2 Chronicles 24

Shan

← Chapter 23 Jump to: Chapter 25 →

1ယေႃးသႃႉ ၼၼ်ႉ မိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင် ဢသၢၵ်ႈမၼ်းလႆႈၸဵတ်းပီႊလႄႈ ဢုပ်ႉပိူင်ႇၸၢမ်ႇၸႃးယူႇၵႃႈၼႂ်း ဝဵင်း ယေႇရူႉသလႅမ်ႇ သီႇသိပ်းပီႊဢေႃႈ။ ၸိုဝ်ႈသဵင်မႄႈၸဝ်ႈၸမ်ႉ၊ ပဵၼ် ၸီႉပီႉ ၵူၼ်းဝဵင်း ပေႇရသေႇၽႃႉ ၊ဢေႃႈ။-

2ၼႂ်းၸူဝ်ႈပၢၼ်ယိတ်ႈပရေႃးႁဵၵ်ႈ ယေႃးယတႃႉ ၼၼ်ႉတဵမ်တဵမ် ယေႃးသႃႉ သၢင်ႈႁဵတ်း ဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးဢေႃႈ။-

3ယေႃးယတႃႉ ဢဝ်မႄႈယိင်းသွင်ၵေႃႉဢၢပ်ႈပၼ်ႁႂ်ႈပဵၼ်မေးမၼ်းလႄႈ၊ မၼ်းလႆႈလုၵ်ႈယိင်းလုၵ်ႈၸၢႆးဢေႃႈ။

4လိုၼ်းၼၼ်ႉ ယေႃးသႃႉ ၼၼ်ႉ မီးတၢင်းၵျၢမ်ႇတၢင်းပွင်တၵ်းမႄးၵုမ်းမႄးႁဵတ်းႁိူၼ်းထႃႇဝရႃႉၽြႃးလႄႈ၊-

5ႁႂ်ႈယိတ်ႈပရေႃးႁဵၵ်ႈ တင်းၵူၼ်းမဵဝ်း လေႇဝီႉ တင်းလၢႆ ၸူႉၵၼ်တုမ်ၵၼ်သေလႄႈမီးဢမိင်ႉလႄႈဝႃႈ၊ သူဢွၼ်ၵၼ်ဢွၵ်ႇၵႂႃႇၸူး ၵႃႈတီႈဝဵင်း ယူႉတႃႉ တင်းလၢႆသေလႄႈ ၶၢမ်ႇဢဝ်တုင်းဢဝ်ငိုၼ်း တီႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ႁႂ်ႈလႆႈမႄးၵုမ်းမႄးႁဵတ်းႁိူၼ်းၽြႃးပဵၼ်ၸဝ်ႈသူၵူႈပီႊလႄႈ ၵျူဝ်းၸႃးႁႂ်ႈဢမူႉယဝ်ႉတူဝ်ႈတႃႉ၊ ဝႃႈၼင်ႇၼႆဢေႃႈ။ ၵူၺ်းၵႃႈၵူၼ်းမဵဝ်း လေႇဝီႉ ၸိူဝ်းၼၼ်ႉယင်းဢမ်ႇၵျူဝ်းၸႃးလႄႈယူႇဢေႃႈ။-

6လႆႈသမ်ႉၶုၼ်ႁေႃၶမ်းႁွင်ႉဢဝ်ယိတ်ႈပရေႃးႁဵၵ်ႈလူင် ယေႃးယတႃႉ မႃးလႄႈ ထၢမ်လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းယင်းဢမ်ႇသင်ႇလၢတ်ႈတီႈၵူၼ်းမဵဝ်း လေႇဝီႉ တင်းလၢႆ ႁႂ်ႈၶဝ်ၶၢမ်ႇဢဝ်တုင်းဢဝ်ငိုၼ်း ၽႃႇၵဵပ်းဢၼ် မူဝ်းသေႇ ၶႃႈထႃႇဝရႃႉၽြႃး ဢိၵ်ႇတင်းပရဵၵ်ႈသၢတ်ႈတီႈၸူႉတီႈတုမ် ဢီႉသရေႇလႃႉ ဢွၼ်ၵၼ်ပၼ်ပုၼ်ႈမူဝ်းၵႃႇၸဝ်ႈ တီႈဢၼ်ဝႆႉၶိူင်ႈဢၼ်ၶၢမ်ႇသၢၵ်ႈသေႇၸဝ်ႈၼၼ်ႉ ၵႃႈၼႂ်းမိူင်း ယူႉတႃႉ တင်းဝဵင်း ယေႇရူႉသလႅမ်ႇ ၼၼ်ႉလႄႈ ယူႇၼင်ႇႁိုဝ်၊ ဝႃႈၼင်ႇၼႆဢေႃႈ။-

7လုၵ်ႈၸၢႆး ဢႃႇထလီႉ မႄႈယိင်းဢႃႉထမ်ႇမႃႉၼၼ်ႉၸိူဝ်းၼၼ်ႉ ဢွၼ်ၵၼ်ၵိူၼ်ႇယႃႉႁိူၼ်း ၽြႃးပဵၼ်ၸဝ်ႈသေလႄႈ ဢဝ်ၽၼ်ႇတႃႇၶိူင်ႈပုၵ်ႈၸေႃႇၵႃႈၼႂ်းႁိူၼ်းၽြႃးပဵၼ်ၸဝ်ႈၵႃႈမီး ပုၵ်ႈၸေႃႇတီႈၽြႃး ပႃႇလႃႉ ယဝ်ႉယဝ်ႉဢေႃႈ။-

8ၶုၼ်ႁေႃၶမ်းမီးဢမိင်ႉလႄႈ ၶဝ်ဢွၼ်ၵၼ်ႁဵတ်းတိူၵ်ႈတႃႇလႄႈ ဝႆႉၵႃႈတီႈႁိမ်းၽၵ်းတူၵႃႈၼွၵ်ႈႁိူၼ်းထႃႇဝရႃႉၽြႃးဢေႃႈ။-

9ၶဝ်ဢွၼ်ၵၼ်လႄႇပၢဝ်ႇလႄႈလၢတ်ႈ ၵႃႈၼႂ်းမိူင်း ယူႉတႃႉ ဢိၵ်ႇတင်းဝဵင်း ယေႇရူႉသလႅမ်ႇ ႁႂ်ႈၶဝ်ဢွၼ်ၵၼ်ဢဝ်ငိုၼ်း ၽႃႇၵဵပ်းဢၼ် မူဝ်းသေႇ ၶႃႈၽြႃးပဵၼ်ၸဝ်ႈၸီႇယၢင်ႇဝႆႉတီႈမဵဝ်း ဢီႉသရေႇလႃႉ ၵႃႈၼႂ်းထိူၼ်ႇၼၼ်ႉမႃးတီႈထႃႇဝရႃႉၽြႃးဢေႃႈ။-

10ၶုၼ်တင်းလၢႆဢိၵ်ႇတင်းၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင် ဢွၼ်ၵၼ်မီးတင်းၸႂ်ဢၼ်ၸူမ်းသိူဝ်းသေလႄႈ ဢဝ်မႃးလႄႈ တွတ်ႈသႂ်ႇဝႆႉၵႃႈၼႂ်းတိူၵ်ႈတႃႇ တေႃႇထိုင်ႁွတ်ႈထၼ်ႈပေႃးယဝ်ႉပေႃးတူဝ်ႈဢေႃႈ။-

11မိူဝ်ႈဢၼ်ၵူၼ်းမဵဝ်း လေႇဝီႉ ၸိူဝ်းၼၼ်ႉ ဢဝ်တိူၵ်ႈတႃႇၼၼ်ႉသႂ်ႇဝႆႉ ၵႃႈၼႂ်းတိူၵ်ႈၽၼ်ႇတႃႇၶုၼ်ႁေႃၶမ်းလႄႈ ႁူႉႁၼ်လွင်ႈဢၼ်ငိုၼ်းၼမ်ၼႃႇၼၼ်ႉၸိုင် ၸရေးလူင်ၶုၼ်ႁေႃၶမ်း ဢိၵ်ႇတင်းၸရေးလူင်ယိတ်ႈပရေႃးႁဵၵ်ႈလူင်ၸိူဝ်းၼၼ်ႉမႃးလႄႈ ၼုၵ်ႈဢဝ်ငိုၼ်းႁႂ်ႈတိူၵ်ႈတႃႇပဝ်ႇသေယဝ်ႉ၊ သမ်ႉဢဝ်ၵႂႃႇၶိုၼ်းဝႆႉတီႈမၼ်းဢေႃႈ။ ၶဝ်ဢွၼ်ၵၼ်ႁဵတ်းၸိူဝ်ႉၼင်ႇၼၼ်ၵူႈဝၼ်းလႄႈ ဢဝ်ငိုၼ်းၼမ်ၼႃႇၸူႉၶွၼ်ႈဝႆႉဢေႃႈ။-

12ၶုၼ်ႁေႃၶမ်းတင်း ယေႃးယတႃႉ ၼၼ်ႉ ဢွၼ်ၵၼ်ဢဝ်ငိုၼ်းၼၼ်ႉဢၢပ်ႈပၼ်တီႈၶဝ်ၸိူဝ်းဢၼ် ပႂ်ႉတၢင်းဢၼ်ၵိုတ်ႉႁၢပ်ႇဢမူႉႁိူၼ်းထႃႇဝရႃႉၽြႃးၼၼ်ႉလႄႈ ၶဝ်ၼၼ်ႉဢွၼ်ၵၼ်ၸၢင်ႈငႃဢဝ် ၶဝ်ၸိူဝ်းဢၼ်မေႃတႄႇတိူၵ်ႈႁဵတ်းတိူၵ်ႈလႂ်၊ လၢၵ်ႈသမႃးလႂ် ႁႂ်ႈလႆႈမႄးၵုမ်းမႄႈႁဵတ်းႁိူၼ်းထႃႇဝရႃႉၽြႃး ဢိၵ်ႇတင်းၸၢင်ႈလဵၵ်းလႂ်၊ ၸၢင်ႈၶမ်းဢၼ်ႁဵတ်းတွင်းလိူင်လႂ် ႁႂ်ႈလႆႈမႄးႁဵတ်းမႄးပွင်ႁိူၼ်းထႃႇဝရႃႉၽြႃးဢေႃႈ။-

13ၶဝ်ၸိူဝ်းဢၼ်ႁဵတ်းတၢင်းႁဵတ်းၼၼ်ႉ ဢွၼ်ၵၼ်ၵျူဝ်းၸႃးလႄႈ မႄးၵုမ်းမႄးႁဵတ်းသေလႄႈႁႂ်ႈႁိူၼ်းၽြႃးပဵၼ်ၸဝ်ႈပဵၼ်ၼင်ႇပၵ်းၵဝ်ႇပိူင်ၵဝ်ႇၼၼ်ႉလႄႈ ႁႂ်ႈမၼ်ႈၶိူင်ႇဢေႃႈ။-

14မိူဝ်ႈဢၼ်ႁဵတ်းယဝ်ႉတူဝ်ႈယဝ်ႉၼၼ်ႉၸိုင်၊ ၶဝ်ဢွၼ်ၵၼ်ဢဝ်ငိုၼ်းဢၼ်ၵိုတ်းဢၼ်ၵျၢၼ်ႇၼၼ်ႉ မႃးတီႈၶုၼ်ႁေႃၶမ်းတင်း ယေႃးယတႃႉ လႄႈ ဢဝ်ငိုၼ်းၼၼ်ႉႁဵတ်းၶိူင်ႈပိူင်ပုၼ်ႈႁိူၼ်းထႃႇဝရႃႉၽြႃး ဢၼ်ဝႃႈ ၶိူင်ႈပိူင်ဢၼ်တၵ်းဢဝ်ၵိုတ်ႉႁၢပ်ႇဢမူႉၸဝ်ႈလႄႈ ပုၵ်ႈၸေႃႇလႂ်၊ ၸေႃႉလႂ်၊ ၵွၵ်းၶမ်းလႂ်၊ ၵွၵ်းငိုၼ်းလႂ်ဢေႃႈ၊ ၸူဝ်ႈပၢၼ် ယေႃးယတႃႉ ၼၼ်ႉတဵမ်တဵမ် ၶဝ်ဢွၼ်ၵၼ်ပုၵ်ႈၸေႃႇယိတ်ႈဢၼ်တုတ်ႇၽႆးၵႃႈၼႂ်းႁိူၼ်းထႃႇဝရႃႉၽြႃးယူႇတႃႇသေႇဢေႃႈ။

15ယေႃးယတႃႉ ၼၼ်ႉ ထဝ်ႈၵႄႇလႄႈ ႁွတ်ႈထိုင်တၢင်းဢၼ်ၶိင်ႇၵႃႇလႃႉမိုဝ်ႉဝၼ်းမၼ်းပျေႉၸုမ်ႇယဝ်ႉလႄႈ တၢႆသေဢေႃႈ။ မိူဝ်ႈဢၼ်တၢႆၼၼ်ႉၸိုင် ဢသၢၵ်ႈမၼ်းလႆႈ ပၢၵ်ႇပၢႆသၢမ်သိပ်းပီႊဢေႃႈ။-

16ၶဝ်ဢဝ်မၼ်းသၢင်းၵျူဝ်ႇၵႃႈၼႂ်းဝဵင်း တႃႇဝိတ်ႈ လူၺ်ႈၵၼ်တင်းၶုၼ်ႁေႃၶမ်းတင်းလၢႆ ၵွပ်ႈပိူဝ်ႈဢၼ်ၼႂ်းမဵဝ်း ဢီႉသရေႇလႃႉ ၼၼ်ႉ မၼ်းၼၼ်ႉပဵၼ်ၵေႃႉဢၼ်ႁဵတ်းဢၼ်လီဢၼ်ငၢမ်းတီႈၽြႃးပဵၼ်ၸဝ်ႈ ဢိၵ်ႇတင်းႁိူၼ်းၸဝ်ႈၼၼ်ႉဢေႃႈ။

17လိုၼ်းသေ ယေႃးယတႃႉ တၢႆယဝ်ႉၼၼ်ႉ၊ ၶုၼ် ယူႉတႃႉ တင်းလၢႆ ဢွၼ်ၵၼ်မႃးတီႈၶုၼ်ႁေႃၶမ်းလႄႈ ၶုပ်ႉဝႆႈဢေႃႈ၊ ၶုၼ်ႁေႃၶမ်းထွမ်ႇဢဝ်ၵႂၢမ်းၶဝ်ၼၼ်ႉသေယဝ်ႉ၊-

18ၶဝ်ၼၼ်ႉဢွၼ်ၵၼ်ၸုၼ်ႉပႅတ်ႈႁိူၼ်းထႃႇဝရႃႉၽြႃး ၽြႃးပဵၼ်ၸဝ်ႈ ပူႇၶဝ်မွၼ်ႇၶဝ်လႄႈ ႁဵတ်းဝၢတ်ႈတီႈတူၼ်ႈ ဢႃႇသရႃႉ လႂ် တင်းရုၵ်ႈထူႉလႂ်ဢေႃႈ။ ၵွပ်ႈပိူဝ်ႈဢပႅတ်ႈၶဝ်ၼၼ်ႉလႄႈ တၢင်းၸႂ်မႆႈၶႆႈၸႃႉၸဝ်ႈ တူၵ်းႁွတ်ႈၵႃႈၼိူဝ်မိူင်း ယူႉတႃႉ ဢိၵ်ႇတင်း ဝဵင်း ယေႇရူႉသလႅမ်ႇ ဢေႃႈ။-

19မၼ်းၸဝ်ႈပွႆႇၸႂ်ႉပရေႃးၽႅတ်ႈတင်းလၢႆတီႈၶဝ်ၼၼ်ႉ ႁႂ်ႈလႆႈတိုၵ်းယူင်းၸူဝ်းဢဝ်ၶဝ်ၼၼ်ႉၶိုၼ်းမႃးၸူးၵႃႈတီႈထႃႇဝရႃႉၽြႃးလႄႈ ပိၵ်ႉသမ်ႉၶဝ်ဢွၼ်ၵၼ်ၶၢမ်ႇသၢၵ်ႈသေႇယူႇၽၢႆႇၼိုင်ႈတင်းၶဝ်ၼၼ်ႉသေၵေႃႈ ၶဝ်ၼၼ်ႉဢမ်ႇထွမ်ႇဢမ်ႇဢဝ်။-

20ၽဝ်ႇၼိုင်ႈ ဝီႉၺိၺ်ႇထႃႇဝရႃႉၽြႃးတူၵ်းႁွတ်ႈၵႃႈၼိူဝ် ၸႃႇၶရီႉ လုၵ်ႈၸၢႆးယိတ်ႈပရေႃးႁဵၵ်ႈ ယေႃးယတႃႉ ၼၼ်ႉလႄႈ မၼ်းၼၼ်ႉၸုၵ်းယူႇၵႃႈတီႈဢၼ်သုင်ၵႃႈၼႂ်း ၵၢင်ပရဵၵ်ႈသၢတ်ႈသေလႄႈ ဢွၵ်ႇသူပ်းလႄႈဝႃႈ ၽြႃးပဵၼ်ၸဝ်ႈမီးဢမိင်ႉလႄႈဝႃႈၸမ်ႉ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူဢွၼ်ၵၼ်ပူၼ်ႉလိူဝ်ပိင်းၺၢပ်ႈထႃႇဝရႃႉၽြႃး ႁႂ်ႈဢၵျူဝ်းသူလူႉၼင်ႇႁိုဝ်။ ၵွပ်ႈပိူဝ်ႈဢၼ်သူၸုၼ်ႉပႅတ်ႈထႃႇဝရႃႉၽြႃးလႄႈ မၼ်းၸဝ်ႈၸုၼ်ႉပႅတ်ႈသူယဝ်ႉ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆလႄႈ၊-

21ၶဝ်လွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းမၼ်းလႄႈ ဢွၼ်ၵၼ်ဢဝ်မၢၵ်ႇႁိၼ်ထိမ်ႈမၼ်းၵႃႈၼႂ်းတမ်ႇတိူင်းႁိူၼ်းထႃႇဝရႃႉၽြႃး ၸွမ်းၵႃႈၼင်ႇဢၼ်ဢမိင်ႉ ၶုၼ်ႁေႃၶမ်းမီးၼၼ်ႉဢေႃႈ။-

22ၼင်ႇၼၼ်လႄႈၶုၼ်လူင် ယေႃးသႃႉ ယင်းဢမ်ႇၶုၵ်းၸႂ်လႆႈၶႆႈၸႂ်ထူပ်း ၵျေးၸူးဢၼ် ယေႃးယတႃႉ ပေႃႈမၼ်းၼၼ်ႉႁဵတ်းၼၼ်ႉလႄႈ ဢဝ်လုၵ်ႈၸၢႆးမၼ်းတၢႆလူင်ပႄႇ။ မိူဝ်ႈဢၼ်မၼ်းၼၼ်ႉတၢႆၼၼ်ႉၸိုင် မၼ်းၼၼ်ႉလၢတ်ႈလႄႈဝႃႈ၊ ထႃႇဝရႃႉၽြႃးတၵ်းတူၺ်းႁၼ်ဢမူႉၼႆႉလႄႈ ၸႅတ်ႈထၢမ်ၸီႇယၢင်ႇဢေႃႈ၊ ဝႃႈၼင်ႇၼႆဢေႃႈ။

23ၼႂ်းတီႈသုတ်းပီႊၼၼ်ႉ ၵူၼ်းတပ်ႉၵူၼ်းသိုၵ်း သူႉရီႉ တင်းလၢႆ ဢွၼ်ၵၼ်ၶီႇသိုၵ်းမႃးယူႇၽၢႆႇၼိုင်ႈတင်းမၼ်းလႄႈ ႁွတ်ႈထိုင်ၵႃႈတီႈ မိူင်း ယူႉတႃႉ ဢိၵ်ႇတင်းဝဵင်း ယေႇရူႉသလႅမ်ႇ သေယဝ်ႉ၊ ဢွၼ်ၵၼ်ပႄႇၽဵဝ်ႈမူးမၢတ်ႈၽွင်းမိူင်းၵႃႈမီးပႅတ်ႈသေ ၵႃႈၼႂ်းၵူၼ်းတင်းလၢႆလႄႈ ဢဝ်ဢုၵ်ႉၸႃႇ ၵႃႈဢၼ်ႁိမ်လႆႈၸိူဝ်းၼၼ်ႉ ပၼ်ၵႂႃႇတီႈၶုၼ်ႁေႃၶမ်း ထမ်ႇမသႅတ်ႉ ဢေႃႈ။-

24ပိၵ်ႉသမ်ႉၵူၼ်းတပ်ႉၵူၼ်းသိုၵ်း သူႉရီႉ ပဵၼ်မုၵ်ႉဢွၼ်ႇၸိူဝ်းဢွၼ်ႇသေလႄႈမႃးသေၵေႃႈ ထႃႇဝရႃႉၽြႃးဢဝ်မုၵ်ႉလူင်ၸိူဝ်းလူင်ဢၼ်ယႂ်ႇၼႃႇ ဢၢပ်ႈပၼ်ၵႃႈၼႂ်းမိုဝ်းၶဝ်ၼၼ်ႉ ၵွပ်ႈပိူဝ်ႈဢၼ်ၶဝ်ၸုၼ်ႉပႅတ်ႈထႃႇဝရႃႉၽြႃး ၽြႃးပဵၼ်ၸဝ်ႈပူႇၶဝ်မွၼ်ႇၶဝ်ဢေႃႈ။ ၼင်ႇၼၼ်လႄႈၶဝ်ၼၼ်ႉဢွၼ်ၵၼ်ၸီႇယၢင်ႇပၼ်တၢမ်ႇတီႈ ယေႃးသႃႉ ဢေႃႈ။-

25မိူဝ်ႈဢၼ်ၶဝ်ၼၼ်ႉဢွၵ်ႇၵႂႃႇသေၵႃႈတီႈမၼ်းယဝ်ႉၼၼ်ႉၸိုင်၊ မၼ်းလႆႈၶၢမ်ႇတၢင်းၶႆႈတၢင်းပဵၼ်ဢၼ်ယႂ်ႇၼႃႇလူင်လၢင်ၼၼ်ႉယူႇလႄႈ ၶႃႈမၼ်းၵူၼ်းမၼ်းဢွၼ်ၵၼ်လွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းမၼ်း ၵွပ်ႈပိူဝ်ႈလိူတ်ႈလုၵ်ႈၸၢႆးယိတ်ႈပရေႃးႁဵၵ်ႈ ယေႃးယတႃႉ ဢၼ်ထွၵ်ႇပႅတ်ႈၼၼ်ႉလႄႈ ယႃႉမၼ်းပႅတ်ႈၵႃႈၼိူဝ်ၵူႇတီႈၼွၼ်းမၼ်းထၼ်ႈပေႃးတၢႆဢေႃႈ။ မၼ်းၼၼ်ႉၸိုင်၊ ပိၵ်ႉသမ်ႉၶဝ်ဢဝ်သၢင်းၵျူဝ်ႇၵႃႈၼႂ်းဝဵင်း တႃႇဝိတ်ႈ သေၵေႃႈ၊ ၶဝ်ဢမ်ႇဢဝ်သၢင်းၵျူဝ်ႇၵႃႈၼႂ်းပႃႇႁဵဝ်ႈသၢင်းၶႅင်းၶုၼ်ႁေႃၶမ်းတင်းလၢႆ။-

26ၶဝ်ၸိူဝ်းဢၼ်လွမ်ႉႁွပ်ႈ ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းမၼ်းၼၼ်ႉၸမ်ႉ၊ ပဵၼ် ၸပတ်ႉ လုၵ်ႈၸၢႆး သီႉမတ်ႉ မႄႈယိင်းမဵဝ်း ဢမ်ႇမုၼ်ႇ ၊ ဢိၵ်ႇတင်း ယႁေႃးၸပတ်ႉ လုၵ်ႈၸၢႆး သီႉမရိတ်ႉ မႄႈယိင်းမဵဝ်း မေႃႇၽႃႉ ဢေႃႈ။-

27လွင်ႈတၢင်းလုၵ်ႈမၼ်းလၢင်းမၼ်း၊ လွင်ႈတၢင်းဢၼ်မၼ်းႁၢပ်ႇဢမူႉဢၼ်ၼၵ်း၊ လွင်ႈတၢင်းဢၼ်မႄးၵုမ်းမႄးႁဵတ်းႁိူၼ်းၽြႃးပဵၼ်ၸဝ်ႈၸိူဝ်းၼၼ်ႉၸိုင်၊ တႅမ်ႈဝႆႉမီးယူႇၵႃႈၼႂ်းလိၵ်ႈဢၼ်သိုပ်ႇၵၼ်တင်းရႃႇၸဝၢင်ႇၼၼ်ႉဢေႃႈ။ ဢႃႇမၸီႉ လုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။

← Chapter 23 Jump to: Chapter 25 →