bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
2 Chronicles 32
2 Chronicles 32
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 31
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 33 →
1
In bátoṉ aur is ímándárí ke ba‘d sháh i Asúr Sanherib chaṛh áyá, aur Yahúdáh meṉ dáḳhil húá, aur fasíldár shahroṉ ke muqábil ḳhaimazan húá, aur un ko apne qabze meṉ láná cháhá.
2
Jab Hizqiyáh ne dekhá ki Sanherib áyá hai, aur us ká iráda hai ki Yarúshalem se laṛe,
3
to us ne apne sardároṉ aur baháduroṉ ke sáth mashwarat kí, ki un chashmoṉ ke pání ko jo shahr se báhar the band kar de; aur unhoṉ ne us kí madad kí.
4
Aur bahut log jama‘ húe, aur sab chashmoṉ ko aur us nadí ko jo us sarzamín ke bích bahtí thí yih kahkar band kar diyá, ki Asúr ke bádsháh ákar bahut sá pání kyúṉ páeṉ?
5
Aur us ne himmat báṉdhí, aur sárí díwár ko jo ṭúṭí thí banáyá, aur use burjoṉ ke barábar úṉchá kiyá, aur báhar se ek dúsrí díwár uṭháí, aur Dáúd ke shahr meṉ Millo ko mazbút kiyá, aur bahut se hathyár aur ḍháleṉ banáíṉ.
6
Aur us ne logoṉ par sarlashkar ṭhahráe, aur shahr ke pháṭak ke pás ke maidán meṉ un ko apne pás ikaṭṭhá kiyá, aur un se himmatafzáí kí báteṉ kíṉ, aur kahá,
7
Himmat báṉdho, aur hausala rakkho, aur Asúr ke bádsháh aur us ke sáth ke sáre amboh ke sabab se na ḍaro, na hirásán ho; kyúṉki wuh jo hamáre sáth hai, us se baṛá hai jo us ke sáth hai.
8
Us ke sáth bashar ká háth hai; lekin hamáre sáth Ḳhudáwand hamárá Ḳhudá hai, ki hamárí madad kare, aur hamárí laṛáiyáṉ laṛe. So logoṉ ne sháh i Yahúdáh Hizqiyáh kí bátoṉ par takya kiyá.
9
Us ke ba‘d sháh i Asúr Sanherib ne jo apne sáre lashkar ke sáth Lakís ke muqábil paṛá thá apne naukar Yarúshalem ko sháh i Yahúdáh Hizqiyáh ke pás, aur tamám Yahúdáh ke pás jo Yarúshalem meṉ the yih kahne ko bheje, ki
10
Sháh i Asúr Sanherib yúṉ farmátá hai, ki Tumhárá kis par bharosá hai, ki tum Yarúshalem meṉ muhásare ko jhel rahe ho?
11
Kyá Hizqiyáh tum ko qaht aur piyás kí maut ke hawále karne ko tum ko nahíṉ bahká rahá hai, ki Ḳhudáwand hamárá Ḳhudá ham ko sháh i Asúr ke háth se bachá legá?
12
Kyá isí Hizqiyáh ne us ke úṉche maqámoṉ aur mazbahoṉ ko dúr karke Yahúdáh aur Yarúshalem ko hukm nahíṉ diyá, ki Tum ek hí mazbah ke áge sijda karná, aur usí par baḳhúr jaláná?
13
Kyá tum nahíṉ jánte ki maiṉ ne aur mere bápdádá ne âur mulkoṉ ke sáre logoṉ se kyá kyá kiyá hai? kyá un mamálik ki qaumoṉ ke ma‘búd apne mulk ko kisí tarah se mere háth se bachá sake?
14
Jin qaumoṉ ko mere bápdádá ne bi’lkull halák kar ḍálá, un ke ma‘búdoṉ meṉ kaun aisá niklá jo apne logoṉ ko mere háth se bachá saká, ki tumhárá ma‘búd tum ko mere háth se bachá sakegá?
15
Pas Hizqiyáh tum ko fareb na dene páe, aur na is taur par bahkáe, aur na tum us ká yaqín karo; kyúṉki kisí qaum yá mamlukat ká deotá apne logoṉ ko mere háth se aur mere bápdádá ke háth se bachá nahíṉ saká: to kitná kam tumhárá ma‘búd tum ko mere háth se bachá sakegá.
16
Aur us ke naukaroṉ ne Ḳhudáwand Ḳhudá ke ḳhiláf aur us ke bande Hizqiyáh ke ḳhiláf bahut sí âur báteṉ kahíṉ.
17
Aur us ne Ḳhudáwand Isráíl ke Ḳhudá kí ihánat karne, aur us ke haqq meṉ kufr bakne ke liye is mazmún ke ḳhatt bhí likhe, ki Jaise âur mulkoṉ kí qaumoṉ ke ma‘búdoṉ ne apne logoṉ ko mere háth se nahíṉ bacháyá hai, waise hí Hizqiyáh ká ma‘búd bhí apne logoṉ ko mere háth se nahíṉ bachá sakegá.
18
Aur unhoṉ ne baṛí áwáz se pukárkar Yahúdíoṉ kí zabán meṉ Yarúshalem ke logoṉ ko jo díwár par the yih báteṉ kah sunáíṉ, táki un ko ḍaráeṉ aur pareshán kareṉ, aur shahr ko le leṉ.
19
Aur unhoṉ ne Yarúshalem ke Ḳhudá ká zikr zamín kí qaumoṉ ke ma‘búdoṉ kí tarah kiyá, jo ádmíoṉ ke háth kí san‘at haiṉ.
20
Isí sabab se Hizqiyáh bádsháh aur Amús ke beṭe Yasa‘iyáh nabí ne du‘á máṉgí aur ásmán kí taraf chilláe.
21
Aur Ḳhudáwand ne ek firishte ko bhejá, jis ne sháh i Asúr ke lashkar meṉ sáre zabardast súrmáoṉ aur peshwáoṉ, aur sardároṉ ko halák kar ḍálá. Pas wuh sharminda hokar apne mulk ko lauṭá. Aur jab wuh apne deotá ke mandir meṉ gayá, to un hí ne jo us ke sulb se nikle the use wahíṉ talwár se qatl kiyá.
22
Yúṉ Ḳhudáwand ne Hizqiyáh ko aur Yarúshalem ke báshindoṉ ko sháh i Asúr Sanherib ke háth se aur âur sabhoṉ ke háth se bacháyá, aur har tarah un kí rahnumáí kí.
23
Aur bahut log Yarúshalem meṉ Ḳhudáwand ke liye hadye, aur sháh i Yahúdáh Hizqiyáh ke liye qímatí chízeṉ láe; yaháṉ tak ki wuh us waqt se sab qaumoṉ kí nazar meṉ mumtáz ho gayá.
24
Un dinoṉ meṉ Hizqiyáh aisá bímár paṛá ki marne ke qaríb ho gayá, aur us ne Ḳhudáwand se du‘á máṉgí; tab us ne us se báteṉ kíṉ, aur use ek nishán diyá.
25
Lekin Hizqiyáh ne us ihsán ke láiq jo us par kiyá gayá ‘amal na kiyá; kyúṉki us ke dil meṉ ghamanḍ samá gayá; is liye us par aur Yahúdáh aur Yarúshalem par g̣azab bhaṛká.
26
Tab Hizqiyáh aur Yarúshalem ke báshindoṉ ne apne dil ke g̣urúr ke badle ḳháksárí iḳhtiyár kí; so Hizqiyáh ke dinoṉ meṉ Ḳhudáwand ká g̣azab un par názil na húá.
27
Aur Hizqiyáh kí daulat aur ‘izzat niháyat firáwán thí; aur us ne chándí, aur sone, aur jawáhir, aur masálih, aur ḍháloṉ, aur sab tarah kí qímatí chízoṉ ke liye ḳhazáne,
28
aur anáj aur mai aur tel ke liye ambárḳháne, aur sab qism ke jánwaroṉ ke liye thán, aur bheṛ bakriyoṉ ke liye báṛe banáe.
29
Is ke ‘aláwa us ne apne liye shahr basáe, aur bheṛ bakriyoṉ aur gáe bailoṉ ko kasrat se muhaiyá kiyá, kyúṉki Ḳhudá ne use bahut mál baḳhshá thá.
30
Isí Hizqiyáh ne Jaihún ke pání ke úpar ke sote ko band kar diyá, aur use Dáúd ke shahr kí mag̣rib kí taraf sídhá pahuṉcháyá. Aur Hizqiyáh apne sáre kám meṉ kámyáb húá.
31
Taubhí Bábul ke amíroṉ ke mu‘ámale meṉ, jinhoṉ ne apne elchí us ke pás bheje táki us mu‘jize ká hál jo us mulk meṉ kiyá gayá thá daryáft kareṉ, Ḳhudá ne use ázmáne ke liye chhoṛ diyá, táki ma‘lúm kare ki us ke dil meṉ kyá hai.
32
Aur Hizqiyáh ke báqí kám aur us ke nek a‘mál Ámús ke beṭe Yasa‘iyáh nabí kí royá meṉ, aur Yahúdáh aur Isráíl ke bádsháhoṉ kí kitáb meṉ qalamband haiṉ.
33
Aur Hizqiyáh apne bápdádá ke sáth so gayá, aur unhoṉ ne use baní Dáúd kí qabroṉ kí chaṛháí par dafn kiyá; aur sáre Yahúdáh aur Yarúshalem ke sab báshindoṉ ne us kí maut par us kí ta‘zím kí. Aur us ká beṭá Munassí us kí jagah bádsháh húá.
← Chapter 31
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 33 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
Recommended Reading
Commentary
2 Chronicles Commentaries
→
Devotional
2 Chronicles Devotional Guide
→
Get This Bible
URDR55 (Kitáb i Muqaddas (Tauret, Zabúr, Ambiyá ke Sahífa, aur Injíl)) Study Bible
→