2 Chronicles 36 — Shan

1ၵူၼ်းဝၢၼ်ႈၵူၼ်းမိူင်းတင်းလၢႆ ဢွၼ်ၵၼ်ဢဝ် ယေႃးၶတ်ႉ လုၵ်ႈၸၢႆးၸဝ်ႈ ယူဝ်းသီႉယႃႉ လႄႈ ႁႂ်ႈမၼ်းပဵၼ်ၶုၼ်ႁေႃၶမ်းတၢင်တူဝ်ၸဝ်ႈပေႃႈမၼ်း ၵႃႈၼႂ်းဝဵင်း ယေႇရူႉသလႅမ်ႇ ဢေႃႈ။-

2ယေႃးၶတ်ႉ ၼၼ်ႉ မိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်၊ ဢသၢၵ်ႈမၼ်းလႆႈသၢဝ်းပၢႆသၢမ်ပီႊလႄႈ မၼ်းဢုပ်ႉပိူင်ႇၸၢမ်ႇၸႃး ယူႇၵႃႈၼႂ်းဝဵင်း ယေႇရူႉသလႅမ်ႇ သၢမ်လိူၼ်ဢေႃႈ။-

3မၼ်းၼၼ်ႉၸိုင်၊ ၶုၼ်ႁေႃၶမ်း ဢေႇၵိပ်ႉတူႉ ၶျႃးတူၵ်းႁၢင်ႈတူၵ်းႁေႃ ၵႃႈၼႂ်းဝဵင်း ယေႇရူႉသလႅမ်ႇ သေလႄႈ ယွၼ်းဢဝ်ၶွၼ်ႇငိုၼ်းပၢၵ်ႇ တလၢၼ်ႇတၢၼ်ႇ တင်းၶမ်း တလၢၼ်ႇတၢၼ်ႇ ၼိုင်ႈ တီႈမိူင်းၸဝ်ႈဢေႃႈ။-

4ၶုၼ်ႁေႃၶမ်း ဢေႇၵိပ်ႉတူႉ ၼၼ်ႉ ဢဝ် ဢေးလျႃႇၵိမ်ႇ ပီႈၸၢႆး ယေႃးၶတ်ႉ ၼၼ်ႉ ႁဵတ်းၶုၼ်ႁေႃၶမ်း ၵႃႈၼိူဝ်မိူင်း ယူႉတႃႉ တင်းဝဵင်း ယေႇရူႉသလႅမ်ႇ လႄႈ တၢင်ႇပၼ်ၸိုဝ်ႈမႂ်ႇသဵင်မႂ်ႇ ယေႃးယၵိမ်း သေယဝ်ႉ၊ ၼေႇၶေႃႇ ၼၼ်ႉ ဢဝ် ယေႃးၶတ်ႉ ၼွင်ႉၸၢႆးၸဝ်ႈၵႂႃႇၵႃႈတီႈမိူင်း ဢေႇၵိပ်ႉတူႉ ဢေႃႈ။

5ယေႃးယၵိမ်း ၼၼ်ႉ၊ မိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်၊ ဢသၢၵ်ႈမၼ်းလႆႈသၢဝ်းပၢႆႁႃႈပီႊလႄႈ မၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရူႉသလႅမ်ႇ သိပ်းပၢႆဢဵတ်းပီႊဢေႃႈ။ မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃးၽြႃးပဵၼ်ၸဝ်ႈမၼ်းဢေႃႈ။-

6ၼေႇပူႉၶတ်ႉၼေႇၸႃႇ ၶုၼ်ႁေႃၶမ်း ပႃႇပူႉလုၼ်ႇ ၶီႇသိုၵ်းၶိုၼ်ႈၸူးမၼ်းလႄႈ ဢဝ်ၸိူၵ်ႈလဵၵ်းမတ်ႉၽုၵ်ႇမၼ်း ႁႂ်ႈလႆႈဢဝ်ၵႂႃႇၵႃႈတီႈဝဵင်း ပႃႇပူႉလုၼ်ႇ ဢေႃႈ။-

7ၶိူင်ႈပိူင်ႁိူၼ်းထႃႇဝရႃႉၽြႃးတင်းလၢႆၵေႃႈ ၼေႇပူႉၶတ်ႉၼေႇၸႃႇ ဢဝ်ၵႂႃႇ ၵႃႈတီႈဝဵင်း ပႃႇပူႉလုၼ်ႇ လႄႈ ဝႆႉၵႃႈၼႂ်းပိၵ်ႈမၢၼ်ႇၵႃႈတီႈဝဵင်း ပႃႇပူႉလုၼ်ႇ ဢေႃႈ။-

8လွင်ႈတၢင်း ယေႃးယၵိမ်း ဢၼ်ယင်းၵိုတ်းယင်းၵျၢၼ်ႇ၊ လွင်ႈတၢင်းဢၼ်လီႁင်ႈဢဵတ်ႇသဵတ်ႇ ဢၼ်မၼ်းႁဵတ်းမႅၼ်ႈ၊ သၽေႃးဢၼ်ထူပ်းႁၼ်ၼႂ်းမၼ်းၼၼ်ႉ ၸိူဝ်းၼၼ်ႉၸိုင်၊ တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ဢီႉသရေႇလႃႉ တင်းရႃႇၸဝၢင်ႇ ယူႉတႃႉ ဢေႃႈ။ ယေႇၶေႃးၼီႉ လုၵ်ႈၸၢႆးၸဝ်ႈၼၼ်ႉ ၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။

9ယေႇၶေႃးၼီႉ ၼၼ်ႉ မိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင် ဢသၢၵ်ႈမၼ်းလႆႈပႅတ်ႇပီႊလႄႈ မၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရူႉသလႅမ်ႇ သၢမ်လိူၼ်ပၢႆသိပ်းဝၼ်းဢေႃႈ။ မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးဢေႃႈ။-

10မိူဝ်ႈဢၼ်ၶွပ်ႈၶူပ်ႇၼၼ်ႉၸိုင်၊ ၶုၼ်လူင် ၼေႇပူႉၶတ်ႉၼေႇၸႃႇ ၼၼ်ႉ ႁႂ်ႈၶီႇသိုၵ်းလႄႈဢဝ်မၼ်းဢိၵ်ႇတင်းၶိူင်ႈပိူင်ႁိူၼ်းထႃႇဝရႃႉၽြႃး ဢၼ်လီဢၼ်ငၢမ်းတင်းလၢႆ ၵႂႃႇၵႃႈတီႈဝဵင်း ပႃႇပူႉလုၼ်ႇ လႄႈ ဢဝ်ပေႃႈဢၢဝ်မၼ်း ၸေႇတၵီႉ ႁဵတ်းၶုၼ်ႁေႃၶမ်းၵႃႈၼိူဝ်မိူင်း ယူႉတႃႉ တင်းဝဵင်း ယေႇရူႉသလႅမ်ႇ ဢေႃႈ။

11ၸေႇတၵီႉ ၼၼ်ႉ၊ မိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်၊ ဢသၢၵ်ႈမၼ်းလႆႈသၢဝ်းပၢႆဢဵတ်းပီႊလႄႈ မၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရူႉသလႅမ်ႇ သိပ်းပၢႆဢဵတ်းပီႊဢေႃႈ။-

12မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃး ၽြႃးပဵၼ်ၸဝ်ႈမၼ်းဢေႃႈ။ မၼ်းဢမ်ႇၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇၵႃႈတီႈၽၢႆႇၼႃႈပရေႃးၽႅတ်ႈ ယေႇရမီႉ ဢၼ်ဢဝ်ဢမိင်ႉထႃႇဝရႃႉၽြႃး သင်ႇလၢတ်ႈဝႆႉၼၼ်ႉ။

13မၼ်းပုင်ႇၵၢၼ်ႇ ၶုၼ်လူင် ၼေႇပူႉၶတ်ႉၼေႇၸႃႇ ဢၼ်ႁႂ်ႈမၼ်းဢဝ် ၽြႃးပဵၼ်ၸဝ်ႈႁဵတ်းတၢင်းၵိၼ်ႇတၢင်းဝႃႈဝႆႉယဝ်ႉၼၼ်ႉဢေႃႈ။ မၼ်းႁႂ်ႈလမ်းၶေႃးမၼ်းၶႅင်လႄႈ ႁႂ်ႈႁူဝ်ၸႂ်မၼ်းၵႅၼ်ႇ ႁႂ်ႈမၼ်းဢမ်ႇလႆႈၶိုၼ်းမႃးၸူး ၵႃႈတီႈထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ဢေႃႈ။-

14လိူဝ်သေၼၼ်ႉ ၵႃႈပဵၼ်ယိတ်ႈပရေႃးႁဵၵ်ႈလူင် ဢိၵ်ႇတင်းၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင် ဢွၼ်ၵၼ်ၽိတ်းပိူင်ႈၼႃႇလူင်လၢင် ၸွမ်းလင်တၢင်းဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်း ႁဵတ်းဢၼ်လီႁင်ႈဢဵတ်ႇသဵတ်ႇၵႃႈမီးၼၼ်ႉဢေႃႈ။ ၶဝ်ဢွၼ်ၵၼ် ႁႂ်ႈႁိူၼ်းထႃႇဝရႃႉၽြႃးဢၼ်မၼ်းၸဝ်ႈႁႂ်ႈမူတ်းၸၢင်ႇ ၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉၵူဝ်ႈၵိူၵ်ႇဢေႃႈ။-

15ပိၵ်ႉသမ်ႉထႃႇဝရႃႉၽြႃး ၽြႃးပဵၼ်ၸဝ်ႈပူႇၶဝ်မွၼ်ႇၶဝ်ဢဝ်တမၢၼ်ႇတင်းလၢႆ ပွႆႇၸႂ်ႉၸူးတီႈၶဝ်လႄႈ ယၢမ်ႈႁဵတ်းတၢင်းဢၼ် လုၵ်ႉၸဝ်ႉၸဝ်ႉသေလႄႈ ပွႆႇၸႂ်ႉၵွပ်ႈပိူဝ်ႈဢၼ်မၼ်းၸဝ်ႈဢဵတ်းလူ ၵူၼ်းမၼ်းၸဝ်ႈဢိၵ်ႇတင်း ထႃႇၼႃႉတီႈဢၼ်မၼ်းၸဝ်ႈၵိင်းဝၢပ်ႈယူႇၼၼ်ႉသေၵေႃႈ၊-

16ၶဝ်ႁဵတ်းပျၢၵ်ႈၶူဝ်တမၢၼ်ႇၽြႃးပဵၼ်ၸဝ်ႈၸိူဝ်းၼၼ်ႉလႄႈ ႁဵတ်းဢမ်ႇပေႃးၼင်ႇႁိုဝ်တီႈဢမိင်ႉမၼ်းၸဝ်ႈ၊ ၼိၵ်ႈၸၢၵ်ႈငႅၼ်းသႄး ပရေႃးၽႅတ်ႈၸဝ်ႈၸိူဝ်းၼၼ်ႉ ႁႂ်ႈတၢင်းၸႂ်မႆႈၶႆႈၸႃႉထႃႇဝရႃႉၽြႃး ထၼ်ႈပေႃးလႆႈဢွၵ်ႇၸူး တီႈၶုၼ်မၼ်းၸဝ်ႈတင်းလၢႆ တေႃႇထိုင်ႁွတ်ႈထၼ်ႈပေႃးဢမ်ႇထၢတ်ႇလႆႈယဵၼ်လႆႈဢေႃႈ။

17ပိူဝ်ႈဢၼ်ပဵၼ်ၼင်ႇၼႆလႄႈ မၼ်းၸဝ်ႈႁႂ်ႈၶုၼ်ႁေႃၶမ်း ၶႃႇလတေး ၶီႇသိုၵ်းၸူးၵႃႈတီႈၶဝ်လႄႈ မၼ်းၼၼ်ႉဢဝ်ၵူၼ်းၼုမ်ႇၵူၼ်းၵမ်ၶဝ်တၢႆလူၺ်ႈလၢပ်ႇလူၺ်ႈလႅဝ်း ၵႃႈၼႂ်းႁိူၼ်းထႃႇၼႃႉတီႈမူတ်းၸၢင်ႇၸဝ်ႈဢေႃႈ။ မၼ်းဢမ်ႇဢဵတ်းလူၵူၼ်းၸၢႆးၼုမ်ႇ၊ ၵူၼ်းယိင်းၼုမ်ႇ၊ ၵူၼ်းထဝ်ႈ၊ ၵေႃႉဢၼ်ဢသၢၵ်ႈယႂ်ႇလႄႈလင်ၵွမ်းၼၼ်ႉလႄႈ မၼ်းၸဝ်ႈဢဝ်ၶဝ်ၵႃႈမီးတင်းသဵင်ႈတင်းလူင် ဢၢပ်ႈပၼ်ၵႃႈၼႂ်းမိုဝ်းမၼ်းၼၼ်ႉဢေႃႈ။-

18မၼ်းသိမ်းဢဝ်ၶိူင်ႈပိူင်ႁိူၼ်းၽြႃးပဵၼ်ၸဝ်ႈ ဢၼ်ယႂ်ႇဢၼ်လဵၵ်ႉၵႃႈမီး၊ ၽၼ်ႇတႃႇႁိူၼ်းထႃႇဝရႃႉၽြႃး၊ ၽၼ်ႇတႃႇႁေႃၸဝ်ႈ၊ ၽၼ်ႇတႃႇမူးမၢတ်ႈၽွင်းမိူင်း ၵႃႈမီးၸိူဝ်းၼၼ်ႉ ၵႂႃႇၵႃႈတီႈဝဵင်း ပႃႇပူႉလုၼ်ႇ ဢေႃႈ။-

19ၶဝ်ဢွၼ်ၵၼ်ဢဝ်ၽႆးတုတ်ႇႁိူၼ်းၽြႃးပဵၼ်ၸဝ်ႈပႅတ်ႈလႄႈ ၵိူၼ်ႇယႃႉလမ်းဝဵင်း ယေႇရူႉသလႅမ်ႇ တူၵ်းပႅတ်ႈသေလႄႈ ႁႂ်ႈႁိူၼ်းၶုၼ်ၵႃႈမီးမႆႈၽႆးပႅတ်ႈလႄႈ ယႃႉၽဵဝ်ႈၶိူင်ႈပိူင်ဢၼ်လီဢၼ်မျၢတ်ႈၵႃႈမီးပႅတ်ႈဢေႃႈ။-

20မၼ်းသိမ်းဢဝ် ၶဝ်ၸိူဝ်းဢၼ်လွတ်ႈၽေးလၢပ်ႇၽေးလႅဝ်းၼၼ်ႉၵႂႃႇၵႃႈတီႈဝဵင်း ပႃႇပူႉလုၼ်ႇ လႄႈၶဝ်ၼၼ်ႉ လႆႈဢွၼ်ၵၼ်ၶၢမ်ႇႁဵတ်းၶႃႈတီႈမၼ်းၼၼ်ႉ ဢိၵ်ႇတင်းၸူဝ်ႈလုၵ်ႈပၢၼ်လၢၼ်မၼ်းၼၼ်ႉယူႇတေႃႇထိုင်ႁွတ်ႈသိုင်ႇၸိုင်ႈဝၢၼ်ႈမိူင်း ပေႇရသီႉ တႄႇပဵၼ်ၼၼ်ႉလႄႈ၊-

21ဢမိင်ႉထႃႇဝရႃႉၽြႃး ဢၼ် ယေႇရမီႉ သင်ႇလၢတ်ႈဝႆႉၼၼ်ႉလႆႈပျေႉၸုမ်ႇတေႃႇထိုင်ႁွတ်ႈမိူင်းၸဝ်ႈၼၼ်ႉ လႆႈမူၼ်ႈပျေႃႇဝၼ်းၵမ်သိၼ်မၼ်းတင်းလၢႆၼၼ်ႉဢေႃႈ။ မိူင်းၸဝ်ႈၼၼ်ႉၼႂ်းမိူဝ်ႈဢၼ်မၼ်းယင်းတိုၵ်ႉမီးတၢင်းဢၼ်သဵတ်ႇၵူၼ်းယဵၼ်ၵူၼ်းယူႇၼၼ်ႉၸိုင် မၼ်းလႆႈပႂ်ႉဝၼ်းၵမ်သိၼ်မၼ်းယူႇ ႁႂ်ႈထၼ်ႈပေႃးထူၼ်ႈပေႃးတဵမ်ၸဵတ်းသိပ်းပီႊဢေႃႈ။

22ၼႂ်းပီႊဢၼ် ၵူႉရူႉ ၶုၼ်ႁေႃၶမ်း ပေႇရသီႉ ၸၢမ်ႇႁၢင်ႈၸၢမ်ႇႁေႃပီႊပထမႃႉ လွင်ႈၼင်ႇႁိုဝ်ဢမိင်ႉထႃႇဝရႃႉၽြႃး ဢၼ် ယေႇရမီႉ သင်ႇလၢတ်ႈဝႆႉၼၼ်ႉ တၵ်းပျေႉၸုမ်ႇၸိုင် ထႃႇဝရႃႉၽြႃးတိုၵ်းယူင်းၸူဝ်းဢဝ်ႁူဝ်ၸႂ် ၵူႉရူႉ ၶုၼ်ႁေႃၶမ်း ပေႇရသီႉ ႁႂ်ႈမၼ်းၼၼ်ႉပူင်ဢမိင်ႉ ၵျေႃႇၺႃႇၵႃႈၼႂ်းသိုင်ႇၸိုင်ႈဝၢၼ်ႈမိူင်းမၼ်း ၵူႈတီႈၵူႈလႅၼ်သေလႄႈ တႅမ်ႈသႂ်ႇၵႃႈၼႂ်းလိၵ်ႈၼႂ်းလၢႆးလႄႈဝႃႈ၊-

23ၵူႉရူႉ ၶုၼ်ႁေႃၶမ်း ပေႇရသီႉ မီးဢမိင်ႉလႄႈဝႃႈၸမ်ႉ၊ ထႃႇဝရႃႉၽြႃး ၽြႃးပဵၼ်ၸဝ်ႈၸဝ်ႈၽုင်ႇၵၢင်ႁၢဝ်ၼၼ်ႉ ဢဝ်သိုင်ႇၸိုင်ႈဝၢၼ်ႈမိူင်းၵႃႈဢၼ်မီး ၵႃႈၼိူဝ်လိၼ်မိူင်းၼႆႉ ပၼ်တီႈၵဝ်လႄႈသင်ႇလၢတ်ႈဝႆႉ လွင်ႈဢၼ်ၵဝ်တၵ်းလႆႈ တႄႇႁဵတ်းႁိူၼ်းၸဝ်ႈပုၼ်ႈမၼ်းၸဝ်ႈၵႃႈၼႂ်းဝဵင်း ယေႇရူႉသလႅမ်ႇ မိူင်း ယူႉတႃႉ ၼၼ်ႉယဝ်ႉ။ ၼႂ်းၵူၼ်းမၼ်းၸဝ်ႈတင်းသဵင်ႈတင်းလူင်ၼၼ်ႉ ၽူႈလႂ်မီးယူႇၵႃႈၼႂ်းသူၼႆႉ၊ ႁႂ်ႈထႃႇဝရႃႉၽြႃး ၽြႃးပဵၼ်ၸဝ်ႈမၼ်းၼၼ်ႉ မီးယူႇလူၺ်ႈၵၼ်တင်းမၼ်းၼၼ်ႉသေၵမ်းလူၺ်ႈ။ ႁႂ်ႈမၼ်းၼၼ်ႉ ၵႂႃႇၵႃႈတီႈဝဵင်း ယေႇရူႉသလႅမ်ႇ သေၵမ်းလူၺ်ႈ၊ ဝႃႈၼင်ႇၼႆဢေႃႈ။ ရႃႇၸဝၢင်ႇၶျုၵ်ႈၽိုၼ်တူႉတီႉယႃႉယဝ်ႉယဝ်ႉဢေႃႈ။