Jeremiah 40

Tswana (BAEBELE e e Boitshepo) 1992

← Chapter 39 Jump to: Chapter 41 →

1Lefoko le le tsileng mo go Jeremia le tswa kwa go Jehofa, Nebusaratane molaodi wa balebedi a sena go mo golola kwa Rama, jale ka a ne a mo tshotse a golegilwe ka diketana, a na le batshwarwa botlhe ba Jerusalema le ba Juta, ba ba isiwang botshwarong kwa Babilone.

2Molaodi wa balebedi a tsaya Jeremia a mo raya a re: “Jehofa Modimo wa gago o boletse bosula jo ka ga felo fano.

3Jehofa o bo lerile; o dirile jaaka a buile; ka gonne lo leofetse Jehofa, mme lwa se ka lwa reetsa lentswe la gagwe, ke gone ka moo selo se se tsileng mo go lona.

4Jaana bona, ke go golola gompieno mo diketaneng tse di mo letsogong la gago. Fa go le molemo mo matlhong a gago go ya le nna kwa Babilone, a re tsamaye, ke tlaa go disa sentle; mme fa go le bosula mo matlhong a gago go ya le nna kwa Babilone, gana fela; bona lefatshe lotlhe le fa pele ga gago; kwa go leng molemo le tshiamo mo matlhong a gago go ya gone, ya teng fela.”

5Jaana e rile a ise a boe, molaodi wa balebedi a mo raya a re: “Ee, boela kwa go Getalia morwa Ahikame, morwa Shafane, yo kgosi ya Babilone e mmeileng molaodisiwa wa metse ya Juta, mme o nne nae mo gare ga batho; kgotsa o ka ya fela kwa go leng tshiamo mo matlhong a gago go ya teng.” Jalo molaodi wa balebedi a mo naya mefago le dineo, mme a mo lesa a tsamaya.

6Foo Jeremia a ya kwa go Getalia morwa Ahikame kwa Misepa, mme a aga nae mo gare ga batho ba ba tlogetsweng mo lefatsheng.

7Jaana e rile balaodi botlhe ba mephato e e mo nageng, e bong bone le batho ba bone, ba utlwa fa kgosi ya Babilone e beile Getalia morwa Ahikame molaodi mo lefatsheng, mme a mo neetse banna, le basadi, le banyana, le ba ba humanegileng bogolo ba lefatshe, e bong bone ba ba sa isiwang e le ditshwarwa kwa Babilone;

8foo ba tla mo go Getalia kwa Misepa, e bong Išemaele morwa Nethania, le Johanane le Jonathane bomorwa Karea, le Seraia morwa Tanehumethe, le bomorwa Efai wa Monetofathe, le Jesania morwa motho wa Momaakathe, bone ba na le banna ba bone.

9Mme Getalia morwa Ahikame morwa Shafane a ba ikanela le banna ba bone, a re: “Lo se ka lwa boifa go direla Bakalatea; agang mo lefatsheng, mme lo direle kgosi ya Babilone, mme go tlaa nna molemo mo go lona.

10Ka ga me, bonang, ke agile mo Misepa, go ema fa pele ga Bakalatea ba ba tlaa tlang mo go rona: mme lona, phuthang bojalwa jwa mofine, le maungo a letlhabula, le lookwane, lo di tsenye mo dilwaneng tsa lona, mme lo age mo metseng e lo e gapileng.”

11Gape le BaJuta botlhe ba ba kwa Moabe, le kwa baneng ba Moabe, le kwa Etome, le ba ba mo mafatsheng otlhe, e rile ba utlwa fa kgosi ya Babilone e tlogetse masalela mangwe a Juta, e bile e ba tsentse mo taolong ya ga Getalia morwa Ahikame, morwa Shafane;

12foo Bajuta botlhe ba boa kwa mafelong otlhe kwa ba leleketsweng teng, ba tla mo go Getalia mo lefatsheng la Juta, kwa Misepa, mme ba phutha bojalwa jwa mofine le maungo a letlhabula go le gotona thata.

13Gape Johanane morwa Karea, le balaodi botlhe ba mephato e e mo nageng, ba tlaa mo go Getalia kwa Misepa, ba mo raya ba re:

14“A o a itse fa Baalise kgosi ya bana ba Amone a romile Išemaele morwa Nethania go tla go go bolaya?” Getalia morwa Ahikame a se ka a ba dumela.

15Foo Johanane morwa Karea a bua le Getalia mo sephiring a re: “Ke a go rapela, mma ke tsamaye, mme ke tlaa ya ke bolaya Išemaele morwa Nethania, mme ga go ketla go itse motho ope; ana o ka bo a go bolaelang, mme Bajuta botlhe ba ba phuthegetseng mo go wena ba faladiwa, le masalela a Juta a nyelela?”

16Getalia morwa Ahikame a raya Johanane morwa Karea a re: “O se ka wa dira selo se; gonne o pateletsa Išemaele.”

← Chapter 39 Jump to: Chapter 41 →