2 Chronicles 7 — Shan

1မိူဝ်ႈဢၼ် သေႃးလမုၼ်ႇ ႁဵတ်းသူးတွင်းပထၼႃႇယဝ်ႉတူဝ်ႈယဝ်ႉၼၼ်ႉၸိုင်၊ ၽႆးတူၵ်းသေၵႃႈၼိူဝ်ၵၢင်ႁၢဝ်လူင်းမႃးလႄႈ မႆႈယိတ်ႈဢၼ်တုတ်ႇၽႆး ဢိၵ်ႇတင်းမဵဝ်းယိတ်ႈတင်းလၢႆၸိူဝ်းၼၼ်ႉလႄႈ၊ မုၼ်ၽုင်းထႃႇဝရႃႉၽြႃးတဵမ်ဝႆႉၵႃႈၼႂ်းႁိူၼ်းၸဝ်ႈၼၼ်ႉဢေႃႈ။-

2ယိတ်ႈပရေႃးႁဵၵ်ႈတင်းလၢႆဢမ်ႇၶဝ်ႈၵႃႈၼႂ်းႁိူၼ်းထႃႇဝရႃႉၽြႃးၼၼ်ႉလႆႈ ၵွပ်ႈပိူဝ်ႈဢၼ်မုၼ်ၽုင်းထႃႇဝရႃႉၽြႃး တဵမ်ဝႆႉၵႃႈၼႂ်းႁိူၼ်းထႃႇဝရႃႉၽြႃးၼၼ်ႉ။-

3ၵူၼ်းမဵဝ်း ဢီႉသရေႇလႃႉ တင်းလၢႆႁၼ်လွင်ႈဢၼ်ၽႆးတူၵ်းမႃးလႄႈမုၼ်ၽုင်းထႃႇဝရႃႉၽြႃး လူင်းႁွတ်ႈၵႃႈၼိူဝ်ႁိူၼ်းၸဝ်ႈၸိူဝ်ႉၼင်ႇၼၼ်ၼၼ်ႉသေယဝ်ႉ၊ ဢွၼ်ၵၼ်ၶုပ်ႉမူပ်ႇၵုမ်ႈၵွမ်းဝၢင်းႁူဝ် ၵႃႈၼိူဝ်လိၼ် ၵႃႈတီႈဢၼ်ဢဝ်မၢၵ်ႇႁိၼ်သိူဝ်ႇဝႆႉၼၼ်ႉယူႇသေလႄႈ ၵူဝ်းၵႂၢႆႇထႃႇဝရႃႉၽြႃးလႄႈ ယွင်ႈယေႃးထႃႇဝရႃႉၽြႃးလႄႈဝႃႈ၊ မၼ်းၸဝ်ႈမျၢတ်ႈလီတီႈၶႃႈဢေႃႈ။ ၵရူႉၼႃႇၸဝ်ႈတႄႇယူႇတႃႇသေႇမၼ်ႈၶိူင်ႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။

4မိူဝ်ႈၼၼ်ႉၶုၼ်ႁေႃၶမ်းဢိၵ်ႇတင်း ၵူၼ်းတင်းသဵင်ႈတင်းလူင် ဢွၼ်ၵၼ်ႁဵတ်းတၢင်းဢၼ်ပုၵ်ႈၸေႃႇ ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။-

5ၶုၼ်လူင် သေႃးလမုၼ်ႇ ဢဝ်ဝူဝ်းသွင်မိုၼ်ႇပၢႆသွင်ႁဵင်၊ သူဝ်းသႅၼ်ပၢႆသွင်မိုၼ်ႇ ပုၵ်ႈၸေႃႇဢေႃႈ။ ၼင်ႇၼၼ်လႄႈ ၶုၼ်ႁေႃၶမ်းဢိၵ်ႇတင်းၵူၼ်းတင်းသဵင်ႈတင်းလူင် ဢွၼ်ၵၼ်ႁဵတ်းဢၼူႉမေႃးတၼႃႇႁိူၼ်းၽြႃးပဵၼ်ၸဝ်ႈဢေႃႈ။-

6ယိတ်ႈပရေႃးႁဵၵ်ႈတင်းလၢႆ ဢွၼ်ၵၼ်ၸုၵ်းယူႇၸွမ်းလူၺ်ႈတၢင်းဢၼ်ၶဝ်ၵိုတ်ႉႁၢပ်ႇဢမူႉၼၼ်ႉႁင်းၽႂ်ႁင်းမၼ်းဢေႃႈ။ ၵူၼ်းမဵဝ်း လေႇဝီႉ ၸိူဝ်းၼၼ်ႉၵေႃႈ ဢွၼ်ၵၼ်ပႃးဢဝ်မဵဝ်းတူႇရီႉယႃႇထႃႇဝရႃႉၽြႃး ဢၼ်ၶုၼ်လူင် တႃႇဝိတ်ႈ ၸီႇယၢင်ႇႁဵတ်းဝႆႉပုၼ်ႈဢၼ်တၵ်းယွင်ႈယေႃး မုၼ်ထႃႇဝရႃႉၽြႃး ၵွပ်ႈပိူဝ်ႈဢၼ်ၵရူႉၼႃႇမၼ်းၸဝ်ႈ တႄႇယူႇတႃႇသေႇမၼ်ႈၶိူင်ႇၼၼ်ႉလႄႈ ဢဝ်ၶဝ်ႁဵတ်းတၢင်းဢၼ်မၼ်းယွင်ႈယေႃးၼၼ်ႉ ၸိူဝ်းၼၼ်ႉယူႇသေလႄႈၸုၵ်းယူႇဢေႃႈ၊ ယိတ်ႈပရေႃးႁဵၵ်ႈတင်းလၢႆၵေႃႈ ဢွၼ်ၵၼ်ပဝ်ႇၼႄးၶရႃႇၵႃႈတီႈၽၢႆႇၼႃႈၶဝ်လႄႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်ၸုၵ်းယူႇဢေႃႈ။-

7သေႃးလမုၼ်ႇ ႁႂ်ႈထႃႇၼႃႉတီႈတၢင်းၼႂ်းတမ်ႇတိူင်း ဢၼ်မီးၵႃႈတီႈၽၢႆႇၼႃႈႁိူၼ်းထႃႇဝရႃႉၽြႃးၼၼ်ႉမူတ်းၸၢင်ႇလႄႈ ဢဝ်ယိတ်ႈဢၼ်တုတ်ႇၽႆး တင်းၵွၼ်ႈၶႆၵွၼ်ႈမၼ်း ယိတ်ႈမိၵ်ႉသႃႇႁႃယႃႉတင်းလၢႆပုၵ်ႈၸေႃႇၵႃႈတီႈၼၼ်ႈဢေႃႈ။ လွင်ႈမၼ်းၸမ်ႉ ယိတ်ႈပလၢင်ႇတွင်းလိူင်ဢၼ် သေႃးလမုၼ်ႇ ႁဵတ်းဝႆႉယဝ်ႉၼၼ်ႉ ဢမ်ႇပေႃးဢမ်ႇၶၢမ်ႇယိတ်ႈဢၼ်တုတ်ႇၽႆး၊ ၶိူင်ႈပုၵ်ႈၸေႃႇၽေႃးၸဵၼ်ႇ တင်းၵွၼ်ႈၶႆၵွၼ်ႈမၼ်းၸိူဝ်းၼၼ်ႉ။-

8ၼင်ႇၼၼ်လႄႈ မိူဝ်ႈၼၼ်ႉ သေႃးလမုၼ်ႇ ဢိၵ်ႇလူၺ်ႈၵၼ်တင်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ဢၼ်ဝႃႈ ပရဵၵ်ႈသၢတ်ႈဢၼ်ယႂ်ႇၼႃႇၼမ်ၼႃႇလူင်လၢင် ဢၼ်လုၵ်ႉသေၵႃႈတီႈ ၸႃႉၸဵမ်သူပ်းတၢင်းဢၼ်ၶဝ်ႈၸူးၵႃႈတီႈဝဵင်း ႁႃႇမတ်ႉ တေႃႇထိုင်ႁွတ်ႈၼမ်ႉႁွင်ႈ ဢေႇၵိပ်ႉတူႉ ၸိူဝ်းၼၼ်ႉ ဢွၼ်ၵၼ်ၶၢမ်ႇပွႆးၸဵတ်းဝၼ်းတဵမ်တဵမ်ဢေႃႈ။-

9ဝၼ်းဢႃႉထမႃႉၼၼ်ႉ ၶဝ်ဢွၼ်ၵၼ်ႁဵတ်းတၢင်းဢၼ်ၸူႉတုမ်ထမ်ႇမႃႉၵၼ်ဢေႃႈ။ ၶဝ်ဢွၼ်ၵၼ်ႁဵတ်းဢၼူႉမေႃးတၼႃႇ ယိတ်ႈပလၢင်ႇၸဵတ်းဝၼ်းတဵမ်တဵမ် ဢိၵ်ႇတင်းပွႆးၸဵတ်းဝၼ်းတဵမ်တဵမ်ဢေႃႈ။-

10ၼႂ်းလိူၼ်သတ်ႉတမႃႉ သၢဝ်းသၢမ်ဝၼ်းၼၼ်ႉ မၼ်းပွႆႇၵူၼ်းတင်းလၢႆ ဢၼ်ၸူမ်းသိူဝ်းသႂၢင်ႇၸႂ် ၵွပ်ႈပိူဝ်ႈၵျေးၸူးၸဝ်ႈဢၼ်ထႃႇဝရႃႉၽြႃး ႁဵတ်းတီႈ တႃႇဝိတ်ႈ တင်း သေႃးလမုၼ်ႇ ဢိၵ်ႇတင်းၵူၼ်းမၼ်းၸဝ်ႈ ၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉၸိူဝ်းၼၼ်ႉ ၶိုၼ်းမိူဝ်းၵႂႃႇၸူးၵႃႈတီႈမူဝ်းၵႃႇတီႈဢၼ်ၶဝ်ယူႇႁင်းၽႂ်ႁင်းမၼ်းသေဢေႃႈ။

11ၼင်ႇၼၼ်လႄႈ သေႃးလမုၼ်ႇ ႁဵတ်းႁိူၼ်းထႃႇဝရႃႉၽြႃး ဢိၵ်ႇတင်းႁေႃၸဝ်ႈယဝ်ႉတူဝ်ႈလႄႈ၊ တၢင်းၵျၢမ်ႇတၢင်းပွင်ၵႃႈဢၼ် သေႃးလမုၼ်ႇ ၵျၢမ်ႇပွင်တၵ်းသၢင်ႈႁဵတ်း ၵႃႈၼႂ်းႁိူၼ်းထႃႇဝရႃႉၽြႃး ဢိၵ်ႇတင်းႁေႃၸဝ်ႈၸိူဝ်းၼၼ်ႉပဵၼ်မႃးလီလီငၢမ်းငၢမ်းဢေႃႈ။-

12မိူဝ်ႈၼၼ်ႉထႃႇဝရႃႉၽြႃးပေႃႇမႃးတီႈ သေႃးလမုၼ်ႇ ၼႂ်းၶိင်ႇၵၢင်ၶိုၼ်းလႄႈ မီးဢမိင်ႉလႄႈဝႃႈ၊ ၵဝ်ငိၼ်းၵႂၢမ်းဢၼ်မႂ်းသူးတွင်းႁဵတ်းပထၼႃႇၼၼ်ႉယဝ်ႉ။ ၵဝ်လိူၵ်ႈၵဵပ်းဢဝ်ထႃႇၼႃႉတီႈၼႆႉ ႁႂ်ႈပဵၼ်ႁိူၼ်းတီႈဢၼ်ပုၵ်ႈၸေႃႇယိတ်ႈၵဝ်ယဝ်ႉ။-

13မိူဝ်ႈဢၼ်ၵဝ်ႁၼ်ၽႃႉလႅင်ႉလႄႈ ႁႂ်ႈၽူၼ်ဢမ်ႇတူၵ်း၊ ဢမ်ႇၼၼ် မိူဝ်ႈဢၼ်ၵဝ်သင်ႇလၢတ်ႈလႄႈ ႁႂ်ႈမႅင်းၵႅင်းတင်းလၢႆၶူပ်းၵိၼ်မၢၵ်ႇလိၼ်ႁူင်းလိၼ်၊ ဢမ်ႇၼၼ် မိူဝ်ႈဢၼ်ၵဝ်ပွႆႇၸႂ်ႉၵႃႇလႃႉႁႃႈလႅင်မိူင်းမႃးတီႈၵူၼ်းၵဝ်ၼၼ်ႉ၊-

14ပေႃးၵူၼ်းၵဝ်ဢၼ်လႆႈၶၢမ်ႇတၢင်းဢၼ်ဢဝ်ၼႃႇမႃႉၸိုဝ်ႈသဵင်ၵဝ်ႁွင်ႉႁဵၵ်ႈၼၼ်ႉ ၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇလႄႈႁဵတ်းသူးတွင်းပထၼႃႇသေလႄႈ ႁႃဢဝ်ၼႃႈၵဝ်လႄႈ ဝႄႈပႅတ်ႈသဵၼ်ႈတၢင်းဢႃႉထမ်ႇမႃႉၸိုင် ၵဝ်တၵ်းယူႇၵႃႈၼိူဝ်ၽုင်ႇၵၢင်ႁၢဝ်သေလႄႈထွမ်ႇငိၼ်းသေယဝ်ႉ၊ ပွႆႇလွတ်ႈဢပႅတ်ႈၶဝ်လႄႈ ပၼ်မိူင်းၶဝ်မီးဢၼ်သၢၵ်ႈသႃႇၶႅၼ်းမႃးဢေႃႈ။-

15ၵဝ်တၵ်းၽုၺ်ႇတႃမိုၼ်းတႃၵဝ်ၸူးလႄႈ ႁႂ်ႈႁူၵဝ်ငိၼ်းၵႂၢမ်းပထၼႃႇဢၼ်သူးတွင်းၵႃႈတီႈၼႆႈၼၼ်ႉဢေႃႈ။-

16ၵဝ်လိူၵ်ႈၵဵပ်းဢဝ်ႁိူၼ်းၼႆႉလႄႈ ႁႂ်ႈမူတ်းၸၢင်ႇယဝ်ႉပုၼ်ႈဢၼ်ၼႃႇမႃႉၸိုဝ်ႈသဵင်ၵဝ်တၵ်းတႄႇယူႇၵႃႈတီႈၼႆႈသေႇသေႇလႄႈ တႃၵဝ်ဢိၵ်ႇတင်းႁူဝ်ၸႂ်ၵဝ်တၵ်းမီးယူႇၵႃႈတီႈၼႆႈသေႇသေႇဢေႃႈ။

17ပေႃးမႂ်းၵႂႃႇမႃးၵႃႈတီႈၽၢႆႇၼႃႈၵဝ် မိူၼ်ၸိူဝ်ႉၼင်ႇဢၼ် ပေႃႈမႂ်း တႃႇဝိတ်ႈ ၵႂႃႇမႃးၼၼ်ႉ ႁႂ်ႈလႆႈႁဵတ်းၸွမ်းၵႃႈဢၼ်ၵဝ် သင်ႇလၢတ်ႈဝႆႉတီႈမႂ်းလႄႈပႂ်ႉၵမ်ပႂ်ႉၵျၢင်ႉ ထုင်းၽိင်ႈတြႃးၵဝ်၊ လွင်ႈတၢင်းဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉယူႇၸိုင်၊-

18ၸွမ်းၵႃႈၼင်ႇဢၼ်ၵဝ်ႁဵတ်းပတီႉၺိၺ်ႇလူၺ်ႈၵၼ်တင်းပေႃႈမႂ်း တႃႇဝိတ်ႈ ၼၼ်ႉလႄႈဝႃႈ၊ ၸိူဝ်ႉၶိူဝ်းမႂ်းဢၼ်တၵ်းလႆႈဢုပ်ႉပိူင်ႇ မိူင်း ဢီႉသရေႇလႃႉ ဢမ်ႇလႆႈထၢတ်ႇ၊ ဝႃႈၼင်ႇၼႆၼၼ်ႉ၊ ၵဝ်တၵ်းႁႂ်ႈရႃႇၸႃႉပလၢင်ႇသိုင်ႇၸိုင်ႈဝၢၼ်ႈမိူင်းမႂ်းတႄႇယူႇသေႇသေႇဢေႃႈ။-

19ပေႃးဢမ်ႇၼၼ် ပေႃးသူၽိတ်းတၢင်းလႄႈ ၸုၼ်ႉပႅတ်ႈထုင်းၽိင်ႈတြႃးၵဝ် ဢိၵ်ႇတင်းပိင်းၺၢပ်ႈတြႃးၵဝ် ဢၼ်ၵဝ်ဢဝ်ဝႆႉၵႃႈတီႈၽၢႆႇၼႃႈသူၼၼ်ႉလႄႈ ၵႂႃႇႁဵတ်းဝၢတ်ႈၵူဝ်းၵႂၢႆႇတီႈၽြႃးတၢင်ႇသူႇတၢင်ႇပႃးၸိုင်၊-

20ၵဝ်တၵ်းထူၺ်ႈၼုၵ်ႈဢဝ်ၶဝ်ဢိၵ်ႇလူၺ်ႈၵၼ်တင်းႁၢၵ်ႈၶဝ် ဢွၵ်ႇပႅတ်ႈသေၵႃႈၼႂ်းမိူင်းဢၼ်ၵဝ်ပၼ်တီႈၶဝ်ၼႆႉဢေႃႈ။ ႁိူၼ်းၸဝ်ႈဢၼ်ၵဝ်ႁႂ်ႈမူတ်းၸၢင်ႇ ပုၼ်ႈၼႃႇမႃႉၸိုဝ်ႈသဵင်ၵဝ်ၼႆႉၵေႃႈ ၵဝ်တၵ်းပႄႇပႅတ်ႈသေၵႃႈတီႈသိုဝ်ႈၼႃႈတႂ်ႈတႃၵဝ်လႄႈ၊ တၵ်းႁႂ်ႈပဵၼ်တီႈဢၼ်ႁဵတ်းဢပုမ်ႇတႅၵ်ႈ၊ တီႈဢၼ်သႄႉသွမ်းၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းဢေႃႈ။-

21ႁိူၼ်းၸဝ်ႈဢၼ်တၢင်းသုင်မၼ်းပဵၼ်ဢၼ်သုင်လီၼႆႉၸိုင် ၶဝ်ၵႃႈဢၼ်ပႆတၢင်းၸွမ်းတၢင်းၼၼ်ႉတၵ်းဢၢမ်းလႄႈ ၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်ၵၼ်လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ထႃႇဝရႃႉၽြႃးႁဵတ်းတီႈမိူင်းၼႆႉ တင်းႁိူၼ်းၸဝ်ႈၼႆႉၸိူဝ်ႉၼင်ႇၼႆၼင်ႇႁိုဝ်၊ ဝႃႈၼင်ႇၼႆသေယဝ်ႉ၊-

22ပိူၼ်ႈတၵ်းဢွၼ်ၵၼ်ၶိုၼ်းလၢတ်ႈလႄႈဝႃႈ၊ မၼ်းၸဝ်ႈႁႂ်ႈၵႃႈဢၼ်ႁုၵ်းဢၼ်ႁၢႆႉၼႆႉႁွတ်ႈထိုင်ၵႃႈၼိူဝ်ၶဝ် ၵွပ်ႈပိူဝ်ႈဢၼ်ၶဝ်ၸုၼ်ႉပႅတ်ႈထႃႇဝရႃႉၽြႃး ၽြႃးပဵၼ်ၸဝ်ႈ ဢၼ်ၼုၵ်ႈဢဝ်ပူႇမွၼ်ႇၶဝ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉသေလႄႈ ပိုင်ႈဢိင်ၽြႃးတၢင်ႇသူႇတၢင်ႇပႃးယူႇသေလႄႈ ႁဵတ်းဝၢတ်ႈၵူဝ်းၵႂၢႆႇၼၼ်ႉယဝ်ႉ၊ ဝႃႈၼင်ႇၼႆၼၼ်ႉဢေႃႈ၊ ဝႃႈၼင်ႇၼႆဢေႃႈ။