Jeremiah 18

Tswana (BAEBELE e e Boitshepo) 1992

← Chapter 17 Jump to: Chapter 19 →

1Lefoko le le tsileng mo go Jeremia le tswa kwa go Jehofa, la re:

2“Nanoga, o ye kwa ntlong ya mmopi wa dipitsa, mme ke tlaa go utlwisa mafoko a me teng.”

3Foo ka ya kwa ntlong ya mmopi wa dipitsa, mme bonang, a bo a dira tiro mo didikolosong.

4E rile sejana se o se bopang ka letsopa se senyega mo atleng sa mmopi wa dipitsa, a tloga a se bopa sejana se sele, ka fa mmopi wa dipitsa o ne a rata go se bopa ka teng.

5Foo lefoko la ga Jehofa la tla mo go nna, la re:

6“Lona ba ntlo ya Iseraele, a ga nkake ka dira ka lona jaaka mmopi yo wa dipitsa?” Go bua Jehofa. “Bonang, jaaka letsopa le ntse mo seatleng sa mmopi wa dipitsa, le lona lo ntse jalo mo seatleng sa me, lona ba ntlo ya Iseraele.

7E tlaa re fela ka lobaka lo ke buang ka lone ka ga morafe mongwe le ka ga bogosi bonwe, go bo kumola, go bo rutlolola le go bo senya;

8fa morafe o ke buileng ka ga one o kgaogana le bosula jwa one, ke tlaa ikwatlhaya ka ga bosula jo ke ne ke gopotse go bo o direla.

9E tlaa re fela ka lobaka lo ke buang ka lone ka ga morafe mongwe le ka ga bogosi bonwe, go bo aga le go bo tlhoma;

10fa bo dira bosula mo ponong ya me, bo sa utlwe lentswe la me, foo ke tlaa ikwatlhaya ka ga molemo o ke rileng ke tlaa o bo direla.

11“Jaana ya koo, o ye o bue le batho ba Juta, le banni ba Jerusalema o re: ‘Jehofa o bua jaana, a re: Bonang, ke lo baakanyetsa bosula, ke lo logela maano; jaana a mongwe le mongwe wa lona a boe mo tseleng ya gagwe e e bosula, mme lo siamise ditsela tsa lona le ditiro tsa lona.’

12“Mme ba re: ‘Ga go na tsholofelo, gonne re tlaa sepela ka fa maanong a rona, re tlaa dira fela mongwe le mongwe ka fa logwading lwa pelo ya gagwe.’ ”

13Ke gone jaana go bua Jehofa, a re: “A ko lo botse mo merafeng fa mongwe a kile a utlwela dilo tse di ntseng jaana; kgarebana ya Iseraele e dirile selo se se tsitlisang marapo.

14A kapoko ya Lebanone e ka tlhokafala mo lefikeng la naga? Kgotsa a metsi a a tsididi a a tshitlhang a tswa kgakala a ka tšha?

15Gonne batho ba me ba ntebetse, ba fiseditse boithamako maswalo; ba ba kgokgoeditse mo tseleng tsa bone, mo tseleng tsa bogologolo, gore ba tle ba tsamaye mo tselaneng tse di kwa thoko, mo tseleng e e sa dirweng;

16go tla ba dira lefatshe la bone kgakgamatso, le kotso e e sa khutleng; mongwe le mongwe yo o fetang ka teng o tlaa gakgamala, a ba a thukhutha tlhogo.

17Ke tlaa ba falatsa fa pele ga mmaba, jaaka e ka bo e le ka phefo ya botlhabatsatsi; ke tlaa ba leba motlhana, e seng sefatlhogo, mo motlheng wa tatlhego ya bone.”

18Foo ba re: “Ntlong, a re logeleng Jeremia maano; gonne molao ga o ketla o tlhokafala mo moperesiting, le fa e le kgakololo mo go yo o botlhale, le fa e le lefoko mo moperofeting. Ntlong, re mmetseng ka loleme, mme a re se tlhokomeleng mafoko ape a gagwe.”

19“A ko o ntlhokomele Jehofa, o reetse lentswe la bone ba ba ganelang le nna.

20A molemo o tlaa duelwa ka bosula? Gonne ba epetse mowa wa me lemena. O gakologelwe ka fa nkileng ka ema fa pele ga gago ka gone go ba buela molemo, go faposa tšarologo ya gago mo go bone.

21Ke gone o neelele bana ba bone popamo, o ba tsenye mo thateng ya tšhaka; a basadi ba bone ba tlhoke bana, ba nne batlholagadi fela; a banna ba bone ba bolawe ke loso, makau a bone a bolawe ke tšhaka mo tlhabanong.

22A go utlwale go gala mo matlong a bone mogang o lereng setlhopha mo go bone ka tshoganetso, gonne ba epile lemena la go ntshwara, ba fitlhetse dinao tsa me diru.

23Le fa go ntse jalo Jehofa, o a e itse kgakololano yotlhe ya bone ka ga me ya go mpolaya; o se ka wa itshwarela boikepo jwa bone, o se ka wa phimola boleo jwa bone mo ponong ya gago; a ba ribigediwe fa pele ga gago; dira ka bone mo motlheng wa bogale jwa gago.”

← Chapter 17 Jump to: Chapter 19 →