2 Chronicles 9

Shan

← Chapter 8 Jump to: Chapter 10 →

1ၼၢင်းႁေႃၶမ်းဢၼ်ဢုပ်ႉပိူင်ႇ မိူင်း သေးၽႃႉ ၼၼ်ႉ ငိၼ်းသတၢင်းသဵင်ၶၢဝ်ႇမုၼ်သရေႇ သေႃးလမုၼ်ႇ သေယဝ်ႉ၊ ပႃးဢဝ်တင်းၵူၼ်းဢၼ်ၸွမ်းၼမ်ၼႃႇ ဢိၵ်ႇတင်းၵလႃးဢုၵ်ႉ ဢၼ်ပႃးတင်းမဵဝ်းၼၢမ်ႇသႃႇ တင်းၶမ်းၼမ်ၼႃႇတင်းသႅင်ဢၼ်ထိူၵ်ႈၵႃႈထိူၵ်ႈၶၼ်ယႂ်ႇၸိူဝ်းၼၼ်ႉ မႃးၵႃႈတီႈဝဵင်း ယေႇရူႉသလႅမ်ႇ ႁႂ်ႈလႆႈဢဝ်ပျၢတ်ႈသၼႃႇဢၼ်လိုၵ်ႉလမ်ႇယၢပ်ႇၽိုတ်ႇၼႃႇၼၼ်ႉၸၢမ်းတူၺ်း သေႃးလမုၼ်ႇ လႄႈ ႁွတ်ႈထိုင်တီႈ သေႃးလမုၼ်ႇ သေယဝ်ႉ၊ တိူင်ႇပၢင်ႇတွင်ႈထၢမ်လူၺ်ႈလွင်ႈ ၵႃႈဢၼ်မီးၵႃႈၼႂ်းႁူဝ်ၸႂ်မၼ်းၼၼ်ႉဢေႃႈ။-

2သေႃးလမုၼ်ႇ ၵေႃႈ ၵႄႈလိတ်ႈပျၢတ်ႈသၼႃႇၵႃႈဢၼ်မၼ်းတွင်ႈမၼ်းထၢမ်ၼၼ်ႉဢေႃႈ။ လွင်ႈတၢင်းဢၼ် သေႃးလမုၼ်ႇ ဢမ်ႇႁူႉလႄႈ ဢမ်ႇၵႄႈလိတ်ႈလႆႈၼၼ်ႉဢမ်ႇမီးသေၸိူဝ်ႉသေပိူင်။-

3မိူဝ်ႈဢၼ်ၼၢင်းႁေႃၶမ်းမိူင်း သေးၽႃႉ ႁၼ်ပိင်ႇၺႃႇ သေႃးလမုၼ်ႇ ဢိၵ်ႇတင်းႁိူၼ်းၸဝ်ႈဢၼ်မၼ်းတႄႇႁဵတ်း၊-

4ၶိူင်ႈပိူင်ၶူင်ႇတီႈၵိၼ်ၸဝ်ႈ၊ တီႈယူႇတီႈၼင်ႈဢၼ်ၵူၼ်းဢၼ်ပႂ်ႉဢမူႉၸဝ်ႈတင်းလၢႆၼင်ႈၼၼ်ႉ၊ ဢၼ်ၵူဝ်ႇရမ်ႇဢွၼ်ႇၸၢႆးၸဝ်ႈတင်းလၢႆၸုၵ်းၶႃးၸႃးယူႇၼၼ်ႉ ၶူဝ်းၼုင်ႈတၢင်းမႆ ဢၼ်ၶဝ်ၼုင်ႈမႆၸိူဝ်းၼၼ်ႉ၊ ၵူၼ်းယိပ်းၵွၵ်းၸဝ်ႈလႂ် ဢိၵ်ႇတင်းၶူဝ်းၼုင်ႈတၢင်းမႆ ဢၼ်ၶဝ်ၼုင်ႈမႆၸိူဝ်းၼၼ်ႉ ဢိၵ်ႇတင်းၶၼ်ႈလႆတီႈဢၼ်ၶိုၼ်ႈၸူးၵႃႈႁိူၼ်း ထႃႇဝရႃႉၽြႃးၼၼ်ႉၸိူဝ်းၼၼ်ႉၸိုင်၊ မီးတၢင်းဢၼ်လိုမ်းတူဝ်လိုမ်းႁၢင်ႈယူႇသေလႄႈ၊-

5လၢတ်ႈတီႈၶုၼ်ႁေႃၶမ်းလႄႈဝႃႈ၊ ၵႂၢမ်းသတၢင်းသဵင်ၶၢဝ်ႇဢၼ်ၵဝ်ၶႃႈယူႇၵႃႈတီႈမိူင်းၵဝ်ၶႃႈလႄႈ လႆႈငိၼ်းလွင်ႈတၢင်းဢၼ်ၸဝ်ႈႁဝ်းႁဵတ်းတင်းလၢႆ ဢိၵ်ႇတင်းပိင်ႇၺႃႇၸဝ်ႈႁဝ်းၼၼ်ႉမၢၼ်ႇမႅၼ်ႈၶႃႈဢေႃႈ။-

6ၼႂ်းဝႃႈၼၼ်သေၵေႃႈ ၸူဝ်ႈဢၼ်ၵဝ်ၶႃႈဢမ်ႇပႆႇႁွတ်ႈထိုင်လႄႈထူပ်းႁၼ်ၼၼ်ႉ၊ ၵဝ်ၶႃႈဢမ်ႇယုမ်ႇၵႂၢမ်းၼၼ်ႉ၊ မိူဝ်ႈလဵဝ်ၼႆႉၸမ်ႉ၊ ၵႂၢမ်းဢၼ်ၵဝ်ၶႃႈလႆႈငိၼ်း လွင်ႈဢၼ်ပိင်ႇၺႃႇၸဝ်ႈႁဝ်း ယႂ်ႇၵႂၢင်ႈၼႆႉၼၼ်ႉ ဢမ်ႇၶိုတ်းသေၶိုင်ႈၼိုင်ႈလႄႈ၊ ၸဝ်ႈႁဝ်းပဵၼ်ဢၼ်ပူၼ်ႉလိူဝ်သတၢင်းသဵင်ၶၢဝ်ႇ ဢၼ်ၵဝ်ၶႃႈလႆႈငိၼ်းၼၼ်ႉၶႃႈဢေႃႈ။-

7ၵူၼ်းၸဝ်ႈႁဝ်း တင်းၶႃႈၸဝ်ႈႁဝ်း ဢၼ်ယူႇၵႃႈတီႈၽၢႆႇၼႃႈၸဝ်ႈႁဝ်းယူႇသေလႄႈ လႆႈငိၼ်းပိင်ႇၺႃႇၸဝ်ႈႁဝ်းၸိူဝ်းၼႆႉမီးမင်ႇၵလႃႇၶႃႈဢေႃႈ။-

8ႁႂ်ႈထႃႇဝရႃႉၽြႃး ၽြႃးပဵၼ်ၸဝ်ႈၸဝ်ႈႁဝ်း ဢၼ်ထုၵ်ႇၸႂ်တီႈၸဝ်ႈႁဝ်းလႄႈ ဢဝ်ၸဝ်ႈႁဝ်းတၢင်ႇၵႃႈၼိူဝ်ရႃႇၸႃႉပလၢင်ႇမၼ်းၸဝ်ႈ၊ ႁႂ်ႈပဵၼ်ၶုၼ်ႁေႃၶမ်းတၢင်တူဝ်ထႃႇဝရႃႉၽြႃး ၽြႃးပဵၼ်ၸဝ်ႈၸဝ်ႈႁဝ်းၼၼ်ႉ မီးမင်ႇၵလႃႇသေၵမ်းလူၺ်ႈ။ ၵွပ်ႈပိူဝ်ႈ ဢၼ်ၽြႃးပဵၼ်ၸဝ်ႈၸဝ်ႈႁဝ်း ႁၵ်ႉမဵဝ်း ဢီႉသရေႇလႃႉ လႄႈ ႁႂ်ႈတႄႇယူႇသေႇသေႇၼၼ်ႉလႄႈ မၼ်းၸဝ်ႈၶၢၼ်းၸဝ်ႈႁဝ်းဝႆႉ ႁႂ်ႈပဵၼ်ၶုၼ်ႁေႃၶမ်းၵႃႈၼိူဝ်ၶဝ်ၼၼ်ႉ ႁႂ်ႈလႆႈႁဵတ်းတၢင်းဢၼ်ၸီႇယၢင်ႇတြႃး ဢိၵ်ႇတင်းတၢင်းဢၼ်တႅပ်းတတ်းသိုဝ်ႈသိုဝ်ႈတေႃႇတေႃႇၼၼ်ႉၶႃႈယဝ်ႉ၊ ဝႃႈၼင်ႇၼႆလႄႈ၊-

9ဢဝ်ၶမ်းပၢၵ်ႇပၢႆသၢဝ်း တလၢၼ်ႇတၢၼ်ႇ ၊ မဵဝ်းၼၢမ်ႇသႃႇၼမ်ၼႃႇလူင်လၢင်၊ သႅင်လီသႅင်မျၢတ်ႈတင်းလၢႆသၢၵ်ႈပၼ်ဢေႃႈ။ မဵဝ်းၼၢမ်ႇသႃႇဢၼ်မိူၼ်ၸိူဝ်ႉၼင်ႇ မဵဝ်းၼၢမ်ႇသႃႇဢၼ်ၼၢင်းႁေႃၶမ်းမိူင်း သေးၽႃႉ သၢၵ်ႈပၼ်တီႈၶုၼ်လူင် သေႃးလမုၼ်ႇ ၼၼ်ႉဢမ်ႇမီး။

10ၶႃႈၵူၼ်း ႁီႉရမ်ႇ ဢိၵ်ႇတင်းၶႃႈၵူၼ်း သေႃးလမုၼ်ႇ ဢၼ်ဢဝ်ၶမ်း ၵႃႈတီႈမိူင်း ဢေႃႇၽီႉရႃႉ မႃးၸိူဝ်းၼၼ်ႉ ဢွၼ်ၵၼ်ပႃးဢဝ်မႆႉၼၢမ်ႇသႃႇဢိၵ်ႇတင်းသႅင်လီသႅင်မျၢတ်ႈမႃးဢေႃႈ။-

11ၶုၼ်ႁေႃၶမ်းဢဝ်မႆႉၼၢမ်ႇသႃႇၼၼ်ႉ ႁဵတ်းပွတ်းလူင်ႁိူၼ်းထႃႇဝရႃႉၽြႃး တင်းႁေႃၸဝ်ႈဢိၵ်ႇတင်းတိင်ႇ၊ တရေႃး ပုၼ်ႈၶဝ်ၸိူဝ်းဢၼ်ႁဵတ်းၵႂၢမ်းၼၼ်ႉဢေႃႈ။ မႆႉၼၢမ်ႇသႃႇၸိူဝ်ႉၼင်ႇၼၼ်ၼၼ်ႉ ဢမ်ႇတွၼ်ႉပေႃႇမႃးၵႃႈတီႈမိူင်း ယူႉတႃႉ ၊ သေပွၵ်ႈ။-

12လိူဝ်တွၼ်းသေလၢၵ်ႈသွင်ႇဢၼ်မၼ်းသၢၵ်ႈပၼ်တီႈၶုၼ်ႁေႃၶမ်းၼၼ်ႉ၊ ၶုၼ်လူင် သေႃးလမုၼ်ႇ ပၼ်ၸွမ်းၵႃႈဢၼ်ၼၢင်းႁေႃၶမ်းမိူင်း သေးၽႃႉ မီးဢလူဝ်ႇသၼ်ႇတႃႉၶႂ်ႈလႆႈလႄႈ ယွၼ်းဢဝ်ၼၼ်ႉဢေႃႈ၊ လိုၼ်းၼၼ်ႉမၼ်းၼၼ်ႉဢိၵ်ႇလူၺ်ႈၵၼ်တင်းၶႃႈမၼ်းၵူၼ်းမၼ်းၶိုၼ်းမိူဝ်းၵႂႃႇၵႃႈတီႈမိူင်းမၼ်းသေဢေႃႈ။

13ၶၼ်ၸင်ႈၶမ်းဢၼ်မႃးႁွတ်ႈမႃးၽႅဝ်တီႈ သေႃးလမုၼ်ႇ ၼႂ်းယေႈပီႈယေႈပီႈၸမ်ႉ၊ ပဵၼ်ႁူၵ်းပၢၵ်ႇႁူၵ်းသိပ်းပၢႆႁူၵ်း တလၢၼ်ႇတၢၼ်ႇ ဢေႃႈ။-

14ၼွၵ်ႈသေၼၼ်ႉ ယင်းမီးၶမ်းဢၼ်ၵူၼ်းၵႃႉၵူၼ်းၶၢႆလႂ်၊ ၸဝ်ႈၵုၼ်ႇၸဝ်ႈသိၼ်လႂ်၊ ၶုၼ်လူင် ဢရေႇပျႃႉ ၵႃႈမီးလႂ်၊ မဵဝ်ႉဝုၼ်ႇတင်းလၢႆလႂ် သၢၵ်ႈၼၼ်ႉလူးၵွၼ်ႇဢေႃႈ။-

15ၶုၼ်လူင် သေႃးလမုၼ်ႇ တွင်ႈႁဵတ်းၶိူင်ႈႁႄႉလၢၵ်ႈၼၢၵ်ႈ ဢၼ်ယေႈဢၼ်ပႃးၶမ်းႁူၵ်းပၢၵ်ႇၵျၢပ်ႈ သၶေးလႃႉ ၼၼ်ႉသွင်ပၢၵ်ႇဢၼ်၊-

16ၶိူင်ႈႁႄႉလၢၵ်ႈၼၢၵ်ႈဢွၼ်ႇ ဢၼ်ယေႈဢၼ်ပႃးၶမ်းသၢမ်ၵျၢပ်ႈ သၶေးလႃႉ ၼၼ်ႉ သၢမ်ပၢၵ်ႇဢၼ်လႄႈ ၶုၼ်ႁေႃၶမ်းဢဝ်ဝႆႉ ၵႃႈၼႂ်းႁေႃၸဝ်ႈထိူၼ်ႇ လေႇပၼုၼ်ႇ ၼၼ်ႉဢေႃႈ။-

17ၶုၼ်ႁေႃၶမ်းႁဵတ်းရႃႇၸႃႉပလၢင်ႇငႃးၸၢင်ႉလူင်ဢၼ် ဢဝ်တင်းၶမ်းလွတ်ႈငၢၼ်ႇ ဢုမ်ႇႁေႃႇသေၼၼ်ႉဢေႃႈ။-

18မီးၶၼ်ႈလႆႁူၵ်းသိၵ်ႈ တင်းၶူင်ႇႁၢၼ်ႉတိၼ်ၶမ်းဢၼ်ၸပ်းပႅၼ်ႈဢၼ်လဵဝ်ၵၼ်တင်းရႃႇၸႃႉပလၢင်ႇၸဝ်ႈလႄႈ ၵႃႈတီႈသွင်ၽၢႆႇတီႈဢၼ်ၼင်ႈၼၼ်ႉ ပျေႉၸုမ်ႇဝႆႉတင်းႁၢဝ်းတီႈဢိင်လႄႈ ၵႃႈတီႈႁိမ်းႁၢဝ်းၼၼ်ႉမီးသၢင်ႇသီႈသွင်တူဝ်ၸုၵ်းယူႇဢေႃႈ။-

19ၵႃႈတီႈသွင်ၽၢႆႇၼိူဝ်သိၵ်ႈၶၼ်ႈလႆႁူၵ်းသိၵ်ႈၸိူဝ်းၼၼ်ႉၵေႃႈ မီးသၢင်ႇသီႈသိပ်းပၢႆသွင်တူဝ်ၸုၵ်းယူႇဢေႃႈ၊ ၵႃႈတီႈသိုင်ႇၸိုင်ႈဝၢၼ်ႈမိူင်းတီႈလႂ် တၢၼ်းလႂ်သေၸိူဝ်ႉသေမိူင်း ဢမ်ႇမီးဢၼ်မိူၼ်ၸိူဝ်ႉၼင်ႇၼၼ်ၼၼ်ႉလႃးလႃး။

20ၵွၵ်းၸဝ်ႈဢၼ်ၶုၼ်လူင် သေႃးလမုၼ်ႇ ၵိၼ်ၵႃႈမီး ဢိၵ်ႇတင်းၵွၵ်းၸဝ်ႈဢၼ်သုင်းသွင်ႇၵႃႈတီႈႁေႃၸဝ်ႈထိူၼ်ႇ လေႇပၼုၼ်ႇ ၵႃႈမီးၼၼ်ႉ ဢမ်ႇၸႂ်ႈၵွၵ်းငိုၼ်း၊ ပဵၼ်ၵွၵ်းၶမ်းလွၼ်ႉလွၼ်ႉဢေႃႈ။ ၼႂ်းၸူဝ်ႈပၢၼ် သေႃးလမုၼ်ႇ ၼၼ်ႉ၊ ဢမ်ႇၸၢင်ႈမၢတ်ႈငိုၼ်း ပဵၼ်ၵႃႈသင်လႃးလႃး။-

21ၶုၼ်ႁေႃၶမ်းမီးႁိူဝ်းသၢင်းၽေႃးတင်းလၢႆ ဢၼ်ၵႂႃႇၵႃႈတီႈဝဵင်း တႃႇသူႉ ဢိၵ်ႇလူၺ်ႈၵၼ်တင်း ၶႃႈၶုၼ် ႁီႉရမ်ႇ ၸိူဝ်းၼၼ်ႉလႄႈ၊ သၢမ်ပီႊယေႈပွၵ်ႈ ႁိူဝ်းသၢင်းၽေႃး တႃႇသူႉ ၸိူဝ်းၼၼ်ႉ ၸၢင်ႈပႃးဢဝ်ငိုၼ်း၊ ၶမ်း၊ ငႃးၸၢင်ႉ၊ လိင်းလႂ်၊ ၼူၵ်ႉယုင်းလႂ် ၶိုၼ်းမႃးဢေႃႈ။-

22ၼင်ႇၼၼ်လႄႈ ၶုၼ်လူင် သေႃးလမုၼ်ႇ မီးၸေးၸိမ်ႇတင်းပိင်ႇၺႃႇယဵင်ႈၶႅၼ်းလိူဝ်တွၼ်းၼႃႇသေ ၶုၼ်ႁေႃၶမ်းၵႃႈဢၼ်မီးၵႃႈၼိူဝ်လိၼ်မိူင်းဢေႃႈ။-

23ၶုၼ်ႁေႃၶမ်း ၵႃႈၼိူဝ်လိၼ်မိူင်းတင်းသဵင်ႈတင်းလူင်ဢွၼ်ၵၼ်မႃးၵႃႈတီႈ သေႃးလမုၼ်ႇ ႁႂ်ႈလႆႈငိၼ်းၵႂၢမ်းပိင်ႇၺႃႇဢၼ်ၽြႃးပဵၼ်ၸဝ်ႈ သႂၢင်းသႂ်ႇပၼ်ၵႃႈၼႂ်းႁူဝ်ၸႂ်မၼ်းၼၼ်ႉဢေႃႈ။-

24ၶဝ်ၸိူဝ်းဢၼ်မႃးႁင်းၽႂ်ႁင်းမၼ်းၼၼ်ႉ ဢွၼ်ၵၼ်လႆႈသၢၵ်ႈၵွၵ်းၶမ်း၊ ၵွၵ်းငိုၼ်း၊ ၶိူင်ႈၼုင်ႈတၢင်းမႆ၊ လၢၵ်ႈၼၢၵ်ႈတိုၵ်းသိုၵ်း၊ မဵဝ်းၼၢမ်ႇသႃႇ၊ မႃႉလႂ်၊ လီႈလႂ် ၵူႈပီႊၵူႈပီႊဢေႃႈ။-

25သေႃးလမုၼ်ႇ မီးထၢၼ်ႈမႃႉဢၼ်ၸၢပ်ႈသႅင်ႇၵၼ်တင်းလေႃႉရထႃးၸဝ်ႈၼၼ်ႉသီႇႁဵင်၊ ဢိၵ်ႇတင်းႁူဝ်ႁၢၼ်ၵူၼ်းသိုၵ်းၶီႇမႃႉမိုၼ်ႇပၢႆသွင်ႁဵင် ဢၼ်မၼ်းဢဝ်ဝႆႉၵႃႈတီႈဝဵင်း ဢၼ်ထိင်းလေႃႉရထႃးၸဝ်ႈ ဢိၵ်ႇတင်းၵႃႈတီႈမၼ်းၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉဢေႃႈ။-

26မၼ်းၸဝ်ႈဢုပ်ႉပိူင်ႇ ၶုၼ်ႁေႃၶမ်းဢၼ်မီးၵႃႈတီႈၸႃႉၸဵမ်ၼမ်ႉႁွင်ႈလူင် တေႃႇထိုင်ႁွတ်ႈမိူင်း ၽီႉလိတ်ႉတီႉ ဢိၵ်ႇတင်းၶွပ်ႇၼမ်ႉလႅၼ်လိၼ်မိူင်း ဢေႇၵိပ်ႉတူႉ ၼၼ်ႉဢေႃႈ။-

27ၶုၼ်ႁေႃၶမ်းႁႂ်ႈငိုၼ်းၼမ်ၼႃႇ ၵႃႈၼႂ်းဝဵင်း ယေႇရူႉသလႅမ်ႇ မိူၼ်ၸိူဝ်ႉၼင်ႇမၢၵ်ႇႁိၼ်မၢၵ်ႇသၢႆးလႄႈ ႁႂ်ႈတူၼ်ႈ ဢႃႇရိတ်ႉ ၼမ်ၼႃႇမိူၼ်ၸိူဝ်ႉၼင်ႇ တူၼ်ႈမၢၵ်ႇလိူဝ်ႇသၢင်းၽေႃးဢၼ်ဢွၵ်ႇၵႃႈတီႈတႂ်ႈ တီႈဢၼ်ပၢင်ႇဢၼ်ပဵင်းၼၼ်ႉဢေႃႈ။-

28ၶဝ်ဢွၼ်ၵၼ်ဢဝ်မႃႉဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ ဢိၵ်ႇတင်းၵႃႈၼႂ်းၵူႈၸိုင်ႈၵူႈမိူင်း မႃးတီႈ သေႃးလမုၼ်ႇ ဢေႃႈ။

29လွင်ႈတၢင်း သေႃးလမုၼ်ႇ ဢၼ်ယင်းၵိုတ်းယင်းၵျၢၼ်ႇဢဝ်ၸဵမ်ငဝ်ႈတေႃႇပၢႆၸိူဝ်းၼၼ်ႉၸိုင်၊ တႅမ်ႈမၢႆဝႆႉမီးယူႇၵႃႈၼႂ်းၵျၢမ်းလိၵ်ႈ ပရေႃးၽႅတ်ႈ ၼႃႇသၼ်ႇ ၊ ၵျၢမ်းလိၵ်ႈဢၼႃႇၵၢတ်ႈတီႉ ဢႁီႉယႃႉ ၵူၼ်းဝဵင်း သီႉလေႃႇ ၊ ပျႃႇတိၵ်ႈၵျၢမ်း ဢီႉတေႃႇ ဢၼ်ပဵၼ်ၵေႃႉဢၼ်ႁူပွင်ႇတႃလႅင်းဢၼ်ယူႇၽၢႆႇၼိုင်ႈသေလႄႈ လၢတ်ႈလူၺ်ႈလွင်ႈ ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ၼၼ်ႉ ၸိူဝ်းၼၼ်ႉယူႇဢေႃႈ။-

30သေႃးလမုၼ်ႇ ၼၼ်ႉယူႇၵႃႈၼႂ်းဝဵင်း ယေႇရူႉသလႅမ်ႇ လႄႈ ဢုပ်ႉပိူင်ႇၸၢမ်ႇၸႃးမိူင်း ဢီႉသရေႇလႃႉ တင်းသဵင်ႈတင်းမူတ်းသီႇသိပ်းပီႊတဵမ်တဵမ်သေယဝ်ႉ၊-

31သေႃးလမုၼ်ႇ ၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ ၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းဝဵင်း တႃႇဝိတ်ႈ ၸဝ်ႈပေႃႈမၼ်းၼၼ်ႉဢေႃႈ ရူဝ်းပုမ်ႇ လုၵ်ႈၸၢႆးမၼ်းၼၼ်ႉၼင်ႈႁၢင်ႈၼင်ႈႁေႃတၢင်တူဝ်မၼ်းဢေႃႈ။

← Chapter 8 Jump to: Chapter 10 →