2 Chronicles 35

Shan

← Chapter 34 Jump to: Chapter 36 →

1လႆႈသမ်ႉ ယူဝ်းသီႉယႃႉ ၶၢမ်ႇပွႆးပႃႉသၶႃႇပုၼ်ႈထႃႇဝရႃႉၽြႃး ၵႃႈၼႂ်းဝဵင်း ယေႇရူႉသလႅမ်ႇ လႄႈ ၼႂ်းလိူၼ်ပထမႃႉသိပ်းသီႇဝၼ်းၼၼ်ႉ ၶဝ်ဢွၼ်ၵၼ်ဢဝ်သူဝ်းဢွၼ်ႇပႃႉသၶႃႇတၢႆဢေႃႈ။-

2မၼ်းၶၢၼ်းယိတ်ႈပရေႃးႁဵၵ်ႈတင်းလၢႆဝႆႉၵႃႈၼႂ်းဢရႃႇၶဝ်လႄႈ တိုၵ်းယူင်းၸူဝ်းဢဝ်ၶဝ် ႁႂ်ႈၶဝ်ပွင်ႁဵတ်းဢမူႉႁိူၼ်းထႃႇဝရႃႉၽြႃးဢေႃႈ။-

3မၼ်းမီးဢမိင်ႉ တီႈၵူၼ်းမဵဝ်း လေႇဝီႉ ဢၼ်သင်ႇသွၼ်မဵဝ်း ဢီႉသရေႇလႃႉ ၵႃႈမီးလႄႈ မူတ်းၸၢင်ႇပုၼ်ႈထႃႇဝရႃႉၽြႃးၸိူဝ်းၼၼ်ႉလႄႈဝႃႈ၊ ဢွၼ်ၵၼ်ဢဝ်တိူၵ်ႈတႃႇၸဝ်ႈ ဢၼ်မူတ်းၸၢင်ႇၼၼ်ႉသႂၢင်းသႂ်ႇဝႆႉၵႃႈၼႂ်းႁိူၼ်းၸဝ်ႈ ဢၼ် သေႃးလမုၼ်ႇ လုၵ်ႈၸၢႆး တႃႇဝိတ်ႈ ၶုၼ်ႁေႃၶမ်း ဢီႉသရေႇလႃႉ ၼၼ်ႉ တႄႇႁဵတ်းၼၼ်ႉတႃႉ။ ၵမ်းလိုၼ်းယင်းဢမ်ႇလႆႈပဵၼ်ၶူဝ်းႁၢပ်ႇၶူဝ်းပႃးၵႃႈၼိူဝ်ႁူဝ်မႃႇသူယဝ်ႉ။ မိူဝ်ႈလဵဝ်ၼႆႉၸိုင်၊ သူဢွၼ်ၵၼ်ပွင်ႁဵတ်းဢမူႉထႃႇဝရႃႉၽြႃး ၽြႃးပဵၼ်ၸဝ်ႈသူ ဢိၵ်ႇတင်းဢမူႉၵူၼ်းမၼ်းၸဝ်ႈ မဵဝ်း ဢီႉသရေႇလႃႉ တႃႉ။-

4ဢွၼ်ၵၼ်မႄးႁႅၼ်းတူဝ်သူဝႆႉ ၸွမ်းလူၺ်ႈမဵဝ်းပူႇမဵဝ်းပေႃႈသူ ၵႃႈၼင်ႇဢၼ်ပဵၼ်မုၵ်ႉပဵၼ်ၸိူဝ်းဝႆႉ မႅၼ်ႈၵၼ်တင်းလိၵ်ႈ တႃႇဝိတ်ႈ ၶုၼ်ႁေႃၶမ်း ဢီႉသရေႇလႃႉ ဢိၵ်ႇတင်းလိၵ်ႈ သေႃးလမုၼ်ႇ လုၵ်ႈၸၢႆးၸဝ်ႈၼၼ်ႉလႄႈ၊-

5ၸုၵ်းယူႇၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈ ၸွမ်းၵႃႈၼင်ႇဢၼ်မဵဝ်းပူႇမဵဝ်းပေႃႈပီႈၼွင်ႉသူ ဢၼ်ဝႃႈၵူၼ်းဝၢၼ်ႈၵူၼ်းမိူင်းၸိူဝ်းၼၼ်ႉလႆႈၶၢမ်ႇတၢင်းဢၼ်ၽႄဝႆႉႁင်းၽႂ်ႁင်းမၼ်းသေလႄႈ ႁႂ်ႈမဵဝ်းပူႇမဵဝ်းပေႃႈၵူၼ်းမဵဝ်း လေႇဝီႉ ယေႈပုၼ်ႈပဵၼ်ပုၼ်ႈယေႈမဵဝ်းႁင်းၽႂ်ႁင်းမၼ်းၼၼ်ႉတႃႉ။-

6ၼင်ႇၼၼ်လႄႈ ဢွၼ်ၵၼ်ဢဝ်သူဝ်းဢွၼ်ႇ ပႃႉသၶႃႇ တၢႆလႄႈ ႁႂ်ႈတူဝ်သူမူတ်းၸၢင်ႇသေလႄႈ မႄးႁႅၼ်းပီႈၼွင်ႉသူၸိူဝ်းၼၼ်ႉဝႆႉ ႁႂ်ႈလႆႈႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးဢဝ် မူဝ်းသေႇ သင်ႇလၢတ်ႈဝႆႉၼၼ်ႉတႃႉ၊ ဝႃႈၼင်ႇၼႆဢေႃႈ။-

7ယူဝ်းသီႉယႃႉ ဢဝ်သူဝ်းဢွၼ်ႇပႄႉဢွၼ်ႇ ၵႃႈၼႂ်းၽုင်သူဝ်းၽုင်ပႄႉသၢမ်မိုၼ်ႇ ဢိၵ်ႇတင်းဝူဝ်းသၢမ်ႁဵင် ဢၢပ်ႈပၼ်ၵူၼ်းဝၢၼ်ႈၵူၼ်းမိူင်း ၵႃႈဢၼ်ၸူႉတုမ်တင်းသဵင်ႈတင်းလူင်ၼၼ်ႉ ပုၼ်ႈတၢင်းပုၵ်ႈၸေႃႇပႃႉသၶႃႇဢေႃႈ။ ဢၼ်ၸိူဝ်းၼၼ်ႉၸမ်ႉ၊ ပဵၼ်ဢုၵ်ႉၸႃႇၶုၼ်ႁေႃၶမ်းဢေႃႈ။-

8မူးမၢတ်ႈၽွင်းမိူင်းမၼ်းတင်းလၢႆၵေႃႈ ဢွၼ်ၵၼ်မီးၸႂ်ၸေႇတၼႃႇသေလႄႈ ပၼ်တီႈၵူၼ်းတင်းလၢႆ ဢိၵ်ႇတင်းယိတ်ႈပရေႃးႁဵၵ်ႈတင်းလၢႆ တင်းၵူၼ်းမဵဝ်း လေႇဝီႉ ၸိူဝ်းၼၼ်ႉဢေႃႈ။ ႁီႉလၶီႉ၊ ၸႃႇၶရီႉ၊ ယေႇႁေႇလႃႉ ၊ ဢၼ်ဢုပ်ႉၵႃႈၼိူဝ်ႁိူၼ်းၽြႃးပဵၼ်ၸဝ်ႈၸိူဝ်းၼၼ်ႉၵေႃႈ ဢွၼ်ၵၼ်ဢဝ်သူဝ်းပႄႉ သွင်ႁဵင်ပၢႆႁူၵ်းပၢၵ်ႇ တင်းဝူဝ်းသၢမ်ပၢၵ်ႇ ဢၢပ်ႈပၼ်တီႈယိတ်ႈပရေႃးႁဵၵ်ႈတင်းလၢႆ ပုၼ်ႈတၢင်းပုၵ်ႈၸေႃႇ ပႃႉသၶႃႇ ဢေႃႈ။-

9ၵေႃးၼၼီႉ ဢိၵ်ႇတင်း သေႇမႃႇယႃႉ တင်း ၼႃႇသၼေႇလႃႉ ဢၼ်ပဵၼ်ၼွင်ႉၸၢႆးမၼ်း ႁႃႇသပီႉ၊ ယေႇယေႇလႃႉ၊ ယေႃးသပတ်ႉ ဢၼ်ပဵၼ်ငဝ်ႈပဵၼ်ႁူဝ် ၵူၼ်းမဵဝ်း လေႇဝီႉ ၼၼ်ႉ ၸိူဝ်းၼၼ်ႉၵေႃႈ ဢွၼ်ၵၼ်ဢဝ်သူဝ်းပႄႉႁႃႈႁဵင် တင်းဝူဝ်းႁႃႈပၢၵ်ႇ ဢၢပ်ႈပၼ်တီႈၵူၼ်းမဵဝ်း လေႇဝီႉ တင်းလၢႆ ပုၼ်ႈတၢင်းပုၵ်ႈၸေႃႇ ပႃႉသၶႃႇ ဢေႃႈ။-

10ၼင်ႇၼၼ်လႄႈ ၶဝ်ဢွၼ်ၵၼ်မႄးႁႅၼ်းပုၼ်ႈဢၼ်တၵ်းႁဵတ်းဝၢတ်ႈလႄႈ ယိတ်ႈပရေႃးႁဵၵ်ႈၸိူဝ်းၼၼ်ႉဢွၼ်ၵၼ်ၸုၵ်းယူႇၵႃႈၼႂ်းတီႈယူႇၶဝ်သေလႄႈ ၵူၼ်းမဵဝ်း လေႇဝီႉ ၸိူဝ်းၼၼ်ႉၵေႃႈ ဢွၼ်ၵၼ်ႁဵတ်းပဵၼ်မုၵ်ႉပဵၼ်ၸိူဝ်းယူႇ ၸွမ်းၵႃႈၼင်ႇဢၼ်ဢမိင်ႉၶုၼ်ႁေႃၶမ်းမီးၼၼ်ႉဢေႃႈ။-

11ၶဝ်ဢွၼ်ၵၼ်ဢဝ်သူဝ်းဢွၼ်ႇ ပႃႉသၶႃႇ တၢႆလႄႈ ယိတ်ႈပရေႃးႁဵၵ်ႈၸိူဝ်းၼၼ်ႉ ဢွၼ်ၵၼ်ဢဝ်လိူတ်ႈဢၼ်ၶဝ်ႁပ်ႉၶၢမ်ႇဢဝ်ၵႃႈတီႈမိုဝ်းၶဝ်ၼၼ်ႉ ၽႅတ်းသႂ်ႇယူႇ၊ ၵူၼ်းမဵဝ်း လေႇဝီႉ ၸိူဝ်းၼၼ်ႉၵေႃႈ ဢွၼ်ၵၼ်လွၵ်ႈၼင်မၼ်းယူႇဢေႃႈ။-

12ၶဝ်ဢွၼ်ၵၼ်ၽႄဢဝ်ယိတ်ႈဢၼ်တုတ်ႇၽႆးတင်းလၢႆ ႁႂ်ႈလႆႈမႅင်ႇပၼ်ၸွမ်းလူၺ်ႈ တၢင်းဢၼ်မဵဝ်းပူႇမဵဝ်းပေႃႈၵူၼ်းဝၢၼ်ႈၵူၼ်းမိူင်းတင်းလၢႆ လႆႈၶၢမ်ႇတၢင်းဢၼ်ၽႄဝႆႉႁင်းၽႂ်ႁင်းမၼ်း ႁႂ်ႈလႆႈပုၵ်ႈၸေႃႇတီႈထႃႇဝရႃႉၽြႃးမႅၼ်ႈၸွမ်းၵႃႈၼင်ႇဢၼ်တႅမ်ႈဝႆႉ ၵႃႈၼႂ်းၵျၢမ်းလိၵ်ႈ မူဝ်းသေႇ ၼၼ်ႉဢေႃႈ။ ဝူဝ်းတင်းလၢႆၵေႃႈ ၶဝ်ဢဝ်ႁဵတ်းၸိူဝ်ႉၼင်ႇၼၼ်ဢေႃႈ။-

13ၶဝ်ဢွၼ်ၵၼ်ဢဝ်သူဝ်းဢွၼ်ႇ ပႃႉသၶႃႇ ပိင်ႈၽႆးႁၢင်းၽႆးၸွမ်းၵႃႈၼင်ႇဢၼ်ထုင်းၽိင်ႈတြႃးမီးၼၼ်ႉလႄႈ ဢဝ်ၶိူင်ႈပုၵ်ႈၸေႃႇတၢင်းဢၼ်မူတ်းၸၢင်ႇၸိူဝ်းၼၼ်ႉ တူမ်ႈၵႃႈၼႂ်းမေႃႈလိၼ်၊ မေႃႈလဵၵ်း ဢွမ်လဵၵ်းသေလႄႈ ဢဝ်ၽႄမႅင်ႇပၼ်တီႈၵူၼ်းတင်းသဵင်ႈတင်းလူင်ၶၼ်ၶၼ်ၽႂ်းၽႂ်းဢေႃႈ။-

14လိုၼ်းၼၼ်ႉ ၶဝ်ဢွၼ်ၵၼ်မႄးႁဵတ်းမႄးႁႅၼ်းပုၼ်ႈတူဝ်ၸဝ်ႈၵဝ်ႇ ဢိၵ်ႇတင်းပုၼ်ႈယိတ်ႈပရေႃးႁဵၵ်ႈတင်းလၢႆဢေႃႈ။ ၵွပ်ႈပိူဝ်ႈဢၼ်ယိတ်ႈပရေႃးႁဵၵ်ႈၵူၼ်းမဵဝ်း ဢႃႇရုၼ်ႇ ၸိူဝ်းၼၼ်ႉ ပုၵ်ႈၸေႃႇယိတ်ႈဢၼ်တုတ်ႇၽႆး ဢိၵ်ႇတင်းၵွၼ်ႈၶႆၵွၼ်ႈမၼ်း မၼ်းယူႇတေႃႇထိုင်ႁွတ်ႈၶိင်ႇႁူဝ်ၶမ်ႈလႄႈ ၵူၼ်းမဵဝ်း လေႇဝီႉ ၸိူဝ်းၼၼ်ႉ လႆႈဢွၼ်ၵၼ်မႄးႁဵတ်းမႄးႁႅၼ်းပုၼ်ႈတူဝ်ၸဝ်ႈၵဝ်ႇ ဢိၵ်ႇတင်းပုၼ်ႈ ယိတ်ႈပရေႃးႁဵၵ်ႈၵူၼ်းမဵဝ်း ဢႃႇရုၼ်ႇ ၸိူဝ်းၼၼ်ႉဝႆႉဢေႃႈ။-

15မေႃႁဵတ်းၵႂၢမ်း ၵူၼ်းမဵဝ်း ဢႃႇသပ်ႉ ၸိူဝ်းၼၼ်ႉ ဢွၼ်ၵၼ်မီးယူႇၵႃႈၼႂ်းတီႈယူႇၶဝ် ၸွမ်းၵႃႈၼင်ႇဢၼ် တႃႇဝိတ်ႈ၊ ဢႃႇသပ်ႉ၊ ႁေႇမၼ်ႇ ၊ တင်း ယေႇတူႉသုၼ်ႇ ၵေႃႉဢၼ်ႁူပွင်ႇတႃလႅင်း တီႈၶုၼ်ႁေႃၶမ်းၼၼ်ႉၸိူဝ်းၼၼ်ႉၸီႇယၢင်ႇဝႆႉၼၼ်ႉဢေႃႈ။ ၵူၼ်းပႂ်ႉၽၵ်းတူၸိူဝ်းၼၼ်ႉၵေႃႈ၊ ဢွၼ်ၵၼ်မီးယူႇၵႃႈတီႈ ႁူးၽၵ်းတူၽႂ်ႁူးၽၵ်းတူမၼ်းလႄႈ ဢမ်ႇလႆႈယႃႉလႆႈဝႆႉဢမူႉၶဝ်ၵွပ်ႈပိူဝ်ႈဢၼ်ပီႈၼွင်ႉၶဝ် ၵူၼ်းမဵဝ်း လေႇဝီႉ ၸိူဝ်းၼၼ်ႉ ဢွၼ်ၵၼ်မႄးႁႅၼ်းပုၼ်ႈၶဝ်ယူႇၼၼ်ႉဢေႃႈ။-

16ၶဝ်ဢွၼ်ၵၼ်မႄးႁဵတ်းမႄးႁႅၼ်းဝၢတ်ႈဢၼ် လႆႈႁဵတ်းတီႈထႃႇဝရႃႉၽြႃး ၼႂ်းဝၼ်းၼၼ်ႉၵမ်းလဵဝ် ႁႂ်ႈလႆႈၶၢမ်ႇပွႆး ပႃႉသၶႃႇ လႄႈပုၵ်ႈၸေႃႇ ယိတ်ႈဢၼ်တုတ်ႇၽႆးၵႃႈၼိူဝ်ယိတ်ႈပလၢင်ႇထႃႇဝရႃႉၽြႃး ၸွမ်းၵႃႈၼင်ႇဢၼ်ၶုၼ်လူင် ယူဝ်းသီႉယႃႉ မီးဢမိင်ႉၼၼ်ႉဢေႃႈ။-

17ၵူၼ်းမဵဝ်း ဢီႉသရေႇလႃႉ ဢၼ်ၸူႉၵၼ်တုမ်ၵၼ်ၸိူဝ်းၼၼ်ႉ ဢွၼ်ၵၼ်ၶၢမ်ႇပွႆး ပႃႉသၶႃႇ ဢိၵ်ႇတင်းပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၸဵတ်းဝၼ်းတဵမ်တဵမ် ၼႂ်းၶိင်ႇမိူဝ်ႈၼၼ်ႉဢေႃႈ။-

18ပွႆးဢၼ်မိူၼ်ၸိူဝ်ႉၼင်ႇပွႆး ပႃႉသၶႃႇ ဢၼ် ယူဝ်းသီႉယႃႉ ဢိၵ်ႇတင်းယိတ်ႈပရေႃးႁဵၵ်ႈလႂ်၊ ၵူၼ်းမဵဝ်း လေႇဝီႉ လႂ်၊ ၵူၼ်းမိူင်း ယူႉတႃႉ တင်းၵူၼ်းမိူင်း ဢီႉသရေႇလႃႉ ၵႃႈဢၼ်ၸူႉတုမ်လႂ်၊ ၵူၼ်းဝဵင်း ယေႇရူႉသလႅမ်ႇ လႂ် ၶၢမ်ႇၼၼ်ႉၸိုင်ၸႃႉၸဵမ်ၸူဝ်ႈပၢၼ်ပရေႃးၽႅတ်ႈ သမူၺ်ႇလႃႉ ၼၼ်ႉလႄႈ ဢမ်ႇတွၼ်ႉၶၢမ်ႇၵႃႈတီႈသိုင်ႇၸိုင်ႈဝၢၼ်ႈမိူင်း ဢီႉသရေႇလႃႉ ။ ပွႆး ပႃႉသၶႃႇ ၸိူဝ်ႉၼင်ႇၼၼ်ၼၼ်ႉၸိုင် ၶုၼ်ႁေႃၶမ်း ဢီႉသရေႇလႃႉ တင်းလၢႆ ဢမ်ႇတွၼ်ႉၶၢမ်ႇသေၵေႃႉသေၵူၼ်း။-

19ၼႂ်းပီႊဢၼ် ယူဝ်းသီႉယႃႉ ၸၢမ်ႇႁၢင်ႈၸၢမ်ႇႁေႃသိပ်းပၢႆပႅတ်ႇပီႊၼၼ်ႉ ၶဝ်ဢွၼ်ၵၼ်ၶၢမ်ႇပွႆး ပႃႉသၶႃႇ ၼၼ်ႉဢေႃႈ။

20လိုၼ်းၼၼ်ႉမိူဝ်ႈဢၼ် ယူဝ်းသီႉယႃႉ မႄးၵုမ်းမႄးႁဵတ်းပိၵ်ႈမၢၼ်ႇၸဝ်ႈယဝ်ႉၼၼ်ႉၸိုင် ၼေႇၶေႃႇ ၶုၼ်ႁေႃၶမ်း ဢေႇၵိပ်ႉတူႉ ၶီႇသိုၵ်းၶိုၼ်ႈၸူးၵႃႈတီႈဝဵင်း ၶႃႇၶေႇမိတ်ႉ ၵႃႈတီႈႁိမ်းၼမ်ႉႁွင်ႈ ဢူႉၽရတ်ႉ ၼၼ်ႉလႄႈ ယူဝ်းသီႉယႃႉ ဢွၵ်ႇၵႂႃႇ ႁႂ်ႈလႆႈႁႄႉတၢင်းမၼ်းၼၼ်ႉဢေႃႈ။-

21မၼ်းၼၼ်ႉပွႆႇၸႂ်ႉတမၢၼ်ႇတင်းလၢႆမႃးတီႈမၼ်းလႄႈ သင်ႇလၢတ်ႈဝႃႈ၊ ၶုၼ်ႁေႃၶမ်း ယူႉတႃႉ ဢိူၺ်း၊ မႂ်းၸၢပ်ႈသႅင်ႇၵၼ်တင်းၵဝ်ၸိူဝ်ႉၼင်ႇႁိုဝ်။ ၵဝ်ၶီႇသိုၵ်းၸူးတီႈမႂ်းဝၼ်းမိူဝ်ႈၼႆႉဢမ်ႇၸႂ်ႈ၊ ၵဝ်ၶီႇသိုၵ်းၸူးတီႈၶဝ်ၸိူဝ်းဢၼ်တိုၵ်းတေႃးၵၼ်တင်းၵဝ်ၼၼ်ႉဢေႃႈ။ ၽြႃးပဵၼ်ၸဝ်ႈသင်ႇလၢတ်ႈဝႆႉႁႂ်ႈၵဝ်ႁဵတ်းၶၼ်ၶၼ်ၽႂ်းၽႂ်းယဝ်ႉ။ ယႃႇပေႁဵတ်းၶတ်းၵၼ်တင်းၽြႃးပဵၼ်ၸဝ်ႈဢၼ်မီးယူႇၽၢႆႇၵဝ်ၼႆႉလႄႈယူႇသေၵမ်း။ ပေႃးဢမ်ႇၼၼ် မၼ်းၸဝ်ႈတၵ်းယႃႉမႂ်းပႅတ်ႈဢေႃႈ၊ ဝႃႈၼင်ႇၼႆဢေႃႈ။-

22ၵူၺ်းၵႃႈ ယူဝ်းသီႉယႃႉ ဢမ်ႇဝၢႆႇၼႃႈမၼ်းၶိုၼ်းသေၵႃႈတီႈမၼ်းၼၼ်ႉလႄႈ ယႃႉႁၢင်ႈယႃႉၽၢင်မၼ်းႁႂ်ႈလႆႈတိုၵ်းသိုၵ်းၵၼ်တင်းမၼ်းၼၼ်ႉယူႇသေလႄႈ ဢမ်ႇထွမ်ႇဢမ်ႇဢဝ်ၵႂၢမ်းဢၼ် ၼေႇၶေႃႇ ၼၼ်ႉ ဢဝ်ဢမိင်ႉၽြႃးပဵၼ်ၸဝ်ႈသင်ႇလၢတ်ႈၼၼ်ႉလႄႈ ၶဝ်ႈၵႃႈၼႂ်းပွႆးသိုၵ်းၵႃႈတီႈပၢင်ႇႁူၺ်ႈ မေႇၵိတ်ႉတေႃႇ ဢေႃႈ။-

23ႁူဝ်ႁၢၼ်ၵူၼ်းသိုၵ်းဢၼ်ယိပ်းၵမ်ၵၢင်ႇၸိူဝ်းၼၼ်ႉ ပိုတ်းယိုဝ်းသႂ်ႇၶုၼ်လူင် ယူဝ်းသီႉယႃႉ လႄႈ ထုၵ်ႇမႅၼ်ႈသေယဝ်ႉ၊ ၶုၼ်လူင်လၢတ်ႈတီႈၶႃႈမၼ်းၵူၼ်းမၼ်းလႄႈဝႃႈ၊ ဢဝ်ၵဝ်ဢွၵ်ႇၵႂႃႇတႃႉ၊ ၵဝ်လႆႈၶၢမ်ႇတၢင်းဢၼ်တိူဝ်ႉမၢတ်ႇဢၼ်ၸဵပ်းၼႃႇလူင်လၢင်ဢေႃႈ၊ ဝႃႈၼင်ႇၼႆလႄႈ၊-

24ၶႃႈမၼ်းၵူၼ်းမၼ်းဢွၼ်ၵၼ်ဢဝ်မၼ်းၶျႃးလူင်းသေၵႃႈၼိူဝ်လေႃႉရထႃးမၼ်းလႄႈ တၢင်ႇၵႃႈၼိူဝ်လေႃႉရထႃးတူႉတီႉယႃႉသေယဝ်ႉ၊ ဢဝ်မၼ်းၵႂႃႇၵႃႈတီႈဝဵင်း ယေႇရူႉသလႅမ်ႇ လႄႈ မၼ်းႁွတ်ႈဢၼိၵ်ႈၸႃႉသေလႄႈ ၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းသၢင်းၶႅင်းပူႇမွၼ်ႇမၼ်းတင်းလၢႆဢေႃႈ။ ၵူၼ်းမိူင်း ယူႉတႃႉ တင်းၵူၼ်းဝဵင်း ယေႇရူႉသလႅမ်ႇ တင်းသဵင်ႈတင်းလူင်ဢွၼ်ၵၼ်ႁဵတ်းတၢင်းဢၼ်ႁႆႈႁွင်ႉပွင်ႉၶၢင်းၵွပ်ႈပိူဝ်ႈ ယူဝ်းသီႉယႃႉ ၼၼ်ႉဢေႃႈ။-

25ယေႇရမီႉ ၵေႃႈၸီႇယၢင်ႇၸၢပ်ႈၵႂၢမ်းဢၼ်ပွင်ႉၶၢင်းပွင်ႉမိူၼ်ႇဝႆႉလႄႈ မႄႈယိင်းၵူၼ်းၸၢႆး ဢၼ်မေႃႁဵတ်းၵႂၢမ်းၵႃႈမီးၼၼ်ႉဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်း ယူဝ်းသီႉယႃႉ ယူႇသေလႄႈ သုင်းသွင်ႇၵႂၢမ်းဢၼ်ပွင်ႉၶၢင်းပွင်ႉမိူၼ်ႇ တေႃႇထိုင်ႁွတ်ႈဝၼ်းမိူဝ်ႈၼႆႉလႄႈ ႁႂ်ႈပဵၼ်ထုင်းပဵၼ်ၽိင်ႈ တီႈမဵဝ်း ဢီႉသရေႇလႃႉ ယူႇဢေႃႈ။ ၵႂၢမ်းၼၼ်ႉတႅမ်ႈဝႆႉမီးယူႇၵႃႈၼႂ်းလိၵ်ႈဢၼ်ပွင်ႉၶၢင်းပွင်ႉမိူၼ်ႇၼၼ်ႉဢေႃႈ။

26လွင်ႈတၢင်း ယူဝ်းသီႉယႃႉ ဢၼ်ယင်းၵိုတ်းယင်းၵျၢၼ်ႇ ဢိၵ်ႇတင်းလွင်ႈတၢင်းဢၼ်မၼ်းႁဵတ်းၵျေးၸူး ၸွမ်းၵႃႈၼင်ႇဢၼ်တႅမ်ႈဝႆႉမီးယူႇၵႃႈၼႂ်းၵျၢမ်းလိၵ်ႈပိင်းၺၢပ်ႈတီႉထႃႇဝရႃႉၽြႃး၊-

27လွင်ႈတၢင်းဢၼ်မၼ်းၵမ်ၵျၢင်ႉၸဵမ်ငဝ်ႈတေႃႇပၢႆၼၼ်ႉၸိူဝ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်း ရႃႇၸဝၢင်ႇ ဢီႉသရေႇလႃႉ တင်းရႃႇၸဝၢင်ႇ ယူႉတႃႉ ဢေႃႈ။

← Chapter 34 Jump to: Chapter 36 →