2 Chronicles 14

Shan

← Chapter 13 Jump to: Chapter 15 →

1ဢၽီႉယႃႉ ၼၼ်ႉ ၼွၼ်းလပ်းလူၺ်ႈၵၼ်တင်းပူႇမၼ်းမွၼ်ႇမၼ်းၸိူဝ်းၼၼ်ႉလႄႈ ၶဝ်ဢဝ်မၼ်းသၢင်းၵျူဝ်ႇၵႃႈၼႂ်းဝဵင်း တႃႇဝိတ်ႈ ဢေႃႈ။ ဢႃႇသႃႉ လုၵ်ႈၸၢႆးၸဝ်ႈၼၼ်ႉ ၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းလႄႈ၊ ၼႂ်းၸူဝ်ႈပၢၼ်မၼ်းၼၼ်ႉ မိူင်းၸဝ်ႈတဵတ်ႇလီၼိမ်လီသိပ်းပီႊတဵမ်တဵမ်ဢေႃႈ။-

2ဢႃႇသႃႉ ၼၼ်ႉႁဵတ်းလွင်ႈတၢင်းဢၼ်လီဢၼ်ငၢမ်း၊ လွင်ႈတၢင်းဢၼ်သိုဝ်ႈဢၼ်တေႃႇ သိုဝ်ႈၼႃႈတႂ်ႈတႃထႃႇဝရႃႉၽြႃး ၽြႃးပဵၼ်ၸဝ်ႈမၼ်းဢေႃႈ။-

3မၼ်းယႃႉၽဵဝ်ႈယိတ်ႈပလၢင်ႇၽြႃးၵူၼ်းတၢင်ႇၸိူဝ်ႉတၢင်ႇမဵဝ်း ဢိၵ်ႇတင်းထႃႇၼႃႉတီႈသုင်တင်းလၢႆပႅတ်ႈဢေႃႈ။ မၼ်းၵိူၼ်ႇယႃႉသဝ်တီႈၵူဝ်းၵႂၢႆႇပႅတ်ႈလႄႈ ပမ်ႈတူၼ်ႈ ဢႃႇသရႃႉ တင်းလၢႆလူမ်ႉပႅတ်ႈဢေႃႈ။-

4မၼ်းမီးဢမိင်ႉႁႂ်ႈၵူၼ်းမဵဝ်း ယူႉတႃႉ တင်းလၢႆ ဢွၼ်ၵၼ်ႁႃဢဝ် ထႃႇဝရႃႉၽြႃး ၽြႃးပဵၼ်ၸဝ်ႈပူႇၶဝ်မွၼ်ႇၶဝ်လႄႈ ပႂ်ႉၵမ်ပႂ်ႉၸွမ်းတြႃးၸဝ်ႈဢိၵ်ႇတင်းပိင်းၺၢပ်ႈၸဝ်ႈဢေႃႈ။-

5မၼ်းပႄႇၽဵဝ်ႈထႃႇၼႃႉတီႈသုင် ဢိၵ်ႇတင်းရုၵ်ႈထူႉၵၢင်ဝၼ်းတင်းလၢႆပႅတ်ႈသေၵႃႈၼႂ်းဝၢၼ်ႈၼႂ်းဝဵင်း ယူႉတႃႉ ၸိူဝ်းၼၼ်ႉလႄႈ ဢမူႉသိုင်ႇၸိုင်ႈဝၢၼ်ႈမိူင်းၸဝ်ႈ မီးတၢင်းဢၼ်တဵတ်ႇလီၼိမ်လီဝႆႉ ၵႃႈတီႈၽၢႆႇၼႃႈမၼ်းဢေႃႈ။-

6မိူဝ်ႈၼၼ်ႉမၼ်းတႄႇႁဵတ်းဝဵင်းဢၼ်မၼ်ႈၶိူင်ႇၵႃႈၼႂ်းမိူင်း ယူႉတႃႉ ၵွပ်ႈပိူဝ်ႈဢၼ်ထႃႇဝရႃႉၽြႃးပၼ်ဢၶႂၢင်ႉဢၼ်လႆႈၵတ်းယဵၼ်ၶျၢမ်းသႃႇတီႈမၼ်းလႄႈ၊ မိူင်းၸဝ်ႈတဵတ်ႇလီၼိမ်လီလႄႈ ၵၢင်းလွတ်ႈတင်းဢမူႉတၢင်းဢၼ်တိုၵ်းသိုၵ်းၼၼ်ႉဢေႃႈ။

7လွင်ႈမၼ်းၸမ်ႉ မၼ်းမီးဢမိင်ႉတီႈၵူၼ်းမဵဝ်း ယူႉတႃႉ တင်းလၢႆလႄႈဝႃႈ၊ ဢွၼ်ၵၼ်ပွင်ႁဵတ်းပွင်မႄး ဝဵင်းဢၼ်ၸိူဝ်ႉၼင်ႇၼႆၼၼ်ႉလႄႈ ႁဵတ်းလမ်းဝဵင်း၊ လၢင်းၸီး၊ ၽၵ်းတူ တင်းၵိူၼ်ႇၽၵ်းတူတင်းလၢႆတႃႉႁဝ်း။ မိူင်းၸဝ်ႈယင်းမီးယူႇတႂ်ႈမိုဝ်းႁဝ်း ၵွပ်ႈပိူဝ်ႈဢၼ်ႁဝ်းၵျူဝ်းၸႃးႁႃထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၼၼ်ႉဢေႃႈ။ ႁဝ်းၵျူဝ်းၸႃးႁႃမၼ်းၸဝ်ႈလႄႈ မၼ်းၸဝ်ႈပၼ်ဢၶႂၢင်ႉဢၼ်လႆႈတဵတ်ႇလီၼိမ်လီၵူႈၽၢႆႇၵူႈပႃႈယဝ်ႉ၊ ဝႃႈၼင်ႇၼႆဢေႃႈ ၼင်ႇၼၼ်လႄႈၶဝ်ဢွၼ်ၵၼ်ပွင်ႁဵတ်းပွင်မႄးလႄႈ ႁဵတ်းလႆႈပဵၼ်လႆႈဢေႃႈ။-

8ဢႃႇသႃႉ ၼၼ်ႉမီးႁူဝ်ႁၢၼ်ၵူၼ်းသိုၵ်းမဵဝ်း ယူႉတႃႉ ဢၼ်ယိပ်းၵမ်ၶိူင်ႈႁႄႉလၢၵ်ႈၼၢၵ်ႈလူင်လႂ် တင်းႁွၵ်ႇလႂ်ၼၼ်ႉ သၢမ်သႅၼ်၊ ႁူဝ်ႁၢၼ်ၵူၼ်းသိုၵ်းမဵဝ်း ပိၼ်ႇယႃႇမိၼ်ႇ ဢၼ်ယိပ်းၵမ်ၶိူင်ႈႁႄႉလၢၵ်ႈၼၢၵ်ႈဢွၼ်ႇလႂ် တင်းၵၢင်ႇလႂ်ၼၼ်ႉ သွင်သႅၼ်ပၢႆပႅတ်ႇမိုၼ်ႇလႄႈ ၶဝ်တင်းသဵင်ႈတင်းလူင် ပဵၼ်ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇဢေႃႈ။-

9ၽဝ်ႇၼိုင်ႈ ၸေးရႃႉ ၶုၼ်မိူင်း ၵူႉသႃႉ ၼၼ်ႉ ၶီႇဢဝ်ဢိၵ်ႇလူၺ်ႈၵၼ်တင်းႁူဝ်ႁၢၼ်ၵူၼ်းသိုၵ်းလၢၼ်ႉၼိုင်ႈ တင်းလေႃႉရထႃးသၢမ်ပၢၵ်ႇမႃးလႄႈ ႁွတ်ႈထိုင်ၵႃႈတီႈဝဵင်း မရေးသႃႉ သေယဝ်ႉ၊-

10ဢႃႇသႃႉ ဢွၵ်ႇႁႂ်ႈလႆႈႁႄႉႁပ်ႉတိုၵ်းလႄႈ ၶဝ်ယၼ်ႇတပ်ႉၶၢင်းတပ်ႉၶဝ်ႈၸူးၵၼ်ၵႃႈတီႈပၢင်ႇႁူၺ်ႈ ၸေႇၽသႃႉ ၵႃႈႁိမ်းဝဵင်း မရေးသႃႉ ၼၼ်ႉဢေႃႈ။-

11ဢႃႇသႃႉ သႅၼ်ႇႁွင်ႉတီႈထႃႇဝရႃႉၽြႃး ၽြႃးပဵၼ်ၸဝ်ႈမၼ်းလႄႈဝႃႈ၊ ထႃႇဝရႃႉၽြႃးတီႈၶႃႈ၊ လိူဝ်သေၸဝ်ႈႁဝ်းၼႆႉဢမ်ႇမီးၽူႈလႂ်ဢၼ်ၸွႆႈထႅမ်မႃႉၸႃႉ ၵႃႈတီႈၵႄႈဝူင်ႈၵၢင်ၵေႃႉဢၼ်ႁႅင်းယႂ်ႇ ဢိၵ်ႇတင်းၵေႃႉဢၼ်ႁႅင်းလဵၵ်ႉၼၼ်ႉလႆႈလႃးလႃးတီႈၶႃႈ။ ထႃႇဝရႃႉၽြႃးၽြႃးပဵၼ်ၸဝ်ႈႁဝ်းၶႃႈတီႈၶႃႈ၊ ၶႅၼ်းတေႃႈၸွႆႈထႅမ်မႃႉၸႃႉၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ၶႃႈၸဝ်ႈႁဝ်းၸိူဝ်းၼႆႉသွၼ်ႈပိုင်ႈၸဝ်ႈႁဝ်းလႄႈ ဢွၼ်ၵၼ်ဢိင်ပိုင်ႈၼႃႇမႃႉၸိုဝ်ႈသဵင်ၸဝ်ႈႁဝ်းသေလႄႈ ၶီႇသိုၵ်းႁႂ်ႈလႆႈတိုၵ်းမုၵ်ႉလူင်ၸိူဝ်းလူင်ၼႆႉတီႈၶႃႈဢေႃႈ။ ထႃႇဝရႃႉၽြႃးတီႈၶႃႈ၊ ၸဝ်ႈႁဝ်းပဵၼ်ၽြႃးပဵၼ်ၸဝ်ႈၶႃႈၸဝ်ႈႁဝ်းၶဝ်တီႈၶႃႈဢေႃႈ။ ယႃႇပေႁႂ်ႈၵူၼ်းမီးဢၶႂၢင်ႉဢၼ်လႆႈပႄႉၼႅင်ႇၸဝ်ႈႁဝ်းသေၵမ်းတီႈၶႃႈ၊ ဝႃႈၼင်ႇၼႆသေယဝ်ႉ၊

12ထႃႇဝရႃႉၽြႃးပၼ်တၢမ်ႇတီႈၵူၼ်း ၵူႉသႃႉ တင်းလၢႆ ၵႃႈတီႈၽၢႆႇၼႃႈ ဢႃႇသႃႉ ဢိၵ်ႇတင်းၵူၼ်းမဵဝ်း ယူႉတႃႉ တင်းလၢႆလႄႈ၊ ၵူၼ်း ၵူႉသႃႉ ၸိူဝ်းၼၼ်ႉဢွၼ်ၵၼ်ဢွၵ်ႇပၢႆႈဢေႃႈ။-

13ဢႃႇသႃႉ ဢိၵ်ႇတင်းၵူၼ်းဢၼ်ပႃးလူၺ်ႈၵၼ်တင်းမၼ်းၸိူဝ်းၼၼ်ႉ ဢွၼ်ၵၼ်လိုပ်ႈၸွမ်းလမ်းၸွမ်းတေႃႇထိုင်ႁွတ်ႈဝဵင်း ၵေႇရႃႇ သေယဝ်ႉ၊ ၵူၼ်း ၵူႉသႃႉ ၸိူဝ်းၼၼ်ႉ တူၵ်းသုမ်းထၼ်ႈပေႃး ၶဝ်ဢမ်ႇႁတ်းၶိုၼ်းႁပ်ႉၶၢမ်ႇတိုၵ်းတေႃးၶဝ်လႆႈဢေႃႈ။ လွင်ႈမၼ်းၸမ်ႉ ၶဝ်လႆႈၶၢမ်ႇတၢင်းဢၼ်ယႃႉပႅတ်ႈၵႃႈတီႈၽၢႆႇၼႃႈထႃႇဝရႃႉၽြႃး ဢိၵ်ႇတင်းပူဝ်ႇပႃႇၸဝ်ႈတင်းလၢႆဢေႃႈ။ ၶဝ်ဢွၼ်ၵၼ်သိမ်းဢဝ်ဢုၵ်ႉၸႃႇဢၼ်ႁိမ်ႁူင်ႇလႆႈၼၼ်ႉၼမ်ၼႃႇမႃးဢေႃႈ။-

14ၶဝ်တိုၵ်းတေႃးယႃႉပႅတ်ႈဝဵင်းၵႃႈဢၼ်မီးလဵပ်ႈႁွပ်ႈ ဝဵင်း ၵေႇရႃႇ ၸိူဝ်းၼၼ်ႉ၊ ၵွပ်ႈပိူဝ်ႈတၢင်းဢၼ်ၵူဝ်ႁႄထႃႇဝရႃႉၽြႃး ႁွတ်ႈထိုင်ၵႃႈၼိူဝ်ၶဝ်ၼၼ်ႉၼၼ်ႉဢေႃႈ။ ၼင်ႇၼၼ်လႄႈ ၶဝ်ယႃႉဝဵင်းၵႃႈမီးၼၼ်ႉပႅတ်ႈ ၵွပ်ႈပိူဝ်ႈဢၼ်ၽၼ်ႇတႃႇဢုၵ်ႉၸႃႇဢၼ်ႁိမ်ႁူင်ႇလႆႈၼၼ်ႉ မီးယႂ်ႇမီးၼမ် ၵႃႈၼႂ်းၸိူဝ်းၼၼ်ႉဢေႃႈ။-

15ၶွၵ်ႈတရိၵ်ႈသၢၼ်ႇတင်းလၢႆၵေႃႈ ၶဝ်ဢွၼ်ၵၼ်ယႃႉပႅတ်ႈသေလႄႈ သိမ်းဢဝ်သူဝ်းဢိၵ်ႇတင်းၵလႃးဢုၵ်ႉၼမ်ၼႃႇလႄႈ ၶိုၼ်းမိူဝ်းၵႂႃႇၵႃႈတီႈဝဵင်း ယေႇရူႉသလႅမ်ႇ ဢေႃႈ။

← Chapter 13 Jump to: Chapter 15 →