Jeremiah 43

Tswana (BAEBELE e e Boitshepo) 1992

← Chapter 42 Jump to: Chapter 44 →

1Ga dirala e rile Jeremia a sena go wetsa go bua le batho botlhe mafoko otlhe a ga Jehofa, Modimo wa bone, a Jehofa Modimo wa bone o ne a mo romile kwa go bone ka one, e bong mafoko otlhe a,

2foo ga bua Asaria morwa Hošaia, le Johanane morwa Karea, le batho botlhe ba ba ikgodisang, ba raya Jeremia, ba re: “O bua maaka; Jehofa Modimo wa rona ga a a go roma go tla go bua go re: ‘Lo se ka lwa ya Egepeto go jaka teng.’

3Baruke morwa Neria wa go re tlhotlheleletsa, go re tsenya mo seatleng sa Bakalatea, gore ba re bolae, le gore ba re ise kwa Babilone re le ditshwarwa fela.”

4Jalo Johanane morwa Karea le balaodi botlhe ba mephato, le batho botlhe, ba se ka ba ineela mo lentsweng la ga Jehofa go aga mo lefatsheng la Juta.

5Mme Johanane morwa Karea, le balaodi botlhe ba mephato, ba tsaya masalela otlhe a Juta a a ne a boile kwa merafeng yotlhe kwa a ne a leleketswe teng, a tsile go jaka mo lefatsheng la Juta;

6banna, basadi, banyana, le bomorwadia kgosi, le motho mongwe le mongwe yo Nebusaratane molaodi wa balebedi o ne a ba tlogetse le Getalia morwa Ahikame, morwa Shafane, le Jeremia moperofeti, le Baruke morwa Neria.

7Ba fitlha mo lefatsheng la Egepeto, gonne ga ba a ka ba akela lentswe la Jehofa; mme ba ya ba fitlha le kwa Tapanehese.

8Foo ga tla lefoko la ga Jehofa mo go Jeremia kwa Tapanehese, la re:

9“Tsaya maje a matona ka seatla, o a beye mo seretseng fa go alwang makote teng, fa botsenong jwa ntlo ya ga Faro mo Tapanehese, mo ponong ya banna ba Juta;

10mme o ba reye o re: ‘Jehofa wa masomosomo, Modimo wa Iseraele o bua jaana; a re: Bonang, ke tlaa roma ke ya go tsaya Nebukatenesare kgosi ya Babilone, motlhanka wa me, mme ke tlaa tlhoma setulo sa gagwe sa bogosi mo majeng a ke a beileng; mme o tlaa tsharolola mogope wa gagwe wa segosi mo godimo ga one.

11O tlaa tla a kgemetha lefatshe la Egepeto; ba ba laoletsweng go swa ba tlaa neelwa loso, ba ba laoletsweng botshwaro ba tlaa neelwa botshwaro, le ba ba laoletsweng tšhaka ba tlaa neelwa tšhaka.

12Ke tlaa gotsa molelo mo matlong a medimo ya Egepeto; mme o tlaa a fisa, ene o tlaa ba tlosa e le ditshwarwa; o tlaa ikapesa ka lefatshe la Egepeto, jaaka modisa a tle a apare kobo ya gagwe; mme o tlaa tswa teng ka kagiso.

13Gape o tlaa thuba ditshwantsho tse di setilweng tse di metloutlo tsa Ntlo ya letsatsi e e mo lefatsheng la Egepeto; le matlo a medimo ya Egepeto o tlaa a tshuba ka molelo.’ ”

← Chapter 42 Jump to: Chapter 44 →