2 Chronicles 28 — Shan

1ဢႃႇၶတ်ႉ ၼၼ်ႉမိူဝ်ႈဢၼ် ၸႃႉၼင်ႈႁၢင်ႈၼင်ႈႁေႃၼၼ်ႉၸိုင် ဢသၢၵ်ႈမၼ်းလႆႈသၢဝ်းပီႊလႄႈ မၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရူႉသလႅမ်ႇ သိပ်းပၢႆႁူၵ်းပီႊဢေႃႈ။ မၼ်းဢမ်ႇႁဵတ်းဢၼ်လီဢၼ်ငၢမ်း သိုဝ်ႈၼႃႈတႂ်ႈတႃထႃႇဝရႃႉၽြႃး မိူၼ်ၸိူဝ်ႉၼင်ႇၸဝ်ႈပေႃႈမၼ်း တႃႇဝိတ်ႈ ၼၼ်ႉ။-

2မၼ်းၸွမ်းသဵၼ်ႈတၢင်းဢၼ် ၶုၼ်ႁေႃၶမ်း ဢီႉသရေႇလႃႉ ၸိူဝ်းၼၼ်ႉၸွမ်းၼၼ်ႉလႄႈ လေႃႇသွၼ်းႁဵတ်းရုၵ်ႈထူႉသၢင်းထူႉ ပုၼ်ႈၽြႃး ပႃႇလႃႉ တင်းလၢႆဢေႃႈ။-

3မၼ်းဢဝ်ၼၢမ်ႇသႃႇတုတ်ႇၽႆး ၵႃႈၼႂ်းၶူင်ႈႁူၺ်ႈလုၵ်ႈၸၢႆး ႁိၼ်ႇၼုမ်ႇ လႄႈ ဢဝ်လုၵ်ႈလၢင်းမၼ်းတုတ်ႇၽႆးပုၵ်ႈၸေႃႇၸွမ်းၵႃႈၼင်ႇထုင်းၸၢမ်ႇ ဢၼ်လီႁင်ႈဢဵတ်ႇသဵတ်ႇ ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ် ထႃႇဝရႃႉၽြႃးႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈၵူၼ်းမဵဝ်း ဢီႉသရေႇလႃႉ တင်းလၢႆၸိူဝ်းၼၼ်ႉဢေႃႈ။-

4မၼ်းၸၢင်ႈပုၵ်ႈၸေႃႇယိတ်ႈလႄႈ ဢဝ်ၼၢမ်ႇသႃႇတုတ်ႇၽႆးၵႃႈၼိူဝ်ထႃႇၼႃႉတီႈသုင်လႂ်၊ ၵႃႈၼိူဝ်ၵုင်းလႂ်၊ ၵႃႈတႂ်ႈတူၼ်ႈမႆႉဢၼ်ၶဵဝ်လႂ်ဢေႃႈ။

5ပိူဝ်ႈဢၼ်ပဵၼ်ၼင်ႇၼႆလႄႈ ထႃႇဝရႃႉၽြႃး ၽြႃးပဵၼ်ၸဝ်ႈမၼ်း ဢဝ်မၼ်းဢၢပ်ႈပၼ်ၵႃႈၼႂ်းမိုဝ်း ၶုၼ်ႁေႃၶမ်း သူႉရီႉ လႄႈ ၶဝ်ၼၼ်ႉဢွၼ်ၵၼ်တိုၵ်းတေႃးယႃႉပႅတ်ႈမၼ်းလႄႈ သိမ်းဢဝ်ၵူၼ်းဢၼ်တီႉလႆႈၼမ်ၼႃႇသေလႄႈ ဢဝ်ၵႂႃႇၵႃႈတီႈဝဵင်း ထမ်ႇမသႅတ်ႉ ဢေႃႈ။ မၼ်းသမ်ႉလႆႈၶၢမ်ႇတၢင်းဢၼ် မၼ်းၸဝ်ႈဢဝ်ဢၢပ်ႈပၼ်ၵႃႈၼႂ်းမိုဝ်းၶုၼ်ႁေႃၶမ်း ဢီႉသရေႇလႃႉ ဢၼ်ႁဵတ်းတၢင်းဢၼ်ၶႃႈၽၼ်း ဢဝ်တၢႆဢၼ်ယႂ်ႇၼႃႇၼၼ်ႉသေလႄႈ တိုၵ်းတေႃးယႃႉပႅတ်ႈမၼ်းလူးၵွၼ်ႇဢေႃႈ။-

6ၼႂ်းဝၼ်းလဵဝ်ၵူၺ်း ပေႇၵႃႇ လုၵ်ႈၸၢႆး ရေႇမလီႉ ၼၼ်ႉ ဢဝ်ၵူၼ်းမဵဝ်း ယူႉတႃႉ ဢၼ်ႁတ်းႁၢၼ်ၼၼ်ႉတၢႆသႅၼ်ပၢႆသွင်မိုၼ်ႇဢေႃႈ။ လွင်ႈမၼ်းၸမ်ႉၶဝ်ဢွၼ်ၵၼ်ၸုၼ်ႉပႅတ်ႈထႃႇဝရႃႉၽြႃး ၽြႃးပဵၼ်ၸဝ်ႈပူႇၶဝ်မွၼ်ႇၶဝ်ဢေႃႈ။-

7ၸီႉၶရီႉ ၵူၼ်း ဢေႇၽရိမ်ႇ ဢၼ်ႁႅင်းယႂ်ႇၼႃႇၼၼ်ႉ ဢဝ် မႃႇသေႇယႃႉ လုၵ်ႈၸၢႆးၶုၼ်ႁေႃၶမ်း၊ ဢႃႇၸရီႉၵမ်ႇ ၵေႃႉဢၼ်ဢုပ်ႉၵႃႈၼိူဝ်ႁေႃၸဝ်ႈ၊ ဢေးလႃႉၵႃႇၼႃႉ ၶုၼ်တူႉတီႉယႃႉ တႂ်ႈၶုၼ်ႁေႃၶမ်းၸိူဝ်းၼၼ်ႉတၢႆဢေႃႈ။-

8ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉၵေႃႈ ဢွၼ်ၵၼ်တီႉဢဝ်သိမ်းဢဝ်ၵူၼ်းၸၢႆး ၵူၼ်းယိင်း လုၵ်ႈၸၢႆးလုၵ်ႈယိင်းသွင်သႅၼ် ဢၼ်ပဵၼ်ပီႈၼွင်ႉၸိူဝ်ႉၶိူဝ်းၶဝ်ၼၼ်ႉၵႂႃႇလႄႈ ဢွၼ်ၵၼ်ႁိမ်ဢဝ်ႁူင်ႇဢဝ် ဢုၵ်ႉၸႃႇဢၼ်ၼမ်ၼႃႇသေလႄႈ ဢဝ်ဢၼ်ႁိမ်ႁူင်ႇလႆႈၸိူဝ်းၼၼ်ႉ ၵႂႃႇၵႃႈတီႈဝဵင်း သမႃႇရီႉ ဢေႃႈ။

9မိူဝ်ႈၼၼ်ႉမီးပရေႃးၽႅတ်ႈထႃႇဝရႃႉၽြႃး ဢၼ်လႆႈၸိုဝ်ႈ ဢူဝ်းတိတ်ႉ ၼၼ်ႉပႃးၼိုင်ႈ ၵႃႈတီႈၼၼ်ႈလႄႈ မၼ်းၼၼ်ႉဢွၵ်ႇႁပ်ႉႁူဝ်တၢင်း တပ်ႉဢၼ်ၶိုၼ်ႈမႃးၸူးၵႃႈတီႈဝဵင်း သမႃႇရီႉ ၼၼ်ႉသေလႄႈလၢတ်ႈလႄႈဝႃႈ၊ တူၺ်းလူး၊ ၵွပ်ႈပိူဝ်ႈဢၼ်ထႃႇဝရႃႉၽြႃး ၽြႃးပဵၼ်ၸဝ်ႈပူႇသူမွၼ်ႇသူၼၼ်ႉၸႂ်မႆႈၶႆႈၸႃႉတီႈမိူင်း ယူႉတႃႉ လႄႈ မၼ်းၸဝ်ႈဢဝ်ၶဝ်ၼၼ်ႉဢၢပ်ႈပၼ်ၵႃႈၼႂ်းမိုဝ်းသူလႄႈ သူဢွၼ်ၵၼ်ပႃးတင်းဢၢႆႁႅင်းတေႃးသႃႉ တၢင်းၸႂ်မႆႈၶႆႈၸႃႉ ဢၼ်ၶိုတ်းထိုင်ႁွတ်ႈၵႃႈတီႈၽႃႉၵၢင်ႁၢဝ်ၼၼ်ႉသေလႄႈ ဢဝ်ၶဝ်ၼၼ်ႉတၢႆယဝ်ႉလူင်ပႄႇ။-

10မိူဝ်ႈလဵဝ်ၼႆႉၵေႃႈ သူဢွၼ်ၵၼ်မီးတၢင်းၵျၢမ်ႇတၢင်းပွင်တၵ်းဢဝ်ၵူၼ်းမိူင်း ယူႉတႃႉ တင်းၵူၼ်းဝဵင်း ယေႇရူႉသလႅမ်ႇ တင်းလၢႆႁဵတ်းၶႃႈၵူၼ်းၸၢႆး ၶႃႈၵူၼ်းယိင်းတီႈသူလႄႈ ၼိၵ်ႈၸၢၵ်ႈငႅၼ်းသႄးလူင်ပႄႇ။ သူယင်းမီးဢပႅတ်ႈ ဢၼ်သူလႆႈၽိတ်းပိူင်ႈထႃႇဝရႃႉၽြႃး ၽြႃးပဵၼ်ၸဝ်ႈသူၼၼ်ႉယူႇဢမ်ႇၸႂ်ႈႁိုဝ်။-

11သူဢွၼ်ၵၼ်ထွမ်ႇဢဝ်ၵႂၢမ်းၵဝ်လႄႈ ပွႆႇပီႈသူၼွင်ႉသူဢၼ်သူတီႉၵမ်သိမ်းဢဝ်မႃးၸိူဝ်းၼႆႉၶိုၼ်းမိူဝ်းၵႂႃႇသေတႃႉ။ လွင်ႈမၼ်းၸမ်ႉတၢင်းၸႂ်မႆႈၶႆႈၸႃႉထႃႇဝရႃႉၽြႃး ဢၼ်ႁႅင်းယႂ်ႇၼႃႇၼၼ်ႉတၵ်းတူၵ်းႁွတ်ႈၵႃႈၼိူဝ်သူဢေႃႈ၊ ဝႃႈၼင်ႇၼႆဢေႃႈ။-

12မိူဝ်ႈၼၼ်ႉ ၶဝ်ၸိူဝ်းဢၼ်ပဵၼ်တူၼ်ႈပဵၼ်ငဝ်ႈၼႂ်းၵူၼ်းမဵဝ်း ဢေႇၽရိမ်ႇ ဢၼ်ဝႃႈ ဢႃႇၸရီႉ လုၵ်ႈၸၢႆး ယေႃးႁၼၼ်ႇ၊ ပေႇရၶီႉ လုၵ်ႈၸၢႆး မေႇသီႉလမုတ်ႉ၊ ႁေႇၸၵီႉ လုၵ်ႈၸၢႆး သႃႇလုမ်ႇ၊ ဢႃႇမသႃႉ လုၵ်ႈၸၢႆး ႁႃႇတလၢႆး ၸိူဝ်းၼၼ်ႉ ႁၢမ်ႈတၢပ်ႈႁႄႉၶႅၼ်ၶဝ်ၸိူဝ်းဢၼ် လုၵ်ႉသေၵႃႈတီႈဢၼ်တိုၵ်းသိုၵ်းမႃးၼၼ်ႉလႄႈဝႃႈ၊-

13သူဢမ်ႇလႆႈဢဝ် ၶဝ်ၸိူဝ်းဢၼ်သူတီႉလႆႈသိမ်းဢဝ်မႃးၼၼ်ႉ သႂၢင်းၶဝ်ႈၵႃႈၼႂ်းဝဵင်းၼႆႉ၊ သူဢွၼ်ၵၼ်ၵျၢမ်ႇပွင်ႁႂ်ႈလွင်ႈတၢင်းဢၼ်ၽိတ်းပိူင်ႈထႃႇဝရႃႉၽြႃး ႁွတ်ႈထိုင်ၵႃႈၼိူဝ်ႁဝ်းလႄႈ ဢဝ်ထၢပ်ႈသႂ်ႇထႅင်ႈၵႃႈၼိူဝ်ဢပႅတ်ႈႁဝ်း ဢိၵ်ႇတင်းတၢင်းဢၼ်ႁဝ်းလႆႈၽိတ်းပိူင်ႈၸိူဝ်းၼၼ်ႉလူင်ပႄႇ။ မိူဝ်ႈလဵဝ်ၼႆႉ ဢပႅတ်ႈႁဝ်းယႂ်ႇၼႃႇလူင်လၢင်လႄႈ တၢင်းၸႂ်မႆႈၶႆႈၸႃႉၸဝ်ႈဢၼ်ႁႅင်းယႂ်ႇၼႃႇၼၼ်ႉ ယင်းတိုၵ်ႉဢွၵ်ႇၸူးၵႃႈတီႈမဵဝ်း ဢီႉသရေႇလႃႉ ယူႇဢေႃႈ၊ ဝႃႈၼင်ႇၼႆဢေႃႈ။-

14ပိူဝ်ႈၼႆလႄႈ ႁူဝ်ႁၢၼ်ၵူၼ်းသိုၵ်းၸိူဝ်းၼၼ်ႉ ဢွၼ်ၵၼ်ဢဝ်ၶဝ်ၸိူဝ်းဢၼ်တီႉလႆႈသိမ်းဢဝ်မႃး ဢိၵ်ႇတင်းဢုၵ်ႉၸႃႇဢၼ်ႁိမ်ဢဝ်ႁူင်ႇဢဝ်မႃးၸိူဝ်းၼၼ်ႉဝႆႉၵႃႈတီႈၽၢႆႇၼႃႈၶုၼ်တင်းလၢႆ ဢိၵ်ႇတင်းပရဵၵ်ႈသၢတ်ႈတင်းသဵင်ႈတင်းလူင်ၼၼ်ႉဢေႃႈ။-

15ၶဝ်ၸိူဝ်းဢၼ်ဢဝ်ၸိုဝ်ႈဢဝ်သဵင်သေလႄႈ ဝႃႈမႃးယဝ်ႉၸိူဝ်းၼၼ်ႉ ဢွၼ်ၵၼ်လုၵ်ႉလႄႈ ႁွင်ႉဢဝ်ၶဝ်ၸိူဝ်းဢၼ် လႆႈၶၢမ်ႇတၢင်းဢၼ်တီႉလႆႈသိမ်းဢဝ်မႃးၸိူဝ်းၼၼ်ႉ မႃးသေလႄႈဢဝ်ဢုၵ်ႉၸႃႇဢၼ်ႁိမ်ဢဝ်ႁူင်ႇဢဝ်လႆႈၸိူဝ်းၼၼ်ႉပၼ်ႁႂ်ႈၶဝ်ၸိူဝ်းဢၼ်ဢမ်ႇမီး ၶူဝ်းၼုင်ႈမႆၼၼ်ႉၼုင်ႈမႆလႄႈ ဢဝ်ၼုင်ႈမႆပၼ်ၶဝ်ဢေႃႈ။ ဢွၼ်ၵၼ်ႁႂ်ႈၶဝ်တိုဝ်းၶႅပ်းတိၼ်လႄႈ ပၼ်ပုၼ်ႈဢၼ်ၶဝ်တၵ်းၵိၼ်တၵ်းၶူပ်းဢေႃႈ။ ဢွၼ်ၵၼ်ဢဝ်ၼမ်ႉမၼ်းတႃးပၼ်ၶဝ်လႄႈ ဢဝ်ၶဝ်ၵႃႈဢၼ်ဢမ်ႇမီးဢဵၼ်မီးႁႅင်းၸိူဝ်းၼၼ်ႉတၢင်ႇၵႃႈၼိူဝ်လီႈသေလႄႈ ဢဝ်ၵႂႃႇသူင်ႇၵႃႈတီႈဝဵင်းတူၼ်ႈထၢၼ် ဢၼ်ဝႃႈဝဵင်း ယေႇရီႉၶူဝ်း တီႈဢၼ်ပီႈၶဝ်ၼွင်ႉၶဝ်မီးၼၼ်ႉသေယဝ်ႉ၊ ၶဝ်ၼၼ်ႉဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈဝဵင်း သမႃႇရီႉ ဢေႃႈ။

16မိူဝ်ႈၼၼ်ႉၶုၼ်လူင် ဢႃႇၶတ်ႉ ပွႆႇၸႂ်ႉၸူးၵႃႈတီႈၶုၼ်ႁေႃၶမ်း ဢႃႇသူႉရီႉ ႁႂ်ႈမႃးၸွႆႈမႃးထႅမ်မၼ်းဢေႃႈ။-

17လွင်ႈမၼ်းၸမ်ႉ ၵူၼ်း ဢေႇတုမ်ႇ တင်းလၢႆ သမ်ႉၶိုၼ်းမႃးသေယဝ်ႉ၊ တိုၵ်းတေႃးယႃႉပႅတ်ႈ မိူင်း ယူႉတႃႉ သေလႄႈ ဢဝ်ၶဝ်ၸိူဝ်းဢၼ်တီႉၵမ်သိမ်းဢဝ်လႆႈၼၼ်ႉၵႂႃႇယဝ်ႉယဝ်ႉ။-

18ၵူၼ်း ၽီႉလိတ်ႉတီႉ တင်းလၢႆၵေႃႈ ဢွၼ်ၵၼ်ၶီႇသိုၵ်းၸူး ၵႃႈတီႈဝဵင်းဢၼ်မီးၵႃႈတႂ်ႈတီႈဢၼ်ပၢင်ႇဢၼ်ပဵင်း ဢိၵ်ႇတင်းၵႃႈတီႈလိၼ် ပွတ်းတၢင်းၸၢၼ်းမိူင်း ယူႉတႃႉ ၸိူဝ်းၼၼ်ႉလႄႈ သိမ်းဢဝ်ဝဵင်း ပႅတ်ႉသေးမတ်ႉ ဝဵင်း ဢႃႇၸလုၼ်ႇ ၊ ဝဵင်း ၵေႇတရုၼ်ႇ ၊ ဝဵင်း သေႃႇၶေႃႇ ဢိၵ်ႇတင်းဝၢၼ်ႈမၼ်းတင်းလၢႆ၊ ဝဵင်း တီႉမၼႃႉ ဢိၵ်ႇတင်းဝၢၼ်ႈမၼ်းတင်းလၢႆ၊ ဝဵင်း ၵီႉမၸေႃႇ ဢိၵ်ႇတင်းဝၢၼ်ႈမၼ်းတင်းလၢႆသေလႄႈ ၶျႃးတီႈယူႇၶဝ်ယူႇၵႃႈတီႈၼၼ်ႈဢေႃႈ။-

19ၵွပ်ႈပိူဝ်ႈ ဢႃႇၶတ်ႉ ၶုၼ်ႁေႃၶမ်း ဢီႉသရေႇလႃႉ ၼၼ်ႉလႄႈ ထႃႇဝရႃႉၽြႃး ၶျႃးမိူင်း ယူႉတႃႉ တူၵ်းတီႈတႅမ်ႇၼႃႇလူင်လၢင်ဢေႃႈ။ မၼ်းၼၼ်ႉထွတ်ႇၶူဝ်းၼုင်ႈတၢင်းမႆမိူင်း ယူႉတႃႉ ပႅတ်ႈလႄႈ ၽိတ်းပိူင်ႈထႃႇဝရႃႉၽြႃးၵျၢမ်းထၢမ်းၼႃႇလူင်လၢင်ဢေႃႈ။-

20ပိၵ်ႉသမ်ႉ တီႉၵလတ်ႉပီႉလေႇသႃႇ ၶုၼ်ႁေႃၶမ်း ဢႃႇသူႉရီႉ မႃးတီႈမၼ်းလႄႈ ႁႂ်ႈမၼ်းမီးတုၵ်ႉၶႃႉတၢင်းဢၼ်ၶၢၼ်ၸႂ်ၵွပ်ႈသေၵေႃႈ၊ ဢမ်ႇပၼ်ႁႅင်းတီႈမၼ်း။-

21လွင်ႈမၼ်းၸမ်ႉ ပိၵ်ႉသမ်ႉ ဢႃႇၶတ်ႉ ဢဝ်ၵႃႈၼႂ်းၽၼ်ႇတႃႇႁိူၼ်းထႃႇဝရႃႉၽြႃး ဢိၵ်ႇတင်းၵႃႈၼႂ်းၽၼ်ႇတႃႇႁေႃၸဝ်ႈတင်း ၵႃႈၼႂ်းဢုၵ်ႉၸႃႇမူးမၢတ်ႈၽွင်းမိူင်းတင်းလၢႆၸိူဝ်းၼၼ်ႉသေလႄႈ ပၼ်တီႈၶုၼ်ႁေႃၶမ်း ဢႃႇသူႉရီႉ သေၵေႃႈ မၼ်းၼၼ်ႉဢမ်ႇမႃႉၸႃႉၸွႆႈထႅမ်မၼ်း။

22ၶုၼ်လူင် ဢႃႇၶတ်ႉ ၼၼ်ႉ ၼႂ်းမိူဝ်ႈဢၼ်မၼ်းလႆႈၶၢမ်ႇတုၵ်ႉၶႃႉတၢင်းဢၼ်ၶၢၼ်ၸႂ်ၼၼ်ႉၸိုင် မၼ်းယဵင်ႈၶႅၼ်းၽိတ်းပိူင်ႈထႃႇဝရႃႉၽြႃးဢေႃႈ။-

23မၼ်းပုၵ်ႈၸေႃႇယိတ်ႈတီႈၽြႃးဝဵင်း ထမ်ႇမသႅတ်ႉ ဢၼ်ယႃႉမၼ်းပႅတ်ႈၸိူဝ်းၼၼ်ႉလႄႈဝႃႈ၊ ၵွပ်ႈပိူဝ်ႈဢၼ်ၽြႃးဢၼ် ၶုၼ်ႁေႃၶမ်း သူႉရီႉ တင်းလၢႆ ၵူဝ်းၵႂၢႆႇၸိူဝ်းၼၼ်ႉ ၸၢင်ႈၸွႆႈထႅမ်မႃႉၸႃႉၶဝ်ၼၼ်ႉလႄႈ ၵဝ်တၵ်းပုၵ်ႈၸေႃႇယိတ်ႈတီႈၶဝ် ႁႂ်ႈၶဝ်ၸွႆႈထႅမ်မႃႉၸႃႉၵဝ်ဢေႃႈ၊ ဝႃႈၼင်ႇၼႆသေၵေႃႈ၊ ၽြႃးၸိူဝ်းၼၼ်ႉပဵၼ်လွင်ႈဢၼ် မၼ်းဢိၵ်ႇတင်းမဵဝ်း ဢီႉသရေႇလႃႉ တင်းသဵင်ႈတင်းလူင်လႆႈလူႉလႆႈသုမ်းဢေႃႈ။-

24ၽဝ်ႇၼိုင်ႈ၊ ဢႃႇၶတ်ႉ ဢဝ်ၶိူင်ႈပိူင်ႁိူၼ်းၽြႃးပဵၼ်ၸဝ်ႈ ၸူႉၵၼ်ၶွၼ်ႈၵၼ်ဝႆႉလႄႈ ႁၵ်းႁဵၵ်းပဵၼ်ပွတ်းပဵၼ်တွၼ်ႈသေလႄႈ ဢိုတ်းႁပ်းၽၵ်းတူႁိူၼ်းထႃႇဝရႃႉၽြႃးၸိူဝ်းၼၼ်ႉဝႆႉသေဢေႃႈ။ မၼ်းတႄႇႁဵတ်းယိတ်ႈပလၢင်ႇၵႃႈၼႂ်း ဝဵင်း ယေႇရူႉသလႅမ်ႇ ၵူႈၸဵင်ႇဢေႃႈ။-

25မၼ်းတႄႇႁဵတ်းထႃႇၼႃႉတီႈသုင် ၵႃႈၼႂ်းဝဵင်း ယူႉတႃႉ ၵူႈဝဵင်းႁင်းၽႂ်ႁင်းမၼ်း ပုၼ်ႈဢၼ်တၵ်းဢဝ်ၼၢမ်ႇသႃႇတုတ်ႇၽႆးတီႈၽြႃးတၢင်ႇသူႇတၢင်ႇပႃးတင်းလၢႆလႄႈ တိုၵ်းယူင်းတၢင်းၸႂ်မႆႈၶႆႈၸႃႉထႃႇဝရႃႉၽြႃး ၽြႃးပဵၼ်ၸဝ်ႈပူႇမွၼ်ႇမၼ်းဢေႃႈ။-

26လွင်ႈတၢင်း ဢႃႇၶတ်ႉ ဢၼ်ယင်းၵိုတ်းယင်းၵျၢၼ်ႇ သဵၼ်ႈတၢင်းၵႃႈဢၼ်မၼ်းၸွမ်းဢဝ် ၸဵမ်ငဝ်ႈတေႃႇပၢႆၸိူဝ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ယူႉတႃႉ တင်းရႃႇၸဝၢင်ႇ ဢီႉသရေႇလႃႉ ဢေႃႈ။-

27ဢႃႇၶတ်ႉ ၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ ပိၵ်ႉသမ်ႉၶဝ်ဢဝ်မၼ်းသၢင်းၵျူဝ်ႇၵႃႈၼႂ်းဝဵင်းၸဝ်ႈဢၼ်ဝႃႈ ဝဵင်း ယေႇရူႉသလႅမ်ႇ သေၵေႃႈ ၶဝ်ဢမ်ႇဢဝ်သၢင်းၵျူဝ်ႇၵႃႈၼႂ်း သၢင်းၶႅင်းၶုၼ်ႁေႃၶမ်း ဢီႉသရေႇလႃႉ ၸိူဝ်းၼၼ်ႉ။ ႁေႇၸၵီႉ လုၵ်ႈၸၢႆးၸဝ်ႈ ၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။