Jeremiah 35

Tswana (BAEBELE e e Boitshepo) 1992

← Chapter 34 Jump to: Chapter 36 →

1Lefoko le le tsileng mo go Jeremia le tswa kwa go Jehofa, mo metlheng ya ga Jehoiakime morwa Josia, kgosi ya Juta, la re:

2“Ya kwa ntlong ya Barekabe, o bue nabo, mme o ba ise mo ntlong ya ga Jehofa, mo go nngwe ya matlwana, mme o ba nose bojalwa jwa mofine.”

3Foo ka tsaya Jaasania morwa Jeremia, morwa Habasinia, le bomorwa rraagwe le bomorwawe botlhe, le botlhe ba kgotla ya Barekabe;

4ka ba isa mo ntlong ya ga Jehofa, mo ntlwaneng ya bomorwa Hanane morwa Igetalia, monna wa Modimo, e e bapileng le ntlwana ya dikgosana, fa godimo ga ntlwana ya ga Maaseia morwa Shalume, molebedi wa mojako.

5Ka baya dinkgwana tsa bojalwa jwa mofine le dinwelo fa pele ga bomorwa ntlo ya Barekabe, ka ba raya ka re: “Nwang bojalwa jwa mofine.”

6Ba re: “Ga re nwe bojalwa jwa mofine epe; gonne Jonatabe morwa Rekabe rraetsho o ne a re laola a re: ‘Lo se ka lwa na bojalwa jwa mofine epe, lona, le fa e le bomorwaa lona ka bosakhutleng.

7Le gone lo se ka lwa aga ntlo le fa e le go jala peo, le fa e le go tlhoma tshimo ya mafine, le fa e le go dira le yone; mme lo age mo megopeng ka metlha yotlhe ya lona; gore lo tshele metlha e le mentsi mo lefatsheng le lo jakileng mo go lone.’

8Re aketse lentswe la ga Jonatabe morwa Rekabe rraetsho, mo go tsotlhe tse o di re laetseng, ka go tlhoka le go nwa bojalwa jwa mofine bope ka metlha yotlhe ya rona, le basadi ba rona, le bana ba rona ba basimane le ba basetsana;

9le fa e le go ikagela matlo a go aga mo go one; le gone ga re na tshimo ya mafine, le fa e le lotlhagare, le fa e le peo.

10Re ntse re agile mo megopeng fela, re ntse re utlwa, re bile re dirile ka fa go tsotlhe tse Jonatabe rraetsho o di re laoletseng.

11Mme ga dirala, e rile Nebukatenesare kgosi ya Babilone a tla mo lefatsheng, ra bua, ra re: ‘Ntlong, re yeng Jerusalema ka go boifa ntwa ya Bakalatea, le ka go boifa ntwa ya Basiria’; mme re ntse mo Jerusalema jalo.”

12Foo lefoko la ga Jehofa la tla mo go Jeremia, la re:

13“Jehofa wa masomosomo, Modimo wa Iseraele o bua jaana, a re: Ya o reye batho ba Juta le banni ba Jerusalema, o re: A ga lo ketla lo amogela thuto lo reetsa mafoko a me? Go bua Jehofa.

14Mafoko a ga Jonatabe morwa Rekabe, a o a laoletseng bomorwawe, a re, ba se nwe bojalwa jwa mofine, a diraditswe, mme le gompieno ga ba nwe bope, gonne ba ntse ba tshwere taolo ya ga rraabo; mme nna ke buile le lona, ke phakela ke bua; mme ga lo a ka lwa ntheetsa.

15Ke bile ke romile batlhanka botlhe ba me, e bong baperofeti kwa go lona, ke phakela ke ba roma, ke re: ‘A mongwe le mongwe wa lona a ke a boe mo tseleng ya gagwe e e bosula, lo bo lo siamise ditiro tsa lona, lo se ye le medimo e sele go e direla, mme lo tlaa aga mo lefatsheng le ke le neileng lona le borraeno.’ Mme ga lo a ka lwa sekega tsebe, le fa e le go ntheetsa.

16E re ka bomorwa Jonatabe morwa Rekabe, ba dirafaditse taolo ya ga rraabo e o e ba laoletseng, mme batho ba, ba se ka ba ntheetsa,

17ke gone ka moo Jehofa, Modimo wa Masomosomo, Modimo wa Iseraele o bua jaana, a re: ‘Bonang, ke tlaa tlisetsa Bajuta le banni botlhe ba Jerusalema, bosula jotlhe jo ke bo buileng ka ga bone; ka gonne ke buile nabo mme ba se ka ba utlwa; ke ba biditse, mme ba se ka ba araba.’ ”

18Jeremia a raya ba ntlo ya Barekabe a re: “Jehofa wa masomosomo, Modimo wa Iseraele o bua jaana, a re: ‘E re ka lo utlwile taolo ya ga Jonatabe rraeno, lo bile lo tshegeditse dikaelo tsotlhe tsa gagwe, lo dirile ka fa go tsotlhe tse o di lo laoletseng;

19ke gone ka moo Jehofa wa masomosomo, Modimo wa Iseraele o bua jaana, a re: Jonatabe morwa Rekabe ga a ketla a tlhoka monna yo o tlaa emang fa pele ga me ka bosakhutleng.’ ”

← Chapter 34 Jump to: Chapter 36 →