Acts 20

Tswana (BAEBELE e e Boitshepo) 1992

← Chapter 19 Jump to: Chapter 21 →

1E rile magawegawe a sena go khutla, Paulo a bitsa barutwa, a ba laya, a ba sadisa sentle, mme a bolola a ya kwa Maketonia.

2Ya re a sena go ralala mafatshe ao, le go ba laya thata, a ya a fitlha kwa lefatsheng la Gerika.

3Ya re a sena go nna dikgwedi di le tharo teng, mme e re ka Bajuta ba mo rera ka ditogamaano, jaaka a tlaa tloga a ya Siria ka sekepe, foo a bona mogopolo o sele wa go boa ka tsela ya Maketonia.

4Go ya go fitlha kwa Asia, a patwa ke Sopatere wa Berea, morwa Pureho; le Arisetareko le Sekunto e le Bathesalonika; le Gaio wa Derebe, le Timotheo; le Tukiko le Terofimo e le ba Asia.

5Ba, ba ne ba fetetse kwa pele, mme ba bo ba re letile kwa Teroase,

6mme ra tswa mo Filipi ka sekepe morago ga malatsi a senkgwe se se sa bedisiwang, ra ya go fitlha kwa go bone kwa Teroase ka go tsamaya malatsi a le matlhano; mme ra tlhola teng malatsi a supa.

7Ya re ka letsatsi la ntlha la beke, ka re phuthegetse go ngathoganya senkgwe, Paulo a nna a bua nabo, a ikaeletse go tsoga a tsamaya ka moso; a gololela puo ya gagwe go ya bosigogare.

8Ga bo go le dipone di le dintsi mo ntlong e e fa godimo, e re phuthegetseng mo go yone.

9Ga bo go dutse mo seiponeng lekau lengwe go twe Eutiko, a fentswe ke boroko jo bogolo; mme ya re ka Paulo a sa ntse a buele pele, ka a fentswe ke boroko, a wela fa fatshe a tswa kwa ntlong ya boraro e e kwa godimo, mme a tsholediwa a sule.

10Mme Paulo a fologa, a mo wela godimo, a mo tlamparela, a re: “Lo se ka lwa tsosa modumo; gonne mowa wa gagwe o mo go ene.”

11Ya re a sena go tlhatloga, mme a ngatlhogantse senkgwe, e bile a jele, a bile a buile nabo ka boleele, bosigo jwa ba jwa tla jwa sa, jalo a tloga a tsamaya.

12Mme ba tlisa mosimane a tshedile, mme ba gomotsega thata.

13Rona, e re ka re ne re fetetse pele kwa sekepeng, ra ya kwa Asoso ka sekepe, re ikaeletse gore re tlaa tsaya Paulo teng; gonne o ne a laotse jalo, ka ene a ikaeletse go tla a potologa le tsela ya lefatshe.

14E rile re rakana nae kwa Asoso, ra mo tsholela mo sekepeng, mme ra ya go fitlha kwa Mitulene.

15Ra tswa foo ka sekepe, mme ka moso ra fitlha bolebana le Kiose; ka moso o mongwe ra ama Samose, ka moso o mongwe gape ra fitlha kwa Mileto.

16Gonne Paulo a ne a laotse gore re fete Efeso ka sekepe, gore a tle a se ka a bona tiego mo lefatsheng la Asia; ka a itlhaganela, e tle e re kgotsa a bone go nna kwa Jerusalema ka tsatsi la Pentekoste, fa go ka nna jalo.

17A le kwa Mileto a roma kwa Efeso, a ya go bitsa bagolwane ba phuthego.

18E rile ba sena go fitlha kwa go ene, a ba raya a re: “Lona ka losi lo a itse ka fa ke ntseng ka nna mo go lona ka teng ka metlha yotlhe, go simolola ka letsatsi la ntlha le ke gorogileng ka lone mo lefatsheng la Asia.

19Ke direla Morena ka boikokobetso jotlhe jwa pelo, le ka dikeledi, le ka diteko tse di nkwetseng ka ditogamaano tsa Bajuta;

20ka fa ke se kang ka boifa ka teng go lo bolelela sengwe le sengwe se se molemo, ke ruta mo ponong, le ka go nna ke tsamaya le matlo.

21Ke supetsa Bajuta le Bagerika tlhabologelo Modimong, le tumelo mo go Morena wa rona Jesu Keresete.

22Jaana bonang, ke etela kwa Jerusalema, ke pitlaganye mo moweng, ke sa itse dilo tse di tlaa nkwelang teng;

23fa e se gore, Mowa o o Boitshepo o nkaela mo motseng mongwe le mongwe gore dikgole le dipitlagano di ntuletse.

24Mme botshelo jwa me ga ke bo kaye sepe, gore e kete ke bo rata thata, e le gore ke tle ke wetse sebaka sa me sa tshiamelo, le tirelo e ke e amogetseng mo go Morena Jesu, ya go supa Mafoko a a Molemo a tshegofatsho ya Modimo.

25“Jaana bonang, ke a itse gore lona lotlhe ba ke ntseng ka nna ka tsamaya mo go lona ke rera bogosi, ga lo ketla lo tlhola lo bona sefatlhogo sa me gope.

26Ke gone, ke supa mo go lona gompieno ka ga batho botlhe, fa ke se na molato mo mading a bone.

27Gonne ga ke a ka ka boifa go lo bolelela kgakololo yotlhe ya Modimo.

28Lo itise, lo bo lo dise letsomane lotlhe, le Mowa o o Boitshepo o lo dirileng baokami ba lone, gore lo otle phuthego ya Modimo e o e rekileng ka madi a one.

29Ke a itse fa e tlaa re ke sena go tsamaya, go tlaa tsena mo go lona diphiri tse di setlhogo, tse di sa rekegeleng letsomane;

30le mo go lona ka losi, go tlaa tsoga banna ba ba buang dilo tse di sokameng, go tla ba itshadisa barutwa morago.

31Ke gone disang, lo ntse lo gakologelwa fa e kile ya re ka lobaka lwa dinyaga di le tharo, ka nna ka lo gakolola lotlhe ka dikeledi, bosigo le motshegare.

32“Jaana ke lo neela Modimo, ke lo neela lefoko la tshegofatso ya one, le le nonofileng go lo agelela, le go lo naya boswa mo go botlhe ba ba itshepisitsweng.

33Ga ke a ka ka eletsa selefera sa ope, le fa e le gouta, le fa e le diaparo.

34Lona ka losi lo a itse fa diatla tse di diretse go tlhoka ga me, le go tlhoka ga ba ke ne ke na nabo.

35Ka lo beela sekao mo dilong tsotlhe, sa ka fa lo tshwanetseng go thusa ba ba bokoa ka teng, ka go dira mo go ntseng jalo, le go gakologelwa mafoko a Morena Jesu, ka fa ene ka esi o buileng ka teng a re: ‘Ga aba go lesego bogolo go go amogela.’ ”

36E rile a sena go bua jalo, a khubama, a rapela nabo botlhe.

37Mme ba lela botlhe mo go botlhoko, ba wela mo thamong ya ga Paulo, ba mo atla.

38Ba hutsafadiwa bogolo ke lefoko le o le buileng a re, ga ba ketla ba tlhola ba mmona sefatlhogo gope. Mme ba mmuledisa ba mo fitlhisa kwa sekepeng.

← Chapter 19 Jump to: Chapter 21 →