Acts 24

Tswana (BAEBELE e e Boitshepo) 1992

← Chapter 23 Jump to: Chapter 25 →

1E rile malatsi a le matlhano a sena go feta, Ananiase moperesiti yo mogolo a tla, a na le bagolwane bangwe, a bile a na le mmueledi mongwe, yo go tweng Teretulo; mme ba bolelela molaodi ka ga Paulo.

2Ya re a sena go bidiwa, Teretulo a simolola go mmaya molato, a re: “E re ka re bona kagiso e kgolo ka wena kgosi, le dilo tse di bosula di tlosediwa morafe ono ka tlamelo ya gago,

3re a go amogela ka mekgwa yotlhe le mo mafelong otlhe ka tebogo e kgolo, Felekise Motlotlegi yo mogolo.

4Mme gore ke se ka ka tlhola ke go lapisa, ka re, ke a go rapela gore o utlwe mafokonyana mangwe a rona, ka bopelonomi jwa gago.

5Gonne re fitlhetse monna yo e le letshwenyo, le serukhutlhi mo Bajuteng botlhe mo lefatsheng lotlhe, e bile e le tlhogo ya lekoko la Banasaretha;

6yo o bileng a leka go itshepolola tempele; yo re bileng ra mo tshwara; (mme ra rata re ka bo re mo sekisitse ka fa molaong wa rona.

7Mme mong wa mephato, e bong Lusiase a tla, a mo phamola ka thata mo diatleng tsa rona.

8A laola balatofatsi ba gagwe gore ba tle fa pele ga gago;) yo e tlaa reng fa o mo lotolotsa ka wesi, o bo o tlaa tlhaloganya dilo tse tsotlhe tse re mmayang molato ka ga tsone.”

9Bajuta le bone ba dumalana nae mo mafokong ao, ba tlhomamisa gore dilo tseo di ntse jalo.

10E rile molaodi a sena go mo gwetlha gore a bue, Paulo a fetola a re: “E re ka ke itse fa o ntse o le moatlhodi wa morafe o ka dinyaga di le dintsi, ke a ikarabela ka boitumelo.

11Ka kgosi e ka tlhaloganya ka ga lobaka lo ke simolotseng go ya go obama kwa Jerusalema ka lone, fa letsatsi la gompieno e le la 12 fela.

12Ga ba ise ba bo ba fitlhele ke ganela le ope mo tempeleng, le fa e le go tlhotlheletsa batho mo matlong a dithuto, le fa e le mo motseng.

13Ga ba ka ke ba go tlhomamisetsa dilo tse ba mpayang molato ka ga tsone gompieno.

14Se, ke a se go ipolela, gore, Modimo wa borraetsho, ke o direla ka fa Tseleng e bone ba e bitsang lekoko, ke ntse ke dumela dilo tsotlhe tse di ka fa molaong, le tse di kwadilweng mo baperofeting.

15Ke na le tsholofelo mo Modimong, e le bone ba e lebeletseng, ya gore go tlaa nna tsogo ya basiami le ya basiamolodi.

16Ke bile ke a itlwaetsa, gore ke tle ke nne le pelo e e se nang sekgopi mo Modimong le mo bathong, ka metlha yotlhe.

17“Jaana e rile dinyaga di sena go feta di le dintsi, ka tla ke tsholetse morafe wa gaetsho dikatso le dineo.

18Ya re mo gare ga dilo tse, ba mphitlhela mo tempeleng ke iitshekisitse, ke se mo bontsing, ke bile ke sa tsose modumo, mme ga bo go le Bajuta bangwe ba ba tswang kwa Asia teng,

19ba ba neng ba tshwanetse ya bo ne ne ba le fa pele ga gago fa, gore ba supe molato, fa ba na le sengwe se ba nnyatsang ka sone.

20Le fa e le banna ba, a ba bolele tshiamololo e ba e bonyeng jale, jaaka ke ne ke eme fa pele ga lekgotla,

21fa e se lentswe le le lengwe fela, le ke le buetseng godimo ke eme mo go bone, ka re: ‘Ke sekisiwa fa pele ga lona gompieno ka ga go tsoga ba baswi.’ ”

22Mme Felekise ka a na le kitso e e tletseng, bogolo ka ga Tsela, a ba beisa pelo, a re: “E tlaa re fa Lusiase mong wa mephato a tsile, ke tlaa atlhola kgang ya lona.”

23Mme a laola molaodi wa mophato gore a disiwe, le gore a direlwe ka pelonomi; le gore a se ka a itsa ditsala tsa gagwe go tla go mo direla.

24E rile malatsi mangwe a sena go feta, Felekise a tla a na le Durusila mogatse, yo e leng mosadi wa Sejuta, mme a bitsa Paulo, a mo utlwa ka ga tumelo mo go Keresete Jesu.

25Ya re a ntse a mo ranolela ka ga tshiamo, le boikgapo, le tsheko e e tlang, Felekise a boifa thata, mme a mo fetola a re: “Gompieno o ka tsamaya, mme ke tlaa re fa ke bonye lobaka lo lo siameng ke go bitse.”

26Le gone a solofetse gore o tlaa newa madi ke Paulo; mme a nna a mmitsa gantsi ka ntlha ya gone moo, mme a bua nae.

27E rile dinyaga di le pedi di sena go feta, Porekio Feseto a tsena mo boemong jwa ga Felekise; mme e re ka a ne a rata go kgatlha Bajuta, Felekise a tlogela Paulo a golegilwe.

← Chapter 23 Jump to: Chapter 25 →