႉဢၼ်ၸွႆႈၵမ်ႉၸွႆႈထွၵ်ႈတႂ်ႈမိုဝ်းမၼ်းၼၼ်ႉ ၵႃႈၼႂ်းဝဵင်းတီႈယူႇယိတ်ႈပရေႃးႁဵၵ်ႈတင်းလၢႆ ၸွမ်းၵႃႈၼင်ႇဢၼ်ၶဝ်လႆႈၶၢမ်ႇဢရႃႇၼၼ်ႉႁႂ်ႈလႆႈ မႅင်ႇပၼ်ၽႄပၼ်တီႈပီႈၶဝ်ၼွင်ႉၶဝ် ၸွမ်းလူၺ်ႈမုၵ်ႉၽႂ်ၸိူဝ်းမၼ်းၸဵမ်လဵၵ်ႉၸဵမ်ယႂ်ႇတင်းလၢႆၼၼ်ႉဢေႃႈ။-

16လိူဝ်သေၼၼ်ႉ ၶဝ်ၼၼ်ႉမႅင်ႇပၼ်ၽႄပၼ် တီႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇၸွမ်းလူၺ်ႈၸရၢင်းၵူၼ်းၸၢႆးသေလႄႈ ဢသၢၵ်ႈလႆႈသၢမ်ပီႊလႄႈ ဢသၢၵ်ႈလိူဝ်သၢမ်ပီႊၵႂႃႇ ဢၼ်ဝႃႈၶဝ်ၵႃႈဢၼ်ၶဝ်ႈၵႃႈၼႂ်းႁိူၼ်းထႃႇဝရႃႉၽြႃး ႁႂ်ႈလႆႈၶၢမ်ႇပုၼ်ႈၶဝ်တႃႇၶဝ်ၵူႈဝၼ်းၵူႈဝၼ်း ပုၼ်ႈတၢင်းဢၼ်ၶဝ်ၵိုတ်ႉႁၢပ်ႇဢမူႉၸဝ်ႈဢၼ်ၶဝ်ႁဵတ်းၸွမ်းၵႃႈၼင်ႇဢၼ်ပဵၼ်မုၵ်ႉပဵၼ်ၸိူဝ်းၼၼ်ႉ၊-

17ဢိၵ်ႇတင်းတီႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇ ၸွမ်းလူၺ်ႈၸရၢင်းယိတ်ႈပရေႃးႁဵၵ်ႈ ၸွမ်းလူၺ်ႈမဵဝ်းပူႇမဵဝ်းပေႃႈၶဝ်ၼၼ်ႉၸိူဝ်းၼၼ်ႉ တင်းၵူၼ်းမဵဝ်း လေႇဝီႉ ဢၼ်ၸႃႉၸဵမ်ဢသၢၵ်ႈလႆႈသၢဝ်းၼိုင်ႈလႄႈ ဢသၢၵ်ႈလိူဝ်သၢဝ်းၵႂႃႇလႄႈ ၵိုတ်ႉႁၢပ်ႇဢမူႉၸဝ်ႈ ၸွမ်းၵႃႈၼင်ႇဢၼ်ပဵၼ်မုၵ်ႉပဵၼ်ၸိူဝ်းၼၼ်ႉၸိူဝ်းၼၼ်ႉ၊-

18ဢိၵ်ႇတင်းတီႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇၸွမ်းလူၺ်ႈၸရၢင်းလုၵ်ႈဢွၼ်ႇလၢင်းဢွၼ်ႇၶဝ်၊ မေးၶဝ်၊ လုၵ်ႈၸၢႆးၶဝ်၊ လုၵ်ႈယိင်းၶဝ် ဢၼ်မီးယူႇၵႃႈၼႂ်းပရဵၵ်ႈသၢတ်ႈ ၵူၼ်းတင်းသဵင်ႈတင်းလူင် ၵွပ်ႈပိူဝ်ႈဢၼ်ၶဝ်ပႂ်ႉသဵတ်ႈၸႃႇလႄႈ ႁႂ်ႈတူဝ်ၸဝ်ႈၵဝ်ႇမူတ်းၸၢင်ႇ ၸွမ်းၵႃႈၼင်ႇဢၼ်ၶဝ်လႆႈၶၢမ်ႇဢရႃႇၼၼ်ႉၸိူဝ်းၼၼ်ႉဢေႃႈ။-

19မိူၼ်ၼင်ႇၼၼ်ပုၼ်ႈၵူၼ်းမဵဝ်း ဢႃႇရုၼ်ႇ ယိတ်ႈပရေႃးႁဵၵ်ႈဢၼ်ယူႇ ၵႃႈၼႂ်းလိၼ်တီႈဢၼ်လဵပ်ႈႁွပ်ႈဝဵင်းၶဝ် ႁင်းၽႂ်ႁင်းမၼ်းၸိူဝ်းၼၼ်ႉၵေႃႈ မီးၶဝ်ၸိူဝ်းဢၼ်ဢဝ်ၸိုဝ်ႈဢဝ်သဵင်သေလႄႈ မၢတ်ႈမၢႆဝႆႉၸိူဝ်းၼၼ်ႉ ယူႇႁႂ်ႈလႆႈမႅင်ႇပၼ်ၽႄပၼ်တီႈၵူၼ်းၸၢႆး ၵႃႈဢၼ်ပႃးၵႃႈၼႂ်းယိတ်ႈပရေႃးႁဵၵ်ႈတင်းလၢႆ ဢိၵ်ႇတင်းၵႃႈဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇၸွမ်းလူၺ်ႈၸရၢင်းၵူၼ်းမဵဝ်း လေႇဝီႉ ၸိူဝ်းၼၼ်ႉဢေႃႈ။

20ၼင်ႇၼၼ်လႄႈ ႁေႇၸၵီႉ ၸီႇယၢင်ႇ ႁဵတ်းၵႃႈၼႂ်းမိူင်း ယူႉတႃႉ တင်းသဵင်ႈတင်းမူတ်းလႄႈ ႁဵတ်းလွင်ႈတၢင်းဢၼ်လီ၊ လွင်ႈတၢင်းဢၼ်သိုဝ်ႈတေႃႇ၊ လွင်ႈတၢင်းသမ်ႇမႃႇတြႃး ၵႃႈတီႈၽၢႆႇၼႃႈထႃႇဝရႃႉၽြႃး ၽြႃးပဵၼ်ၸဝ်ႈမၼ်းဢေႃႈ။-

21ၵႃႈၼႂ်းလွင်ႈတၢင်း ၵႃႈဢၼ်မၼ်းၸႃႉပွင်ၸႃႉႁဵတ်းဢမူႉ ပုၼ်ႈႁိူၼ်းၽြႃးပဵၼ်ၸဝ်ႈ၊ တြႃးၸဝ်ႈ၊ ပိင်းၺၢပ်ႈၸဝ်ႈၸိူဝ်းၼၼ်ႉ ႁႂ်ႈလႆႈႁႃဢဝ်ၽြႃးပဵၼ်ၸဝ်ႈမၼ်းၼၼ်ႉ မၼ်းပႃးဢဝ်တင်းႁူဝ်ၸႂ်သဵင်ႈသဵင်ႈသေလႄႈ ပွင်ႁဵတ်းလႄႈ တၢင်းၵျၢမ်ႇတၢင်းပွင်မၼ်းပဵၼ်ဢေႃႈ။