2 Chronicles 18

Shan

← Chapter 17 Jump to: Chapter 19 →

1ယူဝ်းသၽတ်ႉ ၼၼ်ႉ မီးၸေးၸိမ်ႇဢုၵ်ႉၸႃႇမုၼ်ၵုင်ႇသရေႇယႂ်ႇၼမ်ၼႃႇလႄႈသိုပ်ႇၸပ်းၵၼ်တင်းၸိူဝ်ႉၶိူဝ်း ဢႃႇႁပ်ႉ ဢေႃႈ။-

2ပီႊပူၼ်ႉၵႂႃႇၵမ်ႈၽွင်ႈသေယဝ်ႉ၊ တူဝ်မၼ်းလူင်းၸူးၵႃႈတီႈ ဢႃႇႁပ်ႉ ၵႃႈတီႈဝဵင်း သမႃႇရီႉ လႄႈ ဢႃႇႁပ်ႉ ၼၼ်ႉ ဢဝ်သူဝ်းဝူဝ်းၼမ်ၼႃႇတၢႆပုၼ်ႈမၼ်း ဢိၵ်ႇတင်းၵူၼ်းဢၼ်ပႃးလူၺ်ႈၵၼ်တင်းမၼ်းၸိူဝ်းၼၼ်ႉလႄႈ ၸူဝ်းဢဝ်မၼ်းႁႂ်ႈမၼ်းၸွမ်းၵႂႃႇၵႃႈတီႈ ဝဵင်း ရႃႇမုတ်ႉ မိူင်း ၵီႉလတ်ႉ ဢေႃႈ။-

3ဢႃႇႁပ်ႉ ၶုၼ်ႁေႃၶမ်း ဢီႉသရေႇလႃႉ ထၢမ်တီႈ ယူဝ်းသၽတ်ႉ ၶုၼ်ႁေႃၶမ်း ယူႉတႃႉ လႄႈဝႃႈ၊ ၸဝ်ႈတၵ်းၸွမ်းလူၺ်ႈၵၼ်တင်းၵဝ်ၶႃႈ ၵႂႃႇၵႃႈတီႈဝဵင်း ရႃႇမုတ်ႉ မိူင်း ၵီႉလတ်ႉ ပုၼ်ႉႁိုဝ်။ ဝႃႈၼင်ႇၼႆသေယဝ်ႉ၊ မၼ်းၶိုၼ်းလၢတ်ႈလႄႈဝႃႈ၊ ၵဝ်ၶႃႈၼႆႉပဵၼ်မိူၼ်ၸိူဝ်ႉၼင်ႇၸဝ်ႈယူႇ၊ ၵူၼ်းၵဝ်ၶႃႈၸိူဝ်းၼႆႉ ပဵၼ်မိူၼ်ၸိူဝ်ႉၼင်ႇၵူၼ်းၸဝ်ႈၸိူဝ်းၼၼ်ႉယူႇသေလႄႈ တၵ်းၽွမ်ႉၵၼ်ၸွႆႈထႅမ်လွင်ႈဢမူႉသိုၵ်းဢေႃႈ၊ ဝႃႈၼင်ႇၼႆဢေႃႈ။

4လႆႈသမ်ႉ ယူဝ်းသၽတ်ႉ လၢတ်ႈတီႈၶုၼ်ႁေႃၶမ်း ဢီႉသရေႇလႃႉ လႄႈဝႃႈ၊ တွင်ႈထၢမ်ၼုၵ်ႈၵပၢတ်ႈထႃႇဝရႃႉၽြႃးဝၼ်းမိူဝ်ႈၼႆႉသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊-

5ၶုၼ်ႁေႃၶမ်း ဢီႉသရေႇလႃႉ ၼၼ်ႉ ႁႂ်ႈပရေႃးၽႅတ်ႈသီႇပၢၵ်ႇၸူႉၵၼ်တုမ်ၵၼ်သေယဝ်ႉ၊ ထၢမ်လႄႈဝႃႈ၊ ႁဝ်းထုၵ်ႇလီၶီႇသိုၵ်းၵႂႃႇ ၵႃႈတီႈဝဵင်း ရႃႇမုတ်ႉ မိူင်း ၵီႉလတ်ႉ ၼၼ်ႉႁိုဝ်။ ဢမ်ႇၼၼ် ၵဝ်ယင်းဢမ်ႇၶီႇလႄႈထုၵ်ႇလီယူႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ဢွၼ်ၵၼ်လဝ်ႊလၢတ်ႈလႄႈဝႃႈ၊ ၶီႇၵႂႃႇသေၵမ်းတီႈၶႃႈ။ ၽြႃးပဵၼ်ၸဝ်ႈတၵ်းဢဝ်ဢၢပ်ႈပၼ် ၵႃႈၼႂ်းမိုဝ်းၸဝ်ႈၶုၼ်လူင်တီႈၶႃႈဢေႃႈ။ ဝႃႈၼင်ႇၼႆဢေႃႈ။-

6ယူဝ်းသၽတ်ႉ သမ်ႉထၢမ်လႄႈဝႃႈ၊ ပုၼ်ႈဢၼ်ႁဝ်းတၵ်းလႆႈတွင်ႈထၢမ်ၸိုင် ၵႃႈတီႈၼႆႈဢမ်ႇမီးပရေႃးၽႅတ်ႈထႃႇဝရႃႉၽြႃးသေတူၼ်သေပႃးၶႃႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

7ၶုၼ်ႁေႃၶမ်း ဢီႉသရေႇလႃႉ ၶိုၼ်းလၢတ်ႈတီႈ ယူဝ်းသၽတ်ႉ လႄႈဝႃႈ၊ ၵေႃႉဢၼ်ဢဝ်တွင်ႈထၢမ်တီႈထႃႇဝရႃႉၽြႃးလႆႈၸိုင်ယင်းမီးၵေႃႉၼိုင်ႈဢေႃႈ။ ၼႂ်းဝႃႈၼၼ်သေၵေႃႈ ၵဝ်ၶႃႈၸင်းမၼ်း ၵွပ်ႈပိူဝ်ႈဢၼ်မၼ်းဢမ်ႇႁေႃးလၢတ်ႈၵႂၢမ်းမင်ႇၵလႃႇလူၺ်ႈလွင်ႈၵဝ်လႄႈ ၸၢင်ႈႁေႃးလၢတ်ႈၵႂၢမ်းဢႃႉမင်ႇၵလႃႇသေႇသေႇၵူၺ်းၼၼ်ႉဢေႃႈ။ ၵေႃႉၼၼ်ႉၸမ်ႉ၊ ပဵၼ် မိၵ်ႉၶႃႇ လုၵ်ႈၸၢႆး ဢီႉမလႃႉ ဢေႃႈ၊ ဝႃႈၼင်ႇၼႆသေယဝ်ႉ၊ ယူဝ်းသၽတ်ႉ ၶိုၼ်းလၢတ်ႈလႄႈဝႃႈ၊ ၶုၼ်လူင်ယႃႇပေလၢတ်ႈၸိူဝ်ႉၼင်ႇၼၼ်သေၵမ်း၊ ဝႃႈၼင်ႇၼႆဢေႃႈ။-

8မိူဝ်ႈၼၼ်ႉၶုၼ်ႁေႃၶမ်း ဢီႉသရေႇလႃႉ ၼၼ်ႉႁွင်ႉဢဝ်ၵေႃႉဢၼ်မီးဢရႃႇၵေႃႉၼိုင်ႈလႄႈ မီးဢမိင်ႉဝႃႈ၊ ႁွင်ႉဢဝ် မိၵ်ႉၶႃႇ လုၵ်ႈၸၢႆး ဢီႉမလႃႉ ၼၼ်ႉမႃးၶၼ်ၶၼ်ၽႂ်းၽႂ်းတႃႉ၊ ဝႃႈၼင်ႇၼႆဢေႃႈ။-

9မိူဝ်ႈၶိင်ႇၼၼ်ႉၶုၼ်ႁေႃၶမ်း ဢီႉသရေႇလႃႉ ဢိၵ်ႇတင်း ယူဝ်းသၽတ်ႉ ၶုၼ်ႁေႃၶမ်း ယူႉတႃႉ ၼၼ်ႉ ၼုင်ႈမႆႁၢင်ႈၶိူင်ႈၶူဝ်းၼုင်ႈၶူဝ်းမႆၶုၼ်ယူႇသေလႄႈ ၼင်ႈယူႇၵႃႈၼိူဝ်ရႃႇၸႃႉပလၢင်ႇႁင်းၽႂ်ႁင်းမၼ်း ၼႂ်းတီႈဢၼ်ပၢင်ႇလီပဵင်းလီ ၵႃႈတီႈၽၢႆႇၼႃႈႁူးၽၵ်းတူဝဵင်း သမႃႇရီႉ ၼၼ်ႉယူႇလႄႈ၊ ပရေႃးၽႅတ်ႈၵႃႈမီးၸိူဝ်းၼၼ်ႉ ဢွၼ်ၵၼ်ႁေႃးလၢတ်ႈၵႃႈတီႈၽၢႆႇၼႃႈၸဝ်ႈယူႇဢေႃႈ။-

10ၸေႇတၵီႉ လုၵ်ႈၸၢႆး ၶေးၼႃႇၼႃႉ ၼၼ်ႉ ႁဵတ်းၶဝ်လႅမ်လဵၵ်းသေလႄႈ ႁေႃးလၢတ်ႈလႄႈဝႃႈ၊ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ၸဝ်ႈႁဝ်းတၵ်းလႆႈဢဝ်ၶဝ်လႅမ်ၸိူဝ်းၼႆႉ တႅင်းၵူၼ်းမိူင်း သူႉရီႉ တေႃႇထိုင်ႁွတ်ႈၶဝ်ထၼ်ႈပေႃးလူႉပေႃးလႅဝ်ဢေႃႈ၊ ဝႃႈၼင်ႇၼႆဝႆႉတီႈၶႃႈယဝ်ႉ၊ ဝႃႈၼင်ႇၼႆဢေႃႈ။-

11ပရေႃးၽႅတ်ႈၵႃႈမီးၸိူဝ်းၼၼ်ႉၵေႃႈ ဢွၼ်ၵၼ်ႁဵတ်းပရေႃးၽႅတ်ႈသေလႄႈ ႁေႃးလၢတ်ႈလႄႈဝႃႈ၊ ၸဝ်ႈႁဝ်းၶီႇသိုၵ်းၶိုၼ်ႈၸူးၵႃႈတီႈဝဵင်း ရႃႇမုတ်ႉ မိူင်း ၵီႉလတ်ႉ လႄႈ ႁႂ်ႈပႄႉၼႅင်ႇသေၵမ်းတီႈၶႃႈ။ ထႃႇဝရႃႉၽြႃးတၵ်းဢဝ်ဢၢပ်ႈပၼ်ၵႃႈၼႂ်းမိုဝ်းၸဝ်ႈၶုၼ်လူင်တီႈၶႃႈဢေႃႈ၊ ဝႃႈၼင်ႇၼႆဢေႃႈ။-

12တမၢၼ်ႇၵူၼ်းၸႂ်ႉဢၼ်ၵႂႃႇ ႁႂ်ႈလႆႈႁွင်ႉ မိၵ်ႉၶႃႇ မႃးၼၼ်ႉလၢတ်ႈတီႈမၼ်းလႄႈဝႃႈ၊ ပရေႃးၽႅတ်ႈၸိူဝ်းၼၼ်ႉၽွမ်ႉၵၼ်ႁေႃးလၢတ်ႈၵႂၢမ်းမင်ႇၵလႃႇၵူၺ်း တီႈၶုၼ်ႁေႃၶမ်းၶႃႈဢေႃႈ။ ၸဝ်ႈႁဝ်းၵေႃႈၶႅၼ်းတေႃႈ ႁႂ်ႈၵႂၢမ်းၸဝ်ႈႁဝ်းပဵၼ်ၸိူဝ်ႉၼင်ႇၵႂၢမ်းၶဝ်ၸိူဝ်းၼၼ်ႉလႄႈ ႁေႃးလၢတ်ႈၵႂၢမ်းမင်ႇၵလႃႇသေၵမ်းၶႃႈ၊ ဝႃႈၼင်ႇၼႆသေယဝ်ႉ၊-

13မိၵ်ႉၶႃႇ ၶိုၼ်းလၢတ်ႈလႄႈဝႃႈ၊ ၵႃႈၼင်ႇဢၼ် ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉ ၵဝ်တၵ်းလႆႈၶိုၼ်းလၢတ်ႈၵႂၢမ်းဢၼ်ၽြႃးပဵၼ်ၸဝ်ႈၵဝ်မီးဢမိင်ႉၼၼ်ႉၵူၺ်းဢေႃႈ၊ ဝႃႈၼင်ႇၼႆဢေႃႈ။

14မိူဝ်ႈဢၼ်မၼ်းႁွတ်ႈထိုင်ၵႃႈတီႈ ၶုၼ်ႁေႃၶမ်းၼၼ်ႉၸိုင်၊ ၶုၼ်ႁေႃၶမ်းထၢမ်တီႈမၼ်းလႄႈဝႃႈ၊ မိၵ်ႉၶႃႇ ဢိူၺ်း၊ ႁဝ်းထုၵ်ႇလီၶီႇသိုၵ်းၵႂႃႇ ၵႃႈတီႈဝဵင်း ရႃႇမုတ်ႉ မိူင်း ၵီႉလတ်ႉ ၼၼ်ႉႁိုဝ်။ ဢမ်ႇၼၼ် ၵဝ်ယင်းဢမ်ႇၶီႇလႄႈထုၵ်ႇလီယူႇႁိုဝ်၊ ဝႃႈၼင်ႇၼႆသေယဝ်ႉ၊ မိၵ်ႉၶႃႇ လဝ်ႊလၢတ်ႈလႄႈဝႃႈ၊ ၸဝ်ႈႁဝ်းၶဝ်ၶီႇသိုၵ်းၶိုၼ်ႈၸူးလႄႈ ႁႂ်ႈပႄႉၼႅင်ႇသေၵမ်းတီႈၶႃႈ။ ၶဝ်ၼၼ်ႉတၵ်းလႆႈၶၢမ်ႇတၢင်းဢၼ်ဢဝ်ဢၢပ်ႈပၼ် ၵႃႈၼႂ်းမိုဝ်းၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

15ၶုၼ်ႁေႃၶမ်းၵေႃႈထၢမ်လႄႈဝႃႈ၊ လိူဝ်သေၵႂၢမ်းဢၼ်မၢၼ်ႇဢၼ်မႅၼ်ႈၼၼ်ႉ၊ လွင်ႈၼင်ႇႁိုဝ်မႂ်းတၵ်းဢမ်ႇဢဝ်တင်းဢၶႂၢင်ႉ ထႃႇဝရႃႉၽြႃးသေလႄႈ ႁေႃးလၢတ်ႈၵႂၢမ်းတၢင်ႇၸိူဝ်ႉတၢင်ႇဢၼ်တီႈၵဝ်ၸိုင်၊ ၵဝ်တၵ်းလႆႈပၼ်တၢင်းၵိၼ်ႇတၢင်းဝႃႈ တီႈမႂ်းတေႃႇထိုင်ႁွတ်ႈလၢႆပွၵ်ႈလၢႆၽဝ်ႇလူးၵွၼ်ႇ၊ မိူဝ်ႈဢၼ်ဝႃႈၼင်ႇၼႆၸိုင်၊-

16မၼ်းၵေႃႈသမ်ႉလဝ်ႊလၢတ်ႈလႄႈဝႃႈ၊ ၶႃႈၸဝ်ႈလႆႈႁၼ်ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် မီးတၢင်းဢၼ်ၽၢတ်ႇၽႄၵၼ်ယူႇၵႃႈၼိူဝ်လွႆၼိူဝ်ၵုင်းတင်းလၢႆမိူၼ်ၸိူဝ်ႉၼင်ႇသူဝ်းဢၼ်ဢမ်ႇမီးၵေႃႉဢၼ်လဵင်ႉဢၼ်ထိင်းၼၼ်ႉတီႈၶႃႈယဝ်ႉ။ ထႃႇဝရႃႉၽြႃး မီးဢမိင်ႉလႄႈဝႃႈၸမ်ႉ၊ ၵွပ်ႈပိူဝ်ႈဢၼ်ၶဝ်ၸိူဝ်းၼႆႉ ဢမ်ႇမီးၸဝ်ႈမီးၸွမ်လႄႈ ႁႂ်ႈၶဝ်ၶိုၼ်းမိူဝ်းၵႂႃႇၵႃႈတီႈႁိူၼ်း တီႈဢၼ်ၶဝ်ယူႇၼၼ်ႉႁင်းၽႂ်ႁင်းမၼ်းသေ၊ ဝႃႈၼင်ႇၼႆတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

17ၶုၼ်ႁေႃၶမ်း ဢီႉသရေႇလႃႉ လၢတ်ႈတီႈ ယူဝ်းသၽတ်ႉ လႄႈဝႃႈ၊ ၸွင်ႇၵဝ်ၶႃႈဢမ်ႇလၢတ်ႈတီႈၸဝ်ႈလႄႈဝႃႈ၊ မၼ်းၼႆႉဢမ်ႇႁေႃးၵႂၢမ်းမင်ႇၵလႃႇလူၺ်ႈလွင်ႈၵဝ်ၶႃႈ၊ ၸၢင်ႈႁေႃးလၢတ်ႈၵႂၢမ်းဢႃႉမင်ႇၵလႃႇၵူၺ်းဢေႃႈ၊ ဝႃႈၼင်ႇၼႆဝႆႉယဝ်ႉဢမ်ႇၸႂ်ႈႁိုဝ်၊ ဝႃႈၼင်ႇၼႆဢေႃႈ။-

18မၼ်းၼၼ်ႉၵေႃႈ သမ်ႉႁေႃးလၢတ်ႈလႄႈဝႃႈ၊ ပိူဝ်ႈဢၼ်ပဵၼ်ၼင်ႇၼႆလႄႈ ၶႅၼ်းတေႃႈထွမ်ႇငိၼ်းဢမိင်ႉထႃႇဝရႃႉၽြႃးသေၵမ်းတီႈၶႃႈ။ ၶႃႈၸဝ်ႈႁၼ်ထႃႇဝရႃႉၽြႃးၼင်ႈယူႇၵႃႈၼိူဝ်ပလၢင်ႇၸဝ်ႈလႄႈ ပူဝ်ႇပႃႇၵၢင်ႁၢဝ်တင်းသဵင်ႈတင်းလူင် ဢွၼ်ၵၼ်ၸုၵ်းယူႇၵႃႈတီႈၽၢႆႇၶႂႃၸဝ်ႈ ၵႃႈတီႈၽၢႆႇသၢႆႉၸဝ်ႈၼၼ်ႉတီႈၶႃႈယဝ်ႉ။-

19ထႃႇဝရႃႉၽြႃးၵေႃႈထၢမ်လႄႈဝႃႈ၊ ၽူႈလႂ်တၵ်းတိုၵ်းယူင်းၸူဝ်းဢဝ် ဢႃႇႁပ်ႉ ၶုၼ်ႁေႃၶမ်း ဢီႉသရေႇလႃႉ ႁႂ်ႈမၼ်းၶီႇသိုၵ်းၶိုၼ်ႈၸူး ၵႃႈတီႈဝဵင်း ရႃႇမုတ်ႉ မိူင်း ၵီႉလတ်ႉ လႄႈ သုမ်းၸွမ်းၼၼ်ႉ၊ ဝႃႈၼင်ႇၼႆသေယဝ်ႉ၊ ၶဝ်ၼၼ်ႉဢွၼ်ၵၼ်ၶိုၼ်းလဝ်ႊလၢတ်ႈယေႈၵေႃႉယေႈၸိူဝ်းယေႈၵေႃႉယေႈၼႄးဢေႃႈ။-

20လႆႈသမ်ႉ ဝီႉၺိၺ်ႇပႃးၼိုင်ႈမႃးလႄႈၸုၵ်းယူႇ ၵႃႈတီႈၽၢႆႇၼႃႈထႃႇဝရႃႉၽြႃးယူႇသေလႄႈ လဝ်ႊလၢတ်ႈလႄႈဝႃႈ၊ ၶႃႈၸဝ်ႈတၵ်းတိုၵ်းယူင်းၸူဝ်းဢဝ်တီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊ ထႃႇဝရႃႉၽြႃးထၢမ်လႄႈဝႃႈ၊ တၵ်းႁဵတ်းၸိူဝ်ႉၼင်ႇႁိုဝ်သေလႄႈ တိုၵ်းယူင်းၸူဝ်းဢဝ်၊ မိူဝ်ႈဢၼ်ဝႃႈၼင်ႇၼႆၸိုင်၊-

21မၼ်းၵေႃႈလဝ်ႊလၢတ်ႈလႄႈဝႃႈ၊ ၶႃႈၸဝ်ႈတၵ်းၵႂႃႇလႄႈ ပဵၼ်ၸႂ်ဝီႉၺိၺ်ႇဢၼ်ၸၢင်ႈလၢတ်ႈၵႂၢမ်းမူႉသႃႇ ၵႃႈၼႂ်းသူပ်းပရေႃးၽႅတ်ႈ ၶုၼ်လူင်ၵႃႈမီးၼၼ်ႉတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊ မၼ်းၸဝ်ႈမီးဢမိင်ႉလႄႈဝႃႈ၊ မႂ်းတၵ်းတိုၵ်းယူင်းၸူဝ်းဢဝ်မၼ်းလႄႈ ပႄႉၼႅင်ႇဢေႃႈ၊ ၵႂႃႇလႄႈႁဵတ်းၸိူဝ်ႉၼင်ႇၼၼ်တႃႉ၊ ဝႃႈၼင်ႇၼႆဢေႃႈ။-

22ပိူဝ်ႈဢၼ်ပဵၼ်ၼင်ႇၼႆလႄႈ ထႃႇဝရႃႉၽြႃးဢဝ်ၸႂ်ဝီႉၺိၺ်ႇဢၼ်ၸၢင်ႈလၢတ်ႈၵႂၢမ်းမူႉသႃႇၼၼ်ႉ သႂၢင်းသႂ်ႇပၼ်ၵႃႈၼႂ်းသူပ်းပရေႃးၽႅတ်ႈၶုၼ်လူင်ၸိူဝ်းၼႆႉတီႈၶႃႈယဝ်ႉ။ ထႃႇဝရႃႉၽြႃးလၢတ်ႈၵႂၢမ်းဢႃႉမင်ႇၵလႃႇလူၺ်ႈလွင်ႈၸဝ်ႈၶုၼ်လူင်တီႈၶႃႈယဝ်ႉ၊ ဝႃႈၼင်ႇၼႆဢေႃႈ။-

23မိူဝ်ႈၼၼ်ႉ ၸေႇတၵီႉ လုၵ်ႈၸၢႆး ၶေးၼႃႇၼႃႉ ၼၼ်ႉ သုတ်ႉၸပ်းသုတ်ႉၸူးလႄႈ တူပ်းသႂ်ႇၵႅမ်ႈ မိၵ်ႉၶႃႇ သေလႄႈ ထၢမ်လႄႈဝႃႈ၊ ဝီႉၺိၺ်ႇထႃႇဝရႃႉၽြႃး ဢွၵ်ႇသေၵႃႈၼႂ်းၵဝ်ၵႂႃႇတၢင်းသဵၼ်ႈလႂ် ႁႂ်ႈလႆႈတၵ်ႉလၢတ်ႈမႂ်း၊ ဝႃႈၼင်ႇၼႆသေယဝ်ႉ၊-

24မိၵ်ႉၶႃႇ ၵေႃႈလၢတ်ႈလႄႈဝႃႈ၊ မႂ်းတၵ်းလႆႈႁၼ်ၼႂ်းမိုဝ်ႉဝၼ်းဢၼ် မႂ်းတၵ်းၶဝ်ႈၵႃႈၼႂ်းလုၵ်းတၢင်းၼႂ်း ႁႂ်ႈလႆႈတဵတ်ႇမႅပ်ႉယူႇၼၼ်ႉဢေႃႈ၊ ဝႃႈၼင်ႇၼႆဢေႃႈ။-

25မိူဝ်ႈၼၼ်ႉၶုၼ်ႁေႃၶမ်း ဢီႉသရေႇလႃႉ ၸီႇယၢင်ႇလႄႈဝႃႈ၊ ဢဝ် မိၵ်ႉၶႃႇ ၶိုၼ်းမိူဝ်းၵႂႃႇၸူးၵႃႈတီႈ ဢႃႇမုၼ်ႇ ၶုၼ်မဵဝ်ႉဝုၼ်ႇတင်း ယေႃးသႃႉ လုၵ်ႈၸၢႆးၸဝ်ႈၼၼ်ႉလႄႈ၊-

26သင်ႇလၢတ်ႈဝႆႉလႄႈဝႃႈ၊ ၶုၼ်ႁေႃၶမ်းမီးဢမိင်ႉၸမ်ႉ၊ ဢွၼ်ၵၼ်ဢဝ်ၵေႃႉၼႆႉ ၶင်ဝႆႉၵႃႈၼႂ်းထွင်ႇလႄႈ ႁႂ်ႈမၼ်းၵိၼ်ၶူပ်းၶဝ်ႈမုၼ်းတုၵ်ႉၶႃႉတၢင်းဢၼ်ၶၢၼ်ၸႂ်လႄႈ သူတ်ႉၵိၼ်ၼမ်ႉတုၵ်ႉၶႃႉတၢင်းဢၼ်ၶၢၼ်ၸႂ်ယူႇ တေႃႇထိုင်ႁွတ်ႈၵဝ်လႆႈၶိုၼ်းမႃးၼိမ်ၼိမ်လီလီၼၼ်ႉတႃႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။-

27မိၵ်ႉၶႃႇ ၵေႃႈၶိုၼ်းလၢတ်ႈလႄႈဝႃႈ၊ ပေႃးၸဝ်ႈၶုၼ်လူင်လႆႈၶိုၼ်းမႃးၼိမ်ၼိမ်လီလီၸိုင်၊ ထႃႇဝရႃႉၽြႃးဢမ်ႇဢဝ်ၶႃႈၸဝ်ႈ မီးဢမိင်ႉဝႆႉတီႈၶႃႈ။ ၵူၼ်းၵႃႈမီးတင်းသဵင်ႈတင်းလူင်ၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းဝႆႉတႃႉ၊ ဝႃႈၼင်ႇၼႆဢေႃႈ။

28ၼင်ႇၼၼ်လႄႈၶုၼ်ႁေႃၶမ်း ဢီႉသရေႇလႃႉ တင်း ယူဝ်းသၽတ်ႉ ၶုၼ်ႁေႃၶမ်း ယူႉတႃႉ ၼၼ်ႉ ဢွၼ်ၵၼ်ၶီႇသိုၵ်းၶိုၼ်ႈၸူးၵႃႈတီႈဝဵင်း ရႃႇမုတ်ႉ မိူင်း ၵီႉလတ်ႉ ဢေႃႈ။-

29ၶုၼ်ႁေႃၶမ်း ဢီႉသရေႇလႃႉ လၢတ်ႈတီႈ ယူဝ်းသၽတ်ႉ လႄႈဝႃႈ၊ ၵဝ်တၵ်းယႃႉႁၢင်ႈယႃႉၽၢင်ၵဝ်သေလႄႈ ၶဝ်ႈၵႃႈၼႂ်းပွႆးသိုၵ်းဢေႃႈ။ ၸဝ်ႈၸမ်ႉ ၼုင်ႈမႆႁၢင်ႈၶိူင်ႈၶူဝ်းၼုင်ႈၶူဝ်းမႆၶုၼ်ယူႇသေၵမ်း၊ ဝႃႈၼင်ႇၼႆသေယဝ်ႉ၊ ၶုၼ်ႁေႃၶမ်း ဢီႉသရေႇလႃႉ ၼၼ်ႉ ယႃႉႁၢင်ႈယႃႉၽၢင်မၼ်းသေလႄႈ ၶဝ်ႈၵႃႈၼႂ်းပွႆးသိုၵ်းဢေႃႈ။-

30ၵွပ်ႈပိူဝ်ႈဢၼ်ၶုၼ်ႁေႃၶမ်း သူႉရီႉ သင်ႇလၢတ်ႈဝႆႉ တီႈၶုၼ်ပူဝ်ႇဢၼ်ဢုပ်ႉၵႃႈၼိူဝ်ႁူဝ်ႁၢၼ်ၵူၼ်းသိုၵ်းၶီႇလေႃႉရထႃးၸိူဝ်းၼၼ်ႉဝႆႉလႄႈဝႃႈ၊ ၼွၵ်ႈသေၶုၼ်ႁေႃၶမ်း ဢီႉသရေႇလႃႉ ၼၼ်ႉ၊ ယႃႇပေတိုၵ်းတေႃးၵူၼ်းလူင်ၵူၼ်းဢွၼ်ႇသေၵေႃႉသေၵူၼ်း၊ ဝႃႈၼင်ႇၼႆဝႆႉၼၼ်ႉလႄႈ၊-

31မိူဝ်ႈဢၼ်ၶုၼ်ပူဝ်ႇဢၼ်ဢုပ်ႉၵႃႈၼိူဝ်ႁူဝ်ႁၢၼ်ၵူၼ်းသိုၵ်း ၶီႇလေႃႉရထႃးၸိူဝ်းၼၼ်ႉ ႁၼ် ယူဝ်းသၽတ်ႉ ၼၼ်ႉၸိုင်၊ ၶဝ်လၢတ်ႈၵၼ်လႄႈဝႃႈ၊ ၵေႃႉၼၼ်ႉတၵ်းပဵၼ်ၶုၼ်ႁေႃၶမ်း ဢီႉသရေႇလႃႉ ဢေႃႈ၊ ဝႃႈၼင်ႇၼႆသေလႄႈ ဢွၼ်ၵၼ်ဢုမ်ႇမႃးႁႂ်ႈလႆႈတိုၵ်းတေႃးမၼ်းလႄႈ ယူဝ်းသၽတ်ႉ ၵေႃႈႁွင်ႉသႅၼ်ႇဢေႃႈ၊ ထႃႇဝရႃႉၽြႃးၸွႆႈထႅမ်မႃႉၸႃႉမၼ်းလႄႈ၊ ၽြႃးပဵၼ်ၸဝ်ႈတိုၵ်းယူင်း ႁႂ်ႈၶဝ်ၼၼ်ႉဝႄႈပိူင်ႈမၼ်းသေဢေႃႈ။-

32မိူဝ်ႈဢၼ်ၶုၼ်ပူဝ်ႇဢၼ်ဢုပ်ႉၵႃႈၼိူဝ်ႁူဝ်ႁၢၼ်ၵူၼ်းသိုၵ်းၶီႇလေႃႉရထႃးၸိူဝ်းၼၼ်ႉ ႁူႉႁၼ်လွင်ႈဢၼ်ဢမ်ႇၸႂ်ႈ ၶုၼ်ႁေႃၶမ်း ဢီႉသရေႇလႃႉ ၼၼ်ႉၸိုင်၊ ၶဝ်ယင်းဢမ်ႇဢုမ်ႇၸွမ်းမၼ်းလႄႈ ဢွၼ်ၵၼ်ဝႄႈပိူင်ႈမၼ်းသေဢေႃႈ။-

33ၵူၼ်းၵေႃႉၼိုင်ႈ ယင်းဢမ်ႇယဵင်းၸူးလႄႈ ဢဝ်ၵၢင်ႇမၼ်းယိုဝ်းလႄႈ ထုၵ်ႇမႅၼ်ႈသႂ်ႇၵႃႈတီႈၵႄႈပွင်ႈသိူဝ်ႈၶႅပ်းလဵၵ်းၶုၼ်ႁေႃၶမ်း ဢီႉသရေႇလႃႉ သေယဝ်ႉ မၼ်းလၢတ်ႈတီႈၵေႃႉဢၼ်ထိင်းလေႃႉရထႃးမၼ်းလႄႈဝႃႈ၊ ဢဝ်ၵဝ်ဝၢႆႇၶိုၼ်းလႄႈဢွၵ်ႇသေၵႃႈၼႂ်းပွႆးသိုၵ်းတႃႉ။ ၵဝ်ၸဵပ်းၼႃႇလူင်လၢင်ယဝ်ႉ၊ ဝႃႈၼင်ႇၼႆဢေႃႈ။-

34ၼႂ်းဝၼ်းၼၼ်ႉ တၢင်းဢၼ်တိုၵ်းၵၼ်တေႃးၵၼ် ယဵင်ႈၶႅၼ်းယႂ်ႇမႃးတူဝ်းမႃးယူႇဢေႃႈ။ ၶုၼ်ႁေႃၶမ်း ဢီႉသရေႇလႃႉ ၵေႃႈ ဢိင်ၵူၼ်းၵႃႈၼႂ်းလေႃႉရထႃးၸဝ်ႈသေလႄႈ ၼင်ႈယူႇၽၢႆႇၼိုင်ႈ တင်းၵူၼ်း သူႉရီႉ ၸိူဝ်းၼၼ်ႉ တေႃႇထိုင်ႁွတ်ႈၶိင်ႇႁူဝ်ၶမ်ႈလႄႈ ယၢမ်းမိူဝ်ႈဢၼ်ၵၢင်ဝၼ်းၸမ်တၵ်းတူၵ်းၼၼ်ႉ၊ ဢသၢၵ်ႈမၼ်းသဵင်ႈသေဢေႃႈ။

← Chapter 17 Jump to: Chapter 19 →