Joshua 20

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 19 Jump to: Chapter 21 →

1Aur Ḳhudáwand ne Yashú‘ se kahá, ki

2Baní Isráíl se kah, ki Apne liye panáh ke shahr, jin kí bábat maiṉ ne Músá kí ma‘rifat tum ko hukm kiyá, muqarrar karo;

3táki wuh ḳhúní, jo bhúl se aur nádánista kisí ko mar ḍále, waháṉ bhág jáe; aur wuh ḳhún ke intiqám lenewále se tumhárí panáh ṭhahreṉ.

4Wuh un shahroṉ meṉ se kisí meṉ bhág jáe, aur us shahr ke darwáze par khaṛá hokar us shahr ke buzurgoṉ ko apná hál kah sunáe. Tab wuh use shahr meṉ apne háṉ le jákar koí jagah deṉ, táki wuh un ke darmiyán rahe.

5Aur agar ḳhún ká intiqám lenewálá us ká píchhá kare, to wuh us ḳhúní ko us ke hawále na kareṉ, kyúṉki us ne apne paṛausí ko nádánista márá, aur pahle se us kí us se ‘adáwat na thí.

6Aur wuh jab tak faisale ke liye jamá‘at ke áge khaṛá na ho, aur un dinoṉ ká sardár káhin mar na jáe, tab tak usí shahr meṉ rahe; is ke ba‘d wuh ḳhúní lauṭkar apne shahr aur apne ghar meṉ, ya‘ní usí shahr meṉ áe jaháṉ se wuh bhágá thá.

7Pas unhoṉ ne Naftálí ke kohistání mulk meṉ Jalíl ke Qádis ko, aur Ifráím ke kohistání mulk meṉ Sikm ko, aur Yahúdáh ke kohistání mulk meṉ Qaryat Arba‘ ko jo Habrún hai, alag kiyá.

8Aur Yaríhú ke pás ke Yardan ke mashriq kí taraf Rúbin ke qabíle ke maidán meṉ Basar ko, jo biyábán meṉ hai, aur Jadd ke qabíle ke hisse meṉ Rámah ko, jo Jili‘ád meṉ hai, aur Munassí ke qabíle ke hisse meṉ Jaulán ko, jo Basan meṉ hai, muqarrar kiyá.

9Yihí wuh shahr haiṉ, jo sab baní Isráíl aur un musáfiroṉ ke liye, jo un ke darmiyán baste haiṉ, is liye ṭhahráe gaye, ki jo koí nádánista kisí ko qatl kare, wuh waháṉ bhág jáe, aur jab tak wuh jamá‘at ke áge khaṛá na ho, tab tak ḳhún ke intiqám lenewále ke háth se márá na jáe.

← Chapter 19 Jump to: Chapter 21 →