Joshua 2

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 1 Jump to: Chapter 3 →

1Tab Nún ke beṭe Yashú‘ ne Shittím se do mardoṉ ko chupke se jásús ke taur par bhejá, aur un se kahá, ki Jákar us mulk ko, aur Yaríhú ko dekho bhálo. Chunáṉchi wuh rawána húe, aur ek kasbí ke ghar meṉ, jis ká nám Ráhab thá, áe, aur wahíṉ soe.

2Aur Yaríhú ke bádsháh ko ḳhabar milí, ki Dekh, áj kí rát baní Isráíl meṉ se chand ádmí is mulk kí jásúsí karne ko yaháṉ áe haiṉ.

3Aur Yaríhú ke bádsháh ne Ráhab ko kahlá bhejá, ki Un logoṉ ko, jo tere pás áe, aur tere ghar meṉ dáḳhil húe haiṉ, nikál lá; is liye ki wuh is sáre mulk kí jásúsí karne ko áe haiṉ.

4Tab us ‘aurat ne un donoṉ mardoṉ ko lekar aur un ko chhipákar yúṉ kah diyá, ki Wuh mard mere pás áe to the, par mujhe ma‘lúm na húá ki wuh kaháṉ ke the,

5aur pháṭak band hone ke waqt ke qaríb jab andherá ho gayá, wuh mard chal diye, aur maiṉ nahíṉ jántí húṉ, ki wuh kaháṉ gaye: so jald un ká píchhá karo, kyúṉki tum zarúr un ko já loge.

6Lekin us ne un ko apní chhat par chaṛhákar san kí lakṛiyoṉ ke níche, jo chhat par tartíb se dharí thíṉ, chhipá diyá thá.

7Aur yih log Yardan ke ráste par páyáboṉ tak un ke píchhe gaye; aur júṉhí un ká píchhá karnewále pháṭak se nikle, unhoṉ ne pháṭak band kar liyá.

8Tab Ráhab chhat par un mardoṉ ke leṭ jáne se pahle un ke pás gayí,

9aur un se kahne lagí, ki Mujhe yaqín hai, ki Ḳhudáwand ne yih mulk tum ko diyá hai, aur tumhárá ru‘b ham logoṉ par chhá gayá hai, aur is mulk ke sab báshinde tumháre áge ghule já rahe haiṉ:

10kyúṉki ham ne sun liyá hai, ki jab tum Misr se nikle to Ḳhudáwand ne tumháre áge bahr i Qulzum ke pání ko sukhá diyá; aur tum ne Amoríoṉ ke donoṉ bádsháhoṉ Síhon aur ‘Oj se, jo Yardan ke us pár the, aur jin ko tum ne bi’lkull halák kar ḍálá kyá kyá kiyá.

11Yih sab kuchh sunte hí hamáre dil pighal gaye, aur tumháre bá‘is phir kisí shaḳhs meṉ ján báqí na rahí; kyúṉki Ḳhudáwand tumhárá Ḳhudá hí úpar ásmán ká, aur níche zamín ká Ḳhudá hai.

12So ab maiṉ tumhárí minnat kartí húṉ, ki mujh se Ḳhudáwand kí qasam kháo ki chúṉki maiṉ ne tum par mihrbání kí hai, tum bhí mere báp ke gharáne par mihrbání karoge aur mujhe koí sachchá nishán do,

13ki tum mere báp aur máṉ, aur bháiyoṉ aur bahinoṉ ko, aur jo kuchh un ká hai, sab ko salámat bachá loge aur hamárí jánoṉ ko maut se mahfúz rakkhoge.

14Un mardoṉ ne us se kahá, ki Hamárí ján tumhárí ján ki kafíl hogí, basharte ki tum hamáre is kám ká zikr na kar do; aur aisá hogá, ki jab Ḳhudáwand is mulk ko hamáre qabze meṉ kar degá, to ham tere sáth mihrbání aur wafádárí se pesh áeṉge.

15Tab us ‘aurat ne un ko khiṛkí ke ráste rassí se níche utár diyá; kyúṉki us ká ghar shahr kí díwár par baná thá, aur wuh díwár par rahtí thí.

16Aur us ne un se kahá, ki Paháṛ ko chal do, tá na ho ki píchhá karnewále tum ko mil jáeṉ; aur tín din tak wahíṉ chhipe rahná, jab tak píchhá karnewále lauṭ na áeṉ; is ke ba‘d apná rásta lená.

17Tab un mardoṉ ne us se kahá, ki Ham to us qasam kí taraf se jo tú ne ham ko khiláí hai beilzám raheṉge.

18So dekh, jab ham is mulk meṉ áen, to tú surḳh rang ke sút kí is ḍorí ko us khiṛkí meṉ jis se tú ne ham ko níche utárá thá báṉdh dená, aur apne báp, aur máṉ aur bháiyoṉ, balki apne báp ke sáre gharáne ko, apne pás ghar meṉ jama‘ kar rakhná;

19phir jo koí tere ghar ke darwázoṉ se nikalkar galí meṉ jáe us ká ḳhún usí ke sir par hogá, aur ham begunáh ṭhahreṉge; aur jo koí tere sáth ghar meṉ hogá, us par agar kisí ká háth chale, to us ká ḳhún hamáre sir par hogá.

20Aur agar tú hamáre is kám ká zikr kar de, to ham us qasam kí taraf se, jo tú ne ham ko khiláí hai, beilzám ho jáeṉge.

21Us ne kahá, Jaisá tum kahte ho, waisá hí ho. So us ne un ko rawána kiyá, aur wuh chal diye. Tab us ne surḳh rang kí wuh ḍorí khiṛkí meṉ báṉdh dí.

22Aur wuh jákar paháṛ par pahuṉche, aur tín din tak wahíṉ ṭhahre rahe, jab tak un ká píchhá karnewále lauṭ na áe; aur un píchhá karnewáloṉ ne un ko sáre ráste ḍhúnḍhá, par kahíṉ na páyá.

23Phir yih donoṉ mard lauṭe, aur paháṛ se utarkar pár gaye, aur Nún ke beṭe Yashú‘ ke pás jákar sab kuchh, jo un par guzrá thá, use batáyá.

24Aur unhoṉ ne Yashú‘ se kahá, ki Yaqínan Ḳhudáwand ne wuh sárá mulk hamáre qabze meṉ kar diyá hai, kyúṉki us mulk ke sab báshinde hamáre áge ghule já rahe haiṉ.

← Chapter 1 Jump to: Chapter 3 →