Acts 11

Tswana (BAEBELE e e Boitshepo) 1992

← Chapter 10 Jump to: Chapter 12 →

1Jaana baaposetole le bakaulengwe ba ba mo Jutea, ba utlwa fa Baditšhaba le bone ba amogetse lefoko la Modimo.

2Mme e rile Petere a sena go tlhatlogela kwa Jerusalema, ba e leng ba bogwera ba ganela nae, ba re:

3“O ile wa tsena mo banneng ba ba sa rupang, wa ja nabo.”

4Mme Petere a simolola a ba phuthololela tiro e ka thulaganyo:

5A re: “Ke ne ke le mo motseng wa Jopa ke rapela; mme ya re ke le mo tsitegong ya pelo ka bona ponatshegelo; setsholo sengwe sa fologa e kete letsela le legolo, le lepeleditswe mo legodimong ka dinaka tsoo nne; la tla fela fa go nna.

6Le re rileng ke sena go le tsepega matlho, ka akanya, ka bona ditshedi tse di maoto mane tsa lefatshe, le ditshedi tsa naga, le tse di gagabang, le dinonyane tsa loapi.

7Le gone ka utlwa lentswe le nthaya le re: ‘Tsoga Petere; tlhaba o je.’

8Ka re: ‘A go se nne jalo, Morena; gonne ga go ise go ke go tsene sepe se e leng selo fela, le se se sa itshekang mo ganong la me gope.’

9Mme lentswe la mphetola lwa bobedi le tswa legodimong, la re: ‘Se Modimo o se ntlafaditseng, o se ka wa se kaya selo fela.’

10Golo mo, ga dirwa gararo; mme gotlhe ga ba ga gogelwa kwa legodimong.

11Bonang, ka bonako ga ema banna ba le bararo fa pele ga ntlo e re mo go yone, ba romilwe kwa go nna ba tswa kwa Kaesarea.

12Mowa wa nthaya wa re, ke ye nabo, ke sa tlhaole ope. Le bakaulengwe ba barataro ba, ba mpata, mme ra ya ra tsena mo ntlong ya monna yo.

13Mme a re bolelela ka fa o bonyeng moengele a eme mo ntlong ya gagwe ka teng, a mo raya a re: ‘Roma kwa Jopa, o ye go lere Simone, yo o bidiwang Petere;

14yo o tlaa buang nao mafoko a o tlaa bolokwang ka one, wena le botlhe ba ntlo ya gago.’

15E rile ke simolola go bua fela, Mowa o o Boitshepo wa ba wela fela jaaka rona mo tshimologong.

16Mme ka gakologelwa lefoko la Morena, jaaka a rile: ‘Le gale Johane o kolobeditse ka metsi; mme lona lo tlaa kolobediwa ka Mowa o o Boitshepo.’

17Ke gone e re fa Modimo o ba neile neo e e etsang e o e re neileng le rona, jale ka re dumela mo go Morena Jesu Keresete, ka bo ke le mang, fa nka ganela le Modimo?”

18Ya re ba utlwa dilo tse, ba didimala fela, mme ba baka Modimo, ba re: “Jalo Baditšhaba le bone Modimo o ba neile boikwatlhao jwa go bona botshelo.”

19Ba ba faladitsweng jale ka pitlagano e e tsogileng ka ga Setefane, ba ya ba fitlha kwa Fenikia, kwa Kupero, le kwa Antioke, ba sa bue le ope lefoko fa e se Bajuta ba le bosi fela.

20Mme ga bo go le bangwe ba bone, e le banna ba Kupero le Kurene, ba e rileng ba tsile mo Antioke, ba bua le Bagerika le bone, ba ba rerela Morena Jesu.

21Mme seatla sa Morena sa nna nabo, mme batho ba le bantsi thata ba ba dumetseng ba sokologela mo Moreneng.

22Tumedi ya bone ya fitlha ya utlwala mo phuthegong e e kwa Jerusalema, mme ba ntsha Barenabase ba mo roma kwa Antioke,

23yo e rileng a fitlha, mme a bona tshegofatso ya Modimo, a itumela; mme a ba gakolola botlhe, gore ba ngaparele Morena ka tlhomamo ya pelo;

24gonne e ne e le monna yo o molemo, a tletse Mowa o o Boitshepo le tumelo. Mme batho ba le bantsi ba oketsegela Morena.

25Mme a tswelela kwa Tareso, a ya go batla Saule;

26ya re a sena go mmona, a tla nae mo Antioke. Ga dirala gore ga feta ngwaga o o tletseng ba ntse ba phuthegile le phuthego; mme ba ruta batho ba le bantsi; le gone barutwa ba simologile ba bidiwa Bakeresete lwa ntlha mo Antioke.

27Ya re mo metlheng eo ga tswa baperofeti kwa Jerusalema ba tla mo Antioke.

28Ga ema mongwe wa bone, go twe Agabuse, mme a kaya ka Mowa fa go tlaa nna leuba le legolo mo lefatsheng lotlhe; le le bileng la dirafala mo motlheng wa ga Kelaudio.

29Barutwa, mongwe le mongwe ka fa nonofong ya gagwe, ba ikaelela gore go isiwe thuso kwa bakaulengweng ba ba agileng kwa Jutea;

30mo ba bileng ba go dira, ba e isa kwa bagolwaneng ka diatla tsa ga Barenabase le Saule.

← Chapter 10 Jump to: Chapter 12 →