Acts 27

Tswana (BAEBELE e e Boitshepo) 1992

← Chapter 26 Jump to: Chapter 28 →

1E rile go sena go laolwa fa re tlaa ya kwa Itale ka sekepe, ba tsenya Paulo le bagolegwi bangwe ba sele mo seatleng sa mongwe go twe Julio, e le molaodi wa mophato o go tweng wa ga Aguseto.

2Ra tsena mo sekepeng sengwe sa Ateramutiume, se se tlaa tlogang se leba kwa metseng ya Asia e e ikamileng lewatle; ra ineela mo lewatleng, re na le Arisetareko, e le Momaketonia wa Thesalonika.

3Ya re ka moso ra tsena kwa Sitone; mme Julio a direla Paulo ka pelonomi, a mo lesa a ya kwa ditsaleng tsa gagwe, gore di mmabalele.

4E rile re tloga teng, ra tsamaya re ikamile Kupero, ka ntlha ya gobo diphefo di tlhabaganye le rona.

5E rile re sena go ralala lewatle le le lebaganyeng le Kilikia le Pamfilia, ra fitlha kwa Mira, motse wa Lukia.

6Foo molaodi wa mophato a fitlhela sekepe sa Alekesantere se se yang kwa Itale; mme a re tsenya mo go sone.

7E rile re sena go nna re tsamaya ka bonya ka malatsi a le mantsi, ra fitlha ka bothata bolebana le Kinito; mme e re ka phefo e sa tlhole e re leseletsa go tswelela pele, ra tsamaya re ikamile Kerete, bolebana le Salamone;

8ya re re ntse re tsamaya re tshwere bothata re o ikamile, ra fitlha golo go twe, Dinwane Dintlhe; motse wa Lasea wa bo o le gaufi nago.

9E rile go fetile lobaka lo lo loleele, le go eta ka sekepe go setse go boitshega; mme e re ka lobaka lwa go ithiba mo dijong lo fetile, Paulo a ba gakolola, a ba raya,

10a re: “Banna, ke a bona fa loeto lo lwa sekepe lo tlaa dirana le molato le tshenyego, e seng mo dilwaneng le mo sekepeng go le gosi, mme le e leng mo matshelong a rona.”

11Mme molaodi wa mophato a reetsa molaodi le mong wa sekepe bogolo go dilo tse di builweng ke Paulo.

12E re ka senwane seo se sa lekana, gore ba ka fetisa mariga mo go sone, bontsi jwa gakolola gore ba tswele teng kwa lewatleng, e tle e re kgotsa ba leke go ya go tshwara Fenikese, mme ba fetise mariga teng, kwa go leng senwane sa Kerete, se se lebileng kwa botsheka botlhabatsatsi le kwa borwa botlhabatsatsi.

13E rile ka phefo ya borwa e foka ka bonya, mme ba solofela gore ke gone ba bonyeng boikaelelo jwa bone, ba tloga ba tsamaya ba bapile le Kerete ba ikamile dintshi tsa lewatle.

14Mme e re kgantele ga bo go tswa teng ledimo la phefo, le le bidiwang Eurakwilo,

15ya re sekepe se tshwarwa, mme se retelelwa ke go tlhabagana le phefo, ra ineela fela, ra kgokgoediwa.

16Ya re re feta fa tlase ga setlhakenyana sengwe go twe, Kauta, ra bona go phamola mokoro, mme e le ka bothata.

17Ya re ba sena go o tsholetsa, ba leka go thusa sekepe ka go se fapa kwa tlase; mme e re ka ba boifa gore ba tlaa ya go digelwa mo Suretise, ba folosa bosaile, mme ba kgokgoediwa jalo.

18Ya re ka re lwa thata le phefo, ya re ka moso ba simolola go ntsha dilo tse di oletsweng mo sekepeng, ba di latlhela mo lewatleng;

19ka letsatsi la boraro ba latlhela dilwana tsa sekepe kwa ntle ka diatla tsa bone.

20Mme ya re malatsi a feta a le mantsi re ntse re sa bone letsatsi le fa e le dinaledi, ledimo le re pitlagantse ka le le legolo, tsholofelo yotlhe ya go phela ya bo e setse e tlogile.

21E rile ba tlhotse gantsi ba sa je, foo Paulo a ema mo gare ga bone, a re: “Banna, lo ne lo tshwanetse lwa bo lo ne lo ntheeditse lwa se ka lwa tlogela Kerete, lo tla go bona molato o, le tshenyegelo e.

22Jaana ke a lo laya ka re, lo nametsege; gonne ga go ketla go swa ope mo go lona, fa e se sekepe se le sosi fela.

23Gonne go letse go eme fa go nna moengele wa Modimo o ke leng wa one, le o ke o direlang,

24a re: ‘Paulo o se ka wa boifa, o na le go ya go ema fa pele ga Kaesare; mme bona, Modimo o go neetse botlhe ba o etileng nabo mo sekepeng.’

25Ke gone banna, nametsegang, gonne ke dumela Modimo fa go tlaa nna fela jaaka ke boleletswe.

26“Le fa go ntse jalo re na le go latlhelwa mo setlhakeng sengwe.”

27E rile go le bosigo jwa 14, e ka ne e le bosigogare, ka re kgarakgatshiwa mo lewatleng la Ateria, batsamaisi ba sekepe ba swaba gore, ba atametse lefatshe lengwe.

28Mme ba lekeletsa boteng, mme ba fitlhela go le boteng jwa dikgato di le 40, mme ya re kgantele ba lekeletsa gape, ba fitlhela boteng jwa dikgato di le 30.

29E re ka ba boifa gore kgotsa re ka tla ra latlhegela fa go mafika, ba digela ditsetsepetso di le nne ka kwa maragong ga sekepe, mme ba sala ba rapelela bosa.

30Ya re batsamaisi ba sekepe ba rata go falola mo sekepeng, ba setse ba foloseditse mokoro mo lewatleng, ba ipata ka go re ba ya go tlhoma ditsetsepetso dingwe ka kwa pele ga sekepe.

31Paulo a raya molaodi wa mophato le batlhabani a re: “Fa batho ba ba sa sale mo sekepeng, ga lo ka ke lwa phela.”

32Foo batlhabani ba kgaola megala ya mokoro, ba o lesa wa wa.

33Ya re bosa bo sa ntse boo sa, Paulo a ba rapela botlhe gore ba je, a re: “Gompieno ke letsatsi la 14 lo ntse lo lebeletse fela, lo itshokile lo le mo tlaleng, lo sa je sepe.

34Ka re, ke a lo rapela gore lo je, gonne go tlaa lo thusa; ka ga go ketla go nyelela le fa e le thiri ya tlhogo ya mongwe wa lona.”

35Ya re a sena go bua jalo, a tshotse senkgwe, a leboga Modimo fa pele ga bone botlhe, mme a se ngatha, a simolola go ja.

36Foo ba nametsega botlhe; le bone ba ja.

37Fa re le mmogo mo sekepeng, ra bo re le batho ba le 276.

38E rile ba sena go kgora, ba fokotsa bokete jwa sekepe ka go tshololela mabele mo lewatleng.

39E rile bosa bo sele, ba se ka ba tlhaloganya lefatshe gore ke lefe, mme ba bona senwane sengwe se se lomota lo lo papametseng, mme ba gakololana gore a ba ka kgweetsa sekepe sa ya go lo pagama.

40Ba latlha ditsetsepetso, ba di tlogela mo lewatleng, ba hunolola megala ya dikgong tse di sokololang sekepe; mme e rile ba sena go tsharololela saile wa kwa pele kwa phefong, ba lekela kwa lomoteng.

41Ya re ka ba wetse fa dikgatlhong tsa mawatle a le mabedi, ba isa sekepe kwa lefatsheng, mme sehuba sa sekepe sa khutlwa, sa tlhomama, marago a sone a simolola go thujwa ke bothata jwa makhubu a metsi.

42Kgakololo ya batlhabani ya bo e le gore, a bagolegwi ba bolawe, e se re kgotsa bangwe ba bone ba tswa ka go sapa, mme ba ngwega.

43Mme ka molaodi wa mophato a rata go boloka Paulo, a ba kganela mo boikaelelong jwa bone; a laola gore ba ba itseng go sapa ba ithabuetse mo lewatleng, ba ye go fitlha pele kwa lefatsheng,

44le ba ba setseng, gore ba leke go falola, bangwe ka dimati, ba bangwe ka dilo tse dingwe tsa sekepe. Ga dirala gore botlhe ba falolela sentle kwa lefatsheng.

← Chapter 26 Jump to: Chapter 28 →