Jeremiah 39

Tswana (BAEBELE e e Boitshepo) 1992

← Chapter 38 Jump to: Chapter 40 →

1Ga dirala, e rile Jerusalema o gapiwa (ka ngwaga o o ferang o le monge fela wa ga Setekia kgosi ya Juta, ka kgwedi ya lesome, Nebukatenesare kgosi ya Babilone a tla, a na le ntwa yotlhe ya gagwe, a tla go tlhabana le Jerusalema, mme a fitlha a o tlhasela;

2ka ngwaga wa 11 wa ga Setekia, ka kgwedi ya bone, ka letsatsi le le ferang o le mongwe fela la kgwedi, ga phunngwa phatlha mo motseng;)

3dikgosana tsotlhe tsa kgosi ya Babilone tsa tsena, tsa dula mo kgorong ya fa gare, e bong Neregale-šaresere, le Samegare-nebo, le Saresekime, le Rabe-sarise, le Neregale-šaresere, le Rabe-mage, ba na le dikgosana tsotlhe tse dingwe tsa kgosi ya Babilone.

4Ga dirala e rile Setekia kgosi ya Juta le batlhabani botlhe ba ba bona, foo ba tshaba, ba tswa mo motseng bosigo, ka tsela ya tshimo ya kgosi, ka kgoro e e fa gare ga dithako tse pedi; mme a tswa ka tsela ya Araba.

5Ntwa ya Bakalatea ya ba konatelela, ya tshwara Setekia mo dipaleng tsa Jeriko; ya re ba sena go mo tshwara, ba mo isa kwa go Nebukatenesare kgosi ya Babilone, kwa Ribela mo lefatsheng la Hamathe, mme a atlhola ka ga gagwe.

6Foo kgosi ya Babilone ya bolaya bomorwa Setekia mo Ribela fa pele ga matlho a gagwe; gape kgosi ya Babilone ya bolaya bagolwane botlhe ba Juta.

7Gape a gonya Setekia matlho, a mo golega ka mehiri go tla a mo isa kwa Babilone.

8Bakalatea ba fisa ntlo ya kgosi ka molelo, le matlo a batho, ba ba ba thuba dithako tsa Jerusalema.

9Foo Nebusaratane, molaodi wa balebedi, a isa kgolegong kwa Babilone masalela a batho ba ba setseng mo motseng, le bangwegi ba ba ngwegetseng kwa go ene, le masalela a batho ba ba setseng.

10Nebusaratane, molaodi wa balebedi, a tlogela bahumanegi ba batho, ba ba se nang sepe mo lefatsheng la Juta, a ba naya masimo a mafine, le matlhagare ka lone lobaka loo.

11Jaana Nebukatenesare, kgosi ya Babilone, a laela Nebusaratane mogolwane wa balebedi ka ga Jeremia, a re:

12“Mo tseye o mo dise sentle, o se ka wa mo utlwisa botlhoko; o mo direle fela ka fa o tlaa go rayang ka gone.”

13Jalo Nebusaratane, molaodi wa balebedi a roma, le Nebušasebane, le Rabesarise, le Neregale-šaresere, le Rabemage, le balaodisiwa botlhe ba bagolwane ba kgosi ya Babilone;

14ba roma, ba ntsha Jeremia mo lwapeng lwa balebedi, mme ba mo neela Getalia morwa Ahikame, morwa Shafane, gore a mo ise kwa gae; jalo a aga mo bathong.

15Jaana lefoko la Jehofa la tla mo go Jeremia jale, ka a sa ntse a tswaletswe mo lwapeng lwa balebedi, la re:

16“Ya o bue le Ebete-meleke wa Moethiopia o re: ‘Jehofa wa masomosomo, Modimo wa Iseraele o bua jaana, a re: Bona ke tlaa dirafatsa mafoko a me mo motseng o ka bosula, e seng ka molemo; mme a tlaa dirafadiwa fa pele ga gago ka tsatsi leo.

17Wena ke tlaa go golola ka tsatsi leo, go bua Jehofa; ga o ketla o tsenngwa mo seatleng sa banna ba o ba boifang.

18Gonne ruri ke tlaa go boloka, ga o ketla o wa ka tšhaka, botshelo jwa gago bo tlaa nna mo go wena kgapo ya gago; ka o ikantse mo go nna,’ ” go bua Jehofa.

← Chapter 38 Jump to: Chapter 40 →