2 Chronicles 19

Shan

← Chapter 18 Jump to: Chapter 20 →

1ယူဝ်းသၽတ်ႉ ၶုၼ်ႁေႃၶမ်း ယူႉတႃႉ ၶိုၼ်းမႃးၸူးၵႃႈတီႈႁေႃၸဝ်ႈ ၵႃႈတီႈဝဵင်း ယေႇရူႉသလႅမ်ႇ ၼိမ်ၼိမ်လီလီဢေႃႈ။-

2ယေႇႁူႉ လုၵ်ႈၸၢႆး ႁႃႇၼၼီႉ ဢၼ်ပဵၼ်ၵေႃႉဢၼ်ႁူပွင်ႇတႃလႅင်းၼၼ်ႉ ဢွၵ်ႇႁႂ်ႈလႆႈႁပ်ႉႁူဝ်တၢင်းၶုၼ်လူင် ယူဝ်းသၽတ်ႉ လႄႈ လဝ်ႊလၢတ်ႈတီႈမၼ်းလႄႈဝႃႈ၊ ၸဝ်ႈၶုၼ်လူင်ထုၵ်ႇလီၸွႆႈထႅမ်မႃႉၸႃႉ ၶဝ်ၸိူဝ်းဢၼ်ဢမ်ႇတြႃးၼၼ်ႉတီႈၶႃႈႁိုဝ်။ ထုၵ်ႇလီႁၵ်ႉၶဝ်ၸိူဝ်းဢၼ်ၸင်း ထႃႇဝရႃႉၽြႃးၼၼ်ႉတီႈၶႃႈႁိုဝ်။ ၵွပ်ႈပိူဝ်ႈတီႈႁဵင်းၼႆႉလႄႈ တၢင်းၸႂ်မႆႈၶႆႈၸႃႉထႃႇဝရႃႉၽြႃးတူၵ်းႁွတ်ႈၵႃႈၼိူဝ်ၸဝ်ႈၶုၼ်လူင်တီႈၶႃႈယဝ်ႉ။-

3ၼႂ်းဝႃႈၼၼ်သေၵေႃႈ ၵွပ်ႈပိူဝ်ႈဢၼ်ၶုၼ်လူင် ပႄႇၽဵဝ်ႈတူၼ်ႈဢႃႇသရႃႉတင်းလၢႆပႅတ်ႈသေၵႃႈၼႂ်းမိူင်းတင်းမိူင်းလႄႈ ၶျႃးၸႂ်ႁႂ်ႈလႆႈႁႃၽြႃးပဵၼ်ၸဝ်ႈၼၼ်ႉလႄႈ လႆႈထူပ်းလွင်ႈတၢင်းဢၼ်လီဢၼ်ငၢမ်းၵႃႈၼႂ်းၶုၼ်လူင်တီႈၶႃႈယဝ်ႉ၊ ဝႃႈၼင်ႇၼႆဢေႃႈ။

4လိုၼ်းၼၼ်ႉ ယူဝ်းသၽတ်ႉ ယူႇၵႃႈၼႂ်းဝဵင်း ယေႇရူႉသလႅမ်ႇ ဢေႃႈ။ လႆႈသမ်ႉ မၼ်းဢွၵ်ႇသေလႄႇလဵပ်ႈၵႃႈၼႂ်းၵူၼ်းဝၢၼ်ႈၵူၼ်းမိူင်းတင်းလၢႆ ဢဝ်ၵႃႈတီႈၸႃႉၸဵမ်ဝဵင်း ပေႇရသေႇၽႃႉ ၊ တေႃႇထိုင်ႁွတ်ႈႁၢၼ်ႉလွႆ ဢေႇၽရိမ်ႇ လႄႈ ႁႂ်ႈၶဝ်ၶိုၼ်ႈၸူး ၵႃႈတီႈထႃႇဝရႃႉၽြႃး ၽြႃးပဵၼ်ၸဝ်ႈပူႇမွၼ်ႇၶဝ်ၼၼ်ႉဢေႃႈ။-

5မၼ်းၶၢၼ်းၵူၼ်းလူင်ဢၼ်ၸီႇယၢင်ႇတြႃးတင်းလၢႆ ဝႆႉၵႃႈတီႈဝဵင်းဢၼ်မၼ်ႈၶိူင်ႇ ၵႃႈၼႂ်းမိူင်း ယူႉတႃႉ ၵႃႈမီးႁင်းၽႂ်ႁင်းမၼ်းလႄႈ၊-

6သင်ႇလၢတ်ႈဝႆႉတီႈၵူၼ်းလူင်ဢၼ်ၸီႇယၢင်ႇတြႃးၸိူဝ်းၼၼ်ႉလႄႈဝႃႈ၊ ဢွၼ်ၵၼ်ႁဵတ်းသတီႉလူၺ်ႈလွင်ႈ ဢၼ်သူႁဵတ်းၼၼ်ႉတႃႉ။ သူဢွၼ်ၵၼ်ပႂ်ႉဢမူႉၵူၼ်းသေလႄႈ ၸီႇယၢင်ႇတြႃးဢမ်ႇၸႂ်ႈ။ သူဢွၼ်ၵၼ်ပႂ်ႉဢမူႉထႃႇဝရႃႉၽြႃးသေလႄႈ ၸီႇယၢင်ႇလႄႈ မၼ်းၸဝ်ႈမီးယူႇလူၺ်ႈၵၼ်တင်းသူ ၼႂ်းလွင်ႈဢၼ်သူၸီႇယၢင်ႇၼၼ်ႉဢေႃႈ။-

7ပိူဝ်ႈဢၼ်ပဵၼ်ၼင်ႇၼႆလႄႈ ႁႂ်ႈတၢင်းဢၼ်ၵူဝ်ႁႄထႃႇဝရႃႉၽြႃးၼၼ်ႉမီးတီႈသူတႃႉ။ ဢွၼ်ၵၼ်ပႃးသတီႉလႄႈႁဵတ်းတႃႉ။ ထႃႇဝရႃႉၽြႃး ၽြႃးပဵၼ်ၸဝ်ႈႁဝ်း ဢမ်ႇမီးဢၶႂၢင်ႉတၢင်းဢၼ် ႁပ်ႉတုင်းဢဝ်ဢမူႉဢၼ်ဢမ်ႇတြႃးတၢင်းဢၼ်ထွၵ်ႈလူၺ်ႈၼႃႈၵူၼ်း၊ တၢင်းဢၼ်ၵိၼ်လၢၵ်ႈသွင်ႇၸိူဝ်းၼၼ်ႉ၊ ဝႃႈၼင်ႇၼႆဢေႃႈ။

8ၵႃႈၼႂ်းဝဵင်း ယေႇရူႉသလႅမ်ႇ ၵေႃႈ ယူဝ်းသၽတ်ႉ ဢဝ် ၵႃႈၼႂ်းၵူၼ်းမဵဝ်း လေႇဝီႉ ၊ ၵႃႈၼႂ်းယိတ်ႈပရေႃးႁဵၵ်ႈ၊ ၵႃႈၼႂ်းၵူၼ်းဢၼ်ပဵၼ်ငဝ်ႈပဵၼ်ႁူဝ် ၼႂ်းမဵဝ်းၸိူဝ်ႉၶိူဝ်းပေႃႈၶဝ်၊ ၼႂ်းမဵဝ်း ဢီႉသရေႇလႃႉ ၵမ်ႈၽွင်ႈ ၶၢၼ်းဝႆႉႁႂ်ႈၸီႇယၢင်ႇဢမူႉတြႃးထႃႇဝရႃႉၽြႃးဢိၵ်ႇတင်းဢမူႉ ဢၼ်ၵူၼ်းၼင်ႇၵၼ်ထူပ်းတြႃးတီႈၵၼ်ၼၼ်ႉ ၼႂ်းမိူဝ်ႈဢၼ်ၶိုၼ်းမႃးၵႃႈတီႈဝဵင်း ယေႇရူႉသလႅမ်ႇ ၼၼ်ႉလႄႈ၊-

9သင်ႇလၢတ်ႈတီႈၶဝ်ၼၼ်ႉလႄႈဝႃႈ၊ သူဢွၼ်ၵၼ်မီးတင်းႁူဝ်ၸႂ်ဢၼ်ၸေးၸုမ်ႇလႄႈ ၵူဝ်ယမ်ထႃႇဝရႃႉၽြႃးယူႇ၊ ပႂ်ႉသဵတ်ႈၸႃႇယူႇသေလႄႈၸီႇယၢင်ႇတႃႉ။-

10ပေႃးဢမူႉတၢင်းဢၼ်ပီႈသူၼွင်ႉသူ ဢၼ်ယူႇၵႃႈၼႂ်းၵူႈဝၢၼ်ႈၵူႈဝဵင်းၼၼ်ႉ ထူပ်းတြႃးတီႈၵၼ်ဢၼ်ဝႃႈ ဢမူႉတၢင်းဢၼ်ဢဝ်ဢသၢၵ်ႈၵူၼ်းတၢႆ၊ ဢမူႉတၢင်းဢၼ်ပူၼ်ႉလိူဝ်ပိင်းၺၢပ်ႈတြႃး ဢိၵ်ႇတင်းလွင်ႈတၢင်းဢၼ်မၼ်းၸဝ်ႈသင်ႇလၢတ်ႈဝႆႉ၊ တင်းထုင်းၽိင်ႈတြႃး တင်းလွင်ႈတၢင်းဢၼ်မၼ်းၸဝ်ႈၸီႇယၢင်ႇဝႆႉၸိူဝ်းၼၼ်ႉၼၼ်ႉ ႁွတ်ႈထိုင်ၵႃႈတီႈၽၢႆႇၼႃႈသူၸိုင်၊ သူဢွၼ်ၵၼ်ပၼ်သတီႉတီႈၶဝ်ႁႂ်ႈၶဝ်ဢမ်ႇလႆႈၽိတ်းပိူင်ႈထႃႇဝရႃႉၽြႃးလႄႈ ႁႂ်ႈတၢင်းၸႂ်မႆႈၶႆႈၸႃႉၸဝ်ႈတူၵ်းႁွတ်ႈၵႃႈၼိူဝ်သူဢိၵ်ႇတင်းပီႈသူၼွင်ႉသူတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ တူဝ်သူတၵ်းဢွၼ်ၵၼ်ၵၢင်းလွတ်ႈတင်းဢပႅတ်ႈဢေႃႈ။-

11ၼႂ်းဢမူႉထႃႇဝရႃႉၽြႃးၵူႈၸိူဝ်ႉၵူႈပိူင်ၼၼ်ႉၸိုင်၊ ၶုၼ်ယိတ်ႈပရေႃးႁဵၵ်ႈ ဢႃႇမရီႉ လႆႈဢုပ်ႉၵႃႈၼိူဝ်သူဢေႃႈ။ ၼႂ်းဢမူႉၶုၼ်ႁေႃၶမ်းၵူႈၸိူဝ်ႉၵူႈပိူင်ၼၼ်ႉ၊ ၸေႇပတီႉ လုၵ်ႈၸၢႆး ဢီႉသမေႇလႃႉ ဢၼ်ပဵၼ်ၶုၼ်ၵႃႈၼိူဝ်မဵဝ်း ယူႉတႃႉ ၼၼ်ႉလႆႈဢုပ်ႉဢေႃႈ။ ၵူၼ်းမဵဝ်း လေႇဝီႉ တင်းလၢႆၵေႃႈလႆႈဢွၼ်ၵၼ်ႁဵတ်းၵူၼ်းဢွၼ်ႇၶၢမ်ႇတၢင်းၸႂ်ႉတၢင်းသွႆယူႇဢေႃႈ။ ဢွၼ်ၵၼ်ၸီႇယၢင်ႇႁတ်းႁတ်းႁၢၼ်ႁၢၼ်တႃႉ။ ထႃႇဝရႃႉၽြႃးတၵ်းယူႇၽၢႆႇၶဝ်ၸိူဝ်းဢၼ်လီဢၼ်ငၢမ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။

← Chapter 18 Jump to: Chapter 20 →