2 Chronicles 8

Shan

← Chapter 7 Jump to: Chapter 9 →

1မိူဝ်ႈဢၼ်ထိုင်ႁွတ်ႈတီႈသုတ်း သၢဝ်းပီႊဢၼ် သေႃးလမုၼ်ႇ လႆႈတႄႇႁဵတ်းႁိူၼ်းထႃႇဝရႃႉၽြႃး ဢိၵ်ႇတင်းႁေႃၸဝ်ႈၼၼ်ႉၸိုင်၊-

2သေႃးလမုၼ်ႇ မႄးၵုမ်းမႄးႁဵတ်း ဝဵင်းဢၼ် ႁီႉရမ်ႇ ၶိုၼ်းပၼ်တီႈ သေႃးလမုၼ်ႇ ၸိူဝ်းၼၼ်ႉသေလႄႈ ႁႂ်ႈၵူၼ်းမဵဝ်း ဢီႉသရေႇလႃႉ ယူႇၵႃႈၼႂ်းမၼ်းဢေႃႈ။-

3လႆႈသမ်ႉ သေႃးလမုၼ်ႇ ၶီႇသိုၵ်းၵႂႃႇၸူးၵႃႈတီႈဝဵင်း ႁႃႇမတ်ႉၸေႃႇၽႃႉ လႄႈ ပႄႉၼႅင်ႇဢေႃႈ။-

4မၼ်းတႄႇႁဵတ်းဝဵင်း တႃႇတမေႃႇ ဢၼ်မီးၵႃႈၼႂ်းထိူၼ်ႇ ဢိၵ်ႇတင်းဝဵင်းတီႈဢၼ်သိမ်းဝႆႉၽၼ်ႇတႃႇၸဝ်ႈ ၵႃႈဢၼ်မၼ်းတႄႇႁဵတ်းၵႃႈတီႈမိူင်း ႁႃႇမတ်ႉ ၸိူဝ်းၼၼ်ႉဢေႃႈ။-

5မၼ်းတႄႇႁဵတ်းဝဵင်း ပဵတ်ႉႁေႃႇရုၼ်ႇ ဢၼ်ၵႃႈၼိူဝ် ဢိၵ်ႇတင်းဝဵင်း ပဵတ်ႉႁေႃႇရုၼ်ႇ ဢၼ်ၵႃႈတႂ်ႈ ဢၼ်ပဵၼ်ဝဵင်းဢၼ်မၼ်ႈၶိူင်ႇလႄႈပျေႉၸုမ်ႇတင်းလမ်းဝဵင်း၊ ၽၵ်းတူ၊ ၵိူၼ်ႇၽၵ်းတူၸိူဝ်းၼၼ်ႉ၊-

6ဢိၵ်ႇတင်းဝဵင်း ပႃႇလတ်ႉ တင်းၵႃႈပဵၼ်ဝဵင်းတီႈဢၼ်သိမ်းဝႆႉၽၼ်ႇတႃႇၸဝ်ႈလႄႈ သေႃးလမုၼ်ႇ ပိူင်ႇၼၼ်ႉ၊ ဝဵင်းတင်းလၢႆဢၼ်လႆႈလူထိင်းလေႃႉရထႃးၸဝ်ႈ၊ ဝဵင်းတင်းလၢႆဢၼ်လႆႈလဵင်ႉမႃႉၸဝ်ႈ ဢိၵ်ႇတင်းၵႃႈဢၼ် သေႃးလမုၼ်ႇ ၶႂ်ႈတႄႇႁဵတ်းၵႃႈၼႂ်းဝဵင်း ယေႇရူႉသလႅမ်ႇ ၊ ၵႃႈၼိူဝ်လွႆ လေႇပၼုၼ်ႇ ၊ ၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၵူႈတီႈၵူႈလႅၼ်ၼၼ်ႉဢေႃႈ။

7ၵႃႈဢၼ်ပဵၼ်ၵူၼ်းမဵဝ်း ႁိတ်ႉတီႉ ၊ ၵူၼ်းမဵဝ်း ဢႃႇမေႃးရီႉ ၊ ၵူၼ်းမဵဝ်း ၽေႇရၸီႉ ၊ ၵူၼ်းမဵဝ်း ႁီႉဝီႉ ၊ ၵူၼ်းမဵဝ်း ယေႇပူႉသီႉ ၊ ဢၼ်ဢမ်ႇပဵၼ် ၵူၼ်းမဵဝ်း ဢီႉသရေႇလႃႉ ဢၼ်ၵိုတ်းဢၼ်ၵျၢၼ်ႇတီႈမိူင်းၸဝ်ႈ၊-

8ဢၼ်ဝႃႈ လုၵ်ႈၶဝ် လၢၼ်ၶဝ်ဢၼ်ၵိုတ်းၵျၢၼ်ႇလိုၼ်းၶဝ် ၵႃႈတီႈမိူင်းၸဝ်ႈၵွပ်ႈပိူဝ်ႈဢၼ်ၵူၼ်းမဵဝ်း ဢီႉသရေႇလႃႉ တင်းလၢႆ ဢမ်ႇယႃႉၽဵဝ်ႈၶဝ်ပႅတ်ႈၼၼ်ႉၸိုင်၊ သေႃးလမုၼ်ႇ ၽႃႇဢဝ်ၵဵပ်းဢဝ်ၵူၼ်းႁႂ်ႈၶၢမ်ႇႁဵတ်းၶႃႈတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-

9ၵူၼ်းမဵဝ်း ဢီႉသရေႇလႃႉ တင်းလၢႆၸမ်ႉ၊ သေႃးလမုၼ်ႇ ဢမ်ႇႁႂ်ႈၶၢမ်ႇႁဵတ်းၶႃႈ၊ ၶဝ်ၼၼ်ႉလႆႈပဵၼ်ႁူဝ်ႁၢၼ်ၵူၼ်းသိုၵ်းလႂ်၊ မူးမၢတ်ႈ၊ ၸဵတ်ႈၵႄး လႂ်၊ ၶဝ်ၸိူဝ်းဢၼ်ဢုပ်ႉၵႃႈၼိူဝ်လေႃႉရထႃးၸဝ်ႈလႂ်၊ ၶဝ်ၸိူဝ်းဢၼ်ဢုပ်ႉၵႃႈၼိူဝ်မႃႉၸဝ်ႈလႂ်ဢေႃႈ။-

10မူးလူင်မၢတ်ႈလူင် ဢၼ် သေႃးလမုၼ်ႇ ၶၢၼ်းဝႆႉ ဢၼ်ဢုပ်ႉၵႃႈၼိူဝ်ၵူၼ်းဢၼ်ၵိုတ်ႉႁၢပ်ႇဢမူႉတင်းလၢႆၸိူဝ်းၼၼ်ႉမီးသွင်ပၢၵ်ႇပၢႆႁႃႈသိပ်းဢေႃႈ။-

11သေႃးလမုၼ်ႇ ဢဝ်လုၵ်ႈယိင်းၶုၼ်ႁေႃၶမ်း ၽႃႇရေႃး ၼၼ်ႉ ဢွၵ်ႇသေၵႃႈၼႂ်းဝဵင်း တႃႇဝိတ်ႈ လႄႈ မႃးဝႆႉၵႃႈတီႈႁေႃၸဝ်ႈဢၼ်မၼ်းႁဵတ်းဝႆႉပုၼ်ႈမၼ်းၼၼ်ႉဢေႃႈ။ လွင်ႈမၼ်းၸမ်ႉ မၼ်းဝႃႈ၊ ၵွပ်ႈပိူဝ်ႈဢၼ်တီႈဢၼ်တိူၵ်ႈတႃႇထႃႇဝရႃႉၽြႃးႁွတ်ႈမႃးၼၼ်ႉမူတ်းၸၢင်ႇလႄႈ မေးၵဝ်ၼႆႉဢမ်ႇထုၵ်ႇလီယူႇၵႃႈၼႂ်းႁိူၼ်း တႃႇဝိတ်ႈ ၊ ၶုၼ်ႁေႃၶမ်း ဢီႉသရေႇလႃႉ ၼၼ်ႉ၊ ဝႃႈၼင်ႇၼႆဢေႃႈ။

12သေႃးလမုၼ်ႇ မီးထုင်းၸၢမ်ႇဢၼ်ယၢမ်ႈပုၵ်ႈၸေႃႇယိတ်ႈဢၼ်တုတ်ႇၽႆး ဢၼ်လႆႈပုၵ်ႈၸေႃႇယေႈဝၼ်းၵႃႈႁိုဝ်ၼၼ်ႉ တီႈထႃႇဝရႃႉၽြႃး ၵႃႈၼိူဝ်ယိတ်ႈပလၢင်ႇထႃႇဝရႃႉၽြႃး ဢၼ်မၼ်းတႄႇႁဵတ်းဝႆႉၵႃႈတီႈၽၢႆႇၼႃႈႁိူၼ်း ၼႃႈႁိူၼ်းၸဝ်ႈၼၼ်ႉလႄႈ ပုၵ်ႈၸေႃႇမႅၼ်ႈၸွမ်းၵႃႈၼင်ႇဢၼ်ပိင်းၺၢပ်ႈတြႃးမူဝ်းသေႇမီးၼၼ်ႉၵူႈဝၼ်း၊-

13ဢိၵ်ႇတင်းဝၼ်းၵမ်သိၼ်တင်းဝၼ်းလိူၼ်မႂ်ႇ တင်းပွႆးထမ်ႇမႃႉ ဢၼ်လႆႈၶၢမ်ႇယေႈပီႊသၢမ်ပွၵ်ႈဢၼ်ဝႃႈ ပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈ၊ ပွႆးၸဵတ်းသတၢင်း၊ ပွႆးႁဵတ်းသုမ်ႉထဵင်ၸိူဝ်းၼၼ်ႉဢေႃႈ။-

14မၼ်းၸွမ်းၵႃႈၼင်ႇဢၼ်ၸဝ်ႈပေႃႈမၼ်း တႃႇဝိတ်ႈ ၸီႇယၢင်ႇဝႆႉၼၼ်ႉသေလႄႈၶၢၼ်းဝႆႉ ယိတ်ႈပရေႃးႁဵၵ်ႈတင်းလၢႆ ႁႂ်ႈလႆႈၵိုတ်ႉႁၢပ်ႇဢမူႉၶဝ်ပဵၼ်လႄႉပဵၼ်ၵမ်း၊ ဢိၵ်ႇတင်းၵူၼ်းမဵဝ်း လေႇဝီႉ တင်းလၢႆ ႁႂ်ႈၶဝ်လႆႈပႂ်ႉတူၺ်းလုမ်းလႃးဢမူႉတၢင်းဢၼ်ႁဵတ်းၵႂၢမ်းထေႃးပၼႃႇ၊ တၢင်းဢၼ်ပွင်ႁဵတ်းဢမူႉ ၵႃႈတီႈၽၢႆႇၼႃႈယိတ်ႈပရေႃးႁဵၵ်ႈတင်းလၢႆ ၸွမ်းၵႃႈၼင်ႇဢၼ်ထုၵ်ႇလီႁဵတ်းၵူႈဝၼ်း ဢိၵ်ႇတင်းၶဝ်ၸိူဝ်းဢၼ်ပႂ်ႉၽၵ်းတူ ႁႂ်ႈလႆႈပႂ်ႉၽၵ်းတူၵႃႈမီးပဵၼ်လႄႉပဵၼ်ၵမ်းၼၼ်ႉဢေႃႈ။ လွင်ႈမၼ်းၸမ်ႉ တႃႇဝိတ်ႈ ၵူၼ်းၽြႃးပဵၼ်ၸဝ်ႈၼၼ်ႉ မီးၸိူဝ်ႉၼင်ႇၼၼ်ဢေႃႈ။-

15ၶဝ်ဢမ်ႇပႄႇဢမ်ႇပႅတ်ႈၵႂၢမ်းဢၼ်ၶုၼ်ႁေႃၶမ်း သင်ႇလၢတ်ႈဝႆႉတီႈယိတ်ႈပရေႃးႁဵၵ်ႈ ဢိၵ်ႇတင်းၵူၼ်းမဵဝ်း လေႇဝီႉ တင်းလၢႆ လူၺ်ႈလွင်ႈဢမူႉသေၸိူဝ်ႉသေပိူင် ဢိၵ်ႇတင်းလူၺ်ႈလွင်ႈၽၼ်ႇတႃႇၸဝ်ႈၸိူဝ်းၼၼ်ႉ။-

16ပိူဝ်ႈဢၼ်လွင်ႈတၢင်းဢၼ် သေႃးလမုၼ်ႇ တၵ်းလႆႈသၢင်ႈလႆႈႁဵတ်းၵႃႈမီးၼၼ်ႉ မီးဝႆႉႁႅၼ်းဝႆႉယဝ်ႉၸႃႉၸဵမ်မိုဝ်ႉဝၼ်းဢၼ်ၶျႃးငဝ်ႈႁၢၵ်ႈႁိူၼ်းထႃႇဝရႃႉၽြႃးတေႃႇထိုင်ႁွတ်ႈထၼ်ႈပေႃးယဝ်ႉပေႃးတူဝ်ႈၼၼ်ႉလႄႈ၊ ႁိူၼ်းထႃႇဝရႃႉၽြႃးၼၼ်ႉ ယဝ်ႉတူဝ်ႈလီငၢမ်းဢေႃႈ။

17လႆႈသမ်ႉ သေႃးလမုၼ်ႇ ၵႂႃႇၵႃႈတီႈဝဵင်း ဢေးၸယုၼ်းၵႃႇပႃႇ တင်းဝဵင်း ဢေႇလုတ်ႉ ဢၼ်မီးၵႃႈတီႈႁိမ်းၽင်ႇပၢင်ႇလၢႆႇ ၼႂ်းမိူင်း ဢေႇတုမ်ႇ ဢေႃႈ။-

18ႁီႉရမ်ႇ ၵေႃႈပွႆႇၸႂ်ႉၶႃႈမၼ်းၵူၼ်းမၼ်းပႃးဢဝ်ႁိူဝ်းသၢင်းၽေႃးတင်းလၢႆ ဢိၵ်ႇတင်းၶႃႈမၼ်းၵူၼ်းမၼ်းဢၼ်ႁူႉလွင်ႈတၢင်းဢၼ်ၶၢမ်ႈပၢင်ႇလၢႆႇၸိူဝ်းၼၼ်ႉမႃးတီႈမၼ်းလႄႈ၊ ၶဝ်ၼၼ်ႉၶီႇလူၺ်ႈၵၼ်တင်း ၶႃႈၶုၼ် သေႃးလမုၼ်ႇ သေလႄႈ ၵႂႃႇၵႃႈတီႈမိူင်း ဢေႃႇၽီႉရႃႉ သေယဝ်ႉ၊ ဢဝ်ၶမ်းသီႇပၢၵ်ႇပၢႆႁႃႈသိပ်း တလၢၼ်ႇတၢၼ်ႇ ၶိုၼ်းမႃးတီႈၶုၼ်လူင် သေႃးလမုၼ်ႇ ဢေႃႈ။

← Chapter 7 Jump to: Chapter 9 →