bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
Joshua 22
Joshua 22
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 21
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 23 →
1
Us waqt Yashú‘ ne Rúbíníoṉ, aur Jaddíoṉ, aur Munassí ke ádhe qabíle ko bulákar
2
un se kahá, ki Sab kuchh jo Ḳhudáwand ke bande Músá ne tum ko farmáyá, tum ne máná, aur jo kuchh maiṉ ne tum ko hukm diyá, us meṉ tum ne merí bát mání.
3
Tum ne apne bháiyoṉ ko is muddat meṉ áj ke din tak nahíṉ chhoṛá, balki Ḳhudáwand apne Ḳhudá ke hukm kí tákíd par ‘amal kiyá.
4
Aur ab Ḳhudáwand tumháre Ḳhudá ne tumháre bháiyoṉ ko, jaisá us ne un se kahá thá árám baḳhshá hai, so tum ab lauṭkar apne apne ḍeroṉ ko apní mírásí sarzamín meṉ, jo Ḳhudáwand ke bande Músá ne Yardan ke us pár tum ko dí hai, chale jáo.
5
Faqat us farmán aur shará‘ par ‘amal karne kí niháyat ihtiyát rakhná, jis ká hukm Ḳhudáwand ke bande Músá ne tum ko diyá, ki tum Ḳhudáwand apne Ḳhudá se mahabbat rakkho, aur us kí sab ráhoṉ par chalo, aur us ke hukmoṉ ko máno, aur us se lipṭe raho, aur apne sáre dil aur apní sárí ján se us kí bandagí karo.
6
Aur Yashú‘ ne barakat dekar un ko ruḳhsat kiyá; aur wuh apne apne ḍere ko chale gaye.
7
Munassí ke ádhe qabíle ko to Músá ne Basan meṉ mírás dí thí, lekin us ke dúsre ádhe ko Yashú‘ ne un ke bháiyoṉ ke darmiyán Yardan ke is pár mag̣rib kí taraf hissa diyá. Aur jab Yashú‘ ne un ko ruḳhsat kiyá, ki apne apne ḍere ko jáeṉ, to un ko bhí barakat dekar
8
un se kahá, ki Baṛí daulat, aur bahut se chaupáye, aur chándí, aur soná, aur pítal, aur lohá, aur bahut sí poshák lekar tum apne apne ḍeroṉ ko lauṭo, aur apne dushmanoṉ ke mál i g̣anímat ko apne bháiyoṉ ke sáth báṉṭ lo.
9
Tab baní Rúbin, aur baní Jadd, aur Munassí ká ádhá qabíla lauṭe, aur wuh baní Isráíl ke pás se Sailá se, jo mulk i Kan‘án meṉ hai, rawána húe, táki wuh apne mírásí mulk Jili‘ád ko lauṭ jáeṉ, jis ke málik wuh Ḳhudáwand ke us hukm ke mutábiq húe the, jo us ne Músá kí ma‘rifat diyá thá.
10
Aur jab wuh Yardan ke pás ke us maqám meṉ pahuṉche, jo mulk i Kan‘án meṉ hai, to baní Rúbin, aur baní Jadd, aur Munassí ke ádhe qabíle ne waháṉ Yardan ke pás ek mazbah jo dekhne meṉ baṛá mazbah thá banáyá.
11
Aur baní Isráíl ke sunne meṉ áyá, ki Dekho, baní Rúbin, aur baní Jadd, aur Munassí ke ádhe qabíle ne mulk i Kan‘án ke sámne, Yardan ke gird ke maqám meṉ us ruḳh par, jo baní Isráíl ká hai, ek mazbah banáyá hai.
12
Jab baní Isráíl ne yih suná, to baní Isráíl kí sárí jamá‘at Sailá meṉ faráham húí, táki un par chaṛh jáe, aur laṛe.
13
Aur baní Isráíl ne Ilí‘azar káhin ke beṭe Fínihás ko baní Rúbin, aur baní Jadd, aur Munassí ke ádhe qabíle ke pás, jo mulk i Jili‘ád meṉ the, bhejá;
14
aur baní Isráíl ke qabíloṉ se har ek ke ábáí ḳhándán se ek amír ke hisáb se das amír us ke sáth kiye. Un meṉ se har ek hazár dar hazár Isráílíoṉ meṉ apne ábáí ḳhándán ká sardár thá.
15
So wuh baní Rúbin, aur baní Jadd, aur Munassí ke ádhe qabíle ke pás mulk i Jili‘ád meṉ áe, aur un se kahá, ki
16
Ḳhudáwand kí sárí jamá‘at yih kahtí hai, ki Tum ne Isráíl ke Ḳhudá se yih kyá sarkashí kí, ki áj ke din Ḳhudáwand kí pairawí se bargashta hokar apne liye ek mazbah banáyá, aur áj ke din tum Ḳhudáwand se bág̣í ho gaye?
17
Kyá hamáre liye Fag̣úr kí badkárí kuchh kam thí, jis se ham áj ke din tak pák nahíṉ húe, agarchi Ḳhudáwand kí jamá‘at meṉ wabá bhí áí, ki
18
tum áj ke din Ḳhudáwand kí pairawí se bargashta hote ho? aur chúṉki tum áj Ḳhudáwand se bág̣í hote ho, is liye kal yih hogá, ki Isráíl kí sárí jamá‘at par us ká qahr názil hogá.
19
Aur agar tumhárá mírásí mulk nápák hai, to tum Ḳhudáwand ke mírásí mulk meṉ pár á jáo, jaháṉ Ḳhudáwand ká maskan hai, aur hamáre darmiyán mírás lo: lekin Ḳhudáwand hamáre Ḳhudá ke mazbah ke siwá apne liye koí âur mazbah banákar na to Ḳhudáwand se bág̣í ho, aur na ham se bag̣áwat karo.
20
Kyá Zárah ke beṭe ‘Akan kí ḳhiyánat ke sabab se, jo us ne maḳhsús kí húí chíz meṉ kí, Isráíl kí sárí jamá‘at par g̣azab názil na húá? Wuh shaḳhs akelá hí apní badkárí meṉ halák nahíṉ húá.
21
Tab baní Rúbin, aur baní Jadd, aur Munassí ke ádhe qabíle ne hazár dar hazár Isráílíoṉ ke sardároṉ ko jawáb diyá, ki
22
Ḳhudáwand ḳhudáoṉ ká Ḳhudá, Ḳhudáwand ḳhudáoṉ ká Ḳhudá jántá hai, aur Isráílí bhí ján leṉge, agar is meṉ bag̣áwat, yá Ḳhudáwand kí muḳhálafat hai, (to tú ham ko áj jítá na chhoṛ,)
23
agar ham ne áj ke din is liye yih mazbah banáyá ho, ki Ḳhudáwand se bargashta ho jáeṉ, yá us par soḳhtaní qurbání, yá nazr kí qurbání, yá salámatí ke zabíhe chaṛháeṉ, to Ḳhudáwand hí is ká hisáb le;
24
balki ham ne is ḳhayál aur g̣araz se yih kiyá, ki kahíṉ áyanda zamáne meṉ tumhárí aulád hamárí aulád se yih na kahne lage, ki Tum ko Ḳhudáwand Isráíl ke Ḳhudá se kyá lená hai?
25
kyúṉki Ḳhudáwand ne to hamáre aur tumháre darmiyán, ai baní Rúbin aur baní Jadd, Yardan ko hadd ṭhahráyá hai; so Ḳhudáwand meṉ tumhárá koí hissa nahíṉ hai: yúṉ tumhárí aulád hamárí aulád se Ḳhudáwand ká ḳhauf chhuṛá degí.
26
Is liye ham ne kahá, ki Áo, ham apne liye ek mazbah banáná shurú‘ kareṉ, jo na soḳhtaní qurbání ke liye ho, aur na zabíhe ke liye,
27
balki wuh hamáre aur tumháre, aur hamáre ba‘d hamárí naslon ke darmiyán gawáh ṭhahre, táki ham Ḳhudáwand ke huzúr us kí ‘ibádat apní soḳhtaní qurbáníoṉ aur apne zabíhoṉ, aur salámatí ke hadyoṉ se kareṉ, aur áyanda zamáne meṉ tumhárí aulád hamárí aulád se kahne na páe, ki Ḳhudáwand meṉ tumhárá koí hissa nahíṉ.
28
Is liye ham ne kahá, ki Jab wuh ham se, yá hamárí aulád se áyanda zamáne meṉ yúṉ kaheṉge, to ham un ko jawáb deṉge, ki Dekho, Ḳhudáwand ke mazbah ká namúna, jise hamáre bápdádá ne banáyá; yih na soḳhtaní qurbání ke liye hai, na zabíhe ke liye, balki yih hamáre aur tumháre darmiyán gawáh hai.
29
Ḳhudá na kare, ki ham Ḳhudáwand se bág̣í hoṉ, aur áj Ḳhudáwand kí pairawí se bargashta hokar Ḳhudáwand apne Ḳhudá ke mazbah ke siwá, jo us ke ḳhaime ke sámne hai, soḳhtaní qurbání aur nazr kí qurbání aur zabíhe ke liye koí mazbah banáeṉ.
30
Jab Fínihás káhin aur jamá‘at ke amíron, ya‘ní hazár dar hazár Isráílíoṉ ke sardároṉ ne, jo us ke sáth áe the, yih báteṉ suníṉ, jo baní Rúbin, aur baní Jadd, aur baní Munassí ne kahíṉ, to wuh bahut ḳhush húe.
31
Tab Ilí‘azar ke beṭe Fínihás káhin ne baní Rúbin, aur baní Jadd, aur baní Munassí se kahá, Áj ham ne ján liyá, ki Ḳhudáwand hamáre darmiyán hai; kyúṉki tum se Ḳhudáwand kí yih ḳhatá nahíṉ húí. So tum ne baní Isráíl ko Ḳhudáwand ke háth se chhuṛá liyá hai.
32
Aur Ilí‘azar káhin ká beṭá Fínihás, aur wuh sardár Jili‘ád se, baní Rúbin aur baní Jadd ke pás se, mulk i Kan‘án meṉ baní Isráíl ke pás lauṭ áe, aur un ko yih májará sunáyá.
33
Tab baní Isráíl is bát se ḳhush húe, aur baní Isráíl ne Ḳhudá kí hamd kí, aur phir jang ke liye un par chaṛháí karne, aur us mulk ko tabáh karne ká nám na liyá jis meṉ baní Rúbin aur baní Jadd rahte the.
34
Tab baní Rúbin aur baní Jadd ne us mazbah ká nám ‘Íd yih kahkar rakkhá, ki Wuh hamáre darmiyán gawáh hai ki Yahowáh Ḳhudá hai.
← Chapter 21
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 23 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24