2 Chronicles 10

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 9 Jump to: Chapter 11 →

1Aur Rahubi‘ám Sikm ko gayá; is liye ki sáre Isráílí use bádsháh banáne ko Sikm meṉ ikaṭṭhe húe the.

2Jab Nabát ke beṭe Yarubi‘ám ne yih suná, (kyúṉki wuh Misr meṉ thá, jaháṉ wuh Sulaimán bádsháh ke áge se bhág gayá thá,) to Yarubi‘ám Misr se lauṭá.

3Aur logoṉ ne use bulwá bhejá. So Yarubi‘ám aur sáre Isráílí áe, aur Rahubi‘ám se kahne lage,

4ki Tere báp ne hamárá júá saḳht kar rakkhá thá; so ab tú apne báp kí us saḳht ḳhidmat ko, aur us bhárí júe ko jo us ne ham par ḍál rakkhá thá, kuchh halká kar de, aur ham terí ḳhidmat kareṉge.

5Aur us ne un se kahá, Tín din ke ba‘d phir mere pás áná. Chunáṉchi wuh log chale gaye.

6Tab Rahubi‘ám bádsháh ne un buzurgoṉ se jo us ke báp Sulaimán ke huzúr us ke jíte jí khaṛe rahte the, mashwarat kí, aur kahá, Tumhárí kyá saláh hai? maiṉ in logoṉ ko kyá jawáb dúṉ?

7Unhoṉ ne us se kahá, ki Agar tú in logoṉ par mihrbán ho, aur in ko rází kare, aur in se achchhí achchhí báteṉ kahe, to wuh hamesha terí ḳhidmat kareṉge.

8Lekin us ne un buzurgoṉ kí saláh ko, jo unhoṉ ne use dí thí, chhoṛkar un jawánoṉ se jinhoṉ ne us ke sáth parwarish páí thí aur us ke áge házir rahte the, mashwarat kí;

9aur un se kahá, Tum mujhe kyá saláh dete ho ki ham in logoṉ ko kyá jawáb deṉ jinhoṉ ne mujh se yih darḳhwást kí hai, ki Us júe ko jo tere báp ne ham par rakkhá kuchh halká kar?

10Un jawánoṉ ne jinhoṉ ne us ke sáth parwarish páí thí us se kahá, Tú un logoṉ ko jinhoṉ ne tujh se kahá, Tere báp ne hamáre júe ko bhárí kiyá, par tú us ko hamáre liye kuchh halká kar de, yúṉ jawáb dená, aur un se kahná, ki Merí chhingulí mere báp kí kamar se bhí moṭí hai;

11aur mere báp ne to bhárí júá tum par rakkhá hí thá, par maiṉ us júe ko âur bhí bhárí karúṉgá; mere báp ne tumheṉ koṛoṉ se ṭhík kiyá, par maiṉ tum ko bichchhúoṉ se ṭhík karúṉgá.

12Aur jaisá bádsháh ne hukm diyá thá, ki Tísre din mere pás phir áná, tísre dín Yarubi‘ám aur sab log Rahubi‘ám ke pás házir húe.

13Tab bádsháh ne un ko saḳht jawáb diyá; aur Rahubi‘ám bádsháh ne buzurgoṉ kí saláh ko chhoṛkar,

14jawánoṉ kí saláh ke muwáfiq un se kahá, ki Mere báp ne tumhárá júá bhárí kiyá, par maiṉ us ko âur bhí bhárí karúṉgá; mere báp ne tum ko koṛoṉ se ṭhík kiyá, par maiṉ tum ko bichchhúoṉ se ṭhík karúṉgá.

15So bádsháh ne logoṉ kí na mání; kyúṉki yih Ḳhudá hí kí taraf se thá, táki wuh us bát ko jo us ne Sailání Aḳhiyáh kí ma‘rifat Nabát ke beṭe Yarubi‘ám ko farmáí thí, púrá kare.

16Jab sáre Isráílíoṉ ne yih dekhá, ki bádsháh ne un kí na mání, to logoṉ ne bádsháh ko jawáb diyá, aur yúṉ kahá, ki Dáúd ke sáth hamárá kyá hissa hai? Yassí ke beṭe ke sáth hamárí kuchh mírás nahíṉ: ai Isráílío, apne apne ḍere ko chale jáo; ab, ai Dáúd, apne hí gharáne ko sambhál. Pas sab Isráílí apne ḍeroṉ ko chal diye.

17Lekin un baní Isráíl par jo Yahúdáh ke shahroṉ meṉ rahte the Rahubi‘ám saltanat kartá rahá.

18Tab Rahubi‘ám bádsháh ne Hadúrám ko jo begáríoṉ ká dárog̣a thá bhejá; lekin baní Isráíl ne us ko saṉgsár kiyá, aur wuh mar gayá. Tab Rahubi‘ám Yarúshalem ko bhág jáne ke liye jhaṭ apne rath par sawár ho gayá.

19Pas Isráílí áj ke din tak Dáúd ke gharáne se bág̣í haiṉ.

← Chapter 9 Jump to: Chapter 11 →