Joshua 18

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 17 Jump to: Chapter 19 →

1Aur baní Isráíl kí sárí jamá‘at ne Sailá meṉ jama‘ hokar ḳhaima e ijtimá‘ ko waháṉ khaṛá kiyá, aur wuh mulk un ke áge mag̣lúb ho chuká thá.

2Aur baní Isráíl meṉ sát qabíle aise rah gaye the jin kí mírás un ko taqsím hone na páí thí.

3Aur Yashú‘ ne baní Isráíl se kahá, ki Tum kab tak us mulk par qabza karne meṉ, jo Ḳhudáwand tumháre bápdádá ke Ḳhudá ne tum ko diyá hai, sustí karoge?

4So tum apne liye har qabíle meṉ se tín shaḳhs chun lo; maiṉ un ko bhejúṉgá, aur wuh jákar us mulk meṉ sair kareṉge, aur apní apní mírás ke muwáfiq us ká hál likhkar mere pás áeṉge.

5Wuh us ke sát hisse kareṉge: Yahúdáh apní sarhadd meṉ junúb kí taraf aur Yúsuf ká ḳhándán apní sarhadd meṉ shimál kí taraf rahegá.

6So tum us mulk ke sát hisse likhkar mere pás yaháṉ láo, táki maiṉ Ḳhudáwand ke áge, jo hamárá Ḳhudá hai, tumháre liye qur‘a ḍálúṉ.

7Kyúṉki tumháre darmiyán Láwíoṉ ká hissa nahíṉ; is liye ki Ḳhudáwand kí kahánat un kí mírás hai: aur Jadd, aur Rúbin, aur Munassí ke ádhe qabíle ko Yardan ke us pár mashriq kí taraf mírás mil chukí hai, jise Ḳhudáwand ke bande Músá ne un ko diyá.

8Pas wuh mard uṭhkar rawána húe; aur Yashú‘ ne un ko, jo us mulk ká hál likhne ke liye gaye, tákíd kí, ki Tum jákar us mulk meṉ sair karo, aur us ká hál likhkar phir mere pás áo, aur maiṉ Sailá meṉ Ḳhudáwand ke áge tumháre liye qur‘a ḍálúṉgá.

9Chunáṉchi unhoṉ ne jákar us mulk meṉ sair kí, aur shahroṉ ke sát hisse karke un ká hál kitáb meṉ likhá, aur Sailá kí ḳhaimagáh meṉ Yashú‘ ke pás lauṭe.

10Tab Yashú‘ ne Sailá meṉ un ke liye Ḳhudáwand ke huzúr qur‘a ḍálá, aur wahíṉ Yashú‘ ne us mulk ko baní Isráíl kí taqsímoṉ ke mutábiq un ko báṉṭ diyá.

11Aur baní Binyamín ke qabíle ká qur‘a un ke gharánoṉ ke mutábiq niklá, aur un ke hisse kí hadd baní Yahúdáh aur baní Yúsuf ke darmiyán paṛí.

12So un kí shimálí hadd Yardan se shurú‘ húí; aur yih hadd Yaríhú ke pás se shimál kí taraf guzarkar kohistání mulk se hotí húí mag̣rib kí taraf Baitáwan ke biyábán tak pahuṉchí.

13Aur wuh hadd waháṉ se Lúz ko, jo Baitel hai gayí, aur Lúz ke junúb se us paháṛ ke barábar hotí húí jo níche ke Bait Haurún ke junúb meṉ hai, ‘Atárot Adár ko já niklí.

14Aur wuh mag̣rib kí taraf se muṛkar junúb ko jhukí, aur Bait Haurún ke sámne ke paháṛ se hotí húí junúb kí taraf baní Yahúdáh ke ek shahr Qaryat Ba‘l tak, jo Qaryat Ya‘rím hai, chalí gayí. Yih mag̣ribí hissa thá.

15Aur junúbí hadd Qaryat Ya‘rím kí intihá se shurú‘ húí, aur wuh hadd mag̣rib kí taraf, Naftúah ke chashme tak chalí gayí.

16Aur waháṉ se wuh hadd us paháṛ ke sire tak, jo baní Hinnúm ke beṭe kí wádí ke sámne hai, gayí. Yih Rifáím kí wádí ke shimál meṉ hai, aur phir waháṉ se junúb kí taraf Hinnúm kí wádí aur Yabúsíoṉ ke barábar se guzartí húí ‘Ain Rájil pahuṉchí;

17waháṉ se wuh shimál kí taraf muṛkar ‘Ain Shams se guzartí húí Jalílot ko gayí, jo Adummím kí chaṛháí ke muqábil hai, aur waháṉ se Rúbin ke beṭe Bohan ke patthar tak pahuṉchí;

18aur phir shimál ko jákar maidán ke muqábil ke ruḳh se nikaltí húí maidán hí meṉ já utrí;

19phir wuh hadd waháṉ se Bait Hujlah ke shimálí pahlú tak pahuṉchí, aur us hadd ká ḳhátima daryá e Shor kí shimálí kháṛí par húá jo Yardan ke junúbí sire par hai. Yih junúb kí hadd thí.

20Aur us kí mashriqí simt kí hadd Yardan ṭhahrá. Baní Binyamín kí mírás, un kí chaugird kí haddoṉ ke i‘tibár se, aur un ke gharánoṉ ke muwáfiq, yih thí.

21Aur baní Binyamín ke qabíle ke shahr, un ke gharánoṉ ke muwáfiq, yih the: Yaríhú, aur Bait Hujlah, aur ‘Imaq Qasís;

22aur Bait ‘Arábah, aur Samarím, aur Baitel;

23aur ‘Awwím, aur Fárah, aur ‘Ufrah;

24aur Kafaru’l ‘Ammoní, aur ‘Ufní, aur Jab‘a. Yih bárah shahr the aur un ke gáṉw bhí the.

25Aur Jiba‘ún, aur Rámah, aur Baírot;

26Misfáh, aur Kafírah, aur Mozah;

27aur Raqam, aur Irfaíl, aur Tarálah;

28aur Zila‘, Alif, aur Yabúsíoṉ ká shahr jo Yarúshalem hai, aur Jiba‘t, aur Qaryat. Yih chaudah shahr haiṉ, aur in ke gáṉw bhí haiṉ. Baní Binyamín kí mírás, un ke gharánoṉ ke muwáfiq, yih hai.

← Chapter 17 Jump to: Chapter 19 →