Acts 18

Tswana (BAEBELE e e Boitshepo) 1992

← Chapter 17 Jump to: Chapter 19 →

1Morago ga dilo tse Paulo a tswa mo Athene, a ya a fitlha kwa Korinthe.

2A fitlhela Mojuta mongwe, yo go tweng Akwila, e le motho wa kwa Ponto ka fa losikeng, yo e leng gone o tswang kwa Itale, a na le Perisila mosadi wa gagwe, ka gobo Kelaudio a ne a laotse gore Bajuta botlhe ba tswe mo Roma; mme Paulo a ya kwa go bone;

3ya re ka a le tiro nngwe fela nabo, a nna nabo, mme ba dira, gonne e ne e le badiri ba megope ya dikhai.

4Ka Sabata mongwe le mongwe, a fetolana le batho mo ntlong ya thuto, a leka go kgona Bajuta le Bagerika.

5E rile Silase le Timotheo ba tswa kwa Maketonia, Paulo a patelelwa ke lefoko, a supetsa Bajuta fa Jesu e le ene Keresete.

6Mme ya re ba ikganetsa, ba kgala, a ikudubatsa kobo, a ba raya a re: “A madi a lona a nne mo ditlhogong tsa lona! Nna ke tlhapile, jaanong ke tloga ke ya kwa go Baditšhaba.”

7A tswa teng, a ya mo ntlong ya monna mongwe go twe Tito Juseto, e le motho yo o obamelang Modimo, yo ntlo ya gagwe e tshwaraganyeng le ntlo ya thuto.

8Mme Kerisepo, molaodi wa ntlo ya thuto, a dumela mo Moreneng, le botlhe ba ntlo ya gagwe; le Bakorinthe ba le bantsi, ya re ba utlwa, ba dumela, mme ba kolobediwa.

9Morena a bua le Paulo bosigo ka ponatshegelo a re: “O se ka wa boifa, bua fela, o se ka wa didimala;

10gonne ke na nao, ga go ope yo o tlaa go tlhaselang go go utlwisa botlhoko; gonne ke na le batho ba le bantsi mo motseng o.”

11A nna teng ngwaga le dikgwedi di le thataro, a ba ruta lefoko la Modimo.

12E rile Galio a le molaodisiwa wa Akaia, Bajuta ba tsogologela Paulo gongwe, ba mo isa kwa sennong sa tshekelo,

13ba re: “Monna yo, o khukhela batho gore ba obamele Modimo ka fa mokgweng o o tlhabanang le molao.”

14Mme ya re Paulo a itlhoma gore o a bua, Galio a raya Bajuta a re: “Bajuta ke lona, le gale fa e ka bo e le sengwe sa molato, le fa e le sa bolotsana, ke ne ke ka fitlhela ke tshwanetse go iphapaanya le lona;

15mme fa e le dikgang tsa mafoko le maina le molao o e leng wa lona ka losi, a go iponele lona koo; nna ga ke na go nna moatlhodi wa dilo tseo.”

16Mme a ba leleka mo tshekelong.

17Botlhe ba tshwara Sosethenese, molaodi wa ntlo ya thuto, ba mmeletsa fa pele ga senno sa tshekelo. Mme Galio a se ka a re sepe ka dilo tse.

18Paulo, o rile a sena go tlhola malatsi a le mantsi morago ga dilo tse, a sadisa bakaulengwe sentle, a tswa teng ka sekepe, a ya kwa Siria, a na le Perisila le Akwila; a bile a ipeotse tlhogo mo Kenkerea; gonne o ne a na le ikano.

19Ba fitlha kwa Efeso, mme a ba tlogela teng; ene a tsena mo ntlong ya thuto, a nna a fetolana le Bajuta.

20Ya re ba mo lopa gore a name a sa ntse nabo, a se ka a dumela;

21mme ya re a sena go ba sadisa sentle, a tswa mo Efeso ka sekepe, a ba reile a re: “Fa e le go rata ga Modimo, ke tlaa ba ke boela kwano go lona.”

22O rile kwa Kaesarea a tswa mo sekepeng a tlhatloga a ya go dumedisa phuthego, mme a itse go fologela kwa Antioke.

23E rile a sena go fetisa lobaka teng, a tloga a tsamaya, a ya a ralala lefatshe la Galatia le la Ferugia ka thulaganyo, a kgothatsa barutwa botlhe.

24Jaana Mojuta mongwe a tla mo Efeso, yo go tweng Apolose, e le Moalekesanteria ka fa botsalong, e le motho yo o seleta mo puong; a bile a nonofile mo dikwalong.

25Monna yo, o kile a nna a rutwa mo tseleng ya Morena; mme ka a ne a le motho yo o mowa o tlhoafetseng, a bua a ba a ruta batho dilo tse e leng ka ga Jesu ka kelelelo, a itse kolobetso ya ga Johane e le yosi fela.

26A simolola go bua ka pelokgale mo ntlong ya thuto. Ya re Perisila le Akwila ba mo utlwa, ba mo itseela kwa ga bone, ba mo phuthololela tsela ya Modimo ka kelelelo bogolo.

27O rile a na le keletso ya go tlolaganyetsa kwa Akaia, bakaulengwe ba mo nametsa pelo, ba ba ba kwalela barutwa, gore ba mo tshole sentle; ya re a fitlha a thusa thata ba ba dumetseng ka tshegofatso;

28gonne a ganetsa Bajuta, a ba sita thata, e bile e le mo ponatshegong, a supa ka dikwalo fa Jesu e le ene Keresete.

← Chapter 17 Jump to: Chapter 19 →