2 Chronicles 34

Shan

← Chapter 33 Jump to: Chapter 35 →

1ယူဝ်းသီႉယႃႉ ၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင် ဢသၢၵ်ႈမၼ်းလႆႈပႅတ်ႇပီႊလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်း ဝဵင်း ယေႇရူႉသလႅမ်ႇ သၢမ်သိပ်းပၢႆဢဵတ်းပီႊဢေႃႈ။-

2မၼ်းႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ၸွမ်းသဵၼ်ႈတၢင်းဢၼ် တႃႇဝိတ်ႈ ၸဝ်ႈပေႃႈမၼ်းၸွမ်းၼၼ်ႉယူႇသေလႄႈ ဢမ်ႇဝႄႈပိူင်ႈသေၵႃႈတီႈၽၢႆႇၶႂႃၵႃႈတီႈၽၢႆႇသၢႆႉ။

3ၼႂ်းပီႊဢၼ်ၸၢမ်ႇႁၢင်ႈၸၢမ်ႇႁေႃပႅတ်ႇပီႊၼၼ်ႉ ၼႂ်းမိူဝ်ႈဢၼ်ဢသၢၵ်ႈမၼ်းယင်းလဵၵ်ႉယင်းၼုမ်ႇယူႇၼၼ်ႉၸိုင် မၼ်းၸႃႉႁႃၽြႃးပဵၼ်ၸဝ်ႈ ၸဝ်ႈပေႃႈမၼ်း တႃႇဝိတ်ႈ ဢေႃႈ။ ၼႂ်းပီႊဢၼ်လႆႈသိပ်းသွင်ပီႊၼၼ်ႉ၊ မၼ်းၸႃႉပႄႇၽဵဝ်ႈထႃႇၼႃႉတီႈသုင်လႂ်၊ တူၼ်ႈ ဢႃႇသရႃႉ လႂ်၊ ရုၵ်ႈထူႉဢၼ်တွင်ႈႁဵတ်းၶၵ်းႁဵတ်းလႂ်၊ ရုၵ်ႈထူႉဢၼ်သွၼ်းႁဵတ်းလေႃႇႁဵတ်းလႂ်၊ ပႅတ်ႈသေၵႃႈၼႂ်းမိူင်း ယူႉတႃႉ ၊ တင်းဝဵင်း ယေႇရူႉသလႅမ်ႇ ဢေႃႈ။-

4ၶဝ်ဢွၼ်ၵၼ်ၵိူၼ်ႇယႃႉယိတ်ႈပလၢင်ႇၽြႃး ပႃႇလႃႉ တင်းလၢႆ တူၵ်းပႅတ်ႈၵႃႈတီႈၽၢႆႇၼႃႈမၼ်းလႄႈ ပမ်ႈရုၵ်ႈထူႉၵၢင်ဝၼ်းတင်းလၢႆ ဢၼ်တၢင်ႇဝႆႉၵႃႈတီႈဢၼ်သုင်ၵႃႈၼိူဝ်ယိတ်ႈပလၢင်ႇၸိူဝ်းၼၼ်ႉလူမ်ႉပႅတ်ႈဢေႃႈ။ မၼ်းႁၵ်းႁဵၵ်းတူၼ်ႈ ဢႃႇသရႃႉ လႂ်၊ ရုၵ်ႈထူႉဢၼ်တွင်ႈႁဵတ်းၶၵ်းႁဵတ်းလႂ် ဢိၵ်ႇတင်းရုၵ်ႈထူႉဢၼ်သွၼ်းႁဵတ်းလေႃႇႁဵတ်းလႂ်ပႅတ်ႈလႄႈ ႁႂ်ႈပဵၼ်မုၼ်ႈပဵၼ်ၽွင်သေယဝ်ႉ၊ ဢဝ်ၽၢဝ်ႇဢဝ်ပိုၼ်သႂ်ႇၵႃႈၼိူဝ်သၢင်းၶႅင်းၶဝ်ၸိူဝ်းဢၼ်ပုၵ်ႈၸေႃႇယိတ်ႈတီႈၸိူဝ်းၼၼ်ႉၼၼ်ႉဢေႃႈ။-

5မၼ်းဢဝ်လုပ်ႇယိတ်ႈပရေႃးႁဵၵ်ႈတင်းလၢႆတုတ်ႇၽႆးၵႃႈၼိူဝ်ယိတ်ႈပလၢင်ႇၶဝ်ၸိူဝ်းၼၼ်ႉလႄႈ ႁႂ်ႈမိူင်း ယူႉတႃႉ တင်းဝဵင်း ယေႇရူႉသလႅမ်ႇ မူတ်းသႂ်ဢေႃႈ။-

6မိူၼ်ၼင်ႇၼၼ်မၼ်းႁဵတ်းတီႈဝဵင်းတင်းလၢႆ ၵႃႈၼႂ်းလိၼ် မၼႃႇသေႇ ၊ လိၼ် ဢေႇၽရိမ်ႇ ၊ လိၼ် သီႉမုၼ်ႇ ၊ တေႃႇထိုင်ႁွတ်ႈ လိၼ် ၼပ်ႉထလီႉ ၵႃႈၼႂ်းဝၢၼ်ႈလူႉဝဵင်းႁၢမ်းၸိူဝ်းၼၼ်ႉလႄႈ၊-

7ႁၵ်းႁဵၵ်းယိတ်ႈပလၢင်ႇတင်းလၢႆပႅတ်ႈ၊ ဢဝ်တူၼ်ႈ ဢႃႇသရႃႉ လႂ် ဢိၵ်ႇတင်းရုၵ်ႈထူႉဢၼ်တွင်ႈႁဵတ်းၶၵ်းႁဵတ်းလႂ် တွႆႇတမ်ႁႂ်ႈပဵၼ်မုၼ်ႈပဵၼ်ၽွင်၊ ပမ်ႈရုၵ်ႈထူႉၵၢင်ဝၼ်း ၵႃႈဢၼ်မီးၵႃႈၼႂ်းမိူင်း ဢီႉသရေႇလႃႉ တင်းသဵင်ႈတင်းမူတ်းၼၼ်ႉ လူမ်ႉပႅတ်ႈသေလႄႈၶိုၼ်းမိူဝ်းၵႂႃႇၵႃႈတီႈဝဵင်း ယေႇရူႉသလႅမ်ႇ သေဢေႃႈ။

8ၼႂ်းပီႊဢၼ်မၼ်းၸၢမ်ႇႁၢင်ႈၸၢမ်ႇႁေႃသိပ်းပၢႆပႅတ်ႇပီႊၼၼ်ႉ၊ မၼ်းႁႂ်ႈသိုင်ႇၸိုင်ႈဝၢၼ်ႈမိူင်းၸဝ်ႈ တင်းပိၵ်ႈမၢၼ်ႇၸဝ်ႈမူတ်းသႂ်သေယဝ်ႉ၊ ပွႆႇၸႂ်ႉ သႃႇၽၢၼ်ႇ လုၵ်ႈၸၢႆး ဢႃႇၸႃႇလီႉ မဵဝ်ႉဝုၼ်ႇ မႃႇသေႇယႃႉ ၊ ဢတႂၢင်းဝုၼ်ႇ ယေႃးဢေးလႃႉ လုၵ်ႈၸၢႆး ယေႃးၶတ်ႉ ၸိူဝ်းၼၼ်ႉ ႁႂ်ႈလႆႈမႄးၵုမ်းမႄးႁဵတ်း ႁိူၼ်းထႃႇဝရႃႉၽြႃးၽြႃးပဵၼ်ၸဝ်ႈမၼ်းဢေႃႈ။-

9ၶဝ်ၼၼ်ႉၵႂႃႇၸူးၵႃႈတီႈၶုၼ်ယိတ်ႈပရေႃးႁဵၵ်ႈ ႁီႉလၶီႉ လႄႈ ဢဝ်ငိုၼ်းဢၼ်ၵူၼ်းတင်းလၢႆဢဝ်မႃးၵႃႈတီႈႁိူၼ်းၽြႃးပဵၼ်ၸဝ်ႈ၊ ဢၼ်ၵူၼ်းမဵဝ်း လေႇဝီႉ ဢၼ်ပႂ်ႉၽၵ်းတူၸိူဝ်းၼၼ်ႉ ၶၢမ်ႇဢဝ်ၵႃႈတီႈမိုဝ်းၵူၼ်းမဵဝ်း မၼႃႇသေႇ ၊ ၵူၼ်းမဵဝ်း ဢေႇၽရိမ်ႇ ၊ ၵူၼ်းမဵဝ်း ဢီႉသရေႇလႃႉ ဢၼ်ၵိုတ်းဢၼ်ၵျၢၼ်ႇၵႃႈမီး၊ ၵူၼ်းမဵဝ်း ယူႉတႃႉ ၊ ၵူၼ်းမဵဝ်း ပိၼ်ႇယႃႇမိၼ်ႇ ၵူၼ်းၶႃႈၵူၼ်းဝဵင်း ယေႇရူႉသလႅမ်ႇ တင်းသဵင်ႈတင်းလူင်ၼၼ်ႉသေလႄႈ၊-

10ဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်သၢင်ႈဢၼ်ႁဵတ်း ဢၼ်ဢုပ်ႉၵႃႈၼိူဝ်ႁိူၼ်းထႃႇဝရႃႉၽြႃးယူႇၸိူဝ်းၼၼ်ႉသေယဝ်ႉ၊ ၶဝ်ၼၼ်ႉဢွၼ်ၵၼ်မႅင်ႇပၼ်တီႈၶဝ်ၸိူဝ်းဢၼ်သၢင်ႈဢၼ်ႁဵတ်း ႁႂ်ႈလႆႈမႄးၵုမ်းမႄးႁဵတ်းႁိူၼ်းထႃႇဝရႃႉၽြႃး၊-

11ဢၼ်ဝႃႈၶဝ်ၸိူဝ်းဢၼ်မေႃတိၼ်မေႃမိုဝ်းလႂ် တင်းလၢၵ်ႈသမႃးလႂ်၊ ပုၼ်ႈဢၼ်တၵ်းသိုဝ်ႉဢဝ်မၢၵ်ႇႁိၼ် ဢၼ်သပ်းယဝ်ႉထၢၵ်ႇယဝ်ႉလႂ် ဢိၵ်ႇတင်း ၶိုဝ်ႇ ပႄ တူင် ၵွၼ် ပုၼ်ႈဢၼ်တၵ်းမႄးၵုမ်းမႄးႁဵတ်းလင် ဢၼ်ၶုၼ်ႁေႃၶမ်း ယူႉတႃႉ တင်းလၢႆယႃႉပႅတ်ႈၸိူဝ်းၼၼ်ႉဢေႃႈ။-

12ၶဝ်ၸိူဝ်းဢၼ်သၢင်ႈႁဵတ်းၼၼ်ႉဢွၼ်ၵၼ်ပႂ်ႉသဵတ်ႈၸႃႇသေလႄႈသၢင်ႈႁဵတ်းဢေႃႈ။ ၶဝ်ၸိူဝ်းဢၼ်ဢုပ်ႉဢၼ်ၶျုၵ်ႈၶဝ်ၼၼ်ႉ ပဵၼ် ယႃႇႁတ်ႉ တင်း ဢေႃးပတီႉ ၸိူဝ်ႉၶိူဝ်း မေႇရႃႇရီႉ မဵဝ်း လေႇဝီႉ၊ ၸႃႇၶရီႉ တင်း မေႇသူႉလမ်ႇ ၸိူဝ်ႉၶိူဝ်း ၵေႃႇႁတ်ႉ ၼၼ်ႉ ႁႂ်ႈလႆႈဢွၼ်ႁဵတ်းဢွၼ်သၢင်ႈ ဢိၵ်ႇတင်းၵူၼ်းမဵဝ်း လေႇဝီႉ ၵႃႈဢၼ်ၸၢင်ႈပဝ်ႇၸၢင်ႈႁႆႇမဵဝ်းတူႇရီႉယႃႇသေလႄႈ ႁဵတ်းၵႂၢမ်းၸိူဝ်းၼၼ်ႉဢေႃႈ။-

13ၶဝ်ၼၼ်ႉ လႆႈဢွၼ်ၵၼ်လူတူၺ်း ဢုပ်ႉၵႃႈၼိူဝ်ၶဝ်ၸိူဝ်းဢၼ်လႆႈတေႃႉလႆႈႁၢပ်ႇၼၼ်ႉလႄႈ ဢွၼ်ႁဵတ်းဢွၼ်သၢင်ႈၶဝ် ၵႃႈဢၼ်လႆႈႁဵတ်းလႆႈသၢင်ႈ မဵဝ်းတၢင်းႁဵတ်းၵူႈမဵဝ်းၸိူဝ်းၼၼ်ႉဢေႃႈ။ ၵူၼ်း လေႇဝီႉ ၵမ်ႈၽွင်ႈၵေႃႈ လႆႈႁဵတ်းၸရေးလႂ်၊ ၵူၼ်းလူင်ဢၼ်ၸီႇယၢင်ႇတြႃးလႂ်၊ ၵူၼ်းပႂ်ႉၽၵ်းတူလႂ်ဢေႃႈ။

14မိူဝ်ႈဢၼ်ၶဝ်ဢဝ်ငိုၼ်းဢၼ်ဢဝ်မႃး ၵႃႈတီႈႁိူၼ်းထႃႇဝရႃႉၽြႃးၼၼ်ႉဢွၵ်ႇၼၼ်ႉၸိုင်၊ ယိတ်ႈပရေႃးႁဵၵ်ႈ ႁီႉလၶီႉ ထူပ်းႁၼ်ၽိုၼ်ၵျၢမ်းလိၵ်ႈပိင်းၺၢပ်ႈတီႉထႃႇဝရႃႉၽြႃးဢၼ် မူဝ်းသေႇ တႅမ်ႈဝႆႉၼၼ်ႉလႄႈ၊-

15ႁီႉလၶီႉ ၼၼ်ႉ မွၵ်ႇလၢတ်ႈလွင်ႈဢၼ်ထူပ်းႁၼ်ၼၼ်ႉ တီႈ သႃႇၽၢၼ်ႇ ၸရေးၸဝ်ႈလႄႈဝႃႈ၊ ၵဝ်ထူပ်းၽိုၼ်ၵျၢမ်းပိင်းၺၢပ်ႈတီႉ ၵႃႈၼႂ်းႁိူၼ်းထႃႇဝရႃႉၽြႃးယဝ်ႉ၊ ဝႃႈၼင်ႇၼႆသေလႄႈ၊ ႁီႉလၶီႉ ၼၼ်ႉ ဢဝ်ၵျၢမ်းလိၵ်ႈၼၼ်ႉ ဢၢပ်ႈပၼ်တီႈ သႃႇၽၢၼ်ႇ လႄႈ၊-

16သႃႇၽၢၼ်ႇ ၼၼ်ႉ ဢဝ်ၵျၢမ်းလိၵ်ႈၼၼ်ႉၵႂႃႇၸူးၵႃႈတီႈၶုၼ်ႁေႃၶမ်းသေလႄႈ ဢဝ်ၵႂၢမ်းၶိုၼ်းလဝ်ႊလၢတ်ႈ တီႈၶုၼ်ႁေႃၶမ်းလႄႈဝႃႈ၊ တၢင်းႁဵတ်းၵႃႈဢၼ် ၸဝ်ႈႁဝ်းသင်ႇလၢတ်ႈတီႈၶႃႈၸဝ်ႈႁဝ်းၶဝ်ၼၼ်ႉၸိုင် ၶႃႈၸဝ်ႈႁဝ်းၶဝ်ဢွၼ်ၵၼ်ႁဵတ်းတီႈၶႃႈဢေႃႈ။-

17ၶဝ်ဢဝ်ငိုၼ်းဢၼ်ထူပ်းႁၼ်ၵႃႈၼႂ်းႁိူၼ်းထႃႇဝရႃႉၽြႃးၼၼ်ႉဢွၵ်ႇသေယဝ်ႉ၊ ဢဝ်ဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်ဢုပ်ႉဢၼ်ၶျုၵ်ႈလႂ် ဢိၵ်ႇတင်းတီႈၶဝ်ၸိူဝ်းဢၼ်သၢင်ႈဢၼ်ႁဵတ်းလႂ်ၼၼ်ႉတီႈၶႃႈယဝ်ႉ၊ ဝႃႈၼင်ႇၼႆဢေႃႈ။-

18ၸရေးလူင် သႃႇၽၢၼ်ႇ သမ်ႉလဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ယိတ်ႈပရေႃးႁဵၵ်ႈ ႁီႉလၶီႉ ၼၼ်ႉ ဢဝ်ၽိုၼ်လိၵ်ႈဢၢပ်ႈပၼ်တီႈၶႃႈၸဝ်ႈတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊ ဢဝ်ၽတ်းႁွတ်ႈၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။-

19ၶုၼ်ႁေႃၶမ်းငိၼ်းၵႂၢမ်းတြႃးၼၼ်ႉသေယဝ်ႉ၊ သိၵ်ႇၶူဝ်းၼုင်ႈမၼ်းလႄႈ၊-

20ၶုၼ်ႁေႃၶမ်းမီးဢမိင်ႉတီႈယိတ်ႈပရေႃးႁဵၵ်ႈ ႁီႉလၶီႉ၊ ဢႁီႉၵမ်ႇ လုၵ်ႈၸၢႆး သႃႇၽၢၼ်ႇ၊ ဢႃႇပတုၼ်ႇ လုၵ်ႈၸၢႆး မိၵ်ႉၶႃႇ၊ သႃႇၽၢၼ်ႇ ၸရေးၸဝ်ႈ၊ ဢသႃႇယႃႉ ၶႃႈၶုၼ်ႁေႃၶမ်းၸိူဝ်းၼၼ်ႉလႄႈဝႃႈ၊-

21သူဢွၼ်ၵၼ်ၵႂႃႇလႄႈ လဝ်ႊထၢမ်တီႈထႃႇဝရႃႉၽြႃး လူၺ်ႈလွင်ႈၵႂၢမ်းၵျၢမ်းလိၵ်ႈ ဢၼ်ထူပ်းႁၼ်မိူဝ်ႈလဵဝ်ၼႆႉၼၼ်ႉပုၼ်ႈၵဝ် ဢိၵ်ႇတင်းပုၼ်ႈၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇ တီႈမိူင်း ဢီႉသရေႇလႃႉ ဢိၵ်ႇတင်းမိူင်း ယူႉတႃႉ တင်းလၢႆၼၼ်ႉသေၵမ်း။ လွင်ႈမၼ်းၸမ်ႉ ၵွပ်ႈပိူဝ်ႈဢၼ်ပူႇႁဝ်းမွၼ်ႇႁဝ်းၸိူဝ်းၼၼ်ႉ ယင်းဢမ်ႇထွမ်ႇဢမ်ႇဢဝ်ဢမိင်ႉထႃႇဝရႃႉၽြႃး ႁႂ်ႈလႆႈၵျၢင်ႉၸွမ်းၵႃႈဢၼ်တႅမ်ႈဝႆႉၵႃႈၼႂ်းၵျၢမ်းလိၵ်ႈၼႆႉလႄႈယူႇၼၼ်ႉလႄႈ တၢင်းၸႂ်မႆႈၶႆႈၸႃႉထႃႇဝရႃႉၽြႃး ဢၼ်တူၵ်းႁွတ်ႈၵႃႈၼိူဝ်ႁဝ်းၼၼ်ႉ ပဵၼ်ဢၼ်ႁႅင်းယႂ်ႇၼႃႇလူင်လၢင်ဢေႃႈ၊ ဝႃႈၼင်ႇၼႆဢေႃႈ။-

22မိူဝ်ႈၼၼ်ႉ ႁီႉလၶီႉ ဢိၵ်ႇတင်းၶဝ်ၸိူဝ်းဢၼ်ၶုၼ်ႁေႃၶမ်းပွႆႇၸႂ်ႉၼၼ်ႉ ဢွၼ်ၵၼ်ၵႂႃႇၸူးၵႃႈတီႈမႄႈယိင်းပရေႃးၽႅတ်ႈ ႁူႉလတႃႉ ၊ မေး သႃႇလုမ်ႇ ဝုၼ်ႇဢၼ်ပႂ်ႉလူပႂ်ႉထိင်းၶူဝ်းၼုင်ႈၸဝ်ႈ ဢၼ်ပဵၼ်လုၵ်ႈၸၢႆး တီႉၵဝႃႉ ဢၼ်ပဵၼ်လုၵ်ႈၸၢႆး ရႃႇႁတ်ႉ လႄႈ ယူႇၵႃႈၼႂ်းဝဵင်း ယေႇရူႉသလႅမ်ႇ ထၢပ်ႈၼွၵ်ႈၼၼ်ႉလႄႈ မွၵ်ႇလၢတ်ႈတီႈမၼ်းၼၼ်ႉဢေႃႈ။-

23မႄႈယိင်းၼၼ်ႉၵေႃႈၶိုၼ်းလၢတ်ႈတီႈၶဝ်လႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ မီးဢမိင်ႉလႄႈဝႃႈၸမ်ႉ၊ သူၶိုၼ်းမိူဝ်းလၢတ်ႈတီႈၵေႃႉဢၼ် ပွႆႇၸႂ်ႉသူမႃးတီႈၵဝ်ၼၼ်ႉလႄႈဝႃႈ၊-

24ၵဝ်တၵ်းႁႂ်ႈၽေးႁွတ်ႈထိုင် ၵႃႈၼိူဝ်တီႈၼႆႈ ဢိၵ်ႇတင်းၵူၼ်းၵႃႈတီႈၼႆႈ ႁႂ်ႈၵႂၢမ်းဢၼ်ၵိၼ်ႇဝႃႈၵႃႈဢၼ်တႅမ်ႈဝႆႉၵႃႈၼႂ်းၵျၢမ်းလိၵ်ႈ ၵႃႈဢၼ်ၶဝ်လႆႈၽတ်း ၵႃႈတီႈၽၢႆႇၼႃႈၶုၼ်ႁေႃၶမ်း ယူႉတႃႉ ယဝ်ႉၼၼ်ႉပျေႉၸုမ်ႇဢေႃႈ။-

25လွင်ႈမၼ်းၸမ်ႉ ၶဝ်ဢွၼ်ၵၼ်ၸုၼ်ႉပႅတ်ႈၵဝ်လႄႈ ဢဝ်ၼၢမ်ႇသႃႇတုတ်ႇၽႆးတီႈၽြႃးတၢင်ႇသူႇတၢင်ႇပႃး ႁႂ်ႈလႆႈဢဝ်လွင်ႈတၢင်းဢၼ်ၶဝ်ႁဵတ်းၸိူဝ်းၼၼ်ႉ တိုၵ်းယူင်းတၢင်းၸႂ်မႆႈၶႆႈၸႃႉၵဝ်ယဝ်ႉ၊ ၵွပ်ႈပိူဝ်ႈၼင်ႇၼၼ်လႄႈ ၽႆးတၢင်းၸႂ်မႆႈၶႆႈၸႃႉၵဝ်ယင်းဢမ်ႇမွတ်ႇလႄႈ တၵ်းလႆႈတူၵ်းႁွတ်ႈၵႃႈၼိူဝ်ၵႃႈတီႈၼႆႈဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆတႃႉ။-

26လႆႈသမ်ႉသူတၵ်းလႆႈၶိုၼ်းလဝ်ႊလၢတ်ႈ တီႈၶုၼ်ႁေႃၶမ်း ယူႉတႃႉ ဢၼ်ပွႆႇၸႂ်ႉသူမႃး ႁႂ်ႈလႆႈလဝ်ႊထၢမ်တီႈထႃႇဝရႃႉၽြႃးၼၼ်ႉလႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ဢဝ်လွင်ႈၵႂၢမ်းၵျၢမ်းလိၵ်ႈဢၼ်ၸဝ်ႈလႆႈငိၼ်းၼၼ်ႉလႄႈ မီးဢမိင်ႉလႄႈဝႃႈၸမ်ႉ၊-

27ၵွပ်ႈပိူဝ်ႈဢၼ်မႂ်းမီးၸႂ်ဢၼ်ဢူၼ်ႈဢွၼ်ႇလႄႈ ၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇၵႃႈတီႈၽၢႆႇၼႃႈၽြႃးပဵၼ်ၸဝ်ႈ ၼႂ်းမိူဝ်ႈဢၼ်မႂ်းငိၼ်းၵႂၢမ်း ဢၼ်ၵဝ်လွၵ်ႇငိုတ်ႈတီႈထႃႇၼႃႉတီႈၼႆႈ ဢိၵ်ႇတင်းတီႈၵူၼ်းၵႃႈတီႈၼႆႈၸိူဝ်းၼၼ်ႉလႄႈ သိၵ်ႇၶူဝ်းၼုင်ႈမႂ်းသေလႄႈႁႆႈႁွင်ႉ ၵႃႈတီႈၽၢႆႇၼႃႈၵဝ်ၼၼ်ႉလႄႈ၊ ၵဝ်ထွမ်ႇဢဝ်ၵႂၢမ်းမႂ်းဢေႃႈ၊ ထႃႇဝရႃႉၽြႃးမီးဢမိင်ႉဢေႃႈ။-

28ၵူၺ်းၵႃႈ ၵဝ်တၵ်းဢဝ်မႂ်းသူင်ႇႁွတ်ႈတီႈဢၼ် ပူႇမႂ်းမွၼ်ႇမႂ်းၸူႉတုမ်ၼၼ်ႉလႄႈ မႂ်းတၵ်းလႆႈၶဝ်ႈၸူးၵႃႈတီႈသၢင်းၶႅင်းၼိမ်ၼိမ်လီလီဢေႃႈ။ တႃမႂ်းတၵ်းလႆႈတူၺ်းလႆႈႁၼ် ၽေးၵႃႈဢၼ်ၵဝ်ႁႂ်ႈႁွတ်ႈထိုင်ၵႃႈၼိူဝ်တီႈၼႆႈ ဢိၵ်ႇတင်းၶဝ်ၸိူဝ်းဢၼ်ယူႇၵႃႈတီႈၼႆႈၼၼ်ႉဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆလႄႈ၊ ၶဝ်ၼၼ်ႉဢွၼ်ၵၼ်ၶိုၼ်းလဝ်ႊလၢတ်ႈတီႈၶုၼ်ႁေႃၶမ်းဢေႃႈ။

29မိူဝ်ႈၼၼ်ႉၶုၼ်ႁေႃၶမ်းပွႆႇၸႂ်ႉလႄႈ ႁႂ်ႈၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမိူင်း ယူႉတႃႉ ၊ တင်းၵူၼ်းဝဵင်း ယေႇရူႉသလႅမ်ႇ တင်းသဵင်ႈတင်းလူင်ၸူႉၵၼ်တုမ်ၵၼ်မႃးလႄႈ၊-

30ၶုၼ်ႁေႃၶမ်းၶိုၼ်ႈၵႃႈၼိူဝ်ႁိူၼ်းထႃႇဝရႃႉၽြႃး ဢိၵ်ႇလူၺ်ႈၵၼ်တင်းၵူၼ်းမိူင်း ယူႉတႃႉ တင်းၵူၼ်းဝဵင်း ယေႇရူႉသလႅမ်ႇ တင်းသဵင်ႈတင်းလူင် ယိတ်ႈပရေႃးႁဵၵ်ႈလႂ်၊ ၵူၼ်းမဵဝ်း လေႇဝီႉ လႂ်၊ ၵူၼ်းတင်းသဵင်ႈတင်းလူင်ၸဵမ်လဵၵ်ႉၸဵမ်ယႂ်ႇၸိူဝ်းၼၼ်ႉလႄႈ ဢဝ်ၵႂၢမ်းၵျၢမ်းလိၵ်ႈပတီႉၺိၺ်ႇတြႃးဢၼ်ထူပ်းႁၼ် ၵႃႈတီႈႁိူၼ်းထႃႇဝရႃႉၽြႃးၼၼ်ႉၵႃႈမီးၽတ်းႁႂ်ႈႁူၶဝ်လႆႈငိၼ်းဢေႃႈ။-

31ၶုၼ်ႁေႃၶမ်းၵေႃႈၸုၵ်းယူႇၵႃႈၼႂ်းတီႈမၼ်းသေလႄႈ ႁဵတ်းတိၵ်ႈထၢၼ်ႇၵႃႈတီႈၽၢႆႇၼႃႈထႃႇဝရႃႉၽြႃး လူၺ်ႈလွင်ႈဢၼ်မၼ်းတၵ်းၸွမ်းလင်ထႃႇဝရႃႉၽြႃးလႄႈ ဢဝ်တင်းႁူဝ်ၸႂ်သဵင်ႈသဵင်ႈ ပႂ်ႉၵမ်ပႂ်ႉၸွမ်းပိင်းၺၢပ်ႈတြႃးမၼ်းၸဝ်ႈ၊ သၢၵ်ႈသေႇမၼ်းၸဝ်ႈ၊ ထုင်းၽိင်ႈတြႃးမၼ်းၸဝ်ႈၸိူဝ်းၼၼ်ႉသေလႄႈ ၵမ်ၵျၢင်ႉၸွမ်းၵႂၢမ်းပတီႉၺိၺ်ႇ ဢၼ်ပႃးၵႃႈၼႂ်းၵျၢမ်းလိၵ်ႈၼႆႉၼၼ်ႉဢေႃႈ။-

32မၼ်းၸီႇယၢင်ႇႁႂ်ႈၶဝ် ၵႃႈဢၼ်လႆႈထူပ်းလႆႈႁၼ်လႄႈ ယူႇၵႃႈၼႂ်းဝဵင်း ယေႇရူႉသလႅမ်ႇ တင်းလိၼ် ပိၼ်ႇယႃႇမိၼ်ႇ ၸိူဝ်းၼၼ်ႉ ႁပ်ႉတုင်းဢဝ်ၵႂၢမ်းၼၼ်ႉဢေႃႈ၊ ၵူၼ်းဝဵင်း ယေႇရူႉသလႅမ်ႇ ၸိူဝ်းၼၼ်ႉၵေႃႈ ဢွၼ်ၵၼ်ၵမ်ၵျၢင်ႉၸွမ်းပတီႉၺိၺ်ႇတြႃးၽြႃးပဵၼ်ၸဝ်ႈဢၼ်ပဵၼ်ၽြႃးပဵၼ်ၸဝ်ႈပူႇၶဝ်မွၼ်ႇၶဝ်ၼၼ်ႉဢေႃႈ။-

33ယူဝ်းသီႉယႃႉ ပႄႇၽဵဝ်ႈလွင်ႈတၢင်းဢၼ်လီႁင်ႈဢဵတ်ႇသဵတ်ႇၵႃႈမီးပႅတ်ႈသေ ၵႃႈၼႂ်းမိူင်းဢၼ် ၵူၼ်းမဵဝ်း ဢီႉသရေႇလႃႉ ပိူင်ႇၵူႈတီႈၵူႈလႅၼ်ၼၼ်ႉလႄႈ ၸီႇယၢင်ႇႁႂ်ႈၶဝ်ၸိူဝ်းဢၼ်ယူႇၵႃႈၼႂ်းမိူင်း ဢီႉသရေႇလႃႉ တင်းလၢႆၼၼ်ႉ ႁဵတ်းဝၢတ်ႈဢၼ်ဝႃႈ ႁဵတ်းဝၢတ်ႈတီႈထႃႇဝရႃႉၽြႃး ၽြႃးပဵၼ်ၸဝ်ႈၶဝ်ၼၼ်ႉသေလႄႈ ၸူဝ်ႈပၢၼ်မၼ်းၼၼ်ႉတဵမ်တဵမ်၊ ၶဝ်ၼၼ်ႉယင်းဢမ်ႇသုတ်ႉၶိုၼ်းယိုတ်းၶိုၼ်းသေၵႃႈတီႈတၢင်းဢၼ်ၸွမ်းလင် ထႃႇဝရႃႉၽြႃး ၽြႃးပဵၼ်ၸဝ်ႈပူႇၶဝ်မွၼ်ႇၶဝ်ၼၼ်ႉလႄႈယူႇဢေႃႈ။

← Chapter 33 Jump to: Chapter 35 →