2 Chronicles 32

Shan

← Chapter 31 Jump to: Chapter 33 →

1လိုၼ်းသေဢၼ်ႁဵတ်းၸိူဝ်းၼၼ်ႉယဝ်ႉသေလႄႈ ပႂ်ႉၸွမ်းသဵတ်ႈၸႃႇၸဝ်ႈယဝ်ႉၼၼ်ႉ၊ သၼႃႇၶရိပ်ႉ ၶုၼ်ႁေႃၶမ်း ဢႃႇသူႉရီႉ ၶီႇသိုၵ်းၶဝ်ႈမႃးၵႃႈၼႂ်းမိူင်း ယူႉတႃႉ လႄႈ လွမ်ႉဝဵင်းဢၼ်မၼ်ႈၶိူင်ႇတင်းလၢႆဝႆႉသေလႄႈ ဢဝ်ႁႅင်းဢွၵ်ႇႁႂ်ႈလႆႈတိုၵ်းဢဝ်ဢေႃႈ။-

2ႁေႇၸၵီႉ ႁူႉႁၼ်လွင်ႈဢၼ် သၼႃႇၶရိပ်ႉ ၼၼ်ႉမႃးလႄႈ မီးတၢင်းၵျၢမ်ႇတၢင်းပွင်တၵ်းတိုၵ်းတေႃး ဝဵင်း ယေႇရူႉသလႅမ်ႇ ၼၼ်ႉသေယဝ်ႉ၊-

3တိူင်ႇပၢင်ႇၵၼ်တင်းမူးမၢတ်ႈၽွင်းမိူင်းမၼ်း၊ ပူဝ်ႇႁူဝ်သိုၵ်းမၼ်းတင်းလၢႆ ႁႂ်ႈလႆႈတဵင်လႆႈဢိုတ်းၼမ်ႉဢွၵ်ႇႁူး ဢၼ်မီးၵႃႈတီႈၼွၵ်ႈဝဵင်းၼၼ်ႉလႄႈ ၶဝ်ၼၼ်ႉၽွမ်ႉၵၼ်ၸွႆႈထႅမ်မၼ်းဢေႃႈ။-

4ၼင်ႇၼၼ်လႄႈ ၵူၼ်းၼမ်ၼႃႇၸူႉၵၼ်တုမ်ၵၼ်သေလႄႈ ဢွၼ်ၵၼ်တဵင်ဢိုတ်းႁူးၼမ်ႉဢွၵ်ႇႁူးၵႃႈမီးဢိၵ်ႇတင်းၼမ်ႉႁွင်ႈ ဢၼ်လႆၵႂႃႇၵႃႈၼႂ်းၵၢင်မိူင်းၼၼ်ႉလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၶုၼ်ႁေႃၶမ်း ဢႃႇသူႉရီႉ ၸိူဝ်းၼၼ်ႉတၵ်းမႃးလႄႈ လႆႈထူပ်းၼမ်ႉဢၼ်ၼမ်ၼႃႇၼင်ႇႁိုဝ်၊ ဝႃႈၼင်ႇၼႆဢေႃႈ။-

5မၼ်းႁဵတ်းႁႂ်ႈၸႂ်မၼ်းမၼ်ႈၶိူင်ႇလႄႈ မႄးၵုမ်းမႄးႁဵတ်းလမ်းဝဵင်းၵႃႈဢၼ်ၵိူၼ်ႇပင်းလူႉလႅဝ်ၼၼ်ႉလႄႈ တႄႇႁဵတ်းႁႂ်ႈသုင်ပဵင်းၵၼ်တင်းတိူၵ်ႈတီႈတိုၵ်းသိုၵ်းဢေႃႈ။ လမ်းဝဵင်းဢၼ်ၵႃႈၼွၵ်ႈၵေႃႈ မၼ်းတႄႇႁဵတ်းဢေႃႈ။ တီႈ မီႉလေႃႇ ၵႃႈၼႂ်းဝဵင်း တႃႇဝိတ်ႈ ၵေႃႈ မၼ်းမႄးၵုမ်းမႄးႁဵတ်းလႄႈ ႁဵတ်းလၢၵ်ႈၼၢၵ်ႈႁွၵ်ႇလႂ်၊ ၶိူင်ႈႁႄႉလၢၵ်ႈၼၢၵ်ႈဢၼ်ၼမ်ၼႃႇလူင်လၢင်လႂ်ဝႆႉဢေႃႈ။-

6မၼ်းၶၢၼ်းတပ်ႉမူးတင်းလၢႆဝႆႉၵႃႈၼိူဝ်ၵူၼ်းတင်းလၢႆလႄႈ ႁႂ်ႈၶဝ်ၸူႉၵၼ်တုမ်ၵၼ်ၵႃႈတီႈပၢင်ႇလူင် ႁိမ်းၽၵ်းတူဝဵင်းသေယဝ်ႉ၊ လၢတ်ႈၵႂၢမ်းဢၼ်ပၼ်ႁႅင်းတီႈၶဝ်သေလႄႈဝႃႈ၊-

7ဢွၼ်ၵၼ်ဢဝ်ႁႅင်းလႄႈမီးတၢင်းဢၼ်ႁတ်းႁၢၼ်တႃႉ။ ယႃႇပေၵူဝ်ပေႁႄလႄႈၸႂ်လူႉ၊ ၵွပ်ႈပိူဝ်ႈၶုၼ်ႁေႃၶမ်း ဢႃႇသူႉရီႉ ဢိၵ်ႇတင်းမူႇၽုင်မုၵ်ႉၸိူဝ်းဢၼ်ပႃးတီႈမၼ်းၵႃႈမီးၸိူဝ်းၼၼ်ႉ၊ ၶဝ်ၸိူဝ်းဢၼ်ယူႇၽၢႆႇႁဝ်းၼႆႉယဵင်ႈၶႅၼ်းၼမ်ၼႃႇသေၶဝ်ၸိူဝ်းဢၼ်ယူႇၽၢႆႇမၼ်းၼၼ်ႉဢေႃႈ။-

8ၽၢႆႇမၼ်းၼၼ်ႉမီးၶႅၼ်မိုဝ်းဢၼ်ပဵၼ်ၼိူဝ်ႉၵူၺ်းဢေႃႈ။ ၽၢႆႇႁဝ်းၼႆႉၸမ်ႉ၊ မီးထႃႇဝရႃႉၽြႃး ၽြႃးပဵၼ်ၸဝ်ႈႁဝ်း ဢၼ်ၵမ်ႉထွၵ်ႈႁဝ်းလႄႈၸွႆႈသိုၵ်းထႅမ်သိုၵ်းတီႈႁဝ်းၼၼ်ႉယူႇဢေႃႈ၊ ဝႃႈၼင်ႇၼႆလႄႈ ၵူၼ်းတင်းလၢႆဢွၼ်ၵၼ်ၸႂ်လီလူၺ်ႈၵႂၢမ်း ႁေႇၸၵီႉ ၶုၼ်ႁေႃၶမ်း ယူႉတႃႉ ၼၼ်ႉဢေႃႈ။

9လိုၼ်းၼၼ်ႉ သၼႃႇၶရိပ်ႉ ၶုၼ်ႁေႃၶမ်း ဢႃႇသူႉရီႉ ၼၼ်ႉ ၼႂ်းမိူဝ်ႈဢၼ်ယင်းတိုၵ်ႉပႃးတင်းပူဝ်ႇပႃႇမၼ်းတင်းသဵင်ႈတင်းလူင် တိုၵ်းတေႃးလွမ်ႉႁွပ်ႈဝဵင်း လႃႇၶီႉသႃႉ ဝႆႉယူႇၼၼ်ႉၸိုင်၊ ပွႆႇၸႂ်ႉၶႃႈမၼ်းၵူၼ်းမၼ်းၵမ်ႈၽွင်ႈၸူးၵႃႈတီႈ ႁေႇၸၵီႉ ၶုၼ်ႁေႃၶမ်း ယူႉတႃႉ ဢိၵ်ႇတင်းၵႃႈတီႈၵူၼ်းမဵဝ်း ယူႉတႃႉ ၵႃႈဢၼ်မီးၵႃႈၼႂ်းဝဵင်း ယေႇရူႉသလႅမ်ႇ ၸိူဝ်းၼၼ်ႉလႄႈ သင်ႇလၢတ်ႈလႄႈဝႃႈ၊-

10သၼႃႇၶရိပ်ႉ ၶုၼ်ႁေႃၶမ်း ဢႃႇသူႉရီႉ မီးဢမိင်ႉလႄႈဝႃႈၸမ်ႉ၊ သူဢိင်ပိုင်ႈၵႃႈသင်ယူႇ ႁႂ်ႈသူလႆႈၶၢမ်ႇတၢင်းဢၼ်လွမ်ႉဝႆႉၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉ။-

11ႁေႇၸၵီႉ ၸူဝ်းဢဝ်သူႁႂ်ႈလႆႈၸုၼ်ႉပႅတ်ႈသူ ႁႂ်ႈသူလႆႈတၢႆလူၺ်ႈတၢင်းဢၼ်တွင်ႉမႆႈသႆႈလိူတ်ႇ၊ တၢင်းဢၼ်ယၢၵ်ႇၼမ်ႉၼၼ်ႉလႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းတၵ်းၵႄႇသႄႇဢဝ်ႁဝ်းလွတ်ႈသေၵႃႈၼႂ်းမိုဝ်းၶုၼ်ႁေႃၶမ်း ဢႃႇသူႉရီႉ ဢေႃႈ၊ ဝႃႈၼင်ႇၼႆဢမ်ႇၸႂ်ႈႁိုဝ်။-

12ႁေႇၸၵီႉ ၼၼ်ႉ ပႄႇၽဵဝ်ႈထႃႇၼႃႉတီႈသုင်မၼ်းလႂ် တင်းယိတ်ႈပလၢင်ႇမၼ်းလႂ် ၸိူဝ်းၼၼ်ႉပႅတ်ႈလႄႈ မီးဢမိင်ႉတီႈၵူၼ်းမိူင်း ယူႉတႃႉ ၊ ၵူၼ်းဝဵင်း ယေႇရူႉသလႅမ်ႇ တင်းလၢႆလႄႈဝႃႈ၊ သူတၵ်းလႆႈၵူဝ်းၵႂၢႆႇၵႃႈတီႈၽၢႆႇၼႃႈယိတ်ႈပလၢင်ႇဢၼ်လဵဝ်ၵူၺ်း။ တၵ်းလႆႈဢဝ်ၼၢမ်ႇသႃႇတုတ်ႇၽႆး ၵႃႈၼိူဝ်ယိတ်ႈပလၢင်ႇၼၼ်ႉဢေႃႈ၊ ဝႃႈၼင်ႇၼႆဝႆႉယဝ်ႉဢမ်ႇၸႂ်ႈႁိုဝ်။-

13သူဢမ်ႇႁူႉလွင်ႈဢၼ်ၵဝ်ဢိၵ်ႇတင်းပူႇၵဝ်မွၼ်ႇၵဝ်ၸိူဝ်းၼၼ်ႉ ႁဵတ်းၸိူဝ်ႉၼင်ႇႁိုဝ်တီႈၵူၼ်းၵူႈသိုင်ႇၵူႈမိူင်းၼၼ်ႉႁိုဝ်။ ၽြႃးၵူၼ်းၵူႈၸိူဝ်ႉၵူႈမဵဝ်းၵႃႈၼႂ်းမိူင်းၸိူဝ်းၼၼ်ႉ တၢတ်ႈၼိူင်ႇလႆႈႁႂ်ႈလႆႈၵႄႇသႄႇဢဝ်မိူင်းၶဝ်လွတ်ႈသေၵႃႈၼႂ်းမိုဝ်းၵဝ်ႁိုဝ်။-

14ၼႂ်းၽြႃးၵူၼ်းၵူႈၸိူဝ်ႉၵူႈမဵဝ်း ဢၼ်ပူႇၵဝ်မွၼ်ႇၵဝ်ယႃႉပႅတ်ႈမူတ်းမူတ်းၼၼ်ႉၸိူဝ်းၼၼ်ႉ ၽြႃးသူႇလႂ်ပႃးလႂ်ယၢမ်ႈတွၼ်ႉၵႄႇသႄႇၼုၵ်ႈဢဝ်ၵူၼ်းမၼ်းတင်းလၢႆ လွတ်ႈသေၵႃႈၼႂ်းမိုဝ်းၵဝ်လႄႈ ၽြႃးသူတၵ်းၵႄႇသႄႇၼုၵ်ႈဢဝ်သူလွတ်ႈသေၵႃႈၼႂ်းမိုဝ်းၵဝ်ၼႆႉ။-

15ပိူဝ်ႈဢၼ်ပဵၼ်ၼင်ႇၼႆလႄႈ ယႃႇပေႁႂ်ႈ ႁေႇၸၵီႉ ပႅတ်ႉလႅၼ်သူလႄႈ ၸူဝ်းဢဝ်သူၸိူဝ်ႉၼင်ႇၼၼ်သေၵမ်း။ ယႃႇပေဢွၼ်ၵၼ်ယုမ်ႇၵႂၢမ်းမၼ်း။ ၽြႃးၵူၼ်းတၢင်ႇၸိူဝ်ႉတၢင်ႇမဵဝ်း၊ ၽြႃးသိုင်ႇၸိုင်ႈဝၢၼ်ႈမိူင်းတၢင်ႇတီႈတၢင်ႇလႅၼ်ၸိူဝ်းၼၼ်ႉ ဢမ်ႇၵႄႇသႄႇၼုၵ်ႈဢဝ်ၵူၼ်းမၼ်းတင်းလၢႆလွတ်ႈသေၵႃႈၼႂ်းမိုဝ်းၵဝ် ဢိၵ်ႇတင်းၵႃႈၼႂ်းမိုဝ်းပူႇၵဝ်မွၼ်ႇၵဝ်ၼၼ်ႉလႆႈသေသူႇသေပႃးလႄႈ ၽြႃးသူၼႆႉယဵင်ႈၶႅၼ်းတၵ်းဢမ်ႇၵႄႇသႄႇၼုၵ်ႈဢဝ်သူလွတ်ႈသေၵႃႈၼႂ်းမိုဝ်းၵဝ်လႆႈ၊ ဝႃႈၼင်ႇၼႆဢေႃႈ။-

16ၶႃႈမၼ်းၵူၼ်းမၼ်းၸိူဝ်းၼၼ်ႉ ယဵင်ႈၶႅၼ်းဢွၼ်ၵၼ်လၢတ်ႈယူႇၽၢႆႇၼိုင်ႈတင်းထႃႇဝရႃႉၽြႃးၽြႃးပဵၼ်ၸဝ်ႈ ဢိၵ်ႇတင်းၽၢႆႇၼိုင်ႈတင်း ႁေႇၸၵီႉ ၶႃႈမၼ်းၸဝ်ႈၼၼ်ႉဢေႃႈ။-

17လိူဝ်သေၼၼ်ႉ မၼ်းတႅမ်ႈလိၵ်ႈဢၼ်သႄႉသွမ်းတၢင်ႇဢပႅတ်ႈတီႈထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ လႄႈ လၢတ်ႈၶတ်းၵၼ်တင်းမၼ်းၸဝ်ႈလႄႈဝႃႈ၊ မိူၼ်ၸိူဝ်ႉၼင်ႇဢၼ် ၽြႃးၵူၼ်းၵူႈၸိူဝ်ႉၵူႈမဵဝ်းၵႃႈၼႂ်းသိုင်ႇၸိုင်ႈဝၢၼ်ႈမိူင်းတၢင်ႇတီႈတၢင်ႇလႅၼ်ၸိူဝ်းၼၼ်ႉ ဢမ်ႇၵႄႇသႄႇၼုၵ်ႈဢဝ်ၵူၼ်းၶဝ်တင်းလၢႆ လွတ်ႈသေၵႃႈၼႂ်းမိုဝ်းၵဝ်လႆႈၼၼ်ႉ၊ ၽြႃးဢၼ် ႁေႇၸၵီႉ ၵူဝ်းၵႂၢႆႇၼၼ်ႉတၵ်းဢမ်ႇၵႄႇသႄႇၼုၵ်ႈဢဝ်ၵူၼ်းမၼ်းတင်းလၢႆ လွတ်ႈသေၵႃႈၼႂ်းမိုဝ်းၵဝ်လႆႈ၊ ဝႃႈၼင်ႇၼႆဢေႃႈ။-

18လႆႈသမ်ႉၶဝ်ဢဝ်တင်းၵႂၢမ်းၽႃႇသႃႇ ယူႉတႃႉ ႁဵတ်းသဵင်ဢၼ်ႁႅင်းယႂ်ႇၼႃႇႁွင်ႉပၢဝ်ႇႁွင်ႉလၢတ်ႈတီႈၵူၼ်းဝဵင်း ယေႇရူႉသလႅမ်ႇ ဢၼ်မီးၵႃႈၼိူဝ်လမ်းဝဵင်းၸိူဝ်းၼၼ်ႉ ႁႂ်ႈလႆႈလွၵ်ႇငိုတ်ႈၶဝ်လႄႈယႃႉယူၵ်ႉၶဝ် ႁႂ်ႈထၼ်ႈပေႃးတိုၵ်းဢဝ်ဝဵင်းလႆႈဢေႃႈ။-

19ၶဝ်ဢွၼ်ၵၼ်သႄႉသွမ်းၽြႃးပဵၼ်ၸဝ်ႈ ဝဵင်း ယေႇရူႉသလႅမ်ႇ ၊ မိူၼ်ၸိူဝ်ႉၼင်ႇဢၼ်မၼ်းၸဝ်ႈပဵၼ်ၽြႃးဢၼ်ၵူၼ်းလိၼ်မိူင်းတင်းလၢႆၵူဝ်းၵႂၢႆႇ ဢၼ်ပဵၼ်ၽြႃးဢၼ်မိုဝ်းၵူၼ်းႁဵတ်းပဵၼ်ၸိူဝ်းၼၼ်ႉဢေႃႈ။

20ၶုၼ်လူင် ႁေႇၸၵီႉ ဢိၵ်ႇတင်းပရေႃးၽႅတ်ႈ ဢီႉသႃႇယႃႉ လုၵ်ႈၸၢႆး ဢႃႇမုတ်ႉ ၼၼ်ႉ သူးတွင်းၵွပ်ႈပိူဝ်ႈလွင်ႈၼၼ်ႉသေလႄႈ ႁွင်ႉသႅၼ်ႇၸူးၵႃႈၼိူဝ်ၽုင်ႇၵၢင်ႁၢဝ်လႄႈ၊-

21ထႃႇဝရႃႉၽြႃးပွႆႇၸႂ်ႉတမၢၼ်ႇၵၢင်ႁၢဝ် ဢၼ်ပႄႇၽဵဝ်ႈႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇတင်းလၢႆ ဢိၵ်ႇတင်းပူဝ်ႇတင်းတပ်ႉမူးတင်းလၢႆပႅတ်ႈသေ ၵႃႈၼႂ်းတပ်ႉၶုၼ်ႁေႃၶမ်း ဢႃႇသူႉရီႉ ၼၼ်ႉမႃးဢေႃႈ။ ပိူဝ်ႈၼႆလႄႈမၼ်းၼၼ်ႉၼႃႈလူႉယူႇသေလႄႈ ၶိုၼ်းမိူဝ်းၵႂႃႇၵႃႈတီႈမိူင်းမၼ်းသေဢေႃႈ။ မိူဝ်ႈဢၼ်မၼ်းႁွတ်ႈထိုင်ၵႃႈတီႈပိၵ်ႈမၢၼ်ႇၽြႃးမၼ်းၼၼ်ႉၸိုင် ၶဝ်ၸိူဝ်းဢၼ်ဢွၵ်ႇမႃးၵႃႈၼႂ်းတွင်ႉမၼ်းၼၼ်ႉဢဝ်မၼ်းတၢႆလူၺ်ႈလၢပ်ႇလူၺ်ႈလႅဝ်းၵႃႈတီႈၼၼ်ႈဢေႃႈ။-

22ၼင်ႇၼၼ်လႄႈ ထႃႇဝရႃႉၽြႃးၵႄႇသႄႇၼုၵ်ႈဢဝ် ႁေႇၸၵီႉ ဢိၵ်ႇတင်းၵူၼ်းဝဵင်း ယေႇရူႉသလႅမ်ႇ တင်းလၢႆ လွတ်ႈသေၵႃႈၼႂ်းမိုဝ်းၶုၼ်ႁေႃၶမ်း ဢႃႇသူႉရီႉ ဢိၵ်ႇတင်းၵႃႈၼႂ်းမိုဝ်းရၢၼ်ႇသူႇတၢင်ႇတီႈတၢင်ႇလႅၼ်လႄႈ ပႂ်ႉၸွႆႈထႅမ်မႃႉၸႃႉၶဝ်ယူႇၵူႈၽၢႆႇၵူႈပႃႈဢေႃႈ။-

23ၵူၼ်းၼမ်ၼႃႇ ဢွၼ်ၵၼ်ဢဝ်ၶိူင်ႈပုၵ်ႈၸေႃႇပုၼ်ႈထႃႇဝရႃႉၽြႃးမႃးတီႈဝဵင်း ယေႇရူႉသလႅမ်ႇ သေလႄႈ ဢဝ်လၢၵ်ႈသွင်ႇပၼ်ႇၼႃႇဢၼ်ထိူၵ်ႈၵႃႈထိူၵ်ႈၶၼ် မႃးၵႃႈတီႈ ႁေႇၸၵီႉ ၶုၼ်ႁေႃၶမ်း ယူႉတႃႉ ၼၼ်ႉ ႁႂ်ႈမၼ်းထၼ်ႈပေႃးမီးမုၼ်မီးၽုင်းဢၼ်ယႂ်ႇၼႃႇသိုဝ်ႈၼႃႈတႂ်ႈတႃၵူၼ်းၵူႈၸိူဝ်ႉၵူႈမဵဝ်း ၸႃႉၸဵမ်ၶိင်ႇၵႃႇလႃႉၼၼ်ႉၵႂႃႇဢေႃႈ။

24ၼႂ်းၶိင်ႇမိုဝ်ႉဝၼ်းၸိူဝ်းၼၼ်ႉ ႁေႇၸၵီႉ ပဵၼ်တၢင်းၶႆႈတၢင်းပဵၼ် ဢၼ်မၼ်းတၵ်းတၢႆလူၺ်ႈၼၼ်ႉလႄႈ သူးတွင်းတီႈထႃႇဝရႃႉၽြႃးသေလႄႈ မၼ်းၸဝ်ႈပၼ်ပျႃႇတိၵ်ႈဢိၵ်ႇတင်းၼီႉမိၵ်ႈလၢၵ်ႈၶၼႃႇတီႈမၼ်းဢေႃႈ။-

25ၵူၺ်းၵႃႈ ႁေႇၸၵီႉ ဢမ်ႇၵမ်ၵျၢင်ႉၸွမ်းၵႃႈၼင်ႇဢၼ်ၵိုင်ႇတၢၼ်ႇၵၼ် တင်းၵျေးၸူးၸဝ်ႈ ဢၼ်မၼ်းလႆႈၶၢမ်ႇၼၼ်ႉလႄႈ မီးၸႂ်ဢၼ်ပူၵ်းပႅၼ်ဢေႃႈ။ ပိူဝ်ႈဢၼ်ပဵၼ်ၼင်ႇၼႆလႄႈ တၢင်းၸႂ်မႆႈၶႆႈၸႃႉၸဝ်ႈဢွၵ်ႇၸူးတီႈမၼ်း ဢိၵ်ႇတင်းမိူင်း ယူႉတႃႉ တင်းဝဵင်း ယေႇရူႉသလႅမ်ႇ ဢေႃႈ။-

26ၼႂ်းဝႃႈၼၼ်သေၵေႃႈ ၵွပ်ႈပိူဝ်ႈဢၼ် ႁေႇၸၵီႉ ဢိၵ်ႇတင်းၵူၼ်းဝဵင်း ယေႇရူႉသလႅမ်ႇ တင်းလၢႆ ၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇ ၵွပ်ႈပိူဝ်ႈတၢင်းဢၼ်ႁူဝ်ၸႂ်ၶဝ်ၽႅၼ်သုင်ၼၼ်ႉလႄႈ တၢင်းၸႂ်မႆႈၶႆႈၸႃႉထႃႇဝရႃႉၽြႃး ဢမ်ႇတူၵ်းဢမ်ႇႁွတ်ႈၵႃႈၼိူဝ်ၶဝ် ၼႂ်းၸူဝ်ႈပၢၼ် ႁေႇၸၵီႉ ၼၼ်ႉ။

27ႁေႇၸၵီႉ မီးၸေးၸိမ်ႇဢုၵ်ႉၸႃႇတင်းမုၼ်ၵုင်ႇသရေႇၼမ်ၼႃႇလူင်လၢင်ဢေႃႈ။ မၼ်းတႄႇႁဵတ်းတိူၵ်ႈၽၼ်ႇတႃႇ တီႈဢၼ်သိမ်းဝႆႉ ၶမ်းငိုၼ်း၊ သႅင်မျၢတ်ႈ၊ မဵဝ်းၼၢမ်ႇသႃႇ၊ ၶိူင်ႈႁႄႉလၢၵ်ႈၼၢၵ်ႈ ၶိူင်ႈပိူင်ဢၼ်လီဢၼ်ငၢမ်းၸိူဝ်းၼၼ်ႉ၊-

28ဢိၵ်ႇတင်းယွင်ၶဝ်ႈယေးၶဝ်ႈ၊ တိူၵ်ႈတီႈဢၼ်သိမ်းဝႆႉၼမ်ႉမၼ်း ၼမ်ႉၸပိတ်ႈ၊ သိုင်ႇတရိၵ်ႈသၢၼ်ႇၵူႈၸိူဝ်ႉၵူႈမဵဝ်း၊ ၶွၵ်ႈသူဝ်း ဢၼ်ပဵၼ်ၽုင်ပဵၼ်ၽုင်ၸိူဝ်းၼၼ်ႉဝႆႉဢေႃႈ။-

29မၼ်းတႄႇႁဵတ်းဝဵင်းတင်းလၢႆ ပုၼ်ႈတူဝ်ၸဝ်ႈၵဝ်ႇလႄႈ ၵဵပ်းႁွမ်သူဝ်းဝူဝ်းဝႆႉၼမ်ၼႃႇလူင်လၢင်ဢေႃႈ။ ၽြႃးပဵၼ်ၸဝ်ႈ ဢဵတ်းလူပၼ်ဢုၵ်ႉၸႃႇဢၼ်ၼမ်ၼႃႇလူင်လၢင်တီႈမၼ်းဢေႃႈ။-

30ႁေႇၸၵီႉ ၼၼ်ႉ တဵင်ဢိုတ်းၼမ်ႉဢွၵ်ႇႁူး ၵီႉႁုၼ်ႇ ဢၼ်ၵႃႈၼိူဝ်လႄႈ ႁႂ်ႈလႆၵႂႃႇၽၢႆႇတၢင်းတူၵ်းဝဵင်း တႃႇဝိတ်ႈ သိုဝ်ႈသိုဝ်ႈသေဢေႃႈ။ ၼင်ႇၼၼ်လႄႈ ႁေႇၸၵီႉ ၼၼ်ႉ ႁဵတ်းလႆႈပဵၼ်လႆႈၵႃႈဢၼ်မၼ်းၵျၢမ်ႇပွင်သၢင်ႈႁဵတ်းၼၼ်ႉဢေႃႈ။-

31ၼႂ်းဝႃႈၼၼ်သေၵေႃႈ ၼႂ်းဢမူႉသၢၼ်ႇတမၢၼ်ႇ ဢၼ်ၶုၼ် ပႃႇပူႉလုၼ်ႇ တင်းလၢႆ ပွႆႇၸႂ်ႉမႃး ႁႂ်ႈလႆႈတွင်ႈထၢမ်လူၺ်ႈလွင်ႈတၢင်းဢၼ်လီဢၢမ်းဢၼ်ပဵၼ်ၵႃႈတီႈမိူင်းၸဝ်ႈၼၼ်ႉ ၸိူဝ်းၼၼ်ႉၼၼ်ႉၸိုင် ၽြႃးပဵၼ်ၸဝ်ႈပႅတ်ႈမၼ်းဝႆႉ ႁႂ်ႈလႆႈၸၢမ်းတူၺ်းမၼ်းထၼ်ႈပေႃးမၼ်းၸဝ်ႈ လႆႈႁူႉသၽေႃးမၼ်းတင်းသဵင်ႈတင်းမူတ်းၼၼ်ႉဢေႃႈ။

32လွင်ႈတၢင်း ႁေႇၸၵီႉ ဢၼ်ယင်းၵိုတ်းယင်းၵျၢၼ်ႇ ဢိၵ်ႇတင်းလွင်ႈတၢင်းဢၼ်မၼ်းႁဵတ်းၵျေးၸူးတင်းလၢႆၼၼ်ႉၸိူဝ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းၵျၢမ်းလိၵ်ႈရူႇပႃႇရူင်ႇ ပရေႃးၽႅတ်ႈ ဢီႉသႃႇယႃႉ လုၵ်ႈၸၢႆး ဢႃႇမုတ်ႉ ဢိၵ်ႇတင်းၵႃႈၼႂ်းရႃႇၸဝၢင်ႇ ယူႉတႃႉ တင်း ရႃႇၸဝၢင်ႇ ဢီႉသရေႇလႃႉ ၼၼ်ႉဢေႃႈ။-

33ႁေႇၸၵီႉ ၼၼ်ႉ ၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ ၶဝ်ဢွၼ်ၵၼ်ဢဝ်မၼ်းသၢင်းၵျူဝ်ႇ ၵႃႈတီႈသဵၼ်ႈတၢင်းဢၼ်ၶိုၼ်ႈၸူး ၵႃႈတီႈသၢင်းၶႅင်းလုၵ်ႈၸဝ်ႈလၢၼ်ၸဝ်ႈ တႃႇဝိတ်ႈ ၸိူဝ်းၼၼ်ႉဢေႃႈ။ ၵူၼ်းမိူင်း ယူႉတႃႉ ၵူၼ်းဝဵင်း ယေႇရူႉသလႅမ်ႇ တင်းသဵင်ႈတင်းလူင် ဢွၼ်ၵၼ်ယုၵ်ႉယွင်ႈမုၼ်ၵုင်ႇသရေႇ ႁေႇၸၵီႉ ၼႂ်းမိူဝ်ႈဢၼ်မၼ်းႁွတ်ႈဢၼိၵ်ႈၸႃႉၼၼ်ႉဢေႃႈ။ မၼႃႇသေႇ လုၵ်ႈၸၢႆးၸဝ်ႈၼၼ်ႉ ၼင်ႈႁၢင်ႈၼင်ႈႁေႃၵႃႈတီႈဢရႃႇပေႃႈၸဝ်ႈဢေႃႈ။

← Chapter 31 Jump to: Chapter 33 →