2 Chronicles 25 — Shan

1ဢႃႇမၸီႉ ၼၼ်ႉ မိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်၊ ဢသၢၵ်ႈမၼ်းလႆႈသၢဝ်းပၢႆႁႃႈပီႊလႄႈ မၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်း ဝဵင်း ယေႇရူႉသလႅမ်ႇ သၢဝ်းပၢႆၵဝ်ႈပီႊဢေႃႈ။ ၸိုဝ်ႈသဵင်မႄႈၸဝ်ႈၸမ်ႉ၊ ပဵၼ် ယုတ်ႉတၼ်ႇ ၵူၼ်းယိင်းဝဵင်း ယေႇရူႉသလႅမ်ႇ ဢေႃႈ။-

2မၼ်းႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးသေၵေႃႈ ႁူဝ်ၸႂ်မၼ်းဢမ်ႇၸေးဢမ်ႇၸုမ်ႇ။-

3မိူဝ်ႈဢၼ်သိုင်ႇၸိုင်ႈဝၢၼ်ႈမိူင်းတႄႇယူႇတီႈမၼ်းယဝ်ႉၼၼ်ႉၸိုင်၊ မၼ်းဢဝ်ၶႃႈမၼ်းၵူၼ်းမၼ်းဢၼ်ဢဝ်ၸဝ်ႈပေႃႈမၼ်းၶုၼ်လူင်ၼၼ်ႉတၢႆၸိူဝ်းၼၼ်ႉတၢႆဢေႃႈ။-

4ၵူၺ်းၵႃႈ မၼ်းဢမ်ႇဢဝ်လုၵ်ႈၸၢႆးၶဝ်ၸိူဝ်းၼၼ်ႉတၢႆလႄႈ ၸွမ်းပိင်းၺၢပ်ႈတြႃးဢၼ်တႅမ်ႈဝႆႉမီးယူႇ ၵႃႈၼႂ်းၵျၢမ်းလိၵ်ႈပိင်းၺၢပ်ႈတီႉ မူဝ်းသေႇ ဢၼ်ထႃႇဝရႃႉၽြႃးမီးဢမိင်ႉလႄႈဝႃႈ၊ ပေႃႈဢမ်ႇလႆႈၶၢမ်ႇတၢႆတၢင်တူဝ်လုၵ်ႈလၢင်း၊ လုၵ်ႈလၢင်းဢမ်ႇလႆႈၶၢမ်ႇတၢႆတၢင်တူဝ်ပေႃႈ၊ ၵူႈၵေႃႉၵူႈၵူၼ်းတၵ်းလႆႈၶၢမ်ႇတၢႆၵွပ်ႈပိူဝ်ႈဢပႅတ်ႈတူဝ်ၸဝ်ႈၵဝ်ႇၵူၺ်းဢေႃႈ၊ ဝႃႈၼင်ႇၼႆၼၼ်ႉဢေႃႈ။

5ဢႃႇမၸီႉ ၼၼ်ႉႁႂ်ႈၵူၼ်းမဵဝ်း ယူႉတႃႉ တင်းလၢႆၸူႉၵၼ်တုမ်ၵၼ်လႄႈ ၸွမ်းလူၺ်ႈပီႈၼွင်ႉၸိူဝ်ႉၶိူဝ်းၶဝ်ၼၼ်ႉသေလႄႈ ဢဝ်ၶဝ်ဢၼ်ဝႃႈၵူၼ်းမဵဝ်း ယူႉတႃႉ တင်းၵူၼ်း ပိၼ်ႇယႃႇမိၼ်ႇ တင်းသဵင်ႈတင်းလူင်ဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်ဢုပ်ႉၵႃႈၼိူဝ် ၵူၼ်းယေႈႁဵင်၊ ၶဝ်ၸိူဝ်းဢၼ်ဢုပ်ႉၵႃႈၼိူဝ်ၵူၼ်းယေႈပၢၵ်ႇၸိူဝ်းၼၼ်ႉဢေႃႈ။ မၼ်းၼပ်ႉဢၢၼ်ႇၶဝ်ၸိူဝ်းဢၼ် ၸႃႉၸဵမ်ဢသၢၵ်ႈလႆႈသၢဝ်းၼိုင်ႈလႄႈ ဢသၢၵ်ႈလိူဝ်သၢဝ်းၵႂႃႇၼၼ်ႉလႄႈ ထူပ်းႁၼ်မီးၶဝ်ၸိူဝ်းဢၼ် ပဵၼ်ၵေႃႉဢၼ်လိူၵ်ႈၵဵပ်းဢဝ်သေလႄႈ တၢတ်ႈၼိူင်ႇလႆႈႁႂ်ႈလႆႈဢွၵ်ႇၵႂႃႇတိုၵ်းသိုၵ်းလႄႈ ၸၢင်ႈယိပ်းႁွၵ်ႇတင်းၶိူင်ႈႁႄႉလၢၵ်ႈၼၢၵ်ႈၼၼ်ႉ သၢမ်သႅၼ်ဢေႃႈ။-

6ႁူဝ်ႁၢၼ်ၵူၼ်းသိုၵ်း ဢီႉသရေႇလႃႉ ဢၼ်ႁႅင်းယႂ်ႇၼႃႇသႅၼ်ၼိုင်ႈၵေႃႈ၊ မၼ်းဢဝ်တင်းငိုၼ်းပၢၵ်ႇ တလၢၼ်ႇတၢၼ်ႇ ၸၢင်ႈငႃဢဝ်ဝႆႉဢေႃႈ။-

7ၵူၺ်းၵႃႈၵူၼ်းၽြႃးပဵၼ်ၸဝ်ႈၵေႃႉၼိုင်ႈ မႃးတီႈမၼ်းလႄႈဝႃႈ၊ ၸဝ်ႈၶုၼ်လူင်ဢိူၺ်း၊ ယႃႇပေႁႂ်ႈတပ်ႉ ဢီႉသရေႇလႃႉ လႆႈၸွမ်းလူၺ်ႈၵၼ်တင်းၸဝ်ႈႁဝ်း။ ထႃႇဝရႃႉၽြႃးဢမ်ႇမီးလူၺ်ႈၵၼ်တင်းၵူၼ်းမဵဝ်း ဢီႉသရေႇလႃႉ ဢၼ်ဝႃႈ ၵူၼ်းမဵဝ်း ဢေႇၽရိမ်ႇ ၸိူဝ်းၼၼ်ႉ။-

8ပေႃးၸဝ်ႈၶုၼ်လူင်ယင်းၶႂ်ႈၵႂႃႇယူႇၸိုင်၊ ပိၵ်ႉသမ်ႉၵႂႃႇလႄႈ ႁႂ်ႈတူဝ်ၸဝ်ႈၵဝ်ႇမၼ်ႈၶိူင်ႇႁႂ်ႈလႆႈတိုၵ်းသိုၵ်းသေၵေႃႈ၊ ၽြႃးပဵၼ်ၸဝ်ႈတၵ်းႁႂ်ႈၸဝ်ႈႁဝ်းတူၵ်းသုမ်း ၵႃႈတီႈၽၢႆႇၼႃႈရၢၼ်ႇသူႇဢေႃႈ။ ၽြႃးပဵၼ်ၸဝ်ႈၼၼ်ႉတၢတ်ႈၼိူင်ႇလႆႈ ႁႂ်ႈလႆႈၸွႆႈထႅမ်မႃႉၸႃႉ ဢိၵ်ႇတင်းႁႂ်ႈလႆႈၶျႃးတူၵ်းတီႈတႅမ်ႇဢေႃႈ၊ ဝႃႈၼင်ႇၼႆသေယဝ်ႉ၊

9ဢႃႇမၸီႉ ထၢမ်တီႈၵူၼ်းၽြႃးပဵၼ်ၸဝ်ႈၼၼ်ႉလႄႈဝႃႈ၊ ငိုၼ်းပၢၵ်ႇ တလၢၼ်ႇတၢၼ်ႇ ဢၼ်လႆႈဢဝ်ၸၢင်ႈငႃဢဝ်တပ်ႉ ဢီႉသရေႇလႃႉ ၼၼ်ႉ မႅၼ်ႈယဝ်ႉၼၼ်ႉ တၵ်းလႆႈႁဵတ်းၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင် ၵူၼ်းၽြႃးပဵၼ်ၸဝ်ႈၼၼ်ႉၶိုၼ်းလၢတ်ႈလႄႈဝႃႈ၊ ၽြႃးပဵၼ်ၸဝ်ႈပၼ်ဢၼ်ယဵင်ႈၶႅၼ်းလိူဝ်တွၼ်းသေၼၼ်ႉလႆႈယူႇဢေႃႈ၊ ဝႃႈၼင်ႇၼႆဢေႃႈ။-

10မိူဝ်ႈၼၼ်ႉ ဢႃႇမၸီႉ ၽေဢဝ်ႁူဝ်ႁၢၼ်ၵူၼ်းသိုၵ်း ဢၼ်လုၵ်ႉသေၵႃႈတီႈမိူင်း ဢေႇၽရိမ်ႇ မႃးၼၼ်ႉလႄႈ ပွႆႇႁႂ်ႈၶဝ်ၶိုၼ်းမိူဝ်းၵႂႃႇၵႃႈတီႈ တီႈယူႇတီႈသဝ်းၶဝ်သေလႄႈ ၶဝ်ၼၼ်ႉၸႂ်မႆႈၶႆႈၸႃႉၼႃႇလူင်လၢင်လႄႈ ဝႆႉတၢင်းၽိတ်းတီႈၵူၼ်းမိူင်း ယူႉတႃႉ တင်းလၢႆသေလႄႈ ဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈ တီႈယူႇတီႈသဝ်းၶဝ်ဢေႃႈ။

11ဢႃႇမၸီႉ ၵေႃႈႁႂ်ႈတူဝ်ၸဝ်ႈၵဝ်ႇမၼ်ႈၶိူင်ႇလႄႈ ဢွၼ်ႁူဝ်ၵူၼ်းမၼ်းတင်းလၢႆဢွၵ်ႇလႄႈၶီႇသိုၵ်းၸူးၵႃႈတီႈပၢင်ႇႁူၺ်ႈၵိူဝ်သေယဝ်ႉ၊ တိုၵ်းတေႃးယႃႉပႅတ်ႈၵူၼ်းလွႆ ၸီႉရႃႉ မိုၼ်ႇၼိုင်ႈဢေႃႈ။-

12ၵူၼ်းမဵဝ်း ယူႉတႃႉ တင်းလၢႆတီႉလႆႈၵူၼ်းလိပ်းမိုၼ်ႇၼိုင်ႈသေယဝ်ႉ၊ ဢွၼ်ၵၼ်ဢဝ်ၶဝ်ၼၼ်ႉၵႂႃႇၵႃႈတီႈပၢႆၸိၵ်းလွႆမၢၵ်ႇႁိၼ်သေလႄႈ ဢီးၶဝ်တူၵ်းသေၵႃႈၼိူဝ်ပၢႆၸိၵ်းလွႆမၢၵ်ႇႁိၼ်ၼၼ်ႉ ႁႂ်ႈၶဝ်ထၼ်ႈပေႃးႁၵ်းပေႃးလႅဝ်ဢေႃႈ။-

13ႁူဝ်ႁၢၼ်ၵူၼ်းသိုၵ်း ဢၼ် ဢႃႇမၸီႉ ပွႆႇမိူဝ်းၵႂႃႇလႄႈ ဢမ်ႇပၼ်ဢၶႂၢင်ႉဢၼ်လႆႈၸွမ်းလူၺ်ႈၵၼ်တင်းမၼ်းသေလႄႈ တိုၵ်းသိုၵ်းၸိူဝ်းၼၼ်ႉၸမ်ႉ၊ ဢွၼ်ၵၼ်တိုၵ်းတေႃးဝဵင်း ယူႉတႃႉ တင်းလၢႆ ဢဝ်ၵႃႈတီႈၸႃႉၸဵမ်ဝဵင်း သမႃႇရီႉ တေႃႇထိုင်ႁွတ်ႈ ဝဵင်း ပႅတ်ႉႁေႃႇရုၼ်ႇ သေလႄႈ ဢဝ်ၵူၼ်းသၢမ်ႁဵင်တၢႆလႄႈ သိမ်းဢဝ်ဢုၵ်ႉၸႃႇဢၼ်ႁိမ်လႆႈၼမ်ၼႃႇၵႂႃႇဢေႃႈ။

14ဢႃႇမၸီႉ ၼၼ်ႉ မိူဝ်ႈဢၼ်လုၵ်ႉသေၵႃႈတီႈ တီႈဢၼ်ၶႃႈၽၼ်းဢဝ်တၢႆၵူၼ်းမဵဝ်း ဢေႇတုမ်ႇ ၸိူဝ်းၼၼ်ႉ ၶိုၼ်းမႃးၼၼ်ႉၸိုင်၊ ဢဝ်ၽြႃးဢၼ်ၵူၼ်းလွႆ ၸီႉရႃႉ တင်းလၢႆၵူဝ်းၵႂၢႆႇၸိူဝ်းၼၼ်ႉမႃးလႄႈတႄႇတင်ႈဝႆႉ ႁႂ်ႈလႆႈပဵၼ်ၽြႃးတီႈဢၼ်မၼ်းၵူဝ်းၵႂၢႆႇၼၼ်ႉသေယဝ်ႉ၊ ၶုပ်ႉမူပ်ႇဝၢင်းႁူဝ်ၵႃႈတီႈၽၢႆႇၼႃႈၶဝ်ၼၼ်ႉလႄႈ ဢဝ်ၽႆးတုတ်ႇၼၢမ်ႇသႃႇဢေႃႈ။-

15ပိူဝ်ႈၼႆလႄႈ ထႃႇဝရႃႉၽြႃးၸႂ်မႆႈၶႆႈၸႃႉတီႈ ဢႃႇမၸီႉ လႄႈ ပွႆႇၸႂ်ႉပရေႃးၽႅတ်ႈၵေႃႉၼိုင်ႈမႃးတီႈမၼ်းလႄႈ မၼ်းၼၼ်ႉလၢတ်ႈတီႈမၼ်းလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းသွၼ်ႈပိုင်ႈၽြႃးၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ဢမ်ႇၵႄႇသႄႇၼုၵ်ႈဢဝ်ၵူၼ်းၶဝ်ဢွၵ်ႇသေၵႃႈၼႂ်းမိုဝ်းၸဝ်ႈႁဝ်းလႆႈၸိူဝ်းၼၼ်ႉ ၼင်ႇႁိုဝ်တီႈၶႃႈ၊ ဝႃႈၼင်ႇၼႆလႄႈ၊-

16ၼႂ်းမိူဝ်ႈဢၼ်မၼ်းၼၼ်ႉယင်းတိုၵ်ႉလဝ်ႊလၢတ်ႈတီႈမၼ်းယူႇၼၼ်ႉၸိုင်၊ မၼ်းၶိုၼ်းလၢတ်ႈတီႈမၼ်းၼၼ်ႉလႄႈဝႃႈ၊ ႁဝ်းႁႂ်ႈမႂ်းပဵၼ်မူးမၢတ်ႈဢၼ်တိူင်ႇပၢင်ႇၵၼ်တင်းၶုၼ်ႁေႃၶမ်းႁိုဝ်။ ပေႃးတႃႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းၶႂ်ႈၶၢမ်ႇရႃႇၸဝၢတ်ႈၼင်ႇႁိုဝ်၊ မိူဝ်ႈဢၼ်ဝႃႈၼင်ႇၼႆၸိုင်၊ ပရေႃးၽႅတ်ႈၼၼ်ႉၵိုတ်းပေႃးသေလႄႈဝႃႈ၊ ၶႃႈၸဝ်ႈႁူႉႁၼ်လွင်ႈဢၼ်ၽြႃးပဵၼ်ၸဝ်ႈၵျၢမ်ႇပွင်တၵ်းယႃႉၽဵဝ်ႈၸဝ်ႈၶုၼ်လူင်ပႅတ်ႈ ၵွပ်ႈပိူဝ်ႈဢၼ်ၸဝ်ႈၶုၼ်လူင်ႁဵတ်းဢမူႉၼႆႉလႄႈ ယင်းဢမ်ႇထွမ်ႇဢမ်ႇဢဝ်ၵႂၢမ်းဢၼ်ၶႃႈၸဝ်ႈပၼ်သတီႉၼၼ်ႉလႄႈ ယူႇၼၼ်ႉဢေႃႈ၊ ဝႃႈၼင်ႇၼႆဢေႃႈ။

17လိုၼ်းၼၼ်ႉ ဢႃႇမၸီႉ ၶုၼ်ႁေႃၶမ်း ယူႉတႃႉ တိူင်ႇပၢင်ႇၵၼ်သေယဝ်ႉ၊ ပွႆႇၸႂ်ႉၵႂႃႇၸူးၵႃႈတီႈ ယႁေႃးသႃႉ လုၵ်ႈၸၢႆး ယေႃးၶတ်ႉ ၊ လုၵ်ႈၸၢႆး ယေႇႁူႉ ၶုၼ်ႁေႃၶမ်း ဢီႉသရေႇလႃႉ ၼၼ်ႉလႄႈ သင်ႇလၢတ်ႈၵႂႃႇလႄႈဝႃႈ၊ မႃးလႄႈတေႃႇၼႃႈႁူပ်ႉထူပ်းၵၼ်တႃႉႁဝ်း၊ ဝႃႈၼင်ႇၼႆသေယဝ်ႉ၊-

18ယႁေႃးသႃႉ ၶုၼ်ႁေႃၶမ်း ဢီႉသရေႇလႃႉ ၶိုၼ်းသင်ႇလၢတ်ႈမႃးတီႈ ဢႃႇမၸီႉ ၶုၼ်ႁေႃၶမ်း ယူႉတႃႉ လႄႈဝႃႈ တူၼ်ႈၼၢမ် လေႇပၼုၼ်ႇ ပွႆႇၸႂ်ႉၵႂႃႇၵႃႈတီႈတူၼ်ႈ ဢႃႇရိတ်ႉ လေႇပၼုၼ်ႇ လႄႈဝႃႈ၊ ဢဝ်လုၵ်ႈယိင်းမႂ်းပၼ်ၵၼ်တင်းလုၵ်ႈၸၢႆးၵဝ်တႃႉ၊ ဝႃႈၼင်ႇၼႆလႄႈ၊ တူဝ်ထိူၼ်ႇႁၢႆႉ လေႇပၼုၼ်ႇ တူဝ်ၼိုင်ႈတႆႇတၢင်းပႆတၢင်းၵႂႃႇလႄႈ ယဵပ်ႇမႅၼ်ႈတူၼ်ႈၼၢမ်ၼၼ်ႉဢေႃႈ။-

19မႂ်းဝႃႈၵဝ်ၼႆႉတိုၵ်းတေႃးယႃႉပႅတ်ႈၵူၼ်း ဢေႇတုမ်ႇ ၸိူဝ်းၼၼ်ႉယဝ်ႉ၊ ဝႃႈၼင်ႇၼႆသေလႄႈ ၸႂ်မႂ်းမီးတၢင်းဢၼ်ၶႂ်ႈဢုပ်ႇဢၢတ်ႇသုင်ၼႃႇဢေႃႈ။ ယူႇၵႃႈတီႈႁိူၼ်းတီႈယူႇမႂ်းတႃႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းႁႃဢမူႉႁႂ်ႈၽေးႁွတ်ႈထိုင်ၵႃႈတီႈမႂ်းလႄႈ မႂ်းဢၼ်ဝႃႈတူဝ်မႂ်းလႆႈလူမ်ႉတူၵ်းပႃးလူၺ်ႈၵၼ်တင်းမိူင်း ယူႉတႃႉ ၼၼ်ႉၼင်ႇႁိုဝ်။ ဝႃႈၼင်ႇၼႆဢေႃႈ။-

20ၵူၺ်းၵႃႈ ဢႃႇမၸီႉ ဢမ်ႇထွမ်ႇဢမ်ႇဢဝ်ၵႂၢမ်းၼၼ်ႉ၊ လွင်ႈမၼ်းၸမ်ႉလွင်ႈတၢင်းၼၼ်ႉပဵၼ်မႃးတီႈၽြႃးပဵၼ်ၸဝ်ႈ ႁႂ်ႈမၼ်းၸဝ်ႈလႆႈဢဝ်ၶဝ်ဢၢပ်ႈၵႃႈၼႂ်းမိုဝ်းရၢၼ်ႇသူႇ ၵွပ်ႈပိူဝ်ႈဢၼ်ၶဝ်သွၼ်ႈပိုင်ႈၽြႃး ဢေႇတုမ်ႇ ၸိူဝ်းၼၼ်ႉဢေႃႈ။-

21ယႁေႃးသႃႉ ၶုၼ်ႁေႃၶမ်း ဢီႉသရေႇလႃႉ ၶီႇသိုၵ်းၶိုၼ်ႈၸူးလႄႈ မၼ်းဢိၵ်ႇတင်း ဢႃႇမၸီႉ ၼၼ်ႉ တေႃႇၼႃႈႁူပ်ႉထူပ်းၵၼ်ၵႃႈတီႈပၢင်ႇပဵင်း ပႅတ်ႉသေးမိတ်ႉ မိူင်း ယူႉတႃႉ သေယဝ်ႉ၊-

22မဵဝ်း ယူႉတႃႉ တူၵ်းသုမ်း ၵႃႈတီႈၽၢႆႇၼႃႈမဵဝ်း ဢီႉသရေႇလႃႉ လႄႈ ဢွၼ်ၵၼ်ဢွၵ်ႇပၢႆႈၸူးၵႃႈတီႈမူဝ်းၵႃႇတီႈယူႇတီႈသဝ်းၶဝ် ႁင်းၽႂ်ႁင်းမၼ်းဢေႃႈ။-

23ယႁေႃးသႃႉ ၶုၼ်ႁေႃၶမ်း ဢီႉသရေႇလႃႉ ၼၼ်ႉ တီႉလႆႈ ဢႃႇမၸီႉ ၶုၼ်ႁေႃၶမ်း ယူႉတႃႉ ဢၼ်ပဵၼ်လုၵ်ႈၸၢႆး ယေႃးသႃႉ လုၵ်ႈၸၢႆး ယေႇႁေႃးႁတ်ႉ ၼၼ်ႉၵႃႈတီႈဝဵင်း ပႅတ်ႉသေးမိတ်ႉ လႄႈ ဢဝ်ၵႂႃႇၸူးၵႃႈတီႈဝဵင်း ယေႇရူႉသလႅမ်ႇ သေယဝ်ႉ၊ ၵိူၼ်ႇယႃႉလမ်းဝဵင်း ယေႇရူႉသလႅမ်ႇ ပႅတ်ႈသီႇပၢၵ်ႇသွၵ်ႇ ဢဝ်ၵႃႈတီႈၽၵ်းတူ ဢေႇၽရိမ်ႇ တေႃႇထိုင်ႁွတ်ႈၽၵ်းတူၸဵင်ႇဝဵင်းဢေႃႈ။-

24မၼ်းသိမ်းဢဝ်ၸႃႉၸဵမ်ငိုၼ်း၊ ၶမ်းလႄႈ ၶိူင်ႈပိူင်ၵႃႈဢၼ်ထူပ်းႁၼ်ၵႃႈၼႂ်းမိုဝ်း ဢူဝ်းပိတ်ႉဢေႇတုမ်ႇ ၵႃႈတီႈႁိူၼ်းၽြႃးပဵၼ်ၸဝ်ႈဢိၵ်ႇတင်းၽၼ်ႇတႃႇႁေႃၸဝ်ႈ တင်းၶဝ်ၸိူဝ်းဢၼ်ႁပ်ႉတုင်းဢဝ်ၵမ်ႈၽွင်ႈၼၼ်ႉသေလႄႈ ၶိုၼ်းမိူဝ်းၵႂႃႇၵႃႈတီႈဝဵင်း သမႃႇရီႉ ဢေႃႈ။

25လိုၼ်းသေ ယႁေႃးသႃႉ လုၵ်ႈၸၢႆး ယေႃးၶတ်ႉ ၶုၼ်ႁေႃၶမ်း ဢီႉသရေႇလႃႉ တၢႆယဝ်ႉၼၼ်ႉ၊ ဢႃႇမၸီႉ လုၵ်ႈၸၢႆး ယေႃးသႃႉ ၶုၼ်ႁေႃၶမ်း ယူႉတႃႉ ၼၼ်ႉဢသၢၵ်ႈလိပ်းယူႇသိပ်းႁႃႈပီႊလူးၵွၼ်ႇဢေႃႈ။-

26လွင်ႈတၢင်း ဢႃႇမၸီႉ ဢၼ်ယင်းၵိုတ်းယင်းၵျၢၼ်ႇဢဝ်ၸဵမ်ငဝ်ႈတေႃႇပၢႆၸိူဝ်းၼၼ်ႉၸိုင်၊ တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ယူႉတႃႉ တင်း ရႃႇၸဝၢင်ႇ ဢီႉသရေႇလႃႉ ဢေႃႈ။-

27ၸႃႉၸဵမ်မိူဝ်ႈဢၼ် ဢႃႇမၸီႉ ယင်းဢမ်ႇၸွမ်းလင်ထႃႇဝရႃႉၽြႃးလႄႈ ဝႄႈပိူင်ႈၵႂႃႇၼၼ်ႉလႄႈ ၶဝ်ဢွၼ်ၵၼ်လွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းမၼ်း ၵႃႈၼႂ်းဝဵင်း ယေႇရူႉသလႅမ်ႇ လႄႈ မၼ်းဢွၵ်ႇပၢႆႈၵႂႃႇၵႃႈတီႈဝဵင်း လႃႇၶီႉသႃႉ လႄႈ ၶဝ်ဢွၼ်ၵၼ်ပွႆႇၸႂ်ႉၸွမ်းၵႂႃႇၵႃႈတီႈဝဵင်း လႃႇၶီႉသႃႉ ၼၼ်ႉသေလႄႈ ဢဝ်မၼ်းတၢႆၵႃႈတီႈၼၼ်ႈသေယဝ်ႉ၊-

28ဢဝ်မၼ်းတၢင်ႇၵႃႈၼိူဝ်မႃႉသေလႄႈ မႃးၵႃႈတီႈဝဵင်း ယေႇရူႉသလႅမ်ႇ လႄႈ ဢဝ်မၼ်းသၢင်းၵျူဝ်ႇလူၺ်ႈၵၼ်တင်းပူႇမၼ်းမွၼ်ႇမၼ်းတင်းလၢႆ ၵႃႈၼႂ်းဝဵင်းၸဝ်ႈ မိူင်း ယူႉတႃႉ ၼၼ်ႉဢေႃႈ။