2 Chronicles 9

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 8 Jump to: Chapter 10 →

1Jab Sabá kí malika ne Sulaimán kí shuhrat suní, to wuh mushkil suwáloṉ se Sulaimán ko ázmáne ke liye bahut baṛí jilau aur úṉṭoṉ ke sáth, jin par masálih aur bá ifrát soná aur jawáhir the, Yarúshalem meṉ áí; aur Sulaimán ke pás ákar jo kuchh us ke dil meṉ thá us sab kí bábat us se guftogú kí.

2Sulaimán ne us ke sab suwáloṉ ká jawáb use diyá: aur Sulaimán se koí bát poshída na thí ki wuh us ko batá na saká.

3Jab Sabá kí malika ne Sulaimán kí dánishmandí ko aur us ghar ko jo us ne banáyá thá,

4aur us ke dastarḳhwánoṉ kí ni‘mat, aur us ke ḳhádimoṉ kí nishast, aur us ke mulázimoṉ kí házirbáshí, aur un kí poshák, aur us ke sáqíoṉ aur un ke libás ko, aur us zíne ko, jis se wuh Ḳhudáwand ke maskan ko játá thá, dekhá; to us ke hosh uṛ gaye.

5Aur us ne bádsháh se kahá, ki Wuh sachchí ḳhabar thí jo maiṉ ne tere kámoṉ aur terí hikmat kí bábat apne mulk meṉ suní thí:

6taubhí jab tak maiṉ ne ákar apní áṉkhoṉ se na dekh liyá, un kí bátoṉ ko báwar na kiyá: aur dekh, jitní baṛí terí hikmat hai, us ká ádhá bayán bhí mere áge nahíṉ húá; tú us shuhrat se baṛhkar hai jo maiṉ ne suní thí.

7Ḳhushnasíb haiṉ tere log, aur ḳhushnasíb haiṉ tere yih mulázim, jo sadá tere huzúr khaṛe rahte aur terí hikmat sunte haiṉ.

8Ḳhudáwand terá Ḳhudá mubárak ho jo tujh se aisá rází húá ki tujh ko apne taḳht par biṭháyá, táki tú Ḳhudáwand apne Ḳhudá kí taraf se bádsháh ho: chúṉki tere Ḳhudá ko Isráíl se mahabbat thí, ki un ko hamesha ke liye qáim kare, is liye us ne tujhe un ká bádsháh banáyá, táki tú ‘adl o insáf kare.

9Aur us ne ek sau bís qintár soná, aur masálih ká bahut baṛá ambár, aur jawáhir Sulaimán ko diye: aur jo masálih Sabá kí malika ne Sulaimán bádsháh ko diye waise phir kabhí muyassar na áe.

10Aur Húrám ke naukar bhí aur Sulaimán ke naukar jo Ofír se soná láte the wuh chandan ke daraḳht aur jawáhir bhí láte the.

11Aur bádsháh ne chandan kí lakṛí se Ḳhudáwand ke ghar ke liye aur sháhí mahall ke liye chabútare, aur gánewáloṉ ke liye barbat, aur sitár taiyár karáe: aur aisí chízeṉ Yahúdáh ke mulk meṉ pahle kabhí dekhne meṉ nahíṉ áí thíṉ.

12Aur Sulaimán bádsháh ne Sabá kí malika ko jo kuchh us ne cháhá aur máṉgá, us se ziyáda jo wuh bádsháh ke liye láí thí, diyá. Aur wuh lauṭkar apne mulázimoṉ samet apní mamlukat ko chalí gayí.

13Aur jitná soná Sulaimán ke pás ek sál meṉ átá thá us ká wazn chha sau chhiyásaṭh qintár sone ká thá;

14yih us ke ‘aláwa thá jo byopárí aur saudágar láte the. Aur ‘Arab ke sab bádsháh aur mulk ke hákim Sulaimán ke pás soná aur chándí láte the.

15Aur Sulaimán bádsháh ne píṭe húe sone kí do sau baṛí ḍháleṉ banwáíṉ; chha sau misqál píṭá húá soná ek ek ḍhál meṉ lagá.

16Aur us ne píṭe húe sone kí tín sau ḍháleṉ âur banwáíṉ; ek ek ḍhál meṉ tín sau misqál soná lagá: aur bádsháh ne un ko Lubnání ban ke ghar meṉ rakkhá.

17Is ke siwá, bádsháh ne háthídáṉt ká ek baṛá taḳht banwáyá, aur us par ḳhális soná manḍhwáyá.

18Aur us taḳht ke liye chha síṛhiyáṉ, aur sone ká ek páyadán thá, yih sab, taḳht se juṛe húe the, aur baiṭhne kí jagah kí donoṉ taraf ek ek ṭek thí, aur un ṭekoṉ ke barábar do sher i babar khaṛe the.

19Aur un chhaoṉ síṛhiyoṉ par, idhar aur udhar bárah sher i babar khaṛe the. Kisí saltanat meṉ aisá kabhí nahíṉ baná thá.

20Aur Sulaimán bádsháh ke píne ke sab bartan sone ke the, aur Lubnání ban ke ghar ke sab bartan ḳhális sone ke the; Sulaimán ke aiyám meṉ chándí kí kuchh qadr na thí.

21Kyúṉki bádsháh ke pás jaház the jo Húrám ke naukaroṉ ke sáth Tarsís ko játe the: Tarsís ke yih jaház tín baras meṉ ek bár, soná, aur chándí, aur háthídáṉt, aur bandar, aur mor lekar áte the.

22So Sulaimán bádsháh daulat aur hikmat meṉ rú e zamín ke sab bádsháhoṉ se baṛh gayá.

23Aur rú e zamín ke sab bádsháh Sulaimán ke dídár ke mushtáq the, táki wuh us kí hikmat ko jo Ḳhudá ne us ke dil meṉ ḍálí thí suneṉ.

24Aur wuh sál ba sál, apná apná hadya, ya‘ní chándí ke bartan, aur sone ke bartan, aur poshák, aur hathyár, aur masálih, aur ghoṛe, aur ḳhachchar, jitne muqarrar the láte the.

25Aur Sulaimán ke pás ghoṛoṉ aur rathoṉ ke liye chár hazár thán, aur bárah hazár sawár the, jin ko us ne rathoṉ ke shahroṉ aur Yarúshalem meṉ bádsháh ke pás rakkhá.

26Aur wuh daryá e Furát se Filistíoṉ ke mulk, balki Misr kí hadd tak, sab bádsháhoṉ par hukmrán thá.

27Aur bádsháh ne Yarúshalem meṉ ifrát kí wajh se chándí ko pattharoṉ kí mánind, aur deodár ke daraḳhtoṉ ko gúlar ke un daraḳtoṉ ke barábar kar diyá jo nasheb kí sarzamín meṉ haiṉ.

28Aur wuh Misr se aur âur sab mulkoṉ se Sulaimán ke liye ghoṛe láyá karte the.

29Aur Sulaimán ke báqí kám shurú‘ se áḳhir tak, kyá wuh Nátan nabí kí kitáb meṉ, aur Sailání Aḳhiyáh kí peshíngoí meṉ, aur ‘Ídú g̣aibbín kí royatoṉ kí kitáb meṉ, jo us ne Yarubi‘ám bin Nabát kí bábat dekhí thíṉ, mundarj nahíṉ haiṉ?

30Aur Sulaimán ne Yarúshalem meṉ sáre Isráíl par chálís baras saltanat kí.

31Aur Sulaimán apne bápdádá ke sáth so gayá, aur apne báp Dáúd ke shahr meṉ dafn húá: aur us ká beṭá Rahubi‘ám us kí jagah saltanat karne lagá.

← Chapter 8 Jump to: Chapter 10 →