2 Chronicles 5

Shan

← Chapter 4 Jump to: Chapter 6 →

1ၼင်ႇၼၼ်လႄႈ တၢင်းႁဵတ်းၵႃႈဢၼ် သေႃးလမုၼ်ႇ ၸီႇယၢင်ႇပွင်ႁဵတ်းၵူႈၸိူဝ်ႉၵူႈပိူင် ပုၼ်ႈႁိူၼ်းထႃႇဝရႃႉၽြႃးၼၼ်ႉ ယဝ်ႉတူဝ်ႈသေယဝ်ႉ၊ သေႃးလမုၼ်ႇ ပႃးဢဝ်ၶိူင်ႈပိူင်ဢၼ်ၸဝ်ႈပေႃႈမၼ်း တႃႇဝိတ်ႈ လူႇတၢၼ်းဢၼ်ဝႃႈ ငိုၼ်း၊ ၶမ်း၊ ၶိူင်ႈပိူင်ၵႃႈမီးၸိူဝ်းၼၼ်ႉမႃးလႄႈ သႂၢင်းသႂ်ႇဝႆႉၵႃႈၼႂ်းတိူၵ်ႈၽၼ်ႇတႃႇႁိူၼ်းၽြႃးပဵၼ်ၸဝ်ႈၼၼ်ႉဢေႃႈ။

2မိူဝ်ႈၼၼ်ႉ သေႃးလမုၼ်ႇ ႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ် ၼႂ်းမဵဝ်း ဢီႉသရေႇလႃႉ တင်းလၢႆ ဢိၵ်ႇတင်းၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ် ၼႂ်းမဵဝ်းတင်းလၢႆဢၼ်ဝႃႈ ၶဝ်ၸိူဝ်းဢၼ်ဢုပ်ႉၵႃႈၼိူဝ်ပီႈၼွင်ႉၸိူဝ်ႉၶိူဝ်းပေႃႈၶဝ်ၵႃႈၼႂ်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် မႃးၵႃႈတီႈဝဵင်း ယေႇရူႉသလႅမ်ႇ ႁႂ်ႈလႆႈဢဝ်တိူၵ်ႈတႃႇပတီႉၺိၺ်ႇထႃႇဝရႃႉၽြႃး ဢွၵ်ႇသေၵႃႈၼႂ်းဝဵင်း တႃႇဝိတ်ႈ ဢၼ်လႆႈၸိုဝ်ႈ ၸီႉဢုၼ်ႇ ၼၼ်ႉမႃးလႄႈ၊-

3ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်မႃးၸူႉၵၼ်တုမ်ၵၼ်ၵႃႈတီႈၶုၼ်ႁေႃၶမ်းၼႂ်းပွႆးဢၼ်ႁဵတ်းၼႂ်းလိူၼ်သတ်ႉတမႃႉၼၼ်ႉဢေႃႈ။-

4ၶုၼ်ဢၼ်ပဵၼ်ၵႄႇပဵၼ်ႁူဝ် ၼႂ်းမဵဝ်း ဢီႉသရေႇလႃႉ တင်းသဵင်ႈတင်းလူင်မႃးလႄႈ၊ ၵူၼ်းမဵဝ်း လေႇဝီႉ ၸိူဝ်းၼၼ်ႉၵေႃႈ ႁၢပ်ႇ တိူၵ်ႈတႃႇၸဝ်ႈယူႇသေလႄႈ၊-

5ပႃးဢဝ်တိူၵ်ႈတႃႇၸဝ်ႈဢိၵ်ႇတင်းမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈ တင်းၶိူင်ႈပိူင်ဢၼ်မူတ်းၸၢင်ႇၵႃႈဢၼ်မီး ၵႃႈၼႂ်း မူဝ်းၵႃႇၸဝ်ႈၸိူဝ်းၼၼ်ႉမႃးဢေႃႈ။ ယိတ်ႈပရေႃးႁဵၵ်ႈတင်းလၢႆ တင်းၵူၼ်းမဵဝ်း လေႇဝီႉ ၸိူဝ်းၼၼ်ႉ ဢွၼ်ၵၼ်ဢဝ်ၸိူဝ်းၼၼ်ႉမႃးဢေႃႈ။-

6ၶုၼ်လူင် သေႃးလမုၼ်ႇ ဢိၵ်ႇတင်းပရဵၵ်ႈသၢတ်ႈ ဢီႉသရေႇလႃႉ တင်းသဵင်ႈတင်းလူင် ဢၼ်မႃးၸူႉၵၼ်တုမ်ၵၼ်ၵႃႈတီႈမၼ်းၼၼ်ႉဢွၼ်ၵၼ်ယူႇ ၵႃႈတီႈၽၢႆႇၼႃႈတိူၵ်ႈတႃႇၸဝ်ႈသေလႄႈ ပုၵ်ႈၸေႃႇယိတ်ႈသူဝ်းဝူဝ်းၼမ်ၼႃႇဢမ်ႇႁူႉၼမ်လႂ်၊ ဢၼ်ထၼ်ႈပေႃးဢမ်ႇၼပ်ႉဢမ်ႇဢၢၼ်ႇလႆႈၼၼ်ႉယူႇဢေႃႈ။-

7ယိတ်ႈပရေႃးႁဵၵ်ႈၸိူဝ်းၼၼ်ႉ ဢွၼ်ၵၼ်ဢဝ်တိူၵ်ႈတႃႇပတီႉၺိၺ်ႇထႃႇဝရႃႉၽြႃး သႂၢင်းၶဝ်ႈဝႆႉၵႃႈၼႂ်းတီႈမၼ်း၊ ၵႃႈၼႂ်းထႃႇၼႃႉတီႈပျႃႇတိၵ်ႈၸဝ်ႈဢၼ်ဝႃႈ ထႃႇၼႃႉတီႈမူတ်းၸၢင်ႇၼႃႇသေပိူၼ်ႈ ၵႃႈတႂ်ႈပိၵ်ႇ ၶေႇရူႉၽဵမ်ႇ ၼၼ်ႉဢေႃႈ။-

8ၶေႇရူႉၽဵမ်ႇ ၸိူဝ်းၼၼ်ႉၵီႈၽႄႇပိၵ်ႇၶဝ် ၵႃႈၼိူဝ်တီႈယူႇတိူၵ်ႈတႃႇၸဝ်ႈၼၼ်ႉလႄႈ၊ ၶေႇရူႉၽဵမ်ႇ ၸိူဝ်းၼၼ်ႉမုင်းႁူမ်ႇတိူၵ်ႈတႃႇၸဝ်ႈတင်းၵၢၼ်းမၼ်းၸိူဝ်းၼၼ်ႉယူႇဢေႃႈ။-

9ၶဝ်တိုတ်ႉထွတ်ႇၵၢၼ်းၸိူဝ်းၼၼ်ႉဢွၵ်ႇဝႆႉဢိတ်းၼိုင်ႈသေလႄႈ ယူႇၵႃႈၼွၵ်ႈၵႃႈတီႈၽၢႆႇၼႃႈထႃႇၼႃႉပျႃႇတိၵ်ႈၸဝ်ႈၼၼ်ႉ ႁၼ်ဢမၢင်ႇႁူဝ်ၵၢၼ်းၸိူဝ်းၼၼ်ႉ ၵႃႈတီႈတိူၵ်ႈတႃႇၸဝ်ႈလႄႈ၊ ၵႃႈတီႈၼွၵ်ႈၸိုင်ဢမ်ႇႁၼ်လႆႈ၊ မီးယူႇၵႃႈတီႈၼၼ်ႈတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-

10ၵႃႈၼႂ်းတိူၵ်ႈတႃႇၸဝ်ႈၼၼ်ႉ လိူဝ်သေၶႅပ်းမၢၵ်ႇႁိၼ်သွင်ၽႅၼ်ႇ ဢၼ် မူဝ်းသေႇ ဢဝ်သႂၢင်းသႂ်ႇဝႆႉၵႃႈၼႂ်းမၼ်းၵႃႈတီႈ ႁေႃးရပ်ႉ တီႈဢၼ်ထႃႇဝရႃႉၽြႃးႁဵတ်းပတီႉၺိၺ်ႇလူၺ်ႈၵၼ်တင်းၵူၼ်းမဵဝ်း ဢီႉသရေႇလႃႉ တင်းလၢႆ ၼႂ်းမိူဝ်ႈဢၼ်ၶဝ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉၸိူဝ်းၼၼ်ႉဢမ်ႇမီးၵႃႈသင်သေၸိူဝ်ႉသေပိူင်။

11မိူဝ်ႈဢၼ်ယိတ်ႈပရေႃးႁဵၵ်ႈၸိူဝ်းၼၼ်ႉဢွၵ်ႇသေၵႃႈၼႂ်းထႃႇၼႃႉတီႈမူတ်းၸၢင်ႇၼၼ်ႉ၊ ၵွပ်ႈပိူဝ်ႈဢၼ်ယိတ်ႈပရေႃးႁဵၵ်ႈ ဢၼ်ၸူႉၵၼ်တုမ်ၵၼ်တင်းသဵင်ႈတင်းလူင်ၼၼ်ႉ ႁႂ်ႈတူဝ်ၸဝ်ႈၵဝ်ႇပဵၼ်ဢၼ်မူတ်းၸၢင်ႇဝႆႉယဝ်ႉလႄႈ ဢမ်ႇပႂ်ႉဢမူႉၸဝ်ႈယူႇၸွမ်းၵႃႈၼင်ႇဢၼ်တူၵ်းလႄႉတူၵ်းၵမ်းၼၼ်ႉ၊-

12ဢိၵ်ႇတင်းၵွပ်ႈပိူဝ်ႈဢၼ်ၵူၼ်းမဵဝ်း လေႇဝီႉ ဢၼ်ပဵၼ်ၵေႃႉဢၼ်ႁဵတ်းၵႂၢမ်းၵႃႈမီး ဢၼ်ဝႃႈ၊ ဢႃႇသပ်ႉ၊ ႁေႇမၼ်ႇ၊ ယေႇတူႉသုၼ်ႇ ဢိၵ်ႇတင်းလုၵ်ႈလၢင်းၶဝ်တင်းပီႈၼွင်ႉၸိူဝ်ႉၶိူဝ်းၶဝ်ၸိူဝ်းၼၼ်ႉ ၼုင်ႈမႆပိၵ်ႈၶျေႃးလႄႈ ပႃးဢဝ်တင်းသႅင်ႇ၊ တိင်ႇ၊ တရေႃးယူႇသေလႄႈ ဢွၼ်ၵၼ်ၸုၵ်းယူႇၵႃႈတီႈၽၢႆႇဝၼ်းဢွၵ်ႇယိတ်ႈပလၢင်ႇ ဢိၵ်ႇလူၺ်ႈၵၼ်တင်းယိတ်ႈပရေႃးႁဵၵ်ႈပၢၵ်ႇပၢႆသၢဝ်းၵေႃႉဢၼ်ပဝ်ႇၼႄးၶရႃႇၼၼ်ႉလႄႈ၊-

13မိူဝ်ႈဢၼ်ၶဝ်ၸိူဝ်းဢၼ်ပဝ်ႇၼႄးၶရႃႇ ဢိၵ်ႇတင်းၶဝ်ၸိူဝ်းဢၼ်ႁဵတ်းၵႂၢမ်းၼၼ်ႉ ၽွမ်ႉသဵင်ၵၼ်သေလႄႈ ႁဵတ်းႁႂ်ႈပဵၼ်သဵင်လဵဝ်ၵၼ်ယူႇ ႁႂ်ႈလႆႈႁဵတ်းထေႃးပၼႃႇလႄႈ ယွင်ႈယေႃးၵျေးၸူးၽြႃးပဵၼ်ၸဝ်ႈၼၼ်ႉ၊ ဢိၵ်ႇတင်းမိူဝ်ႈဢၼ်ၶဝ်ဢွၼ်ၵၼ်ပွႆႇသဵင်ၶဝ် ဢိၵ်ႇလူၺ်ႈၵၼ်တင်းၼႄးၶရႃႇလႂ်၊ သႅင်ႇလႂ်၊ မဵဝ်းတူႇရီႉယႃႇလႂ်လႄႈ ယွင်ႈယေႃးထႃႇဝရႃႉၽြႃးယူႇသေလႄႈဝႃႈ၊ မၼ်းၸဝ်ႈလီမျၢတ်ႈၼႃႇလူင်လၢင်တီႈၶႃႈဢေႃႈ။ ၵရူႉၼႃႇမၼ်းၸဝ်ႈတႄႇယူႇတႃႇသေႇမၼ်ႈၶိူင်ႇတီႈၶႃႈဢေႃႈ၊ ဝႃႈၼင်ႇၼႆယူႇၼၼ်ႉၸိုင်၊ ႁိူၼ်းထႃႇဝရႃႉၽြႃးတဵမ်ဝႆႉတင်းမွၵ်ႇၵုမ်ႈ၊-

14ထၼ်ႈပေႃးယိတ်ႈပရေႃးႁဵၵ်ႈၸိူဝ်းၼၼ်ႉဢမ်ႇၸုၵ်းၶၢမ်ႇယူႇ ႁႂ်ႈလႆႈပွင်ႁဵတ်းဢမူႉၸဝ်ႈလႆႈၵွပ်ႈပိူဝ်ႈမွၵ်ႇၵုမ်ႈၼၼ်ႉဢေႃႈ။ လွင်ႈမၼ်းၸမ်ႉ မုၼ်ၽုင်းထႃႇဝရႃႉၽြႃးတဵမ်ဝႆႉၵႃႈၼႂ်းႁိူၼ်းထႃႇဝရႃႉၽြႃးၼၼ်ႉဢေႃႈ။

← Chapter 4 Jump to: Chapter 6 →