Joshua 1

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

Jump to: Chapter 2 →

1Aur Ḳhudáwand ke bande Músá kí wafát ke ba‘d aisá húá, ki Ḳhudáwand ne us ke ḳhádim Nún ke bete Yashú‘ se kahá,

2Merá banda Músá mar gayá hai; so ab tú uṭh aur in sab logoṉ ko sáth lekar is Yardan ke pár us mulk meṉ já jise maiṉ un ko, ya‘ní baní Isráíl ko, detá húṉ.

3Jis jis jagah tumháre páṉw ká talwá ṭike, us ko, jaisá maiṉ ne Músá se kahá, maiṉ ne tum ko diyá hai.

4Biyábán aur us Lubnán se lekar baṛe daryá ya‘ní daryá i Furát tak, Hittíoṉ ká sárá mulk, aur mag̣rib kí taraf baṛe samundar tak tumhárí hadd hogí.

5Terí zindagí bhar koí shaḳhs tere sámne khaṛá na rah sakegá: jaise maiṉ Músá ke sáth thá waise hí tere sáth rahúṉgá. Maiṉ na tujh se dastbardár húṉgá, aur na tujhe chhoṛúṉgá.

6So mazbút ho já, aur hausala rakh, kyúṉki tú is qaum ko us mulk ká wáris karáegá, jise maiṉ ne un ko dene kí qasam un ke bápdádá se kháí.

7Tú faqat mazbút aur niháyat diler ho já, ki ihtiyát rakhkar us sárí sharí‘at par ‘amal kare jis ká hukm mere bande Músá ne tujh ko diyá: us se na dahine háth muṛná aur na báeṉ, táki jaháṉ kahíṉ tú jáe, tujhe ḳhúb kámyábí hásil ho.

8Sharí‘at kí yih kitáb tere muṉh se na haṭe, balki tujhe din aur rát usí ká dhyán ho, táki jo kuchh is meṉ likhá hai, us sab par tú ihtiyát karke ‘amal kar sake, kyúṉki tab hí tujhe iqbálmandí kí ráh nasíb hogí aur tú ḳhúb kámyáb hogá.

9Kyá maiṉ ne tujh ko hukm nahíṉ diyá? So mazbút ho já aur hausala rakh: ḳhauf na khá, aur bedil na ho; kyúṉki Ḳhudáwand terá Ḳhudá, jaháṉ jaháṉ tú jáe, tere sáth rahegá.

10Tab Yashú‘ ne logoṉ ke mansabdároṉ ko hukm diyá, ki

11Tum lashkar ke bích se hokar guzro, aur logoṉ ko yih hukm do, ki Tum apne apne liye zád i ráh taiyár kar lo, kyúṉki tín din ke andar tum ko is Yardan ke pár hokar us mulk par qabza karne ko jáná hai, jise Ḳhudáwand tumhárá Ḳhudá tum ko detá hai, táki tum us ke málik ho jáo.

12Aur baní Rúbin aur baní Jadd aur Munassí ke nisf qabíle se Yashú‘ ne yih kahá, ki

13Us bát ko, jis ká hukm Ḳhudáwand ke bande Músá ne tum ko diyá, yád rakhná, ki Ḳhudáwand tumhárá Ḳhudá tum ko árám baḳhshtá hai, aur wuh yih mulk tum ko degá.

14Tumhárí bíwiyáṉ, aur tumháre bál bachche, aur chaupáye isí mulk meṉ jise Músá ne Yardan ke is pár tum ko diyá hai, raheṉ; par tum sab, jitne bahádur súrmá ho masallah hokar apne bháiyoṉ ke áge áge pár jáo, aur un kí madad karo;

15jab tak Ḳhudáwand tumháre bháiyoṉ ko tumhárí tarah árám na baḳhshe, aur wuh us mulk par jise Ḳhudáwand tumhárá Ḳhudá un ko detá hai, qabza na kar leṉ. Ba‘d meṉ tum apní milkíyat ke mulk meṉ lauṭná, jise Ḳhudáwand ke bande Músá ne Yardan ke is pár, mashriq kí taraf, tum ko diyá hai, aur us ke málik honá.

16Aur unhoṉ ne Yashú‘ ko jawáb diyá, ki Jis jis bát ká tú ne ham ko hukm diyá hai, ham wuh sab kareṉge; aur jaháṉ jaháṉ tú ham ko bheje waháṉ ham jáeṉge.

17Jaise ham sáre umúr meṉ Músá kí bát sunte the, waise hí terí suneṉge. Faqat itná ho, ki Ḳhudáwand terá Ḳhudá, jis tarah Músá ke sáth rahtá thá, tere sáth bhí rahe.

18Jo koí tere hukm kí muḳhálafat kare, aur sáre mu‘ámaloṉ meṉ jin kí tú tákíd kare, terí bát na máne, wuh ján se márá jáe: tú faqat mazbút ho já; aur hausala rakh.

Jump to: Chapter 2 →