2 Chronicles 26

Shan

← Chapter 25 Jump to: Chapter 27 →

1ၵူၼ်းဝၢၼ်ႈၵူၼ်းမိူင်း ယူႉတႃႉ တင်းသဵင်ႈတင်းလူင် ဢွၼ်ၵၼ်ဢဝ် ဢူဝ်းၸီႉယႃႉ ဢၼ်ဢသၢၵ်ႈလႆႈသိပ်းပၢႆႁူၵ်းပီႊၼၼ်ႉ ႁဵတ်းၶုၼ်ႁေႃၶမ်းတၢင်တူဝ် ဢႃႇမၸီႉ ၸဝ်ႈပေႃႈမၼ်းၼၼ်ႉဢေႃႈ။-

2မၼ်းၼၼ်ႉတႄႇႁဵတ်းဝဵင်း ဢေႇလုတ်ႉ လႄႈ သမ်ႉဢဝ်သႂၢင်းၶဝ်ႈၵႃႈၼႂ်းမိူင်း ယူႉတႃႉ လိုၼ်းသေၸဝ်ႈပေႃႈမၼ်းၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆယဝ်ႉၼၼ်ႉဢေႃႈ။-

3ဢူဝ်းၸီႉယႃႉ ၼၼ်ႉ မိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင် ဢသၢၵ်ႈမၼ်းလႆႈသိပ်းပၢႆႁူၵ်းပီႊလႄႈ မၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရူႉသလႅမ်ႇ ႁႃႈသိပ်းပၢႆသွင်ပီႊဢေႃႈ။ ၸိုဝ်ႈသဵင်မႄႈၸဝ်ႈၸမ်ႉ၊ ပဵၼ် ယေႇၶေႃးလီႉ မႄႈယိင်းဝဵင်း ယေႇရူႉသလႅမ်ႇ ဢေႃႈ။-

4မၼ်းႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးၸွမ်းၵႃႈၼင်ႇဢၼ် ၸဝ်ႈပေႃႈမၼ်း ဢႃႇမၸီႉ ႁဵတ်းၼၼ်ႉဢေႃႈ။-

5ၼႂ်းၸူဝ်ႈပၢၼ် ၸႃႇၶရီႉ ဢၼ်ႁူႉပျႃႇတိၵ်ႈရူႇပႃႇရူင်ႇၽြႃးပဵၼ်ၸဝ်ႈၼၼ်ႉ၊ မၼ်းသွၼ်ႈပိုင်ႈၽြႃးပဵၼ်ၸဝ်ႈဢေႃႈ။ ၼႂ်းၸူဝ်ႈပၢၼ်ဢၼ်မၼ်းသွၼ်ႈပိုင်ႈထႃႇဝရႃႉၽြႃးယူႇၼၼ်ႉတဵမ်တဵမ် ၽြႃးပဵၼ်ၸဝ်ႈႁႂ်ႈတၢင်းၵျၢမ်ႇတၢင်းပွင်မၼ်းပဵၼ်လႆႈဢေႃႈ။-

6မၼ်းၶီႇသိုၵ်းဢွၵ်ႇလႄႈတိုၵ်းတေႃးၵူၼ်း ၽီႉလိတ်ႉတီႉ တင်းလၢႆသေလႄႈၵိူၼ်ႇယႃႉပႅတ်ႈလမ်းဝဵင်း ၵႃႇသႃႉ ၊ လမ်းဝဵင်း ယႃႇပၼေႉ ၊ လမ်းဝဵင်း ဢႃႇၸုတ်ႉ ပႅတ်ႈသေယဝ်ႉ၊ တႄႇႁဵတ်းဝဵင်းမႂ်ႇၵူၺ်းၵူၺ်းၵႃႈၼႂ်းလိၼ် ဢႃႇၸုတ်ႉ မိူင်း ၽီႉလိတ်ႉတီႉ ၼၼ်ႉဢေႃႈ။-

7ၽြႃးပဵၼ်ၸဝ်ႈၸွႆႈထႅမ်မႃႉၸႃႉမၼ်း ယူႇၽၢႆႇၼိုင်ႈတင်းၵူၼ်း ၽီႉလိတ်ႉတီႉ ၊ ၵူၼ်း ဢရေႇပျႃႉ ဢၼ်ယူႇၵႃႈတီႈဝဵင်း ၵူႉရႃႉပႃႇလႃႉ တင်းၵူၼ်း မႁူႉၼိမ်ႇ ၸိူဝ်းၼၼ်ႉဢေႃႈ။-

8ၵူၼ်းမဵဝ်း ဢမ်ႇမုၼ်ႇ တင်းလၢႆၵေႃႈ ဢွၼ်ၵၼ်သၢၵ်ႈလၢၵ်ႈသွင်ႇပၼ်ႇၼႃႇတီႈ ဢူဝ်းၸီႉယႃႉ ဢေႃႈ။ မၼ်းႁႂ်ႈတူဝ်ၸဝ်ႈၵဝ်ႇမၼ်ႈၶိူင်ႇၼႃႇလူင်လၢင်သေယဝ်ႉ၊ သတၢင်းသဵင်ၶၢဝ်ႇၸိုဝ်ႈသဵင်မၼ်းႁူင်ႁၢင်းတူဝ်ႈၸွတ်ႇၵႂႃႇတေႃႇထိုင်ႁွတ်ႈတီႈဢၼ်ၶဝ်ႈမိူင်း ဢေႇၵိပ်ႉတူႉ ၼၼ်ႉဢေႃႈ။-

9ဢူဝ်းၸီႉယႃႉ တႄႇႁဵတ်းတိူၵ်ႈတီႈတိုၵ်းသိုၵ်းၵႃႈတီႈၽၵ်းတူၸဵင်ႇဝဵင်း၊ ၽၵ်းတူၶူင်ႈႁူၺ်ႈ၊ ၽၵ်းတူလမ်းဝဵင်း တီႈဢၼ်ၵူတ်ႉၸိူဝ်းၼၼ်ႉၵႃႈတီႈဝဵင်း ယေႇရူႉသလႅမ်ႇ လႄႈ ႁႂ်ႈမၼ်ႈၶိူင်ႇဢေႃႈ။-

10ၵႃႈၼႂ်းထိူၼ်ႇၵေႃႈ မၼ်းတႄႇႁဵတ်းတိူၵ်ႈတီႈတိုၵ်းသိုၵ်းတင်းလၢႆလႄႈ ၶုတ်းၼမ်ႉမေႃႇဝႆႉၼမ်ၼႃႇဢေႃႈ။ လွင်ႈမၼ်းၸမ်ႉ မၼ်းမီးသူဝ်းဝူဝ်းၼမ်ၼႃႇ ၵႃႈတႂ်ႈတီႈဢၼ်ပၢင်ႇဢၼ်ပဵင်းဢိၵ်ႇတင်းၵႃႈၼိူဝ်ႁၢၼ်ႉလွႆၵႄႈလွႆၼၼ်ႉဢေႃႈ။ မၼ်းမီးၵူၼ်းဢၼ်ႁဵတ်းႁႆႊႁဵတ်းၼႃး ဢိၵ်ႇတင်းၵူၼ်းဢၼ်လုမ်းလႃးသူၼ်ဢူးယဵၼ်ႇၸပိတ်ႈၼမ်ၼႃႇ ၵႃႈၼိူဝ်လွႆလႂ်၊ ၵႃႈတီႈဢၼ်လိၼ်လီလႂ်လႄႈ၊ မၼ်းမီးဝႃႇသၼႃႇလွင်ႈတၢင်းၸိူဝ်းၼၼ်ႉဢေႃႈ။

11တီႈ ဢူဝ်းၸီႉယႃႉ ၼၼ်ႉ မီးပူဝ်ႇပႃႇႁူဝ်ႁၢၼ်ၵူၼ်းသိုၵ်း ဢၼ်ပဵၼ်မုၵ်ႉပဵၼ်ၸိူဝ်းႁင်းၽႂ်ႁင်းမၼ်းၼမ်ၼႃႇ ၸွမ်းၵႃႈၼင်ႇဢၼ် ႁႃႇၼၼီႉ ၶုၼ်ပူဝ်ႇၶုၼ်ႁေႃၶမ်း ဢဝ် ယေႇယေႇလႃႉ ၸရေးတပ်ႉတင်း မႃႇသေႇယႃႉ ၵေႃႉဢၼ်ဢုပ်ႉတပ်ႉၸိူဝ်းၼၼ်ႉဢဝ်ၸရၢင်းဝႆႉၼၼ်ႉဢေႃႈ။-

12ၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ် ၼႂ်းပီႈၼွင်ႉၸိူဝ်ႉၶိူဝ်းပေႃႈၶဝ် ဢၼ်ပဵၼ်ႁူဝ်ႁၢၼ်ၵူၼ်းသိုၵ်း ဢၼ်ႁႅင်းယႂ်ႇၸိူဝ်းၼၼ်ႉၸမ်ႉ၊ မီးသွင်ႁဵင်ပၢႆႁူၵ်းပၢၵ်ႇဢေႃႈ။-

13တႂ်ႈၶဝ်ၼၼ်ႉမီးႁူဝ်ႁၢၼ်ၵူၼ်းသိုၵ်း ဢၼ်မီးႁႅင်းဢၼ်ယႂ်ႇလႄႈ တိုၵ်းသိုၵ်းႁႂ်ႈလႆႈၵမ်ႉထွၵ်ႈၶုၼ်ႁေႃၶမ်းယူႇၽၢႆႇၼိုင်ႈ တင်းရၢၼ်ႇသူႇမၼ်းၸိူဝ်းၼၼ်ႉ သၢမ်သႅၼ်ပၢႆၸဵတ်းႁဵင်ႁႃႈပၢၵ်ႇဢေႃႈ။-

14ဢူဝ်းၸီႉယႃႉ ၼၼ်ႉ ပွင်ႁဵတ်းပွင်ႁႅၼ်းၶိူင်ႈႁႄႉလၢၵ်ႈၼၢၵ်ႈလႂ်၊ ႁွၵ်ႇလႂ်၊ ၵုပ်းလဵၵ်းလႂ်၊ သိူဝ်ႈၶႅပ်းလဵၵ်းလႂ်၊ ၵၢင်ႇလႂ်၊ ၵူင်ၵွၼ်တီႈဢၼ်တၵ်းပိုတ်းမၢၵ်ႇႁိၼ်လႂ် ပုၼ်ႈပူဝ်ႇပႃႇၵႃႈမီးၼၼ်ႉဢေႃႈ။-

15ၸၢၵ်ႈယၢၼ်းတရႃး ဢၼ်ၶဝ်ၸိူဝ်းဢၼ်လၵ်းလႅမ်ၼၼ်ႉ ဢဝ်ၺၢၼ်ႇႁႃဢဝ်လႄႈႁဵတ်းၸိူဝ်းၼၼ်ႉၵေႃႈ မၼ်းပွင်ႁဵတ်းပွင်ႁႅၼ်းၵႃႈၼႂ်းဝဵင်း ယေႇရူႉသလႅမ်ႇ ပုၼ်ႈဢၼ်တၵ်းဝႆႉၵႃႈၼိူဝ်တိူၵ်ႈတီႈတိုၵ်းသိုၵ်း ဢိၵ်ႇတင်းလၢင်းၸီးတင်းလၢႆ ႁႂ်ႈလႆႈပိုတ်းပိုၼ်ထိမ်ႈမၢၵ်ႇႁိၼ်လူင်ဢေႃႈ။ ၼင်ႇၼၼ်လႄႈ ပိူဝ်ႈဢၼ်မၼ်းလႆႈၶၢမ်ႇတၢင်းဢၼ် ၸွႆႈထႅမ်မႃႉၸႃႉၼႃႇလူင်လၢင်ထၼ်ႈပေႃး ႁႂ်ႈတၼ်းၶူဝ်းယႂ်ႇၼႃႇၼၼ်ႉလႄႈ သတၢင်းသဵင်ၶၢဝ်ႇၼႃႇမႃႉၸိုဝ်ႈသဵင်မၼ်းၼၼ်ႉ ႁူင်ႁၢင်းၸွတ်ႇတူဝ်ႈၵႂႃႇဢေႃႈ။

16မိူဝ်ႈဢၼ်တၼ်းၶူဝ်းမၼ်းယႂ်ႇၼၼ်ႉၸိုင် မၼ်းမီးၸႂ်ဢၼ်ပူၵ်းပႅၼ်လုၵ်ႉၶိုၼ်ႈ ႁႂ်ႈတူဝ်ၸဝ်ႈၵဝ်ႇလူႉလႅဝ်ၼၼ်ႉသေလႄႈ ၽိတ်းပိူင်ႈထႃႇဝရႃႉၽြႃး ၽြႃးပဵၼ်ၸဝ်ႈမၼ်းလႄႈ ၶဝ်ႈၵႂႃႇၵႃႈၼႂ်းပိၵ်ႈမၢၼ်ႇထႃႇဝရႃႉၽြႃး ႁႂ်ႈလႆႈဢဝ်ၼၢမ်ႇသႃႇတုတ်ႇၽႆးၵႃႈၼိူဝ်ယိတ်ႈပလၢင်ႇ တီႈဢၼ်တုတ်ႇၽႆးၼၢမ်ႇသႃႇၼၼ်ႉဢေႃႈ။-

17ယိတ်ႈပရေႃးႁဵၵ်ႈ ဢႃႇၸရီႉ ဢိၵ်ႇလူၺ်ႈၵၼ်တင်းယိတ်ႈပရေႃးႁဵၵ်ႈပႅတ်ႇသိပ်း ဢၼ်ၵိုတ်ႉႁၢပ်ႇဢမူႉထႃႇဝရႃႉၽြႃး ဢၼ်မီးတၢင်းဢၼ်ႁတ်းႁၢၼ်ၸိူဝ်းၼၼ်ႉ ၸွမ်းလင်ၶုၼ်ႁေႃၶမ်း ဢူဝ်းၸီႉယႃႉ ၶဝ်ႈၵႂႃႇလႄႈ၊-

18ႁၢမ်ႈတၢပ်ႈႁႄႉၶႅၼ်မၼ်းလႄႈဝႃႈ၊ ၸဝ်ႈၶုၼ်လူင် ဢူဝ်းၸီႉယႃႉ ဢိူၺ်း၊ ၸဝ်ႈႁဝ်းၼႆႉဢမ်ႇၸၢပ်ႈသႅင်ႇၵၼ်တင်းဢမူႉတၢင်းဢၼ်ဢဝ်ၼၢမ်ႇသႃႇတုတ်ႇၽႆးတီႈထႃႇဝရႃႉၽြႃးၼႆႉတီႈၶႃႈ။ ယိတ်ႈပရေႃးႁဵၵ်ႈလုၵ်ႈလၢၼ် ဢႃႇရုၼ်ႇ ဢၼ်လႆႈၶၢမ်ႇတၢင်းဢၼ်ၶၢၼ်းဝႆႉ ႁႂ်ႈလႆႈဢဝ်ၼၢမ်ႇသႃႇတုတ်ႇၽႆးၸိူဝ်းၼၼ်ႉၵူၺ်း ၸၢပ်ႈသႅင်ႇၵၼ်တင်းဢမူႉတီႈၶႃႈဢေႃႈ။ ဢွၵ်ႇသေၵႃႈၼႂ်းထႃႇၼႃႉ တီႈမူတ်းၸၢင်ႇၸဝ်ႈၵႂႃႇသေၵမ်း။ ၸဝ်ႈႁဝ်းၽိတ်းပိူင်ႈတီႈၶႃႈယဝ်ႉ။ သရေႇၸဝ်ႈႁဝ်းတၵ်းလူႉ ၵႃႈတီႈၽၢႆႇၼႃႈထႃႇဝရႃႉၽြႃး ၽြႃးပဵၼ်ၸဝ်ႈတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

19ဢူဝ်းၸီႉယႃႉ ၼၼ်ႉ တေႃးသႃႉတၢင်းၸႂ်မႆႈဢွၵ်ႇလႄႈ ယိပ်းၵမ်လၢင်ႇပၢၼ်းႁႂ်ႈလႆႈဢဝ်ၼၢမ်ႇသႃႇတုတ်ႇၽႆးယူႇသေလႄႈ၊ ၼႂ်းမိူဝ်ႈဢၼ်မၼ်းယင်းတိုၵ်ႉၸႂ်မႆႈၶႆႈၸႃႉတီႈ ယိတ်ႈပရေႃးႁဵၵ်ႈၸိူဝ်းၼၼ်ႉယူႇၼၼ်ႉၸိုင် တုတ်ႈပေႃႇဢွၵ်ႇမႃးၵႃႈတီႈၼႃႈၽၢၵ်ႇမၼ်း ၵႃႈတီႈၽၢႆႇၼႃႈယိတ်ႈပရေႃးႁဵၵ်ႈၸိူဝ်းၼၼ်ႉ ၵႃႈၼႂ်းႁိူၼ်းထႃႇဝရႃႉၽြႃး ၵႃႈတီႈႁိမ်းယိတ်ႈပလၢင်ႇ တီႈဢၼ်ဢဝ်ၼၢမ်ႇသႃႇတုတ်ႇၽႆးၼၼ်ႉၵမ်းလဵဝ်ဢေႃႈ။-

20ၶုၼ်ယိတ်ႈပရေႃးႁဵၵ်ႈ ဢႃႇၸရီႉ ဢိၵ်ႇတင်းယိတ်ႈပရေႃးႁဵၵ်ႈၵႃႈမီးၸိူဝ်းၼၼ်ႉလူတူၺ်းလႄႈ ႁၼ်တုတ်ႈၸပ်းၵႃႈတီႈၼႃႈၽၢၵ်ႇမၼ်းၼၼ်ႉသေယဝ်ႉ၊ ဢွၼ်ၵၼ်ဢီးမၼ်းဢွၵ်ႇၵႂႃႇၵႃႈတီႈၼွၵ်ႈသေဢေႃႈ။ တူဝ်မၼ်းၵေႃႈ၊ ဢွၵ်ႇၶၼ်ၶၼ်ၽႂ်းၽႂ်း ၵွပ်ႈပိူဝ်ႈဢၼ်ထႃႇဝရႃႉၽြႃးပၼ်တၢမ်ႇတီႈမၼ်းၼၼ်ႉဢေႃႈ။-

21ၼင်ႇၼၼ်လႄႈ ၶုၼ်လူင် ဢူဝ်းၸီႉယႃႉ ၼၼ်ႉ ပဵၼ်တုတ်ႈတေႃႇထိုင်ႁွတ်ႈမၼ်းထၼ်ႈပေႃးတၢႆလႄႈ လႆႈယူႇၵႃႈတီႁေႃလင်ၼိုင်ႈၶေႃၶေႃၵူၺ်းမၼ်းဢေႃႈ။ မၼ်းဢမ်ႇလႆႈဢၶႂၢင်ႉဢၼ်လႆႈၶဝ်ႈၵႃႈၼႂ်းႁိူၼ်းထႃႇဝရႃႉၽြႃး။ ယူဝ်းထမ်ႇ လုၵ်ႈၸၢႆးၸဝ်ႈၼၼ်ႉလႆႈဢုပ်ႉၵႃႈၼိူဝ်ႁေႃၸဝ်ႈလႄႈ ၸီႇယၢင်ႇဢမူႉတီႈၵူၼ်းဝၢၼ်ႈၵူၼ်းမိူင်းတင်းလၢႆဢေႃႈ။

22လွင်ႈတၢင်း ဢူဝ်းၸီႉယႃႉ ဢၼ်ယင်းၵိုတ်းယင်းၵျၢၼ်ႇ ဢဝ်ၸဵမ်ငဝ်ႈတေႃႇပၢႆၸိူဝ်းၼၼ်ႉၸိုင်၊ ပရေႃးၽႅတ်ႈ ဢီႉသႃႇယႃႉ လုၵ်ႈၸၢႆး ဢႃႇမုတ်ႉ ၼၼ်ႉတႅမ်ႈဝႆႉမီးယူႇဢေႃႈ။-

23ဢူဝ်းၸီႉယႃႉ ၼၼ်ႉ ၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ၊ ၶဝ်ဢွၼ်ၵၼ်ဢဝ်သၢင်းၵျူဝ်ႇလူၺ်ႈၵၼ်တင်းပူႇမွၼ်ႇမၼ်းၸိူဝ်းၼၼ်ႉ ၵႃႈၼႂ်းၵႂၢၵ်ႈလိၼ်ဢၼ်ၸၢပ်ႈသႅင်ႇၵၼ်တင်းသၢင်းၶႅင်းၶုၼ်ႁေႃၶမ်းၸိူဝ်းၼၼ်ႉၵူၺ်း ၵွပ်ႈပိူဝ်ႈဢၼ်မၼ်းပဵၼ်ၵူၼ်းတုတ်ႈၼၼ်ႉဢေႃႈ။ ယူဝ်းထမ်ႇ လုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။

← Chapter 25 Jump to: Chapter 27 →