2 Chronicles 13

Shan

← Chapter 12 Jump to: Chapter 14 →

1ၼႂ်းပီႊဢၼ် ၶုၼ်လူင် ယေႇရူဝ်းပုမ်ႇ ၼင်ႈႁၢင်ႈၼင်ႈႁေႃသိပ်းပႅတ်ႇပီႊၼၼ်ႉ ဢၽီႉယႃႉ ၸႃႉဢုပ်ႉပိူင်ႇၸၢမ်ႇၸႃးမိူင်း ယူႉတႃႉ လႄႈ၊ ဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရူႉသလႅမ်ႇ သၢမ်ပီႊဢေႃႈ။-

2ၸိုဝ်ႈသဵင်မႄႈၸဝ်ႈၸမ်ႉ၊ ပဵၼ် မႃႇၶႃႇ လုၵ်ႈယိင်း ဢေႃးရေးလႃႉ ၵူၼ်းဝဵင်း ၵီႉပႃႉ ဢေႃႈ။ လွင်ႈဢၼ် ဢၽီႉယႃႉ ၊ တင်း ယေႇရူဝ်းပုမ်ႇ ၼၼ်ႉ ပဵၼ်သိုၵ်းပဵၼ်သိူဝ်ၵၼ်ၼၼ်ႉၸမ်ႉ၊-

3ဢၽီႉယႃႉ ၼၼ်ႉပႃးဢဝ်ႁူဝ်ႁၢၼ်ၵူၼ်းသိုၵ်းလီ ဢၼ်လိူၵ်ႈၵဵပ်းဢဝ်သီႇသႅၼ်ၼၼ်ႉသေလႄႈ ယၼ်ႇတပ်ႉၶၢင်းတပ်ႉဢေႃႈ။ ယေႇရူဝ်းပုမ်ႇ ၼၼ်ႉ ပႃးဢဝ်ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇ၊ ဢၼ်လိူၵ်ႈၵဵပ်းဢဝ်ပႅတ်ႇသႅၼ်ၼၼ်ႉ ယၼ်ႇတပ်ႉၶၢင်းတပ်ႉဢေႃႈ။-

4ဢၽီႉယႃႉ ၸုၵ်းယူႇၵႃႈၼိူဝ်လွႆ ၸေႇမရိမ်ႇ ဢၼ်မီးယူႇၵႃႈၼိူဝ်ႁၢၼ်ႉလွႆ ဢေႇၽရိမ်ႇ သေလႄႈႁွင်ႉလၢတ်ႈလႄႈဝႃႈ၊ ယေႇရူဝ်းပုမ်ႇ ဢိၵ်ႇတင်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းတႃႉ။-

5သူထုၵ်ႇလီႁူႉၸႅင်ႈမၢတ်ႈတွင်းလွင်ႈဢၼ်ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ဢဝ်ပတီႉၺိၺ်ႇဢၼ်ၸၢပ်ႈသႅင်ႇၵၼ်တၢင်းၵိူဝ် ဢဝ်မိူင်း ဢီႉသရေႇလႃႉ ဢၢပ်ႈပၼ်တီႈ တႃႇဝိတ်ႈ ဢိၵ်ႇတင်းလုၵ်ႈလၢၼ်ၸဝ်ႈတင်းလၢႆသေႇသေႇၼၼ်ႉဢမ်ႇၸႂ်ႈႁိုဝ်။-

6ၵူၺ်းၵႃႈ ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ၶႃႈ သေႃးလမုၼ်ႇ ဢၼ်ပဵၼ်လုၵ်ႈၸဝ်ႈ တႃႇဝိတ်ႈ ၼၼ်ႉၼၼ်ႉ ၸုၵ်းယူႇၽၢႆႇၼိုင်ႈတင်းၸဝ်ႈမၼ်းလႄႈပုင်ႇၵၢၼ်ႇယဝ်ႉ။-

7ၶဝ်ၸိူဝ်းဢၼ်ယူႇမဝ်ၵိၼ်မၢင်၊ ၵူၼ်းဢႃႉထမ်ႇမႃႉတင်းလၢႆၼၼ်ႉ ဢွၼ်ၵၼ်ၸူႉတုမ်ၵႃႈတီႈမၼ်းၼၼ်ႉလႄႈ ႁႂ်ႈတူဝ်ၸဝ်ႈၵဝ်ႇမၼ်ႈၶိူင်ႇ ယူႇၽၢႆႇၼိုင်ႈတင်း ရူဝ်းပုမ်ႇ လုၵ်ႈၸၢႆးၸဝ်ႈ သေႃးလမုၼ်ႇ ၼႂ်းမိူဝ်ႈဢၼ် ရူဝ်းပုမ်ႇ ဢသၢၵ်ႈယင်းလဵၵ်ႉယင်းၼုမ်ႇ၊ သၽေႃးယင်းဢူၼ်ႈယင်းဢွၼ်ႇလႄႈ ဢမ်ႇႁၢမ်ႈတၢပ်ႈႁႄႉၶႅၼ်လႆႈၼၼ်ႉဢေႃႈ။-

8မိူဝ်ႈလဵဝ်ၼႆႉၵေႃႈ သူဢွၼ်ၵၼ်ၵျၢမ်ႇပွင် တၵ်းႁၢမ်ႈတၢပ်ႈႁႄႉၶႅၼ်သိုင်ႇၸိုင်ႈဝၢၼ်ႈမိူင်းထႃႇဝရႃႉၽြႃး ဢၼ်မီးၵႃႈတီႈမိုဝ်းလုၵ်ႈလၢၼ် တႃႇဝိတ်ႈ ၼၼ်ႉလူင်ပႄႇ၊ သူပဵၼ်မုၵ်ႉလူင်ၸိူဝ်းလူင်သေလႄႈ မီးဝူဝ်းၶမ်းဢွၼ်ႇ ဢၼ် ယေႇရူဝ်းပုမ်ႇ ႁဵတ်းဝႆႉ ႁႂ်ႈပဵၼ်ၽြႃးပုၼ်ႈသူၼၼ်ႉသေဢေႃႈ။-

9သူဢွၼ်ၵၼ်ႁေႃႈယိတ်ႈပရေႃးႁဵၵ်ႈထႃႇဝရႃႉၽြႃး ဢၼ်ဝႃႈၵူၼ်းမဵဝ်း ဢႃႇရုၼ်ႇ တင်းၵူၼ်းမဵဝ်း လေႇဝီႉ တင်းလၢႆဢွၵ်ႇပႅတ်ႈလႄႈႁဵတ်းယိတ်ႈပရေႃးႁဵၵ်ႈတင်းလၢႆပုၼ်ႈသူၸွမ်းၵႃႈၼင်ႇဢၼ်ထုင်းၸၢမ်ႇ ၵူၼ်းတၢင်ႇၸိူဝ်ႉတၢင်ႇၶိူဝ်းမီးၼၼ်ႉယဝ်ႉဢမ်ႇၸႂ်ႈႁိုဝ်။ မႅၼ်ႈၼင်ႇဢၼ်ၼၼ်ႉလႄႈ၊ ၵေႃႉဢၼ်ပႃးဢဝ်ဝူဝ်းဢွၼ်ႇတူဝ်ၼိုင်ႈ ဢိၵ်ႇတင်းသူဝ်းၸဵတ်းတူဝ်သေလႄႈ မႃးႁႂ်ႈလႆႈၶၢမ်ႇဢဝ်တၢင်းဢၼ်ၶၢၼ်းဝႆႉၵႃႈၼႂ်းဢရႃႇယိတ်ႈပရေႃးႁဵၵ်ႈၼၼ်ႉလႆႈႁဵတ်းယိတ်ႈပရေႃးႁဵၵ်ႈ တီႈၶဝ်ၸိူဝ်းဢၼ်ဢမ်ႇၸႂ်ႈၽြႃးၼၼ်ႉယဝ်ႉလူင်ပႄႇ။-

10ႁဝ်းၸမ်ႉ၊ ထႃႇဝရႃႉၽြႃးပဵၼ် ၽြႃးပဵၼ်ၸဝ်ႈႁဝ်းလႄႈ ႁဝ်းဢမ်ႇၸုၼ်ႉပႅတ်ႈမၼ်းၸဝ်ႈ ႁဝ်းမီးယိတ်ႈပရေႃးႁဵၵ်ႈ ဢၼ်ၵိုတ်ႉႁၢပ်ႇဢမူႉထႃႇဝရႃႉၽြႃး ဢၼ်ပဵၼ်မဵဝ်း ဢႃႇရုၼ်ႇ ဢိၵ်ႇတင်းၵူၼ်းမဵဝ်း လေႇဝီႉ ဢၼ်ပႂ်ႉဢမူႉၶဝ်ယူႇၸိူဝ်းၼၼ်ႉဢေႃႈ။-

11ၶဝ်ဢွၼ်ၵၼ်ဢဝ်ယိတ်ႈဢၼ်တုတ်ႇၽႆး ဢိၵ်ႇတင်းၼၢမ်ႇသႃႇတုတ်ႇၽႆးၵႃႈတီႈၽၢႆႇၼႃႈထႃႇဝရႃႉၽြႃး ၵူႈႁူဝ်ၼႂ်ၵူႈႁူဝ်ၶမ်ႈဢေႃႈ။ ၶဝ်ဢွၼ်ၵၼ်ပွင်မႄးပွင်ႁႅၼ်းၶဝ်ႈမုၼ်းၽၢႆႇၼႃႈၸဝ်ႈ ဝႆႉၵႃႈၼိူဝ်ၶူင်ႇတီႈၵိၼ်ဢၼ်မူတ်းၸၢင်ႇ ဢိၵ်ႇတင်းၶူင်ႇတီႈတႆႈၽႆး တင်းဝၢၼ်ႇတႆႈၽႆး ပုၼ်ႈဢၼ်တၵ်းတႆႈၵူႈႁူဝ်ၶမ်ႈဢေႃႈ။ ႁဝ်းဢွၼ်ၵၼ်ပႂ်ႉဢမူႉထႃႇဝရႃႉၽြႃး ၽြႃးပဵၼ်ၸဝ်ႈႁဝ်းဢေႃႈ သူၸမ်ႉဢွၼ်ၵၼ်ၸုၼ်ႉပႅတ်ႈမၼ်းၸဝ်ႈယဝ်ႉ။-

12တူဝ်ၽြႃးပဵၼ်ၸဝ်ႈၼၼ်ႉမီးယူႇလူၺ်ႈၵၼ်တင်းႁဝ်းလႄႈ ပဵၼ်ငဝ်ႈပဵၼ်ႁူဝ်ႁဝ်းယူႇဢေႃႈ ယိတ်ႈပရေႃးႁဵၵ်ႈမၼ်းၸဝ်ႈတင်းလၢႆၵေႃႈ ပႃးဢဝ်တင်းၼႄးၶရႃႇပုၼ်ႈဢၼ်တၵ်းတိုၵ်းယူင်းၸိူဝ်းၼၼ်ႉသေလႄႈ မီးယူႇလူၺ်ႈၵၼ်တင်းႁဝ်းႁႂ်ႈလႆႈပဝ်ႇတိုင်ႈသေလႄႈ တိုၵ်းယူင်းယူႇၽၢႆႇၼိုင်ႈတင်းသူဢေႃႈ။ ၵူၼ်းမဵဝ်း ဢီႉသရေႇလႃႉ ၶဝ်ဢိူၺ်း၊ ယႃႇပေဢွၼ်ၵၼ်ယူႇၽၢႆႇၼိုင်ႈသေလႄႈတိုၵ်းတေႃးထႃႇဝရႃႉၽြႃး ၽြႃးပဵၼ်ၸဝ်ႈပူႇသူမွၼ်ႇသူပေႃးတိုၵ်းၸိုင် သူတၵ်းဢမ်ႇလႆႈလီလႆႈပဵၼ်ၵူၺ်ႉ၊ ဝႃႈၼင်ႇၼႆဢေႃႈ။

13ယေႇရူဝ်းပုမ်ႇ ၼၼ်ႉ ဝႆႉတပ်ႉသိုၵ်းမူၵ်းၵႃႈတီႈၽၢႆႇတၢင်းလင်ၵူၼ်းမဵဝ်း ယူႉတႃႉ တင်းလၢႆလႄႈ၊ ၶဝ်ႈယူႇၵႃႈတီႈၽၢႆႇၼႃႈၵူၼ်းမဵဝ်း ယူႉတႃႉ တင်းလၢႆယူႇသေလႄႈ၊ တပ်ႉသိုၵ်းမူၵ်းၶဝ်ၼၼ်ႉယူႇၵႃႈတီႈၽၢႆႇတၢင်းလင်ဢေႃႈ။-

14မိူဝ်ႈဢၼ်ၵူၼ်းမဵဝ်း ယူႉတႃႉ တင်းလၢႆဝၢႆႇတူၺ်းၶိုၼ်းၼၼ်ႉၸိုင် ၶဝ်ႁၼ်လွင်ႈဢၼ်ဢမူႉသိုၵ်းမီးၵႃႈတီႈၽၢႆႇၼႃႈဢိၵ်ႇတင်းၵႃႈတီႈၽၢႆႇလင်ၶဝ်ၼၼ်ႉလႄႈ ႁွင်ႉႁႃထႃႇဝရႃႉၽြႃးလႄႈ ယိတ်ႈပရေႃးႁဵၵ်ႈတင်းလၢႆၵေႃႈဢွၼ်ၵၼ်ပဝ်ႇတိုင်ႈၼႄးၶရႃႇဢေႃႈ။-

15ၵမ်းၼၼ်ႉၵူၼ်းမဵဝ်း ယူႉတႃႉ တင်းလၢႆ ဢွၼ်ၵၼ်ႁွင်ႉသႅၼ်ႇလႄႈ ၼႂ်းမိူဝ်ႈဢၼ်ၵူၼ်းမဵဝ်း ယူႉတႃႉ ၸိူဝ်းၼၼ်ႉႁွင်ႉသႅၼ်ႇယူႇၼၼ်ႉ၊ ၽြႃးပဵၼ်ၸဝ်ႈပၼ်တၢမ်ႇတီႈ ယေႇရူဝ်းပုမ်ႇ ဢိၵ်ႇတင်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ၵႃႈတီႈၽၢႆႇၼႃႈ ဢၽီႉယႃႉ တင်းၵူၼ်းမဵဝ်း ယူႉတႃႉ တင်းလၢႆသေယဝ်ႉ၊-

16ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ ဢွၼ်ၵၼ်ဢွၵ်ႇပၢႆႈသေ ၵႃႈတီႈၽၢႆႇၼႃႈၵူၼ်းမဵဝ်း ယူႉတႃႉ တင်းလၢႆလႄႈ ၽြႃးပဵၼ်ၸဝ်ႈဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းၶဝ်ၼၼ်ႉဢေႃႈ။-

17ဢၽီႉယႃႉ ဢိၵ်ႇတင်းၵူၼ်းမၼ်းတင်းလၢႆ ဢွၼ်ၵၼ်ႁဵတ်းတၢင်းဢၼ်ၶႃႈၽၼ်းဢဝ်တၢႆဢၼ်ယႂ်ႇၼႃႇလူင်လၢင် ဢဝ်ၶဝ်တၢႆလႄႈၵူၼ်းမဵဝ်း ဢီႉသရေႇလႃႉ ဢၼ်လိူၵ်ႈၵဵပ်းဢဝ်ၼၼ်ႉလူမ်ႉတၢႆႁႃႈသႅၼ်ဢေႃႈ။-

18ၼင်ႇၼၼ်လႄႈၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ တူၵ်းသုမ်းမိူဝ်ႈၼၼ်ႉလႄႈ၊ ၵူၼ်းမဵဝ်း ယူႉတႃႉ တင်းလၢႆ ဢွၼ်ၵၼ်ပႄႉၼႅင်ႇ ၵွပ်ႈပိူဝ်ႈဢၼ်ၶဝ်သွၼ်ႈပိုင်ႈထႃႇဝရႃႉၽြႃး ၽြႃးပဵၼ်ၸဝ်ႈပူႇၶဝ်မွၼ်ႇၶဝ်ၼၼ်ႉဢေႃႈ။-

19ဢၽီႉယႃႉ လိုပ်ႈၸွမ်းလမ်းၸွမ်း ယေႇရူဝ်းပုမ်ႇ လႄႈ ၼုၵ်ႈဢဝ်ဝဵင်း ပေႇသလႃႉ ဢိၵ်ႇတင်းဝၢၼ်ႈမၼ်းတင်းလၢႆ၊ဝဵင်း ယေႇသၼႃႉ ဢိၵ်ႇတင်းဝၢၼ်ႈမၼ်းတင်းလၢႆ၊ ဝဵင်း ဢေႇၽရိမ်ႇ ဢိၵ်ႇတင်းဝၢၼ်ႈမၼ်းတင်းလၢႆ သေၵႃႈၼႂ်းမိုဝ်းမၼ်းဢေႃႈ။-

20ၸူဝ်ႈပၢၼ် ဢၽီႉယႃႉ ၼၼ်ႉ၊ ယေႇရူဝ်းပုမ်ႇ ၼၼ်ႉ ဢမ်ႇလႆႈၶိုၼ်းလႆႈႁႅင်းမီးႁႅင်း။ ထႃႇဝရႃႉၽြႃးပၼ်တၢမ်ႇတီႈမၼ်းလႄႈ မၼ်းတၢႆသေဢေႃႈ။-

21ဢၽီႉယႃႉ ၸမ်ႉ၊ ႁႅင်းယႂ်ႇၽေႈတူဝ်းတွၼ်းမႃးဢေႃႈ။ မၼ်းဢဝ်မေးသိပ်းသီႇၵေႃႉလႄႈ လႆႈလုၵ်ႈၸၢႆးသၢဝ်းသွင်ၵေႃႉ တင်းလုၵ်ႈယိင်းသိပ်းႁူၵ်းၵေႃႉဢေႃႈ။-

22လွင်ႈတၢင်း ဢၽီႉယႃႉ ဢၼ်ယင်းၵိုတ်းယင်းၵျၢၼ်ႇ၊ သဵၼ်ႈတၢင်းဢၼ်မၼ်းၸွမ်းတင်းလၢႆ၊ ၵႂၢမ်းဢၼ်မၼ်းလၢတ်ႈၼၼ်ႉၸိူဝ်းၼၼ်ႉ တႅမ်ႈဝႆႉမီးယူႇၵႃႈၼႂ်းလိၵ်ႈ ဢၼ်ပရေႃးၽႅတ်ႈ ဢီႉတေႃႇ ၸီႇယၢင်ႇသိုပ်ႇသႂ်ႇဝႆႉတီႈရႃႇၸဝၢင်ႇၼၼ်ႉယူႇဢေႃႈ။

← Chapter 12 Jump to: Chapter 14 →