2 Chronicles 2

Shan

← Chapter 1 Jump to: Chapter 3 →

1သေႃးလမုၼ်ႇ မီးတၢင်းၵျၢမ်ႇတၢင်းပွင်တၵ်းတႄႇႁဵတ်းႁိူၼ်း ပုၼ်ႈၼႃႇမႃႉၸိုဝ်ႈသဵင်ထႃႇဝရႃႉၽြႃး ဢိၵ်ႇတင်းႁေႃပုၼ်ႈသိုင်ႇၸိုင်ႈဝၢၼ်ႈမိူင်းၸဝ်ႈလႄႈ၊-

2သေႃးလမုၼ်ႇ ၽႃႇၵဵပ်းၶၢၼ်းဝႆႉ ၶဝ်ၸိူဝ်းဢၼ်လႆႈႁၢပ်ႇလႆႈႁၢမ်ၸဵတ်းမိုၼ်ႇ၊ ၶဝ်ၸိူဝ်းဢၼ်လႆႈပမ်ႈမႆႉၽၼ်းမႆႉၵႃႈၼိူဝ်လွႆပႅတ်ႇမိုၼ်ႇ၊ ၶဝ်ၸိူဝ်းဢၼ်လူတူၺ်းၸီႇယၢင်ႇသၢမ်ႁဵင်ႁူၵ်းပၢၵ်ႇသေယဝ်ႉ၊-

3သေႃးလမုၼ်ႇ ပွႆႇၸႂ်ႉၵႂႃႇတီႈၶုၼ်လူင် ႁီႉရမ်ႇ လႄႈ သင်ႇလၢတ်ႈၵႂႃႇလႄႈဝႃႈ၊ ၸိူဝ်ႉၼင်ႇဢၼ်ၶုၼ်လူင်ႁဵတ်းၵျေးၸူးတီႈ ၸဝ်ႈပေႃႈၵဝ် တႃႇဝိတ်ႈ လႄႈ ပၼ်မႆႉ ဢႃႇရိတ်ႉ မႃးပုၼ်ႈဢၼ်မၼ်းၸဝ်ႈတၵ်းတႄႇႁဵတ်းႁေႃၸဝ်ႈတီႈဢၼ်မၼ်းၸဝ်ႈတၵ်းယူႇၼၼ်ႉ၊ သမ်ႉႁဵတ်းၵျေးၸူးတီႈၵဝ်သေၵမ်း။-

4ၵဝ်တၵ်းတႄႇႁဵတ်းႁိူၼ်းပုၼ်ႈၼႃႇမႃႉၸိုဝ်ႈသဵင်ထႃႇဝရႃႉၽြႃးၽြႃးပဵၼ်ၸဝ်ႈႁဝ်းသေလႄႈ ဢဝ်ပုၵ်ႈၸေႃႇႁႂ်ႈလႆႈဢဝ်ၼၢမ်ႇသႃႇဢၼ်ႁွမ်ဢၼ်ႁူၺ်းတုတ်ႇၽႆးၵႃႈတီႈၽၢႆႇၼႃႈမၼ်းၸဝ်ႈ ႁႂ်ႈလႆႈဢဝ်ၶဝ်ႈမုၼ်းၽၢႆႇၼႃႈၸဝ်ႈတၢင်ႇဝႆႉသေႇသေႇ ဢိၵ်ႇတင်းႁႂ်ႈလႆႈဢဝ်ယိတ်ႈဢၼ်တုတ်ႇၽႆးပုၵ်ႈၸေႃႇၶိင်ႇႁူဝ်ၶမ်ႈ၊ ၶိင်ႇၵၢင်ၼႂ်၊ ဝၼ်းၵမ်သိၼ်၊ ဝၼ်းလိူၼ်မႂ်ႇတင်းဝၼ်းပွႆးထမ်ႇမႃႉထႃႇဝရႃႉၽြႃး ၽြႃးပဵၼ်ၸဝ်ႈႁဝ်း၊ ၸွမ်းၼင်ႇတြႃးဢၼ်ၸီႇယၢင်ႇဝႆႉတီႈမဵဝ်း ဢီႉသရေႇလႃႉ တႃႇသေႇၼၼ်ႉဢေႃႈ။-

5ႁိူၼ်းၸဝ်ႈဢၼ်ၵဝ်တၵ်းႁဵတ်းၼၼ်ႉ တၵ်းလႆႈပဵၼ်ဢၼ်ယႂ်ႇဢေႃႈ။ လွင်ႈမၼ်းၸမ်ႉ ၽြႃးပဵၼ်ၸဝ်ႈႁဝ်းယႂ်ႇမျၢတ်ႈၼႃႇသေၽြႃးတင်းသဵင်ႈတင်းလူင်ဢေႃႈ။-

6ပိူဝ်ႈဢၼ်ၵၢင်ႁၢဝ်ဢိၵ်ႇတင်းၵၢင်ႁၢဝ်ဢၼ်ပဵၼ်ၸိၵ်းၸွမ်ၵၢင်ႁၢဝ်ၼၼ်ႉ ဢမ်ႇပေႃးဢမ်ႇၶၢမ်ႇမၼ်းၸဝ်ႈလႆႈလႄႈ ၽူႈလႂ်တၵ်းတႄႇႁဵတ်းႁိူၼ်းတီႈဢၼ်မၼ်းၸဝ်ႈ တၵ်းၵိင်းဝၢပ်ႈယူႇလႆႈ၊ ၼွၵ်ႈသေႁိူၼ်းတီႈဢၼ်ဢဝ်ယိတ်ႈတုတ်ႇၽႆးၵႃႈတီႈၽၢႆႇၼႃႈမၼ်းၸဝ်ႈၼၼ်ႉ၊ ၵဝ်ၼႆႉပဵၼ်ၵူၼ်းၸိူဝ်ႉၼင်ႇႁိုဝ်လႄႈ တၵ်းတႄႇႁဵတ်းႁိူၼ်းတၢင်ႇၸိူဝ်ႉတၢင်ႇဢၼ်လႆႈ။-

7ပိူဝ်ႈၼႆလႄႈ မိူဝ်ႈလဵဝ်ၼႆႉ ပွႆႇၸႂ်ႉၵူၼ်းဢၼ်ပျေႉၸုမ်ႇတင်းဢတၢတ်ႈပိင်ႇၺႃႇ၊ ဢၼ်မေႃႁဵတ်းလူၺ်ႈၶမ်း၊ ငိုၼ်း၊ တွင်းလိူင်၊ လဵၵ်း၊ ၶူဝ်းဢၼ်လႅင်ၵမ်ႇ၊ ၶူဝ်းဢၼ်လႅင်ၸုင်းႁုင်း၊ ၶူဝ်းဢၼ်သွမ်ႇ၊ ဢတၢတ်ႈပိင်ႇၺႃႇဢၼ်မေႃၽွမ်ႉၵၼ်လႄႈ တွင်ႈႁဵတ်းၶၵ်းႁဵတ်းလူၺ်ႈၵၼ်တင်းသြႃႇသမႃး ဢၼ်မီးယူႇၵႃႈတီႈၵဝ်ၵႃႈၼႂ်းမိူင်း ယူႉတႃႉ တင်းဝဵင်း ယေႇရူႉသလႅမ်ႇ ဢၼ်ၸဝ်ႈပေႃႈၵဝ် တႃႇဝိတ်ႈ ဢဝ်ဝႆႉထႃႈၸိူဝ်းၼႆႉၼၼ်ႉၵေႃႉၼိုင်ႈမႃးၵႃႈတီႈၵဝ်သေၵမ်း။-

8ဢဝ်မႆႉ ဢႃႇရိတ်ႉ ၊ မႆႉပႅၵ်ႇ၊ မႆႉၼၢမ်ႇသႃႇၼမ်ၼႃႇသေၵႃႈၼိူဝ်လွႆ လေႇပၼုၼ်ႇ လႄႈ ပၼ်မႃးတီႈၵဝ်သေၵမ်း၊ ၵဝ်ႁူႉလွင်ႈဢၼ်ၶႃႈၵူၼ်းၶုၼ်လူင် ၸၢင်ႈပမ်ႈမႆႉၽၼ်းမႆႉၵႃႈၼိူဝ်လွႆ လေႇပၼုၼ်ႇ ၼၼ်ႉယူႇဢေႃႈ။-

9ၶႃႈၵူၼ်းၵဝ်တၵ်းဢွၼ်ၵၼ်ၽွမ်ႉႁူမ်ႈလူၺ်ႈၵၼ်တင်း ၶႃႈၵူၼ်းၶုၼ်လူင် ႁႂ်ႈလႆႈပွင်ႁဵတ်းပွင်ႁႅၼ်းမႆႉၼမ်ၼႃႇပုၼ်ႈၵဝ်ဢေႃႈ။ ႁိူၼ်းၸဝ်ႈဢၼ်ၵဝ်တၵ်းတႄႇႁဵတ်းၼၼ်ႉ တၵ်းလႆႈပဵၼ်ႁိူၼ်းဢၼ်ယႂ်ႇၼႃႇလူင်လၢင်လႄႈလီဢၢမ်းဢေႃႈ။-

10ၵဝ်တၵ်းဢဝ်ၶဝ်ႈသၢၼ်ၵျုင်ႇ သွင်မိုၼ်ႇ ၵေႃးရႃႉ ၊ ၶဝ်ႈသၢၼ်မူႉယေႃး သွင်မိုၼ်ႇ ၵေႃးရႃႉ ၊ ၼမ်ႉၸပိတ်ႈ သွင်မိုၼ်ႇ ပၢတ်ႈ ၊ ၼမ်ႉမၼ်း သွင်မိုၼ်ႇ ပၢတ်ႈ ပၼ်တီႈၶႃႈၵူၼ်းၶုၼ်လူင်ဢၼ်ပမ်ႈမႆႉၽၼ်းမႆႉၸိူဝ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။

11ႁီႉရမ်ႇ ၶုၼ်လူင် တူႉရူႉ ၼၼ်ႉ တႅမ်ႈလိၵ်ႈလႄႈ ၶိုၼ်းပၼ်တီႈ သေႃးလမုၼ်ႇ လႄႈဝႃႈၸမ်ႉ၊ ၵွပ်ႈပိူဝ်ႈဢၼ်ထႃႇဝရႃႉၽြႃး ႁၵ်ႉဢဵတ်းလူၵူၼ်းမၼ်းၸဝ်ႈလႄႈ မၼ်းၸဝ်ႈယုၵ်ႉယွင်ႈၸဝ်ႈႁဝ်း ႁႂ်ႈပဵၼ်ၶုၼ်ႁေႃၶမ်းၵႃႈၼိူဝ်ၶဝ်ယဝ်ႉ၊ ဝႃႈၼင်ႇၼႆဢေႃႈ။-

12ႁီႉရမ်ႇ သမ်ႉလၢတ်ႈထႅင်ႈလႄႈဝႃႈ၊ ႁႂ်ႈထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ဢၼ်ႁဵတ်းပဵၼ်ၽႃႉၵၢင်ႁၢဝ်တင်းလိၼ်မိူင်း ဢၼ်ဢဵတ်းလူပၼ်လုၵ်ႈၸၢႆးဢၼ်လၵ်းလႅမ်လႄႈပျေႉၸုမ်ႇတင်းၺၢၼ်ႇပိင်ႇၺႃႇ ထၼ်ႈပေႃးမၼ်းတၢတ်ႈၼိူင်ႇလႆႈ ႁႂ်ႈလႆႈတႄႇႁဵတ်းႁိူၼ်းၸဝ်ႈပုၼ်ႈထႃႇဝရႃႉၽြႃး တင်းႁေႃပုၼ်ႈသိုင်ႇၸိုင်ႈဝၢၼ်ႈမိူင်းၸဝ်ႈၼၼ်ႉ တီႈၶုၼ်လူင် တႃႇဝိတ်ႈ ၼၼ်ႉၼၼ်ႉ မီးမင်ႇၵလႃႇသေၵမ်းလူၺ်ႈ။-

13မိူဝ်ႈလဵဝ်ၼႆႉၸိုင် ၵဝ်ပွႆႇၸႂ်ႉ ႁီႉရမ်ႇဢၽီႉ ၵေႃႉဢၼ်ၺၢၼ်ႇလီလႄႈလၵ်းလႅမ်ၼၼ်ႉၵႂႃႇဢေႃႈ။-

14မၼ်းၼၼ်ႉပဵၼ်လုၵ်ႈၸၢႆးမႄႈယိင်းမဵဝ်း တၢၼ်ႇ လႄႈ၊ ပေႃႈမၼ်းၸမ်ႉ၊ ပဵၼ်ၵူၼ်းမဵဝ်း တူႉရူႉ ဢေႃႈ။ မၼ်းပျေႉၸုမ်ႇတင်းဢတၢတ်ႈပိင်ႇၺႃႇ ဢၼ်မေႃႁဵတ်းလူၺ်ႈၶမ်း၊ ငိုၼ်း၊ တွင်းလိူင်၊ လဵၵ်း၊ မၢၵ်ႇႁိၼ်၊ မႆႉ၊ ၶူဝ်းဢၼ်သွမ်ႇ၊ ၶူဝ်းဢၼ်လႅင်ၵမ်ႇ၊ ပိၵ်ႈၶျေႃး၊ ၶူဝ်းဢၼ်လႅင်ၸုင်းႁုင်း၊ ဢတၢတ်ႈပိင်ႇၺႃႇဢၼ်မေႃတွင်ႈႁဵတ်းၶၵ်းႁဵတ်းလႄႈ၊ မေႃသၢင်ႈမေႃႁဵတ်းၵူႈၸိူဝ်ႉၵူႈပိူင် ပဵၼ်ၵေႃႉဢၼ်ၽွမ်ႉႁူမ်ႈၸွႆႈထႅမ်သြႃႇသမႃးၸဝ်ႈႁဝ်းတင်းလၢႆ ဢိၵ်ႇတင်းသြႃႇသမႃးၸဝ်ႈၵဝ်ၶႃႈ၊ ၸဝ်ႈပေႃႈၸဝ်ႈႁဝ်း တႃႇဝိတ်ႈ ၸိူဝ်းၼၼ်ႉဢေႃႈ။-

15ပိူဝ်ႈဢၼ်ပဵၼ်ၼင်ႇၼႆလႄႈ၊ ဢဝ်ၶဝ်ႈသၢၼ်ၵျုင်ႇ၊ ၶဝ်ႈသၢၼ်မူႉယေႃး၊ ၼမ်ႉၸပိတ်ႈ၊ ၼမ်ႉမၼ်းဢၼ်ၸဝ်ႈႁဝ်းမီးဢမိင်ႉၼၼ်ႉ ပၼ်တီႈၶႃႈၸဝ်ႈႁဝ်းတင်းလၢႆမႃးသေၵမ်း။-

16ႁဝ်းတၵ်းတီႇပမ်ႈတႅပ်းၽၼ်းမႆႉ ၵႃႈၼိူဝ်လွႆ လေႇပၼုၼ်ႇ ၵႃႈဢၼ်ၸဝ်ႈႁဝ်းမီးဢလူဝ်ႇၶႂ်ႈလႆႈၼၼ်ႉသေလႄႈ ၶၢတ်ႈႁဵတ်းၽွင်ႇသေယဝ်ႉ၊ ဢဝ်ၸွမ်းတၢင်းပၢင်ႇလၢႆႇၵႂႃႇၸူး ၵႃႈတီႈဝဵင်း ယွပ်ႉပႃႉ ဢေႃႈ။ ၸဝ်ႈႁဝ်းတၵ်းလႆႈတေႃႉဢဝ်ၶိုၼ်ႈၸူးၵႃႈတီႈဝဵင်း ယေႇရူႉသလႅမ်ႇ ဢေႃႈ၊ ဝႃႈၼင်ႇၼႆဢေႃႈ။

17သေႃးလမုၼ်ႇ သမ်ႉၶိုၼ်းၼပ်ႉဢၢၼ်ႇ ဢဝ်ၸရၢင်းၵူၼ်းတၢင်ႇၸိူဝ်ႉတၢင်ႇမဵဝ်း ၵႃႈဢၼ်ယူႇၵႃႈၼႂ်းမိူင်း ဢီႉသရေႇလႃႉ ၸိူဝ်းၼၼ်ႉ ၸွမ်းလူၺ်ႈတၢင်းဢၼ်ၸဝ်ႈပေႃႈမၼ်း တႃႇဝိတ်ႈ ၼပ်ႉဢၢၼ်ႇဢဝ်ၸရၢင်းၼၼ်ႉထႅင်ႈလႄႈ ထူပ်းႁၼ်သႅၼ်ပၢႆႁႃႈမိုၼ်ႇသၢမ်ႁဵင်ႁူၵ်းပၢၵ်ႇဢေႃႈ။-

18မၼ်းၽႃႇၵဵပ်းၶၢၼ်းဝႆႉၶဝ်ၸိူဝ်းဢၼ်လႆႈႁၢပ်ႇလႆႈႁၢမ်ၼၼ်ႉၸဵတ်းမိုၼ်ႇ၊ ၶဝ်ၸိူဝ်းဢၼ်လႆႈပမ်ႈမႆႉၽၼ်းမႆႉ ၵႃႈၼိူဝ်သၼ်လွႆၼၼ်ႉပႅတ်ႇမိုၼ်ႇ၊ ၶဝ်ၸိူဝ်းဢၼ်လႆႈလူတူၺ်းၸီႇယၢင်ႇႁႂ်ႈၵူၼ်းတင်းလၢႆႁဵတ်းသၢင်ႈၼၼ်ႉသၢမ်ႁဵင်ႁူၵ်းပၢၵ်ႇဢေႃႈ။

← Chapter 1 Jump to: Chapter 3 →