Jeremiah 37

Tswana (BAEBELE e e Boitshepo) 1992

← Chapter 36 Jump to: Chapter 38 →

1Setekia morwa Josia a busa e le kgosi mo boemong jwa ga Konia morwa Jehoiakime, yo Nebukateresare kgosi ya Babilone o mmeileng kgosi mo lefatsheng la Juta.

2Go ne go le ene, le batlhanka ba gagwe, le batho ba lefatshe; ga ba a ka ba reetsa mafoko a ga Jehofa, a o a buileng ka moperofeti Jeremia.

3Kgosi Setekia a roma Jehukale morwa Shelemia, le Sefania morwa Maaseia moperesiti, kwa go Jeremia moperofeti, a re: “A ko o re rapelele mo go Jehofa Modimo wa rona.”

4Jaana Jeremia a bo a ntse a tsamayatsamaya mo bathong, gonne ba ne ba ise ba mo tsenye mo ntlong ya kgolegelo.

5Ntwa ya ga Faro e ne e bolotse kwa Egepeto; mme e rile Bakalatea ba ba tlhaselang Jerusalema ba e utlwela, ba bothologa kwa Jerusalema.

6Foo lefoko la ga Jehofa la tla mo go moperofeti Jeremia, la re:

7“Jehofa, Modimo wa Iseraele o bua jaana, a re: Bua jaana le kgosi ya Juta, yo o lo romileng kwa go nna go tla go mpotsa; ‘Bona, ntwa ya ga Faro, e e tsileng go lo thusa, e tlaa boela kwa Egepeto, lefatshe la ga yone.

8Bakalatea ba tlaa tla gape, ba tlhabana le motse o; mme ba tlaa o gapa, ba o fisa ka molelo.’

9Jehofa a bua jaana, a re: Lo se ka lwa itsietsa lwa re: ‘Bakalatea ba tlaa re tlogela ka mmaanete;’ gonne ga ba ketla ba tloga.

10Gonne le fa lo ka bo lo ne lo kgemethile ntwa yotlhe ya Bakalatea ba ba tlhabanang le lona, mme ga sala fela ba ba tlhabilweng mo go bone, le fa go ntse jalo ba ne ba tlaa nanoga, mongwe le mongwe mo mogopeng wa gagwe, ba fisa motse o ka molelo.”

11Ga dirala, e rile ntwa ya Bakalatea e bothologa kwa Jerusalema ka go boifa ntwa ya ga Faro,

12foo Jeremia a tswa mo Jerusalema, a re o ya lefatsheng la Benjamine, a ya go amogela kabelo ya gagwe a le teng mo gare ga batho.

13Ya re a le fa kgorong ya Benjamine, go ne go le mogolwane wa tebelo teng, yo leina la gagwe go tweng Irija, morwa Shelemia, morwa Hanania; a tshwara Jeremia moperofeti, a re: “O ntse jaana o ngwegela kwa Bakalateeng.”

14Foo Jeremia a re: “Ke maaka; ga ke ngwegele kwa Bakalateeng;” mme a se ka a mo reetsa; jalo Irija a tshwara Jeremia, a mo isa kwa dikgosaneng.

15Dikgosana tsa galefela Jeremia, tsa ba tsa mo itaya tsa mo tsenya mo ntlong ya kgolegelo, mo ntlong ya ga Jonathane mokwadi; gonne ba ne ba ntshitse yone ntlo ya kgolegelo.

16E rile Jeremia a sena go fitlha mo ntlong ya molete, le mo dingaleng tsa kgolegelo, mme Jeremia a sa bolo go nna teng malatsi a le mantsi;

17foo Setekia kgosi a roma a ya go mo lere; kgosi ya mmotsa mo sephiring mo ntlong ya yone, ya re: “A go na le lefoko lengwe le le tswang kwa go Jehofa?” Jeremia a re: “Le gone.” Gape a ba a re: “O tlaa tsenngwa mo seatleng sa kgosi ya Babilone.”

18Gape Jeremia a raya kgosi Setekia, a re: “Ke go leofetse mo go eng, le fa e le batlhanka ba gago, le fa e le batho ba, fa e bo ne ne lo ntsentse mo ntlong ya kgolegelo jaana?

19Ba kae jaanong baperofeti ba lona ba ba lo perofeseditseng, ba re: ‘Kgosi ya Babilone, ga e ketla e tla go tlhabana le lona, le fa e le lefatshe le’?

20Jaana ke a go rapela kgosi, morena wa me, o nkutlwe; ke a go rapela, a mokokotlelo wa me o amogelwe fa pele ga gago; o se ka wa ba wa mpusetsa kwa ntlong ya ga Jonathane mokwadi, nka tla ka swela teng.”

21Foo Setekia kgosi a laola, mme ba tsenya Jeremia mo lwapeng lwa balebedi, ba mo naya ka malatsi otlhe senkgwe se le sengwe fela se se tswang mo mmileng wa babesi ba senkgwe, ga tsamaya senkgwe sotlhe sa fela mo motseng. Jeremia a nna jalo mo lwapeng lwa balebedi.

← Chapter 36 Jump to: Chapter 38 →