2 Chronicles 20

Shan

← Chapter 19 Jump to: Chapter 21 →

1လိုၼ်းၼၼ်ႉၵူၼ်းမဵဝ်း မေႃႇၽႃႉ ၊ ဢိၵ်ႇတင်းၵူၼ်းမဵဝ်း ဢမ်ႇမုၼ်ႇ တင်းလၢႆ ပႃးတင်းၵူၼ်း ဢေႇတုမ်ႇ ၵမ်ႈၽွင်ႈသေလႄႈ ၶီႇမႃးႁႂ်ႈလႆႈတိုၵ်းတေႃး ယူဝ်းသၽတ်ႉ ဢေႃႈ။-

2ပိူၼ်ႈမႃးလဝ်ႊလၢတ်ႈတီႈ ယူဝ်းသၽတ်ႉ လႄႈဝႃႈ၊ မူႇၽုင်မုၵ်ႉၸိူဝ်းဢၼ်ၼမ်ၼႃႇလူင်လၢင်ၼၼ်ႉ ဢွၼ်ၵၼ်လုၵ်ႉသေၵႃႈတီႈမိူင်း သူႉရီႉ ၽၢႆႇပုၼ်ႉၼမ်ႉႁွင်ႈလူင်ၼၼ်ႉမႃးလႄႈ၊ တူၺ်းတီႈၶႃႈလူး၊ မီးယူႇၵႃႈတီႈဝဵင်း ႁႃႇၸၸုၼ်ႇတႃႇမႃႇ ဢၼ်မီးၸိုဝ်ႈဝႃႈ ဢႅၼ်ႇၵေးတီႉ ၼၼ်ႉတီႈၶႃႈဢေႃႈ။ ဝႃႈၼင်ႇၼႆသေယဝ်ႉ၊-

3ယူဝ်းသၽတ်ႉ ၵူဝ်ႁႄလႄႈ ၶျႃးၸႂ်သၽေႃးႁႂ်ႈလႆႈႁႃထႃႇဝရႃႉၽြႃးယူႇသေလႄႈ ႁႂ်ႈႁွင်ႉပၢဝ်ႇႁွင်ႉလၢတ်ႈ ၶိင်ႇဢၼ်ၵမ်တၢင်းၵိၼ်ၵႃႈၼႂ်းမိူင်း ယူႉတႃႉ တင်းမိူင်းဢေႃႈ။-

4ၵူၼ်းမဵဝ်း ယူႉတႃႉ တင်းလၢႆ ၸူႉၵၼ်တုမ်ၵၼ် ႁႂ်ႈလႆႈသူးတွင်းတီႈထႃႇဝရႃႉၽြႃးလႄႈ ဢွၼ်ၵၼ်ဢွၵ်ႇသေၵႃႈၼႂ်းဝဵင်း ယူႉတႃႉ ၵႃႈမီး မႃးႁႂ်ႈလႆႈႁႃထႃႇဝရႃႉၽြႃးဢေႃႈ။

5ယူဝ်းသၽတ်ႉ ၼၼ်ႉ လုၵ်ႉၸုၵ်းၵႃႈၼႂ်းၵၢင်ပရဵၵ်ႈသၢတ်ႈတီႈဢၼ်ၵူၼ်းမိူင်း ယူႉတႃႉ ၵူၼ်းဝဵင်း ယေႇရူႉသလႅမ်ႇ ၸူႉတုမ်ၼၼ်ႉၵႃႈတီႈၽၢႆႇၼႃႈတမ်ႇတိူင်းဢၼ်မႂ်ႇ ၵႃႈၼႂ်းႁိူၼ်းထႃႇဝရႃႉၽြႃးယူႇသေလႄႈ၊-

6သူးတွင်းလႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈပူႇမွၼ်ႇႁဝ်းၶႃႈတီႈၶႃႈ၊ ၸဝ်ႈႁဝ်းပဵၼ်ၽြႃးပဵၼ်ၸဝ်ႈၸဝ်ႈၽုင်ႇၵၢင်ႁၢဝ်ဢမ်ႇၸႂ်ႈတီႈၶႃႈႁိုဝ်။ ၸဝ်ႈႁဝ်းဢုပ်ႉပိူင်ႇသိုင်ႇၸိုင်ႈဝၢၼ်ႈမိူင်း ၵူၼ်းတၢင်ႇၸိူဝ်ႉတၢင်ႇမဵဝ်းၵႃႈမီးဢမ်ႇၸႂ်ႈတီႈၶႃႈႁိုဝ်။ ၵႃႈၼႂ်းၶႅၼ်မိုဝ်းၸဝ်ႈႁဝ်းၼၼ်ႉ၊ မီးႁႅင်းတၼ်းၶူဝ်းဢၼ်ယႂ်ႇၼႃႇထၼ်ႈပေႃးၽူႈလႂ်သေၵေႃႉသေၵူၼ်း ဢမ်ႇႁၢမ်ႈတၢပ်ႈႁႄႉၶႅၼ်ၸဝ်ႈႁဝ်းလႆႈဢမ်ႇၸႂ်ႈတီႈၶႃႈႁိုဝ်။-

7ၽြႃးပဵၼ်ၸဝ်ႈႁဝ်းၶႃႈတီႈၶႃႈ၊ ၸဝ်ႈႁဝ်းႁေႃႈၶဝ်ၸိူဝ်းဢၼ်ယၢမ်ႈယူႇ ၵႃႈၼႂ်းမိူင်းၼႆႉၸိူဝ်းၼၼ်ႉ ဢွၵ်ႇပႅတ်ႈသေၵႃႈတီႈၽၢႆႇၼႃႈၵူၼ်းၸဝ်ႈႁဝ်းမဵဝ်း ဢီႉသရေႇလႃႉ လႄႈ ဢဝ်မိူင်းၼႆႉပၼ်တီႈလုၵ်ႈလၢၼ် ဢႃႇပြႃႇႁၢမ်ႇ ၵေႃႉသေႈၸဝ်ႈႁဝ်းၼၼ်ႉသေလႄႈ ဢမ်ႇၸႂ်ႈတီႈၶႃႈႁိုဝ်။-

8ၶဝ်ၼၼ်ႉတူၵ်းတီႈတူၵ်းလႅၼ်ယူႇၵႃႈၼႂ်းမၼ်းသေလႄႈ ဢွၼ်ၵၼ်ႁဵတ်းထႃႇၼႃႉတီႈမူတ်းၸၢင်ႇၵႃႈၼႂ်းမၼ်း ပုၼ်ႈၼႃႇမႃႉၸိုဝ်ႈသဵင်ၸဝ်ႈႁဝ်းလႄႈ၊-

9လဝ်ႊလၢတ်ႈလႄႈဝႃႈ၊ မိူဝ်ႈဢၼ်ၽေးဢူႉပၢတ်ႈဢၼ်ဝႃႈ၊ ၽေးလၢပ်ႇ၊ ၽေးတၢင်းဢၼ်ပၼ်တၢမ်ႇ ၽေးၵႃႇလႃႉႁႃႈလႅင်မိူင်း၊ ၽေးတၢင်းဢၼ်ဢိုပ်းယၢၵ်ႈၼၼ်ႉ၊ သေၸိူဝ်ႉသေပိူင်ႁွတ်ႈထိုင်ၵႃႈၼိူဝ်ၶႃႈၸဝ်ႈႁဝ်းၶဝ်လႄႈ၊ ၶႃႈၸဝ်ႈႁဝ်းၶဝ်ဢွၼ်ၵၼ်ၸုၵ်းယူႇၵႃႈတီႈၽၢႆႇၼႃႈႁိူၼ်းၸဝ်ႈႁဝ်းၼႆႉ ဢိၵ်ႇတင်းၵႃႈတီႈၽၢႆႇၼႃႈၸဝ်ႈႁဝ်း ၵွပ်ႈပိူဝ်ႈဢၼ်ၼႃႇမႃႉၸိုဝ်ႈသဵင်ၸဝ်ႈႁဝ်း မီးၵႃႈတီႈႁိူၼ်းၸဝ်ႈၼႆႉၼၼ်ႉယူႇ၊ ထွၵ်ႈလူၺ်ႈတုၵ်ႉၶႃႉတၢင်းၽၢၼ်ၶႃႈၸဝ်ႈႁဝ်းၶဝ်ယူႇသေလႄႈ ႁွင်ႉသႅၼ်ႇၸိုင် ၶႅၼ်းတေႃႈထွမ်ႇငိၼ်းဢဝ်လႄႈ ဢဵတ်းလူၸွႆႈထႅမ်မႃႉၸႃႉသေၵမ်းတီႈၶႃႈ၊ ဝႃႈၼင်ႇၼႆဝႆႉတီႈၶႃႈဢေႃႈ။-

10မိူဝ်ႈလဵဝ်ၼႆႉ ၶႅၼ်းတေႃႈလူတူၺ်းလွင်ႈဢၼ်ၵူၼ်းမဵဝ်း ဢမ်ႇမုၼ်ႇ ၊ ၵူၼ်းမဵဝ်း မေႃႇၽႃႉ ၊ ၵူၼ်းလွႆ ၸီႉရႃႉ ဢၼ်ၸဝ်ႈႁဝ်းဢမ်ႇပၼ်ဢၶႂၢင်ႉဢၼ်ၵူၼ်းမဵဝ်း ဢီႉသရေႇလႃႉ တင်းလၢႆ လႆႈတိုၵ်းလႆႈတေႃးၼႂ်းမိူဝ်ႈဢၼ်ၶဝ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉလႄႈ ဝႄႈပိူင်ႈသေလႄႈ ယင်းဢမ်ႇယႃႉပႅတ်ႈလႄႈယူႇၸိူဝ်းၼၼ်ႉ၊-

11ဢွၼ်ၵၼ်မႃးႁႂ်ႈလႆႈႁေႃႈၶႃႈၸဝ်ႈႁဝ်းၶဝ်ဢွၵ်ႇသေၵႃႈၼႂ်းလိၼ်တီႈဢၼ်ၶၢမ်ႇဢမူၺ်ႇ ဢၼ်ၸဝ်ႈႁဝ်းပၼ်ပိူင်ႇၼႆႉလႄႈ တွပ်ႇတႅၼ်းပၼ်ၵျေးၸူးၸိူဝ်ႉၼင်ႇႁိုဝ်ၼၼ်ႉသေၵမ်းတီႈၶႃႈ။-

12ၽြႃးပဵၼ်ၸဝ်ႈႁဝ်းၶႃႈတီႈၶႃႈ၊ ယင်းဢမ်ႇၸီႇယၢင်ႇၶဝ်လႄႈ တၵ်းယူႇတီႈၶႃႈႁိုဝ်။ ႁႂ်ႈၶႃႈၸဝ်ႈႁဝ်းၶဝ်ဢမ်ႇတၢတ်ႈၼိူင်ႇလႆႈ ႁႂ်ႈလႆႈႁၢမ်ႈတၢပ်ႈႁႄႉၶႅၼ်မူႇၽုင်မုၵ်ႉၸိူဝ်းလူင် ဢၼ်မႃးႁႂ်ႈလႆႈတိုၵ်းတေႃးၶႃႈၸဝ်ႈႁဝ်းၶဝ်ၼၼ်ႉတီႈၶႃႈ။ တၵ်းလႆႈႁဵတ်းၸိူဝ်ႉၼင်ႇႁိုဝ်ဢမ်ႇႁူႉတီႈၶႃႈ။ တႃၶႃႈၸဝ်ႈႁဝ်းၶဝ်ၼႆႉဢွၼ်ၵၼ်ၸပ်းၸဝ်ႈႁဝ်းၵူၺ်းလႄႈ ယူႇတီႈၶႃႈဢေႃႈ၊ ဝႃႈၼင်ႇၼႆလႄႈ၊-

13ၵူၼ်းမဵဝ်း ယူႉတႃႉ တင်းသဵင်ႈတင်းလူင်ဢိၵ်ႇတင်းလုၵ်ႈၶဝ်၊ မေးၶဝ်၊ လုၵ်ႈဢွၼ်ႇလႅင်ၶဝ် ဢွၼ်ၵၼ်ၸုၵ်းယူႇၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။

14မိူဝ်ႈၼၼ်ႉ ဝီႉၺိၺ်ႇထႃႇဝရႃႉၽြႃးတူၵ်းႁွတ်ႈၵႃႈၼိူဝ် ယႁႃႇၸေးလႃႉ ဢၼ်ပဵၼ်လုၵ်ႈၸၢႆး ၸႃႇၶရီႉ ၊ ဢၼ်ပဵၼ်လုၵ်ႈၸၢႆး ပေႇၼႃႇယႃႉ ၊ ဢၼ်ပဵၼ်လုၵ်ႈၸၢႆး ယေႇယေႇလႃႉ ၊ ဢၼ်ပဵၼ်လုၵ်ႈၸၢႆး မတ်ႉတၼီႉ မဵဝ်း လေႇဝီႉ ၊ ၸိူဝ်ႉၶိူဝ်း ဢႃႇသပ်ႉ ၼၼ်ႉ ၵႃႈတီႈၼႂ်းၵၢင်ပရဵၵ်ႈသၢတ်ႈလႄႈ၊-

15မၼ်းလၢတ်ႈလႄႈဝႃႈ၊ ၶုၼ်လူင် ယူဝ်းသၽတ်ႉ တင်းၵူၼ်းမိူင်း ယူႉတႃႉ ၵူၼ်းဝဵင်း ယေႇရူႉသလႅမ်ႇ တင်းသဵင်ႈတင်းလူင်ၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းတႃႉ၊ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ယႃႇပေဢွၼ်ၵၼ်ၵူဝ်ႁႄ၊ ယႃႇပေဢွၼ်ၵၼ်ၸႂ်လူႉ ၵွပ်ႈပိူဝ်ႈမူႇၽုင်မုၵ်ႉၸိူဝ်းလူင်ၼၼ်ႉ၊ ဢမူႉတိုၵ်းသိုၵ်းၼၼ်ႉပဵၼ်ပုၼ်ႈတႃႇသူဢမ်ႇၸႂ်ႈ။ ပဵၼ်ပုၼ်ႈတႃႇၽြႃးပဵၼ်ၸဝ်ႈဢေႃႈ။-

16ဝၼ်းမိူဝ်ႈၽုၵ်ႈဢွၼ်ၵၼ်ၶီႇလူင်းၵႂႃႇၸူးတီႈဢၼ်ၶဝ်မီးၼၼ်ႉတႃႉ။ ၶဝ်ယင်းတိုၵ်ႉဢွၼ်ၵၼ်ၸွမ်းသဵၼ်ႈတၢင်းဢၼ်ၶိုၼ်ႈၸူးဝဵင်း ၸီႉၸႃႉ ၼၼ်ႉမႃးယူႇလႄႈ သူတၵ်းထူပ်းႁၼ်ၶဝ်ၵႃႈတီႈသူပ်းပၢင်ႇႁူၺ်ႈ သိုဝ်ႈထိူၼ်ႇ ယေႇႁူၺ်ႇလႃႉ ၼၼ်ႉဢေႃႈ။-

17ၵူၺ်းၵႃႈ ၵူၼ်းမိူင်း ယူႉတႃႉ ၊ ၵူၼ်းဝဵင်း ယေႇရူႉသလႅမ်ႇ ၶဝ်ဢိူၺ်း၊ သူဢမ်ႇမီးလွင်ႈဢၼ်တၵ်းလႆႈတိုၵ်းသိုၵ်းၼႂ်းပွႆးသိုၵ်းၼႆႉ။ ဢွၼ်ၵၼ်ႁႂ်ႈတူဝ်သူတႄႇၼိမ်ၵၼ်လႄႈ ၸုၵ်းယူႇၼိမ်ၼိမ်လီလီသေလႄႈ လူတူၺ်းၵျေးၸူးတၢင်းဢၼ်ထႃႇဝရႃႉၽြႃး ၵႄႇသႄႇၶျွတ်ႈဢဝ်မီးယူႇတီႈသူၼၼ်ႉတႃႉ။ ယႃႇပေဢွၼ်ၵၼ်ၵူဝ်ႁႄ။ ယႃႇပေဢွၼ်ၵၼ်ၸႂ်လူႉ။ ဢွၼ်ၵၼ်ၶီႇၵႂႃႇၼႂ်းဝၼ်းမိူဝ်ႈၽုၵ်ႈတႃႉ။ ထႃႇဝရႃႉၽြႃးတၵ်းမီးယူႇလူၺ်ႈၵၼ်တင်းသူဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆဢေႃႈ။-

18ယူဝ်းသၽတ်ႉ ၼၼ်ႉ ၶုပ်ႉမူပ်ႇဝၢင်းႁူဝ်ၵႃႈၼိူဝ်လိၼ်လႄႈ ၵူၼ်းမိူင်း ယူႉတႃႉ ၵူၼ်းဝဵင်း ယေႇရူႉသလႅမ်ႇ တင်းသဵင်ႈတင်းလူင်ဢွၼ်ၵၼ်ၶုပ်ႉမူပ်ႇၵႃႈတီႈၽၢႆႇၼႃႈထႃႇဝရႃႉၽြႃးလႄႈ ၵူဝ်းၵႂၢႆႇထႃႇဝရႃႉၽြႃးဢေႃႈ။-

19ၵူၼ်းၸိူဝ်ႉၶိူဝ်း ၵေႃႇႁတ်ႉ ဢိၵ်ႇတင်း ၵူၼ်းၸိူဝ်ႉၶိူဝ်း ၵေႃးရႃႉ မဵဝ်း လေႇဝီႉ ၸိူဝ်းၼၼ်ႉ ဢွၼ်ၵၼ်ၸုၵ်းယူႇ ႁႂ်ႈလႆႈႁဵတ်းတင်းသဵင်ဢၼ်ယႂ်ႇၼႃႇႁႅင်းၼႃႇလူင်လၢင်သေလႄႈ ယွင်ႈယေႃးထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ဢေႃႈ။

20ၼႂ်ၽုၵ်ႈၼၼ်ႉ ၶဝ်ဢွၼ်ၵၼ်လုၵ်ႉၸဝ်ႉၸဝ်ႉလႄႈ ၵႂႃႇၵႃႈတီႈထိူၼ်ႇ တေႇၵေႃႇ ဢေႃႈ။ ၼႂ်းမိူဝ်ႈဢၼ်ၶဝ်ယင်းတိုၵ်ႉဢွၵ်ႇၵႂႃႇယူႇၼၼ်ႉ၊ ယူဝ်းသၽတ်ႉ ၸုၵ်းယူႇသေလႄႈမီးဢမိင်ႉလႄႈဝႃႈ၊ ၵူၼ်းမိူင်း ယူႉတႃႉ ၊ ၵူၼ်းဝဵင်း ယေႇရူႉသလႅမ်ႇ ၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းတႃႉ။ ဢွၼ်ၵၼ်ယုမ်ႇမၢတ်ႈထႃႇဝရႃႉၽြႃး ၽြႃးပဵၼ်ၸဝ်ႈသူတႃႉ ပေႃးႁဵတ်းၸိူဝ်ႉၼင်ႇၼၼ်ၸိုင်၊ သူတၵ်းဢွၼ်ၵၼ်တႄႇၼိမ်ဢေႃႈ။ ဢွၼ်ၵၼ်ယုမ်ႇမၢတ်ႈပရေႃးၽႅတ်ႈမၼ်းၸဝ်ႈတင်းလၢႆၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ သူတၵ်းဢွၼ်ၵၼ်ႁဵတ်းလႆႈပဵၼ်လႆႈဢေႃႈ၊ ဝႃႈၼင်ႇၼႆဢေႃႈ။-

21မၼ်းတိူင်ႇပၢင်ႇၵၼ်တင်းၵူၼ်းတင်းလၢႆသေယဝ်ႉ၊ ၶၢၼ်းဝႆႉၶဝ်ၸိူဝ်းဢၼ် ႁဵတ်းၵႂၢမ်းတီႈထႃႇဝရႃႉၽြႃးလႄႈ ယွင်ႈယေႃးမုၼ်သရေႇတၢင်းဢၼ်မူတ်းၸၢင်ႇၸဝ်ႈ ၼႂ်းမိူဝ်ႈဢၼ်ၶဝ်ဢွၼ်ႁူဝ်တပ်ႉၶီႇၵႂႃႇၼၼ်ႉယူႇသေလႄႈဝႃႈ၊ ဢွၼ်ၵၼ်ယွင်ႈယေႃးမုၼ်ၵျေးၸူးထႃႇဝရႃႉၽြႃးတႃႉ။ လွင်ႈမၼ်းၸမ်ႉၵရူႉၼႃႇမၼ်းၸဝ်ႈ တႄႇယူႇတႃႇသေႇဢမ်ႇထၢတ်ႇဢေႃႈ၊ ဝႃႈၼင်ႇၼႆၼၼ်ႉဢေႃႈ။-

22မိူဝ်ႈဢၼ်ၶဝ်ၼၼ်ႉဢွၼ်ၵၼ်ၸႃႉႁဵတ်းၵႂၢမ်းဢၼ်ယွင်ႈယေႃးၼၼ်ႉၸိုင် ထႃႇဝရႃႉၽြႃးႁဵတ်းတပ်ႉသိုၵ်းမူၵ်း ဢၼ်လွမ်ပႂ်ႉယူႇၽၢႆႇၼိုင်ႈတင်းၵူၼ်းမဵဝ်း ဢမ်ႇမုၼ်ႇ ၊ ၵူၼ်းမဵဝ်း မေႃႇၽႃႉ ၊ ၵူၼ်းလွႆ ၸီႉရႃႉ ဢၼ်မႃးႁႂ်ႈလႆႈတိုၵ်းတေႃးမိူင်း ယူႉတႃႉ ၸိူဝ်းၼၼ်ႉလႄႈ ၶဝ်ၼၼ်ႉလႆႈၶၢမ်ႇတၢင်းဢၼ်ယႃႉပႅတ်ႈဢေႃႈ။-

23လွင်ႈမၼ်းၸမ်ႉ ၵူၼ်းမဵဝ်း ဢမ်ႇမုၼ်ႇ ၊ တင်းၵူၼ်းမဵဝ်း မေႃႇၽႃႉ ၸိူဝ်းၼၼ်ႉ ဢွၼ်ၵၼ်ၸုၵ်းယူႇၽၢႆႇၼိုင်ႈ တင်းၵူၼ်းလွႆ ၸီႉရႃႉ တင်းလၢႆ ႁႂ်ႈလႆႈၶႃႈၽၼ်းဢဝ်ၶဝ်တၢႆလႄႈ ယႃႉၽဵဝ်ႈၶဝ်ပႅတ်ႈ ႁႂ်ႈၵူၼ်းလွႆ ၸီႉရႃႉ ၸိူဝ်းၼၼ်ႉ မူတ်းသဵင်ႈသေယဝ်ႉ၊ ၶဝ်ၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ်တိုၵ်းတေႃးၵၼ်လႄႈ ႁွတ်ႈထိုင်တၢင်းဢၼ်လူႉလႅဝ်ဢေႃႈ။-

24မိူဝ်ႈဢၼ်ၵူၼ်း ယူႉတႃႉ တင်းလၢႆႁွတ်ႈထိုင်ၵႃႈတီႈလၢင်းၸီး တီႈဢၼ်မုင်ႈတူၺ်းဢၼ်မီးၵႃႈတီႈထိူၼ်ႇၼၼ်ႉလႄႈလူတူၺ်း မူႇၽုင်မုၵ်ႉၸိူဝ်းၼၼ်ႉၸိုင်၊ ၶဝ်ၸိူဝ်းၼၼ်ႉပဵၼ်တူဝ်တၢႆလႄႈ လူမ်ႉသိူဝ်ႇၵႃႈၼိူဝ်လိၼ်ဝႆႉဢေႃႈ။ ဢမ်ႇလွတ်ႈသေၵေႃႉသေၵူၼ်း။-

25မိူဝ်ႈဢၼ် ယူဝ်းသၽတ်ႉ ဢိၵ်ႇတင်းၵူၼ်းမၼ်းၸိူဝ်းၼၼ်ႉ ဢွၼ်ၵၼ်မႃးႁႂ်ႈလႆႈဢဝ်ဢုၵ်ႉၸႃႇ ဢၼ်ႁိမ်လႆႈၼၼ်ႉၸိုင်၊ ၶဝ်ထူပ်းႁၼ်ဢုၵ်ႉၸႃႇဢၼ်ၼမ်ၼႃႇလူင်လၢင်လႂ်၊ တူဝ်တၢႆလႂ်၊ ၶိူင်ႈပိူင်ဢၼ်ထိူၵ်ႈၵႃႈထိူၵ်ႈၶၼ်ဢၼ်ၶဝ်ဢွၼ်ၵၼ်ထွတ်ႇဢဝ်ထၼ်ႈပေႃးဢမ်ႇႁၢပ်ႇဢဝ်ၵႂႃႇလႆႈလႂ်ၸိူဝ်းၼၼ်ႉဢေႃႈ။ ၵွပ်ႈပိူဝ်ႈဢၼ်ဢုၵ်ႉၸႃႇဢၼ်ႁိမ်လႆႈၸိူဝ်းၼၼ်ႉၼမ်ၼႃႇလူင်လၢင်လႄႈ၊ ၶဝ်ဢွၼ်ၵၼ်သိမ်းဢဝ်သၢမ်ဝၼ်းတဵမ်တဵမ်ဢေႃႈ။

26ၼႂ်းဝၼ်းဢၼ်ၸတုၵ်ႉထႃႉၼၼ်ႉ၊ ၶဝ်ၸူႉၵၼ်တုမ်ၵၼ်ၵႃႈတီႈပၢင်ႇႁူၺ်ႈ ပႃႇရႃႇၶႃႉ လႄႈ ဢွၼ်ၵၼ်ယွင်ႈယေႃးပၼ်တၢင်းလီတီႈထႃႇဝရႃႉၽြႃးဢေႃႈ။ ၵွပ်ႈပိူဝ်ႈၼင်ႇၼၼ်လႄႈၵႃႈတီႈၼၼ်ႈၼၼ်ႉ လႆႈၶၢမ်ႇတၢင်းဢၼ်ႁွင်ႉႁဵၵ်ႈၸိုဝ်ႈပၢင်ႇႁူၺ်ႈ ပႃႇရႃႇၶႃႉ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-

27မိူဝ်ႈၼၼ်ႉၵွပ်ႈပိူဝ်ႈဢၼ် ထႃႇဝရႃႉၽြႃးပၼ်ဢၶႂၢင်ႉဢၼ်ၶဝ်လႆႈၸူမ်းသိူဝ်းၵႃႈၼိူဝ်ရၢၼ်ႇသူႇၶဝ်တီႈၶဝ်လႄႈ ယူဝ်းသၽတ်ႉ ၼၼ်ႉ ဢွၼ်ႁူဝ်လႄႈ ၵူၼ်းမိူင်း ယူႉတႃႉ ၵူၼ်းဝဵင်း ယေႇရူႉသလႅမ်ႇ ၵႃႈမီးၼၼ်ႉ မီးတင်းၸႂ်ဢၼ်ၸူမ်းသိူဝ်းလႄႈ ဢွၼ်ၵၼ်ၶိုၼ်းမိူဝ်းၵႃႈတီႈဝဵင်း ယေႇရူႉသလႅမ်ႇ လႄႈ၊-

28ပႃးဢဝ်တင်းတိင်ႇ တရေႃး ၼႄးၶရႃႇယူႇသေလႄႈႁွတ်ႈထိုင်ဝဵင်း ယေႇရူႉသလႅမ်ႇ ၸူး ၵႃႈတီႈႁိူၼ်းၽြႃးပဵၼ်ၸဝ်ႈဢေႃႈ။-

29တၢင်းဢၼ်ၵူဝ်ႁႄထႃႇဝရႃႉၽြႃး ႁွတ်ႈထိုင်ၵႃႈၼိူဝ်သိုင်ႇၸိုင်ႈဝၢၼ်ႈမိူင်းတင်းသဵင်ႈတင်းလူင်မိူဝ်ႈဢၼ်ၶဝ် ငိၼ်းလွင်ႈဢၼ်ထႃႇဝရႃႉၽြႃး တိုၵ်းတေႃးရၢၼ်ႇသူႇမဵဝ်း ဢီႉသရေႇလႃႉ ၸိူဝ်းၼၼ်ႉပႅတ်ႈၼၼ်ႉဢေႃႈ။-

30ၼင်ႇၼၼ်လႄႈ သိုင်ႇၸိုင်ႈဝၢၼ်ႈမိူင်း ယူဝ်းသၽတ်ႉ ၼၼ်ႉ သႃႇယႃႇလီငၢမ်း ၵွပ်ႈပိူဝ်ႈဢၼ်ၽြႃးပဵၼ်ၸဝ်ႈပၼ်ဢၶႂၢင်ႉ ဢၼ်လႆႈထၢတ်ႇသိုၵ်းယဵၼ်သိုၵ်းသေၵႃႈတီႈၵူႈတီႈၵူႈလႅၼ်ၼၼ်ႉဢေႃႈ။

31ယူဝ်းသၽတ်ႉ ဢုပ်ႉပိူင်ႇၸၢမ်ႇၸႃး မိူင်း ယူႉတႃႉ လႄႈ မိူဝ်ႈဢၼ်ဢသၢၵ်ႈမၼ်းလႆႈသၢမ်သိပ်းပၢႆႁႃႈပီႊၼၼ်ႉၸိုင် မၼ်းၸႃႉၼင်ႈႁၢင်ႈၼင်ႈႁေႃလႄႈ ဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရူႉသလႅမ်ႇ သၢဝ်းပၢႆႁႃႈပီႊဢေႃႈ၊ ၸိုဝ်ႈသဵင်မႄႈၸဝ်ႈၸမ်ႉ၊ ပဵၼ် ဢၸူႉၽႃႉ လုၵ်ႈယိင်း သီႉလႁီႉ ဢေႃႈ။-

32မၼ်းၼၼ်ႉ ယင်းဢမ်ႇဝႄႈပိူင်ႈသေသဵၼ်ႈတၢင်းဢၼ် ဢႃႇသႃႉ ၸဝ်ႈပေႃႈမၼ်းၸွမ်းၼၼ်ႉလႄႈ ၸွမ်းတင်းသဵင်ႈတင်းမူတ်းယူႇသေလႄႈ ႁဵတ်းဢၼ်လီဢၼ်ငၢမ်းသိုဝ်ႈၼႃႇတႂ်ႈတႃထႃႇဝရႃႉၽြႃးဢေႃႈ။-

33ၼႂ်းဝႃႈၼၼ်သေၵေႃႈမၼ်းဢမ်ႇပႄႇၽဵဝ်ႈထႃႇၼႃႉတီႈသုင်တင်းလၢႆပႅတ်ႈ။ လွင်ႈမၼ်းၸမ်ႉ ၵူၼ်းတင်းလၢႆယင်းဢမ်ႇပႆႇၶျႃးၸႂ်သၽေႃးႁႂ်ႈလႆႈပိုင်ႈဢိင်ၽြႃးပဵၼ်ၸဝ်ႈပူႇမွၼ်ႇၶဝ်လႄႈယူႇဢေႃႈ။-

34လွင်ႈတၢင်း ယူဝ်းသၽတ်ႉ ဢၼ်ယင်းၵိုတ်းယင်းၵျၢၼ်ႇ ဢဝ်ၸဵမ်ငဝ်ႈတေႃႇပၢႆၸိူဝ်းၼၼ်ႉ တႅမ်ႈမၢႆဝႆႉမီးယူႇၵႃႈၼႂ်းလိၵ်ႈဢၼ် ယေႇႁူႉ လုၵ်ႈၸၢႆး ႁႃႇၼၼီႉ ၸီႇယၢင်ႇသိုပ်ႇသႂ်ႇဝႆႉတီႈရႃႇၸဝၢင်ႇ ဢီႉသရေႇလႃႉ ၼၼ်ႉယူႇဢေႃႈ။

35လိုၼ်းၼၼ်ႉ ယူဝ်းသၽတ်ႉ ၶုၼ်ႁေႃၶမ်း ယူႉတႃႉ ၼၼ်ႉ ႁဵတ်းၵေႃႉႁူမ်ႈပွင်းလူၺ်ႈၵၼ်တင်း ဢႃႇၶၸီႉ ၶုၼ်ႁေႃၶမ်း ဢီႉသရေႇလႃႉ ဢၼ်ႁဵတ်းဢမူႉဢႃႉထမ်ႇမႃႉၼႃႇလူင်လၢင်ၼၼ်ႉဢေႃႈ။-

36မၼ်းႁဵတ်းၵေႃႉႁူမ်ႈပွင်းလူၺ်ႈၵၼ်တင်းမၼ်းၼၼ်ႉၸိူဝ်ႉၼင်ႇၼၼ် ႁႂ်ႈလႆႈႁဵတ်းႁိူဝ်းသၢင်းၽေႃးတင်းလၢႆ ပုၼ်ႈဢၼ်တၵ်းၵႂႃႇၵႃႈတီႈဝဵင်း တႃႇသူႉ ၼၼ်ႉလႄႈ ၶဝ်ဢွၼ်ၵၼ်ႁဵတ်းႁိူဝ်းသၢင်းၽေႃးၸိူဝ်းၼၼ်ႉ ၵႃႈတီႈဝဵင်း ဢေးၸယုၼ်းၵႃႇပႃႇ ဢေႃႈ။-

37မိူဝ်ႈဢၼ် ဢေးလေႇၸႃႇ လုၵ်ႈၸၢႆး တေႃႇတဝႁူႉ ၵူၼ်းဝဵင်း မရေးသႃႉ ၼၼ်ႉ ႁဵတ်းပရေႃးၽႅတ်ႈသေလႄႈႁေႃးလၢတ်ႈယူႇၽၢႆႇၼိုင်ႈ တင်း ယူဝ်းသၽတ်ႉ လႄႈဝႃႈ၊ ၵွပ်ႈပိူဝ်ႈဢၼ်ၸဝ်ႈၶုၼ်လူင်ႁဵတ်းၵေႃႉႁူမ်ႈပွင်း လူၺ်ႈၵၼ်တင်း ဢႃႇၶၸီႉ ၼၼ်ႉလႄႈ ထႃႇဝရႃႉၽြႃးယႃႉဢမူႉဢၼ်ၸဝ်ႈၶုၼ်လူင်ႁဵတ်းၸိူဝ်းၼၼ်ႉပႅတ်ႈတီႈၶႃႈယဝ်ႉ၊ ဝႃႈၼင်ႇၼႆလႄႈ၊ ႁိူဝ်းသၢင်းၽေႃးၸိူဝ်းၼၼ်ႉဢွၼ်ၵၼ်ႁၵ်းလူႉထၼ်ႈပေႃးဢမ်ႇၵႂႃႇၵႃႈတီႈဝဵင်း တႃႇသူႉ လႆႈဢေႃႈ။

← Chapter 19 Jump to: Chapter 21 →