Joshua 13

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 12 Jump to: Chapter 14 →

1Aur Yashú‘ buḍḍhá aur ‘umrrasída húá; aur Ḳhudáwand ne us se kahá, ki Tú buḍḍhá aur ‘umrrasída hai, aur qabza karne ko abhí bahut sá mulk báqí hai.

2Aur wuh mulk jo báqí hai, so yih hai: Filistíoṉ ke sáre aqlím, aur sáre Jasúrí,

3Saihúr se, jo Misr ke sámne hai, shimál kí taraf ‘Aqrún kí hadd tak jo Kan‘áníoṉ ká giná játá hai; Filistíoṉ ke páṉch sardár, ya‘ní G̣azí, aur Ashdúdí, aur Asqalúní, aur Játí, aur ‘Aqrúní; aur ‘Awwím bhí,

4jo junúb kí taraf haiṉ, aur Kan‘áníoṉ ká sárá mulk, aur Mag̣árah, jo Saidáníoṉ ká hai; Afíq ya‘ní Amoríoṉ kí sarhadd tak;

5aur Jabalíoṉ ká mulk, aur mashriq kí taraf Ba‘l Jadd se, jo koh i Harmún ke níche hai, Hamát ke madḳhal tak sárá Lubnán.

6Phir Lubnán se Misrafátu’l Máim tak kohistání mulk ke sab báshinde, ya‘ní sab Saidání, un ko maiṉ baní Isráíl ke sámne se nikál ḍálúṉgá. Tú faqat, jaisá main ne tujhe hukm diyá hai, mírás ke taur par use Isráílíoṉ ko taqsím kar de.

7So tú is mulk ko un nau qabíloṉ aur Munassí ke ádhe qabíle ko mírás ke taur par báṉṭ de.

8Munassí ke sáth baní Rúbin aur baní Jadd ne apní apní mírás pá lí thí, jise Músá ne Yardan ke us pár mashriq kí taraf un ko diyá thá, kyúṉki Ḳhudáwand ke bande Músá ne use un hí ko diyá thá, ya‘ní

9‘Aro‘ír se, jo wádí e Arnon ke kanáre wáqi‘ hai, shurú‘ karke wuh shahr, jo wádí ke bích meṉ hai, aur Mídbá ká sárá maidán Díbon tak;

10aur Amoríoṉ ke bádsháh Síhon ke sáre shahr, jo Hasbon meṉ saltanat kartá thá, baní ‘Ammon kí sarhadd tak;

11aur Jili‘ád, aur Jasúríoṉ, aur Ma‘kátíoṉ kí nawáhí, aur sárá koh i Harmún, aur sárá Basan Salkah tak;

12aur ‘Oj jo Rafáím kí baqiya nasl se thá, aur ‘Istárát aur Adra‘í meṉ hukmrán thá, us ká sárá ‘iláqa jo Basan meṉ thá; kyúṉki Músá ne un ko márkar ḳhárij kar diyá thá.

13Taubhí baní Isráíl ne Jasúríoṉ aur Ma‘kátíoṉ ko nahíṉ nikálá; chunáṉchi Jasúrí aur Ma‘kátí áj tak Isráílíoṉ ke darmiyán base húe haiṉ.

14Faqat Láwí ke qabíle ko us ne koí mírás nahíṉ dí, kyúṉki Ḳhudáwand Isráíl ke Ḳhudá kí átashín qurbáníáṉ us kí mírás haiṉ, jaisá us ne us se kahá thá.

15Aur Músá ne baní Rúbin ke qabíle ko un ke gharánoṉ ke mutábiq mírás dí.

16Aur un kí sarhadd yih thí: ya‘ní ‘Aro‘ír se, jo wádí e Arnon ke kanáre wáqi‘ hai, aur wuh shahr, jo wádí ke bích meṉ hai, aur Mídbá ke pás ká sárá maidán;

17Hasbon aur us ke sáre shahr jo maidáṉ meṉ haiṉ; Díbon, aur Bámát Ba‘l, aur Bait Ba‘l Ma‘ún;

18aur Yahsáh, aur Qadímát, aur Mafa‘t;

19aur Qaryatáim, aur Sibmáh, aur Zaratu’l Sahar jo wádí ke koh meṉ hai;

20aur Bait Fag̣úr aur Pisgah ke dáman kí zamín, aur Bait Yashímot;

21aur maidán ke sáre shahr, aur Amoríoṉ ke bádsháh Síhon ká sárá mulk, jo Hasbon meṉ saltanat kartá thá, jise Músá ne Midyán ke raísoṉ, ‘Awwí aur Raqam, aur Súr, aur Húr, aur Raba‘, Síhon ke raísoṉ samet, jo us mulk meṉ baste the, qatl kiyá thá.

22Aur Ba‘or ke beṭe Bal‘ám ko bhí, jo nujúmí thá, baní Isráíl ne talwár se qatl karke un ke maqtúloṉ ke sáth milá diyá thá.

23Aur Yardan aur us kí nawáhí baní Rúbin kí sarhadd thí. Yihí shahr aur un ke gáṉw baní Rúbin ke gharánoṉ ke mutábiq un kí mírás ṭhahre.

24Aur Músá ne Jadd ke qabíle ya‘ní baní Jadd ko, un ke gharánoṉ ke mutábiq mírás dí.

25Aur un kí sarhadd yih thí: Ya‘zer, aur Jili‘ád ke sáre shahr, aur baní ‘Ammon ká ádhá mulk ‘Aro‘ír tak, jo Rabbah ke sámne hai;

26aur Hasbon se Rámatu’l Misfáh aur Batúním tak, aur Mahanáyim se Dabír kí sarhadd tak;

27aur wádí meṉ, Bait Háram, aur Bait Nimrah, aur Sukkát, aur Safon, ya‘ní Hasbon ke bádsháh Síhon kí aqlím ká báqí hissa, aur Yardan ke us pár mashriq kí taraf Kinnarat kí jhíl ke us sire tak Yardan aur us kí sárí nawáhí.

28Yihí shahr aur in ke gáṉw baní Jadd ke gharánoṉ ke mutábiq, un kí mírás ṭhahre.

29Aur Músá ne Munassí ke ádhe qabíle ko bhí mírás dí. Yih baní Munassí ke gharánoṉ ke mutábiq un ke ádhe qabíle ke liye thí.

30Aur un kí sarhadd yih thí: Mahanáyim se lekar sárá Basan, aur Basan ke bádsháh ‘Oj kí tamám aqlím aur Yáír ke sáre qasbe jo Basan meṉ haiṉ, wuh sáṭh shahr haiṉ.

31Aur ádhá Jili‘ád, aur ‘Istárát, aur Adra‘í, jo Basan ke bádsháh ‘Oj ke shahr the, yih Munassí ke beṭe Makír kí aulád ko mile, ya‘ní Makír kí aulád ke ádhe ádmíoṉ ko un ke gharánoṉ ke mutábiq yih mile.

32Yihí wuh hisse haiṉ, jin ko Músá ne Yaríhú ke pás Yardan ke us pár mashriq kí taraf mírás ke taur par taqsím kiyá.

33Lekin Láwí ke qabíle ko Músá ne koí mírás nahíṉ dí; kyúṉki Ḳhudáwand Isráíl ká Ḳhudá un kí mírás hai, jaisá us ne un se ḳhud kahá.

← Chapter 12 Jump to: Chapter 14 →