2 Chronicles 29

Shan

← Chapter 28 Jump to: Chapter 30 →

1ႁေႇၸၵီႉ ၼၼ်ႉ မိူဝ်ႈဢၼ်မၼ်းၸႃႉၼင်ႈႁၢင်ႈၼင်ႈႁေႃၼၼ်ႉၸိုင် ဢသၢၵ်ႈမၼ်းလႆႈသၢဝ်းပၢႆႁႃႈပီႊလႄႈ မၼ်းဢုပ်ႉပိူင်ႇၸၢမ်ႇၸႃး ယူႇၵႃႈၼႂ်းဝဵင်း ယေႇရူႉသလႅမ်ႇ သၢဝ်းပၢႆၵဝ်ႈပီႊဢေႃႈ။ ၸိုဝ်ႈသဵင်မႄႈၸဝ်ႈၸမ်ႉ၊ ပဵၼ် ဢၽီႉယႃႉ လုၵ်ႈယိင်း ၸႃႇၶရီႉ ဢေႃႈ။-

2မၼ်းႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃး ၸွမ်းၵႃႈၼင်ႇဢၼ်ၸဝ်ႈပေႃႈမၼ်း တႃႇဝိတ်ႈ ႁဵတ်းၼၼ်ႉဢေႃႈ။

3ၼႂ်းပီႊပထမႃႉ၊ လိူၼ်ပထမႃႉ ဢၼ်မၼ်းၼင်ႈႁၢင်ႈၼင်ႈႁေႃၼၼ်ႉ မၼ်းၽုၺ်ႇပိုတ်ႇၽၵ်းတူႁိူၼ်းထႃႇဝရႃႉၽြႃးသေလႄႈ မႄးၵုမ်းမႄးႁဵတ်းဢေႃႈ။-

4မၼ်းႁွင်ႉဢဝ်ယိတ်ႈပရေႃးႁဵၵ်ႈလႂ် ဢိၵ်ႇတင်းၵူၼ်းမဵဝ်း လေႇဝီႉ လႂ် မႃးလႄႈ ႁႂ်ႈၸူႉၵၼ်တုမ်ၵၼ်ၵႃႈၼႂ်းတလၢင်းၽၢႆႇဝၼ်းဢွၵ်ႇၼၼ်ႉသေလႄႈ၊-

5မီးဢမိင်ႉလႄႈဝႃႈ၊ ၵူၼ်းမဵဝ်း လေႇဝီႉ ၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းတႃႉ။ ဢွၼ်ၵၼ်ႁႂ်ႈတူဝ်ၸဝ်ႈၵဝ်ႇမူတ်းၸၢင်ႇလႄႈ ႁႂ်ႈႁိူၼ်းထႃႇဝရႃႉၽြႃး ၽြႃးပဵၼ်ၸဝ်ႈပူႇသူမွၼ်ႇသူမူတ်းၸၢင်ႇသေလႄႈ ပႄႇၽဵဝ်ႈမုၼ်ႈဢၢင်ႉဢၢၵ်ႇယိူဝ်ႈယုၵ်းပႅတ်ႈသေ ၵႃႈၼႂ်းထႃႇၼႃႉတီႈမူတ်းၸၢင်ႇတႃႉ။-

6ပူႇႁဝ်းပေႃႈႁဝ်းၸိူဝ်းၼၼ်ႉ ဢွၼ်ၵၼ်ၽိတ်းပိူင်ႈလႄႈ ႁဵတ်းတူႉၸရိူၵ်ႈဢပႅတ်ႈသိုဝ်ႈၼႃႈတႂ်ႈတႃထႃႇဝရႃႉၽြႃး ၽြႃးပဵၼ်ၸဝ်ႈႁဝ်းယဝ်ႉ။ ၶဝ်ၼၼ်ႉဢွၼ်ၵၼ်ၸုၼ်ႉပႅတ်ႈမၼ်းၸဝ်ႈလႄႈ ဝၢႆႇၼႃႈပႅတ်ႈသေၵႃႈတီႈ တီႈဢၼ်မၼ်းၸဝ်ႈၵိင်းဝၢပ်ႈယူႇၼၼ်ႉယူႇသေလႄႈ ၵွင်လင်ပၼ်ယဝ်ႉလူင်ပႄႇ။-

7ၶဝ်ၼၼ်ႉဢွၼ်ၵၼ်ဢိုတ်းႁပ်းၽၵ်းတူႁိူၼ်းၼႃႈႁိူၼ်းၸဝ်ႈၸိူဝ်းၼၼ်ႉ ဝႆႉဢဝ်ဝၢၼ်ႇၽႆးတဵၼ်းတင်းလၢႆမွတ်ႇဝႆႉသေလႄႈ ယင်းဢမ်ႇဢဝ်ၼၢမ်ႇသႃႇတုတ်ႇၽႆး၊ ယင်းဢမ်ႇပုၵ်ႈၸေႃႇယိတ်ႈဢၼ်တုတ်ႇၽႆးတီႈ ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈၼၼ်ႉလႄႈယူႇဢေႃႈ။-

8ပိူဝ်ႈဢၼ်ပဵၼ်ၼင်ႇၼႆလႄႈ တၢင်းၸႂ်မႆႈၶႆႈၸႃႉ ထႃႇဝရႃႉၽြႃး ဢွၵ်ႇတီႈမိူင်း ယူႉတႃႉ တင်းဝဵင်း ယေႇရူႉသလႅမ်ႇ လႄႈ မၼ်းၸဝ်ႈဢဝ်ၶဝ်ဢၢပ်ႈပၼ် ႁႂ်ႈပဵၼ်တၢင်းဢၼ်လႆႈၶၢမ်ႇတုၵ်ႉၶႃႉၶၢၼ်ၸႂ်၊ တၢင်းဢၼ်ၵိုတ်းမိူၼ်ႇၵႂင်ၸႂ်၊ တၢင်းဢၼ်ငိၼ်းသဵင်ဢၼ်သႄႉသွမ်းၼၼ်ႉ ၵႃႈၼင်ႇဢၼ်တႃသူလႆႈႁၼ်ၼၼ်ႉယဝ်ႉ။-

9ပိူဝ်ႈဢၼ်ပဵၼ်ၼင်ႇၼႆလႄႈ ပူႇႁဝ်းပေႃႈႁဝ်းၸိူဝ်းၼၼ်ႉ လႆႈလူမ်ႉတၢႆလူၺ်ႈလၢပ်ႇလူၺ်ႈလႅဝ်းယဝ်ႉ၊ လုၵ်ႈၸၢႆးလုၵ်ႈယိင်းႁဝ်းမေးႁဝ်း လႆႈၶၢမ်ႇတၢင်းဢၼ်သိမ်းဢဝ်ၵႂႃႇယဝ်ႉ။-

10မိူဝ်ႈလဵဝ်ၼႆႉၸမ်ႉ၊ လွင်ႈၼင်ႇႁိုဝ်တၢင်းၸႂ်မႆႈၶႆႈၸႃႉၸဝ်ႈ ဢၼ်ႁႅင်းယႂ်ႇၼႃႇၼၼ်ႉ တၵ်းဝႄႈပိူင်ႈသေၵႃႈတီႈႁဝ်းၵႂႃႇၸိုင်၊ ၵဝ်မီးတၢင်းၵျၢမ်ႇတၢင်းပွင်တၵ်းႁဵတ်းပတီႉၺိၺ်ႇလူၺ်ႈၵၼ်တင်းထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ဢေႃႈ။-

11လုၵ်ႈၸၢႆးၵဝ်တင်းလၢႆၶဝ်ဢိူၺ်း၊ ယႃႇပေဢွၼ်ၵၼ်ႁဵတ်းၵွႆႈႁဵတ်းထိူင်း၊ ထႃႇဝရႃႉၽြႃး လိူၵ်ႈၵဵပ်းဢဝ်သူႁႂ်ႈသူလႆႈၸုၵ်းၵႃႈတီႈၽၢႆႇၼႃႈမၼ်းၸဝ်ႈသေလႄႈ ႁဵတ်းဢမူႉတၢင်းဢၼ်ႁဵတ်းဝၢတ်ႈၼၼ်ႉလႄႈ ပဵၼ်ၵေႃႉဢၼ်ပႂ်ႉဢမူႉၸဝ်ႈလႄႈ ဢဝ်ၼၢမ်ႇသႃႇတုတ်ႇၽႆးယဝ်ႉ၊ ဝႃႈၼင်ႇၼႆသေယဝ်ႉ၊-

12ၵူၼ်းမဵဝ်း လေႇဝီႉ ဢၼ်ဝႃႈ မႃႇႁတ်ႉ လုၵ်ႈၸၢႆး ဢႃႇမသေး တင်း ယူဝ်းဢေးလႃႉ လုၵ်ႈၸၢႆး ဢႃႇၸရီႉ ၼႂ်းၸိူဝ်ႉၶိူဝ်း ၵေႃႇႁတ်ႉ၊ ၵီႉသႃႉ လုၵ်ႈၸၢႆး ဢႃႇပတီႉ တင်း ဢႃႇၸရီႉ လုၵ်ႈၸၢႆး ယေႇႁႃႉလေးလႃႉ ၼႂ်းၸိူဝ်ႉၶိူဝ်း မေႇရႃႇရီႉ၊ ယေႃႇဢႃႇ လုၵ်ႈၸၢႆး ၸိမ်းမႃႉ တင်း ဢေႇတိၼ်ႇ လုၵ်ႈၸၢႆး ယေႃႇဢႃႇ ၼႂ်းၸိူဝ်ႉၶိူဝ်း ၵေႇရသုၼ်ႇ ၊-

13သီႉမရီႉ တင်း ယေႇယေႇလႃႉ ၼႂ်းၵူၼ်းမဵဝ်း ဢေးလီႉၸပၢၼ်ႇ၊ ၸႃႇၶရီႉ တင်း မတ်ႉတၼီႉ ၼႂ်းၵူၼ်းမဵဝ်း ဢႃႇသပ်ႉ ၊-

14ယေႇႁေႇလႃႉ တင်း သီႉမီႉ ၼႂ်းၵူၼ်းမဵဝ်း ႁေႇမၼ်ႇ၊ သေႇမႃႇယႃႉ တင်း ဢေႃးၸေးလႃႉ ၼႂ်းၵူၼ်းမဵဝ်း ယေႇတူႉသုၼ်ႇ ၼၼ်ႉ ၸိူဝ်းၼၼ်ႉဢွၼ်ၵၼ်လုၵ်ႉလႄႈ၊-

15ႁွင်ႉဢဝ်ပီႈၶဝ်ၼွင်ႉၶဝ်သေလႄႈ ႁႂ်ႈတူဝ်ၸဝ်ႈၵဝ်ႇမူတ်းၸၢင်ႇသေယဝ်ႉ၊ ၶဝ်ႈၵႂႃႇႁႂ်ႈလႆႈႁႂ်ႈႁိူၼ်းထႃႇဝရႃႉၽြႃး လႆႈမူတ်းလီၵဵင်ႈလီၸွမ်းၵႃႈၼင်ႇဢၼ် ၶုၼ်ႁေႃၶမ်းဢဝ်ဢမိင်ႉ ထႃႇဝရႃႉၽြႃးမီးဢမိင်ႉၸီႇယၢင်ႇဝႆႉၼၼ်ႉဢေႃႈ။-

16ယိတ်ႈပရေႃးႁဵၵ်ႈၸိူဝ်းၼၼ်ႉ ဢွၼ်ၵၼ်ၶဝ်ႈၵႃႈၼႂ်းလုၵ်းတၢင်းၼႂ်းႁိူၼ်းထႃႇဝရႃႉၽြႃး ႁႂ်ႈမူတ်းလီၵဵင်ႈလီလႄႈ ဢဝ်မုၼ်ႈဢၢင်ႉဢၢၵ်ႇယိူဝ်ႈယႃႈယိူဝ်ႈယုၵ်း ၵႃႈဢၼ်ထူပ်းၵႃႈၼႂ်းပိၵ်ႈမၢၼ်ႇထႃႇဝရႃႉၽြႃးၼၼ်ႉဢွၵ်ႇၸူး ၵႃႈတီႈတမ်ႇတိူင်းႁိူၼ်းထႃႇဝရႃႉၽြႃးသေယဝ်ႉ၊ ၵူၼ်းမဵဝ်း လေႇဝီႉ ၸိူဝ်းၼၼ်ႉ ဢွၼ်ၵၼ်ဢဝ်ဢွၵ်ႇၵႂႃႇၵႃႈၼွၵ်ႈ တီႈၼမ်ႉႁွင်ႈ ၵီႉတြုၼ်ႇ ဢေႃႈ။-

17ၼႂ်းလိူၼ်ပထမႃႉ၊ ဝၼ်းပထမႃႉၼၼ်ႉ ၶဝ်ဢွၼ်ၵၼ်ၸႃႉႁဵတ်းတၢင်းဢၼ်ႁႂ်ႈမူတ်းၸၢင်ႇလႄႈ ၼႂ်းဝၼ်းဢၼ်ထူၼ်ႈထိုင်ပႅတ်ႇဝၼ်းၼၼ်ႉ ထိုင်ႁွတ်ႈၵႃႈတီႈႁိူၼ်းၼႃႈႁိူၼ်းထႃႇဝရႃႉၽြႃးဢေႃႈ။ လိုၼ်းၼၼ်ႉပႅတ်ႇဝၼ်းတဵမ်တဵမ် ဢွၼ်ၵၼ်ႁႂ်ႈႁိူၼ်းၽြႃးပဵၼ်ၸဝ်ႈမူတ်းၸၢင်ႇလႄႈ ၼႂ်းလိူၼ်ပထမႃႉသိပ်းႁူၵ်းဝၼ်းၼၼ်ႉယဝ်ႉတူဝ်ႈလီငၢမ်းဢေႃႈ။-

18မိူဝ်ႈၼၼ်ႉ ၶဝ်ဢွၼ်ၵၼ်ၶဝ်ႈၸူးၵႃႈတီႈၶုၼ်လူင် ႁေႇၸၵီႉ လႄႈ လဝ်ႊလႄႈဝႃႈ၊ ၶႃႈၸဝ်ႈႁဝ်းၶဝ်ဢွၼ်ၵၼ်ႁႂ်ႈႁိူၼ်းထႃႇဝရႃႉၽြႃးတင်းသဵင်ႈတင်းလူင်၊ ယိတ်ႈပလၢင်ႇတီႈဢၼ်ဢဝ်ယိတ်ႈဢၼ်တုတ်ႇၽႆးတင်းၶိူင်ႈပိူင်မၼ်းၵႃႈမီး၊ ၶူင်ႇတီႈၵိၼ်ဢၼ်ဢဝ်ၶဝ်ႈမုၼ်းၽၢႆႇၼႃႈၸဝ်ႈတၢင်ႇဝႆႉ တင်းၶိူင်ႈပိူင်မၼ်းၵႃႈမီးၼၼ်ႉ မူတ်းလီၵဵင်ႈလီယဝ်ႉတီႈၶႃႈယဝ်ႉ။-

19ၼွၵ်ႈသေၼႆႉ ၶိူင်ႈပိူင်ၵႃႈဢၼ် ၶုၼ်လူင် ဢႃႇၶတ်ႉ ႁဵတ်းဢႃႉထမ်ႇမႃႉၼႂ်းၸူဝ်ႈပၢၼ်မၼ်းလႄႈ ပႅတ်ႈဝႆႉၼႂ်းမိူဝ်ႈဢၼ်မၼ်းၽိတ်းပိူင်ႈၼၼ်ႉၸိူဝ်းၼၼ်ႉၵေႃႈ ၶႃႈၸဝ်ႈႁဝ်းၶဝ်ၶိုၼ်းႁဵတ်းၶိုၼ်းမႄးလႄႈ ႁႂ်ႈမူတ်းၸၢင်ႇယဝ်ႉတီႈၶႃႈဢေႃႈ။ တူၺ်းတီႈၶႃႈလူး၊ မီးယူႇၵႃႈတီႈၽၢႆႇၼႃႈ ယိတ်ႈပလၢင်ႇထႃႇဝရႃႉၽြႃးၼၼ်ႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။

20မိူဝ်ႈၼၼ်ႉၶုၼ်လူင် ႁေႇၸၵီႉ လုၵ်ႉၸဝ်ႉၸဝ်ႉသေလႄႈ ႁႂ်ႈၵူၼ်းဝဵင်းတင်းလၢႆ ၸူႉၵၼ်တုမ်ၵၼ်လႄႈ ၶိုၼ်ႈၸူးၵႃႈတီႈႁိူၼ်းထႃႇဝရႃႉၽြႃးဢေႃႈ။-

21ၶဝ်ဢွၼ်ၵၼ်ဢဝ်ဝူဝ်းၸဵတ်းတူဝ်၊ သူဝ်းပေႃႈၸဵတ်းတူဝ်၊ သူဝ်းဢွၼ်ႇၸဵတ်းတူဝ်၊ ပႄႉပေႃႈၸဵတ်းတူဝ်၊ ပုၼ်ႈဢၼ်တၵ်းပုၵ်ႈၸေႃႇ ယိတ်ႈၽေႇဢပႅတ်ႈႁေႃၸဝ်ႈ၊ ဢပႅတ်ႈထႃႇၼႃႉတီႈမူတ်းၸၢင်ႇၸဝ်ႈ၊ ဢပႅတ်ႈမိူင်း ယူႉတႃႉ ၸိူဝ်းၼၼ်ႉမႃးဢေႃႈ။ မၼ်းမီးဢမိင်ႉႁႂ်ႈယိတ်ႈပရေႃးႁဵၵ်ႈ ၵူၼ်းမဵဝ်း ဢႃႇရုၼ်ႇ တင်းလၢႆ ဢဝ်ၸိူဝ်းၼၼ်ႉပုၵ်ႈၸေႃႇၵႃႈၼိူဝ်ယိတ်ႈပလၢင်ႇထႃႇဝရႃႉၽြႃးၼၼ်ႉလႄႈ၊-

22ၶဝ်ၼၼ်ႉဢွၼ်ၵၼ်ဢဝ်ဝူဝ်းတၢႆ ၸွမ်းၵႃႈၼင်ႇဢၼ်မီးဢမိင်ႉၼၼ်ႉလႄႈ ယိတ်ႈပရေႃးႁဵၵ်ႈၸိူဝ်းၼၼ်ႉ ၶၢမ်ႇဢဝ်လိူတ်ႈမၼ်းသေလႄႈ ဢဝ်ၽႅတ်းသႂ်ႇၵႃႈၼိူဝ်ယိတ်ႈပလၢင်ႇဢေႃႈ။ သူဝ်းပေႃႈၸိူဝ်းၼၼ်ႉၵေႃႈ၊ ၶဝ်ၼၼ်ႉဢွၼ်ၵၼ်ဢဝ်တၢႆလႄႈ ဢဝ်လိူတ်ႈမၼ်းၽႅတ်းသႂ်ႇၵႃႈၼိူဝ်ယိတ်ႈပလၢင်ႇဢေႃႈ။ သူဝ်းဢွၼ်ႇၸိူဝ်းၼၼ်ႉၵေႃႈ ၶဝ်ဢွၼ်ၵၼ်ဢဝ်တၢႆလႄႈ ဢဝ်လိူတ်ႈမၼ်းၽႅတ်းသႂ်ႇ ၵႃႈၼိူဝ်ယိတ်ႈပလၢင်ႇဢေႃႈ။-

23ပႄႉပေႃႈပုၼ်ႈဢၼ်တၵ်းပုၵ်ႈၸေႃႇယိတ်ႈၽေႇဢပႅတ်ႈၸိူဝ်းၼၼ်ႉၵေႃႈ၊ ၶဝ်ၼၼ်ႉဢွၼ်ၵၼ်ဢဝ်ဢွၵ်ႇၵႃႈတီႈၽၢႆႇၼႃႈၶုၼ်ႁေႃၶမ်း တင်းပရဵၵ်ႈသၢတ်ႈတင်းလၢႆလႄႈ ၶဝ်ဢဝ်မိုဝ်းတူဝ်ၸဝ်ႈၵဝ်ႇတၢင်ႇသေယဝ်ႉ၊-

24ယိတ်ႈပရေႃးႁဵၵ်ႈၸိူဝ်းၼၼ်ႉဢွၼ်ၵၼ်ဢဝ်တၢႆလႄႈ ႁဵတ်းမင်ႇၵလႃႇတၢင်းဢၼ်ဢဝ်လိူတ်ႈၽေႇဢပႅတ်ႈၵႃႈၼိူဝ်ယိတ်ႈပလၢင်ႇ ႁႂ်ႈလႆႈၽေႇဢပႅတ်ႈ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ဢေႃႈ။ ၼင်ႇၼၼ်လႄႈ ၶုၼ်ႁေႃၶမ်းမီးဢမိင်ႉႁႂ်ႈပုၵ်ႈၸေႃႇယိတ်ႈဢၼ်တုတ်ႇၽႆး တင်းယိတ်ႈဢၼ်ၽေႇဢပႅတ်ႈ ပုၼ်ႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ဢေႃႈ။-

25မၼ်းၶၢၼ်းၵူၼ်းမဵဝ်း လေႇဝီႉ ဢၼ်ပႃးဢဝ်တင်းသႅင်ႇလႂ်၊ တိင်ႇလႂ်၊ တရေႃးလႂ်ၸိူဝ်းၼၼ်ႉ ဝႆႉၵႃႈၼႂ်းႁိူၼ်းထႃႇဝရႃႉၽြႃး ၸွမ်းၵႃႈၼင်ႇဢၼ် ၶုၼ်လူင် တႃႇဝိတ်ႈ ဢိၵ်ႇတင်း ၵၢတ်ႉ ၵေႃႉဢၼ်ႁူပွင်ႇတႃလႅင်း တီႈၶုၼ်ႁေႃၶမ်း တင်းပရေႃးၽႅတ်ႈ ၼႃႇသၼ်ႇ ၸိူဝ်းၼၼ်ႉ ၸီႇယၢင်ႇဝႆႉၼၼ်ႉဢေႃႈ။ ၼင်ႇၼၼ်လႄႈဢမိင်ႉၸဝ်ႈၼၼ်ႉ ပဵၼ်မႃးတီႈထႃႇဝရႃႉၽြႃးၵႃႈၼႂ်းသူပ်းပရေႃးၽႅတ်ႈတင်းလၢႆၼၼ်ႉဢေႃႈ။-

26ပိူဝ်ႈဢၼ်ပဵၼ်ၼင်ႇၼႆလႄႈ ၵူၼ်းမဵဝ်း လေႇဝီႉ ၸိူဝ်းၼၼ်ႉ ဢွၼ်ၵၼ်ယိပ်းၵမ်မဵဝ်းတူႇရီႉယႃႇ ဢၼ်ၶုၼ် တႃႇဝိတ်ႈ ၸီႇယၢင်ႇဝႆႉၼၼ်ႉယူႇ၊ ယိတ်ႈပရေႃးႁဵၵ်ႈၸိူဝ်းၼၼ်ႉ ဢွၼ်ၵၼ်ယိပ်းၵမ်ၼႄးၶရႃႇတင်းလၢႆယူႇသေလႄႈ ၸုၵ်းယူႇဢေႃႈ။-

27ႁေႇၸၵီႉ မီးဢမိင်ႉႁႂ်ႈဢဝ်ယိတ်ႈဢၼ်တုတ်ႇၽႆး ပုၵ်ႈၸေႃႇၵႃႈၼိူဝ်ယိတ်ႈပလၢင်ႇလႄႈ မိူဝ်ႈဢၼ်ၸႃႉႁဵတ်းတၢင်းဢၼ် ပုၵ်ႈၸေႃႇယိတ်ႈဢၼ်တုတ်ႇၽႆးၼၼ်ႉၸိုင် ၶဝ်ၼၼ်ႉဢွၼ်ၵၼ်ၸႃႉႁဵတ်းၵႂၢမ်းတီႈထႃႇဝရႃႉၽြႃး ဢိၵ်ႇတင်းတၢင်းဢၼ်ပဝ်ႇႁႆႇၼႄးၶရႃႇ တင်းမဵဝ်းတူႇရီႉယႃႇ ဢၼ် တႃႇဝိတ်ႈ ၶုၼ်ႁေႃၶမ်း ဢီႉသရေႇလႃႉ ၸီႇယၢင်ႇဝႆႉၸိူဝ်းၼၼ်ႉဢေႃႈ။-

28ပရဵၵ်ႈသၢတ်ႈတင်းသဵင်ႈတင်းလူင် ဢွၼ်ၵၼ်ၵူဝ်းၵႂၢႆႇယူႇ၊ ၶဝ်ၸိူဝ်းဢၼ်ႁဵတ်းၵႂၢမ်းၵေႃႈႁဵတ်းၵႂၢမ်းယူႇ၊ ၶဝ်ၸိူဝ်းဢၼ်ပဝ်ႇတိုင်ႈၼႄးၶရႃႇၵေႃႈ၊ ပဝ်ႇတိုင်ႈယူႇ တေႃႇထိုင်ႁွတ်ႈတၢင်းဢၼ်ပုၵ်ႈၸေႃႇယိတ်ႈဢၼ်တုတ်ႇၽႆးၼၼ်ႉ ထၼ်ႈပေႃးယဝ်ႉပေႃးတူဝ်ႈဢေႃႈ။-

29ဢဝ်ပုၵ်ႈၸေႃႇယဝ်ႉတူဝ်ႈသေယဝ်ႉ၊ ၶုၼ်ႁေႃၶမ်း ဢိၵ်ႇတင်းၶဝ်ၵႃႈဢၼ်မီးၵႃႈတီႈၼၼ်ႈလူၺ်ႈၵၼ်တင်းမၼ်းၸိူဝ်းၼၼ်ႉ ဢွၼ်ၵၼ်ၶုပ်ႉမူပ်ႇဝၢင်းႁူဝ်လႄႈၵူဝ်းၵႂၢႆႇဢေႃႈ။-

30လႆႈသမ်ႉ ၶုၼ်လူင် ႁေႇၸၵီႉ ဢိၵ်ႇတင်းၶုၼ်ၸိူဝ်းၼၼ်ႉၸီႇယၢင်ႇ ႁႂ်ႈၵူၼ်းမဵဝ်း လေႇဝီႉ ၸိူဝ်းၼၼ်ႉ ဢွၼ်ၵၼ်ဢဝ်ၵႂၢမ်း တႃႇဝိတ်ႈ တင်းၵႂၢမ်း ဢႃႇသပ်ႉ ၵေႃႉဢၼ်ႁူပွင်ႇတႃလႅင်းၼၼ်ႉ ႁဵတ်းၵႂၢမ်းထေႃးပၼႃႇတီႈထႃႇဝရႃႉၽြႃးဢေႃႈ။ ၶဝ်ၼၼ်ႉဢွၼ်ၵၼ်မီးတၢင်းၸႂ်ဢၼ်သႂၢင်ႇသိူဝ်းႁဵတ်းၵႂၢမ်း ထေႃးပၼႃႇယူႇသေလႄႈ ၵူမ်ႈၵွမ်းဝၢင်းႁူဝ်လႄႈ ၵူဝ်းၵႂၢႆႇဢေႃႈ။-

31လိုၼ်းၼၼ်ႉ ႁေႇၸၵီႉ သမ်ႉမီးဢမိင်ႉထႅင်ႈလႄႈဝႃႈ သူၼႆႉဢွၼ်ၵၼ်ဢဝ်တူဝ်ၸဝ်ႈၵဝ်ႇ ပုၵ်ႈၸေႃႇတီႈထႃႇဝရႃႉၽြႃးမိူဝ်ႈလဵဝ်ၼႆႉယဝ်ႉ။ ဢွၼ်ၵၼ်သုတ်ႉၸပ်းသုတ်ႉၸူးလႄႈ ဢဝ်မဵဝ်းယိတ်ႈလႂ် ဢိၵ်ႇတင်းၶိူင်ႈပုၵ်ႈၸေႃႇတီႈဢၼ်ႁပ်ႉတုင်းဢဝ်ၵျေးၸူးၸဝ်ႈလႂ် မႃးၵႃႈၼႂ်းႁိူၼ်းထႃႇဝရႃႉၽြႃးတႃႉ၊ ဝႃႈၼင်ႇၼႆလႄႈ ပရဵၵ်ႈသၢတ်ႈၸိူဝ်းၼၼ်ႉ ဢွၼ်ၵၼ်ဢဝ်မဵဝ်းယိတ်ႈလႂ် ဢိၵ်ႇတင်းၶိူင်ႈပုၵ်ႈၸေႃႇ တီႈဢၼ်ႁပ်ႉတုင်းဢဝ်ၵျေးၸူးၸဝ်ႈလႂ်မႃးဢေႃႈ။ ၶဝ်ၵႃႈဢၼ်မီးၸႂ်ၸေႇတၼႃႇၸိူဝ်းၼၼ်ႉ ဢဝ်ယိတ်ႈဢၼ်တုတ်ႇၽႆးမႃးႁင်းၽႂ်ႁင်းမၼ်းဢေႃႈ။-

32ယိတ်ႈဢၼ်တုတ်ႇၽႆး ဢၼ်ပရဵၵ်ႈသၢတ်ႈၸိူဝ်းၼၼ်ႉ ဢဝ်မႃးၼၼ်ႉပွင်းၵၼ်မီးဝူဝ်းၸဵတ်းသိပ်း၊ သူဝ်းပေႃႈပၢၵ်ႇၼိုင်ႈ၊ သူဝ်းဢွၼ်ႇသွင်ပၢၵ်ႇဢေႃႈ။ ၸိူဝ်းၼၼ်ႉပဵၼ်ပုၼ်ႈဢၼ်တၵ်းပုၵ်ႈၸေႃႇယိတ်ႈဢၼ်တုတ်ႇၽႆးတီႈထႃႇဝရႃႉၽြႃးဢေႃႈ။-

33ဢုၵ်ႉၸႃႇဢၼ်ပုၵ်ႈၸေႃႇၼၼ်ႉၸမ်ႉ၊ မီးဝူဝ်းႁႃႈပၢၵ်ႇ ဢိၵ်ႇတင်းသူဝ်းသၢမ်ႁဵင်ဢေႃႈ။-

34ၵွပ်ႈပိူဝ်ႈဢၼ်ယိတ်ႈပရေႃးႁဵၵ်ႈၸိူဝ်းၼၼ်ႉၵေႇလႄႈ ဢမ်ႇလွၵ်ႈဢဝ်ၼင်တူဝ်ယိတ်ႈဢၼ်တုတ်ႇၽႆးၸိူဝ်းၼၼ်ႉလႆႈလႄႈ ပီႈၼွင်ႉၶဝ်ၵူၼ်းမဵဝ်း လေႇဝီႉ တင်းလၢႆ ဢွၼ်ၵၼ်ၸွႆႈထႅမ်တေႃႇထိုင်ႁွတ်ႈဢမူႉၼၼ်ႉ ထၼ်ႈပေႃးယဝ်ႉတူဝ်ႈဢိၵ်ႇတင်း တေႃႇထိုင်ႁွတ်ႈယိတ်ႈပရေႃးႁဵၵ်ႈတၢင်ႇၵေႃႉတၢင်ႇၵူၼ်းၸိူဝ်းၼၼ်ႉ ႁႂ်ႈတူဝ်ၸဝ်ႈၵဝ်ႇလႆႈမူတ်းၸၢင်ႇယဝ်ႉၼၼ်ႉဢေႃႈ။ ၵူၼ်းမဵဝ်း လေႇဝီႉ ၸိူဝ်းၼၼ်ႉ ယဵင်ႈၶႅၼ်းဢွၼ်ၵၼ်မီးၸႂ်သၽေႃး ဢၼ်သိုဝ်ႈလီယူဝ်းလီ ႁႂ်ႈတူဝ်ၸဝ်ႈၵဝ်ႇလႆႈမူတ်းၸၢင်ႇ လိူဝ်တွၼ်းၼႃႇသေယိတ်ႈပရေႃးႁဵၵ်ႈၸိူဝ်းၼၼ်ႉဢေႃႈ။-

35ယိတ်ႈဢၼ်တုတ်ႇၽႆး ဢိၵ်ႇတင်းၵွၼ်ႈၶႆၵွၼ်ႈမၼ်း ယိတ်ႈမိၵ်ႉသႃႇႁႃယႃႉၶိူင်ႈပုၵ်ႈၸေႃႇဢၼ်သွၼ်းလေႃႇ ဢၼ်ၸၢပ်ႈသႅင်ႇၵၼ်တင်း ယိတ်ႈဢၼ်တုတ်ႇၽႆးႁင်းၽႂ်ႁင်းမၼ်းၸိူဝ်းၼၼ်ႉ မီးဝႆႉၼမ်ၼႃႇဢေႃႈ။ ၼင်ႇၼၼ်လႄႈ ၶဝ်ဢွၼ်ၵၼ်ၸီႇယၢင်ႇ တၢင်းဢၼ်ႁဵတ်းဝၢတ်ႈ ၵႃႈတီႈႁိူၼ်းထႃႇဝရႃႉၽြႃးၼၼ်ႉဝႆႉဢေႃႈ။-

36ႁေႇၸၵီႉ ဢိၵ်ႇတင်းၵူၼ်းတင်းသဵင်ႈတင်းလူင် ဢွၼ်ၵၼ်ၸူမ်းသိူဝ်းၵွပ်ႈပိူဝ်ႈလွင်ႈတၢင်းဢၼ်ၽြႃးပဵၼ်ၸဝ်ႈ လႆႈႁဵတ်းပွင်မႄးပုၼ်ႈၵူၼ်းတင်းလၢႆၼၼ်ႉဢေႃႈ။ လွင်ႈမၼ်းၸမ်ႉ ဢမူႉၼၼ်ႉပဵၼ်တၢင်းဢၼ် ၶဝ်ၶုၵ်းၶီႈၶုၵ်းၶၵ်းႁဵတ်းဢေႃႈ။

← Chapter 28 Jump to: Chapter 30 →