2 Chronicles 23

Shan

← Chapter 22 Jump to: Chapter 24 →

1မိူဝ်ႈဢၼ်ထူၼ်ႈထိုင်ၸဵတ်းပီႊၼၼ်ႉ ယေႃးယတႃႉ ႁႂ်ႈတူဝ်ၸဝ်ႈၵဝ်ႇမၼ်ႈၶိူင်ႇလႄႈ ႁဵတ်းတၢင်းဢၼ်ထုၵ်ႇၵၼ်တင်းၵူၼ်းဢၼ်ဢုပ်ႉၵႃႈၼိူဝ်ၵူၼ်းယေႈပၢၵ်ႇတင်းလၢႆ ဢၼ်ဝႃႈ ဢႃႇၸရီႉ လုၵ်ႈၸၢႆး ယေႇရေႃးႁမ်ႇ၊ ဢီႉသမေႇလႃႉ လုၵ်ႈၸၢႆး ယေႃးႁၼၼ်ႇ၊ ဢႃႇၸရီႉႁူႉ လုၵ်ႈၸၢႆး ဢူဝ်းပိတ်ႉ၊ မႃႇသေႇယႃႉ လုၵ်ႈၸၢႆး ဢတႃႇယႃႉ၊ ဢေးလီႉသၽတ်ႉ လုၵ်ႈၸၢႆး ၸီႉၶရီႉ ၸိူဝ်းၼၼ်ႉဢေႃႈ။-

2ၶဝ်ၼၼ်ႉဢွၼ်ၵၼ်လႄႇလဵပ်ႈၵႃႈၼႂ်းမိူင်း ယူႉတႃႉ သေယဝ်ႉ၊ ႁႂ်ႈၵူၼ်းမဵဝ်း လေႇဝီႉ ဢိၵ်ႇတင်းၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ် ပီႈၼွင်ႉၸိူဝ်ႉၶိူဝ်းပေႃႈ ၼႂ်းမဵဝ်း ဢီႉသရေႇလႃႉ တင်းလၢႆၸူႉၵၼ်တုမ်ၵၼ် ဢွၵ်ႇသေၵႃႈၼႂ်းဝဵင်း ယူႉတႃႉ ၵႃႈမီးၼၼ်ႉလႄႈ ၶိုၼ်းမႃးၵႃႈတီႈဝဵင်း ယေႇရူႉသလႅမ်ႇ ဢေႃႈ။-

3မုၵ်ႉၸိူဝ်းဢၼ်ၸူႉၵၼ်တုမ်ၵၼ်ၵႃႈမီးၼၼ်ႉဢွၼ်ၵၼ်ႁဵတ်းပတီႉၺိၺ်ႇလူၺ်ႈၵၼ်တင်းၶုၼ်ႁေႃၶမ်း ၵႃႈၼႂ်းႁိူၼ်းၽြႃးပဵၼ်ၸဝ်ႈဢေႃႈ။ ယေႃးယတႃႉ ၵေႃႈ လၢတ်ႈတီႈၶဝ်လႄႈဝႃႈ၊ တူၺ်းလူး၊ လုၵ်ႈၸၢႆးၸဝ်ႈၶုၼ်ႁေႃၶမ်း တၵ်းလႆႈဢုပ်ႉပိူင်ႇၸၢမ်ႇၸႃး ၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉလူၺ်ႈမဵဝ်းၸိူဝ်ႉၶိူဝ်း တႃႇဝိတ်ႈ ၼၼ်ႉဢေႃႈ။-

4လွင်ႈတၢင်းဢၼ်သူတၵ်းလႆႈႁဵတ်းၸမ်ႉ၊ ယိတ်ႈပရေႃးႁဵၵ်ႈ ဢိၵ်ႇတင်းၵူၼ်းမဵဝ်း လေႇဝီႉ ဢၼ်ၶဝ်ႈမႃးၼႂ်းဝၼ်းၵမ်သိၼ်ၼၼ်ႉ သၢမ်ပုၼ်ႈပုၼ်ႈၼိုင်ႈတၵ်းလႆႈႁဵတ်းၵူၼ်းပႂ်ႉၽၵ်းတူဢေႃႈ။-

5သၢမ်ပုၼ်ႈပုၼ်ႈၼိုင်ႈတၵ်းလႆႈပႂ်ႉႁေႃၶမ်းဢေႃႈ။ သၢမ်ပုၼ်ႈပုၼ်ႈၼိုင်ႈတၵ်းလႆႈပႂ်ႉၽၵ်းတူ သူႉရႃႉ ဢေႃႈ။ ၵူၼ်းတင်းသဵင်ႈတင်းလူင် တၵ်းလႆႈဢွၼ်ၵၼ်ယူႇၵႃႈၼႂ်းတမ်ႇတိူင်း ႁိူၼ်းၽြႃးပဵၼ်ၸဝ်ႈဢေႃႈ။-

6ၼွၵ်ႈသေယိတ်ႈပရေႃးႁဵၵ်ႈ ဢိၵ်ႇတင်းၵူၼ်းမဵဝ်း လေႇဝီႉ ဢၼ်ပႂ်ႉဢမူႉၸဝ်ႈၸိူဝ်းၼၼ်ႉ၊ ယႃႇပေႁႂ်ႈၽူႈလႂ်သေၵေႃႉသေၵူၼ်း ၶဝ်ႈၵႃႈၼႂ်းႁိူၼ်းထႃႇဝရႃႉၽြႃး။ ၶဝ်ၼၼ်ႉတၵ်းလႆႈဢွၼ်ၵၼ်ၶဝ်ႈ ၵွပ်ႈပိူဝ်ႈဢၼ်ၶဝ်မူတ်းၸၢင်ႇၼၼ်ႉဢေႃႈ။ ၵူၼ်းတင်းသဵင်ႈတင်းလူင်ၸမ်ႉ၊ တၵ်းလႆႈဢွၼ်ၵၼ်ပႂ်ႉယူႇၽၢႆႇထႃႇဝရႃႉၽြႃးဢေႃႈ။-

7ၵူၼ်းမဵဝ်း လေႇဝီႉ ၸိူဝ်းၼၼ်ႉ တၵ်းလႆႈယိပ်းၵမ်လၢၵ်ႈၼၢၵ်ႈၶဝ်ၵူႈၵေႃႉၵူႈၵူၼ်းသေလႄႈ ဢွၼ်ၵၼ်လွမ်ႉလဵပ်ႈႁွပ်ႈၶုၼ်ႁေႃၶမ်းယူႇလႄႈ ဢဝ်ၶဝ်ၸိူဝ်းဢၼ်ၶဝ်ႈမႃးၵႃႈၼႂ်းႁိူၼ်းၸဝ်ႈၼၼ်ႉတၢႆဢေႃႈ။ ယၢမ်းမိူဝ်ႈဢၼ်ၶုၼ်ႁေႃၶမ်းၶဝ်ႈဢွၵ်ႇၼၼ်ႉၸိုင် သူတၵ်းလႆႈၸွမ်းလူၺ်ႈၵၼ်တင်းမၼ်းၸဝ်ႈဢေႃႈ၊ ဝႃႈၼင်ႇၼႆဢေႃႈ။-

8ၵူၼ်းမဵဝ်း လေႇဝီႉ တင်းလၢႆဢိၵ်ႇတင်းၵူၼ်းမဵဝ်း ယူႉတႃႉ တင်းသဵင်ႈတင်းလူင် ႁဵတ်းၸွမ်းၵႃႈၼင်ႇဢၼ် ယိတ်ႈပရေႃးႁဵၵ်ႈ ယေႃးယတႃႉ သင်ႇလၢတ်ႈဝႆႉၼၼ်ႉလႄႈ ၶဝ်ၸိူဝ်းၼၼ်ႉႁွင်ႉဢဝ်ၶဝ်ၸိူဝ်းဢၼ် တၵ်းလႆႈၶဝ်ႈၼႂ်းဝၼ်းၵမ်သိၼ် ဢိၵ်ႇတင်းၶဝ်ၸိူဝ်းဢၼ်တၵ်းလႆႈဢွၵ်ႇၼႂ်းဝၼ်းၵမ်သိၼ် ႁင်းၽႂ်ႁင်းမၼ်းၼၼ်ႉမႃး ၵွပ်ႈပိူဝ်ႈဢၼ်ယိတ်ႈပရေႃးႁဵၵ်ႈ ယေႃးယတႃႉ ဢမ်ႇပွႆႇမုၵ်ႉပွႆႇၸိူဝ်းၼၼ်ႉဢေႃႈ။-

9ယိတ်ႈပရေႃးႁဵၵ်ႈ ယေႃးယတႃႉ ဢဝ်ႁွၵ်ႇ ဢိၵ်ႇတင်းၶိူင်ႈႁႄႉလၢၵ်ႈၼၢၵ်ႈ ဢၼ်လူင်ဢၼ်ဢွၼ်ႇၶုၼ်လူင် တႃႇဝိတ်ႈ ဢၼ်မီးၵႃႈၼႂ်းႁိူၼ်းၽြႃးပဵၼ်ၸဝ်ႈၸိူဝ်းၼၼ်ႉ ဢွၵ်ႇလႄႈဢၢပ်ႈပၼ်တီႈၶဝ်ၸိူဝ်းဢၼ်ဢုပ်ႉၵႃႈၼိူဝ်ၵူၼ်းယေႈပၢၵ်ႇၸိူဝ်းၼၼ်ႉဢေႃႈ။-

10မၼ်းဢဝ်ၶဝ်ၸိူဝ်းဢၼ်ယိပ်းၵမ်လၢၵ်ႈၼၢၵ်ႈႁင်းၽႂ်ႁင်းမၼ်းတင်းသဵင်ႈတင်းလူင်ၼၼ်ႉ ၶျႃးတီႈယူႇဝႆႉၸွမ်းႁိမ်းယိတ်ႈပလၢင်ႇႁိူၼ်းၸဝ်ႈၼၼ်ႉ ဢဝ်ၵႃႈတီႈၸဵင်ႇၶႂႃႁိူၼ်းၸဝ်ႈ တေႃႇထိုင်ႁွတ်ႈၸဵင်ႇသၢႆႉႁိူၼ်းၸဝ်ႈလႄႈ လွမ်ႉလဵပ်ႈႁွပ်ႈၶုၼ်ႁေႃၶမ်းယူႇဢေႃႈ။-

11မိူဝ်ႈၼၼ်ႉၶဝ်ဢွၼ်ၵၼ်ဢဝ်လုၵ်ႈၸၢႆးၸဝ်ႈၶုၼ်ႁေႃၶမ်းဢွၵ်ႇၵႃႈၼွၵ်ႈလႄႈ ဢဝ်ရႃႇၸႃႉသရၽူႇတိုဝ်းပၼ်လႄႈ ဢဝ်ၵျၢမ်းလိၵ်ႈပိင်းၺၢပ်ႈတီႉဢၢပ်ႈပၼ်သေလႄႈ ႁႂ်ႈမၼ်းပဵၼ်ၶုၼ်ႁေႃၶမ်းဢေႃႈ။ ယေႃးယတႃႉ ဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉပၼ်ၽိၵ်ႈသိၵ်ႈသေလႄႈ ဢွၼ်ၵၼ်ႁွင်ႉပၢဝ်ႇလႄႈဝႃႈ၊ ႁႂ်ႈၶုၼ်ႁေႃၶမ်းဢသၢၵ်ႈလိပ်းသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

12ဢႃႇထလီႉ ၼၼ်ႉ ငိၼ်းသဵင်ၵူၼ်းတင်းလၢႆၶုၼ်ႇလႅၼ်ႈယူႇ ႁဵတ်းသဵင်ယွင်ႈယေႃးၶုၼ်ႁေႃၶမ်းယူႇၼၼ်ႉသေယဝ်ႉ၊ ၵႂႃႇၸူးၵႃႈတီႈၵူၼ်းတင်းလၢႆ ၵႃႈၼႂ်းႁိူၼ်းထႃႇဝရႃႉၽြႃးၼၼ်ႉလႄႈ၊-

13မုင်ႈႁၼ်ၶုၼ်ႁေႃၶမ်းၸုၵ်းၵႃႈတီႈႁိမ်းသဝ်ႁူးသူပ်းတီႈဢၼ်ၶဝ်ႈၸူးၼၼ်ႉယူႇ၊ တပ်ႉမူးတင်းလၢႆဢိၵ်ႇတင်းၶဝ်ၸိူဝ်းဢၼ် ပဝ်ႇတိုင်ႈၼႄးၶရႃႇၼၼ်ႉၸိူဝ်းၼၼ်ႉ ၸုၵ်းၵႃႈတီႈႁိမ်းၶုၼ်ႁေႃၶမ်းယူႇသေလႄႈ၊ ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်ၸူမ်းသိူဝ်းလႄႈ ပဝ်ႇတိုင်ႈၼႄးၶရႃႇယူႇ၊ မေႃၵႂၢမ်းတင်းလၢႆ ယိပ်းၵမ်တူႇရီႉယႃႇၵူႈၸိူဝ်ႉၵူႈမဵဝ်းလႄႈ ဢွၼ်ႁူဝ်ႁဵတ်းၵႂၢမ်းယွင်ႈယေႃးယူႇၼၼ်ႉသေယဝ်ႉ၊ ဢႃႇထလီႉ ၼၼ်ႉ ၸၵ်ႉသိၵ်ႇၶူဝ်းၼုင်ႈမၼ်းသေလႄႈ သႅၼ်ႇႁွင်ႉလႄႈဝႃႈ၊ ဢမူႉဢၼ်ပုင်ႇၵၢၼ်ႇလူင်ပႄႇ။ ဢမူႉဢၼ်ပုင်ႇၵၢၼ်ႇလူင်ပႄႇ၊ ဝႃႈၼင်ႇၼႆဢေႃႈ။-

14ယိတ်ႈပရေႃးႁဵၵ်ႈ ယေႃးယတႃႉ ၼၼ်ႉ ဢဝ်ၶဝ်ၸိူဝ်းဢၼ်ဢုပ်ႉၵႃႈၼိူဝ်ၵူၼ်းယေႈပၢၵ်ႇ ဢၼ်လႆႈၶၢမ်ႇတၢင်းဢၼ်ၶၢၼ်းဝႆႉၵႃႈၼိူဝ်ပူဝ်ႇပႃႇၸိူဝ်းၼၼ်ႉ ဢွၵ်ႇလႄႈလၢတ်ႈတီႈၶဝ်လႄႈဝႃႈ၊ ဢွၼ်ၵၼ်ဢဝ်မၼ်းဢွၵ်ႇသေၵႃႈၼွၵ်ႈထႅဝ်ၵူၼ်းသိုၵ်းသေလႄႈ ဢဝ်ၶဝ်ၸိူဝ်းဢၼ်ၸွမ်းလင်မၼ်းၼၼ်ႉတၢႆတႃႉ၊ ဝႃႈၼင်ႇၼႆဢေႃႈ၊ လွင်ႈမၼ်းၸမ်ႉ ယိတ်ႈပရေႃးႁဵၵ်ႈလႆႈလၢတ်ႈလႄႈဝႃႈ၊ ယႃႇပေဢဝ်မၼ်းတၢႆၵႃႈၼႂ်းႁိူၼ်းၽြႃးပဵၼ်ၸဝ်ႈသေၵမ်း၊ ဝႃႈၼင်ႇၼႆဝႆႉဢေႃႈ။-

15ၶဝ်ၼၼ်ႉဢွၼ်ၵၼ်ငိူင်ႉဝႄႈပၼ်တၢင်းတီႈမၼ်းလႄႈ မၼ်းဢွၵ်ႇၵႂႃႇၸူးၵႃႈတီႈ သူပ်းတၢင်းမႃႉဢၼ်ၶဝ်ႈၸူးႁေႃၸဝ်ႈၼၼ်ႉလႄႈ၊ ၶဝ်ဢွၼ်ၵၼ်ဢဝ်မၼ်းတၢႆၵႃႈတီႈၼၼ်ႈဢေႃႈ။

16ယေႃးယတႃႉ ႁဵတ်းပတီႉၺိၺ်ႇဝူင်ႈၵၢင်မၼ်း ဢိၵ်ႇတင်းၵူၼ်းတင်းသဵင်ႈတင်းလူင် တင်းၶုၼ်ႁေႃၶမ်း ႁႂ်ႈၶဝ်ပဵၼ်ၵူၼ်းထႃႇဝရႃႉၽြႃးဢေႃႈ။-

17ၵူၼ်းတင်းသဵင်ႈတင်းလူင်ၼၼ်ႉ ဢွၼ်ၵၼ်ၵႂႃႇၵႃႈတီႈၵျွင်း ပႃႇလႃႉ လႄႈ ၵိူၼ်ႇယႃႉပႅတ်ႈဢေႃႈ။ ဢွၼ်ၵၼ်ႁၵ်းႁဵၵ်းယိတ်ႈပလၢင်ႇလႂ် တင်းရုၵ်ႈထူႉလႂ်ပႅတ်ႈလႄႈ ဢဝ် မတ်ႉသၼ်ႇ ယိတ်ႈပရေႃးႁဵၵ်ႈ ပႃႇလႃႉ ၼၼ်ႉတၢႆ ၵႃႈတီႈၽၢႆႇၼႃႈယိတ်ႈပလၢင်ႇၸိူဝ်းၼၼ်ႉဢေႃႈ။-

18ယေႃးယတႃႉ ၸီႇယၢင်ႇတၢင်းဢၼ်ၵိုတ်ႉႁၢပ်ႇဢမူႉၸဝ်ႈတင်းလၢႆ ၵႃႈၼႂ်းႁိူၼ်းထႃႇဝရႃႉၽြႃးၼၼ်ႉသေလႄႈ ဢၢပ်ႈပၼ်ၵႃႈၼႂ်းမိုဝ်းယိတ်ႈပရေႃးႁဵၵ်ႈ ၵူၼ်းမဵဝ်း လေႇဝီႉ ဢၼ် တႃႇဝိတ်ႈ ၽႄဢွၵ်ႇၶၢၼ်းဝႆႉၵႃႈၼႂ်းႁိူၼ်းထႃႇဝရႃႉၽြႃး ႁႂ်ႈလႆႈပုၵ်ႈၸေႃႇယိတ်ႈဢၼ်တုတ်ႇၽႆးတီႈထႃႇဝရႃႉၽြႃး ၸွမ်းၵႃႈၼင်ႇဢၼ်ပႃးၵႃႈၼႂ်းၵျၢမ်းလိၵ်ႈပိင်းၺၢပ်ႈတီႉ မူဝ်းသေႇ ၼၼ်ႉလႄႈ ႁဵတ်းတၢင်းဢၼ်သႂၢင်ႇသိူဝ်း၊ တၢင်းဢၼ်ႁဵတ်းၵႂၢမ်းမႅၼ်ႈၸွမ်း ၵႃႈၼင်ႇဢၼ် တႃႇဝိတ်ႈ ၸီႇယၢင်ႇဝႆႉၼၼ်ႉဢေႃႈ။-

19ၶဝ်ၸိူဝ်းဢၼ်ပႂ်ႉၽၵ်းတူႁိူၼ်းၸဝ်ႈၼၼ်ႉၵေႃႈ မၼ်းၶၢၼ်းဝႆႉႁႂ်ႈၵေႃႉဢၼ်မီးလၢၵ်ႈၶၼႃႇ ဢၼ်ဢမ်ႇမူတ်းသႂ်သေၸိူဝ်ႉသေပိူင်ၼၼ်ႉ ဢမ်ႇလႆႈၶဝ်ႈမႃးၼၼ်ႉဢေႃႈ။-

20မၼ်းႁွင်ႉဢဝ်ၶဝ်ၸိူဝ်းဢၼ်ဢုပ်ႉၵႃႈၼိူဝ်ၵူၼ်းယေႈပၢၵ်ႇလႂ်၊ မူးမၢတ်ႈၽွင်းမိူင်းလႂ်၊ ၶဝ်ၸိူဝ်းဢၼ်ပဵၼ် ၵူၼ်းယႂ်ႇၵူၼ်းလူင်လႂ်၊ ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်သေလႄႈ ဢွၼ်ၵၼ်ဢဝ်ၶုၼ်ႁေႃၶမ်းလူင်းသေၵႃႈတီႈႁိူၼ်းထႃႇဝရႃႉၽြႃးလႄႈ ၸွမ်းသဵၼ်ႈတၢင်းၽၵ်းတူဢၼ်သုင်ၼၼ်ႉ သူင်ႇႁွတ်ႈၵႃႈၼႂ်းႁေႃၸဝ်ႈလႄႈ ဢဝ်တၢင်ႇၵႃႈၼိူဝ်ရႃႇၸႃႉပလၢင်ႇသိုင်ႇၸိုင်ႈဝၢၼ်ႈမိူင်းဢေႃႈ။-

21ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်ၸူမ်းသိူဝ်းလႄႈ၊ ဝဵင်းတင်းဝဵင်းၵေႃႈ မီးတၢင်းဢၼ်တဵတ်ႇလီၼိမ်လီဢေႃႈ။ ၶဝ်ဢွၼ်ၵၼ်ဢဝ် ဢႃႇထလီႉ တၢႆလူၺ်ႈလၢပ်ႇလူၺ်ႈလႅဝ်းဢေႃႈ။

← Chapter 22 Jump to: Chapter 24 →