Joshua 15

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 14 Jump to: Chapter 16 →

1Aur baní Yahúdáh ke qabíle ká hissa un ke gharánoṉ ke mutábiq qur‘a ḍálkar Adom kí sarhadd tak, aur junúb meṉ dasht i Sín tak, jo junúb ke intiháí hisse meṉ wáqi‘ hai, ṭhahrá.

2Aur un kí junúbí hadd daryá e Shor ke intiháí hisse kí us kháṛí se, jis ká ruḳh junúb kí taraf hai, shurú‘ húí.

3Aur wuh ‘Aqrábbím kí chaṛháí kí junúbí simt se nikal Sín hotí húí Qádis Barní‘a ke junúb ko gayí. Phir Hasron ke pás se Adár ko jákar Qarqa‘ ko muṛí;

4aur waháṉ se ‘Azmún hotí húí Misr ke nále ko já niklí, aur us hadd ká ḳhátima samundar par húá. Yihí tumhárí junúbí sarhadd hogí.

5Aur mashriqí sarhadd Yardan ke daháne tak daryá e Shor hí ṭhahrá, aur us kí shimálí hadd us daryá kí us kháṛí se, jo Yardan ke daháne par hai, shurú‘ húí.

6Aur yih hadd Bait Hajlah ko jákar aur Baitu’l ‘Arábah ke shimál se guzarkar Rúbin ke beṭe Bohan ke patthar ko pahuṉchí.

7Phir waháṉ se wuh hadd ‘Akúr kí wádí hotí húí Dabír ko gayí, aur waháṉ se shimál kí simt ko chalkar Jiljál ke sámne, jo Adummím kí chaṛháí ke muqábil hai, já niklí; yih chaṛháí nadí ke junúb meṉ hai. Phir wuh hadd ‘Ain Shams ke chashmoṉ ke pás hokar ‘Ain Rájil pahuṉchí.

8Phir wuhí hadd Hinnúm ke beṭe kí wádí meṉ se hokar Yabúsíoṉ kí bastí ke junúb ko gayí, (Yarúshalem wuhí hai,) aur waháṉ se us paháṛ kí choṭí ko já niklí, jo wádí e Hinnúm ke muqábil mag̣rib kí taraf, aur Rifáím kí wádí ke shimálí intiháí hisse meṉ wáqi‘ hai.

9Phir wuhí hadd paháṛ kí choṭí se áb i Naftúah ke chashme ko gayí, aur waháṉ se koh i ‘Ifron ke shahroṉ ke pás já niklí; aur udhar se Ba‘lah tak, jo Qaryat Ya‘rím hai, pahuṉchí:

10aur Ba‘lah se hokar mag̣rib kí simt koh i Sha‘ír ko phirí, aur koh i Ya‘rím, ke, jo Kaslún bhí kahlátá hai, shimálí dáman ke pás se guzarkar Bait Shams kí taraf utartí húí Timnah ko gayí.

11Aur waháṉ se wuh hadd ‘Aqrún ke shimál ko já niklí. Phir wuh Sikrún se hokar koh i Ba‘lah ke pás se guzartí húí Yabníel par já niklí, aur is hadd ká ḳhátima samundar par húá.

12Aur mag̣ribí sarhadd baṛá samundar aur us ká sáhil thá. Baní Yahúdáh kí chároṉ taraf kí hadd un ke gharánoṉ ke mutábiq yihí hai.

13Aur Yashú‘ ne us hukm ke mutábiq jo Ḳhudáwand ne use diyá thá, Yufannah ke beṭe Kálib ko baní Yahúdáh ke darmiyán ‘Anáq ke báp Arba‘ ká shahr Qaryat Arba‘ jo Habrún hai hissa diyá.

14So Kálib ne waháṉ se ‘Anáq ke tínoṉ beṭoṉ, ya‘ní Sísí, aur Aḳhímán, aur Talmí ko, jo baní ‘Anáq haiṉ, nikál diyá.

15Aur wuh waháṉ se Dabír ke báshindoṉ par chaṛh gayá. Dabír ká qadímí nám Qaryat Sifar thá.

16Aur Kálib ne kahá, Jo koí Qaryat Sifar ko márkar us ko sar kar le, use maiṉ apní beṭí ‘Aksah biyáh dúṉgá.

17Tab Kálib ke bháí Qanaz ke beṭe G̣utníel ne us ko sar kar liyá; so us ne apní beṭí ‘Aksah use biyáh dí

18Jab wuh us ke pás áí, to us ne us ádmí ko ubhárá, ki wuh us ke báp se ek khet máṉge. So wuh apne gadhe par se utar paṛí. Tab Kálib ne us se kahá, Tú kyá cháhtí hai?

19Us ne kahá, Mujhe barakat de, kyúṉki tú ne junúb ke mulk meṉ kuchh zamín mujhe ‘ináyat kí hai, so mujhe pání ke chashme bhí de. Tab us ne use úpar ke chashme aur níche ke chashme ‘ináyat kiye.

20Baní Yahúdáh ke qabíle kí mírás, un ke gharánoṉ ke mutábiq, yih hai.

21Aur Adom kí sarhadd kí taraf junúb meṉ baní Yahúdáh ke intiháí shahr yih haiṉ: Qabzíel, aur ‘Edar, aur Yajúr;

22aur Qainah, aur Daimúnah, aur ‘Ad‘adah;

23aur Qádis, aur Hasúr, aur Itnán;

24Zíf, aur Talam, aur Ba‘lot;

25aur Hasúr, aur Hadatah, aur Qaryat Hasron, jo Hasúr hai;

26aur Amám, aur Sama‘, aur Moládah;

27aur Hasár Jaddah, aur Hishmon, aur Bait Falat;

28aur Hasar Su‘ál, aur Baírsaba‘, aur Bizyotyáh;

29Ba‘lah, aur ‘Aiyím, aur ‘Azam;

30aur Iltolád, aur Kasíl, aur Hurmah;

31aur Siqláj, aur Madmannah, aur Sansannáh;

32aur Labáot, aur Silhím, aur ‘Ain, aur Rimmon. Yih sab untís shahr haiṉ, aur in ke gáṉw bhí haiṉ.

33Aur nasheb kí zamín meṉ; Istál, aur Sur‘áh aur Asnáh;

34aur Zanúh, aur ‘Ain Janním, Taffúah, aur ‘Ainám;

35Yarmot, aur ‘Adullám, Shokah, aur ‘Azíqah;

36aur Sha‘rím, aur ‘Adítím, aur Jadírah, aur Jadíratím. Yih chaudah shahr haiṉ, aur in ke gáṉw bhí haiṉ.

37Zinán, aur Hadásha, aur Mijdal Jadd;

38aur Dil‘án, aur Misfáh, aur Yuqtíel;

39Lakís, aur Busqat, aur ‘Ijlún;

40aur Kabbún, aur Lahmám, aur Kitlís;

41aur Jadírot, aur Bait Dajún, aur Na‘mah, aur Muqqaidah. Yih solah shahr haiṉ, aur in ke gáṉw bhí haiṉ.

42Libnáh, aur ‘Atr, aur ‘Asan;

43aur Yaftáh, aur Asnah, aur Nasíb;

44aur Qa‘ílah, aur Akzíb, aur Maresah. Yih nau shahr haiṉ, aur in ke gáṉw bhí haiṉ.

45‘Aqrún aur us ke qasbe aur gáṉw;

46‘Aqrún se samundar tak Ashdúd ke pás ke sáre shahr, aur un ke gáṉw.

47Ashdúd apne shahroṉ aur gáṉwoṉ samet; aur G̣azzah apne shahroṉ aur gáṉwoṉ samet Misr kí nadí aur baṛe samundar aur us ke sáhil tak.

48Aur kohistání mulk meṉ Samír, aur Yatír, aur Shokah;

49aur Dannáh, aur Qaryat Sannah, jo Dabír hai;

50aur ‘Anáb, aur Istimoh, aur ‘Aním;

51aur Jashan, aur Haulún, aur Jiloh. Yih gyárah shahr haiṉ, aur in ke gáṉw bhí haiṉ.

52Aráb, aur Domáh, aur Ish‘án;

53aur Yaním, aur Bait Taffúah, aur Afíqah;

54aur Humtah, aur Qaryat Arba‘, jo Habrún hai, aur Sí‘úr. Yih nau shahr haiṉ, aur in ke gáṉw bhí haiṉ.

55Ma‘ún, Karmil, aur Zíf, aur Yúttah;

56aur Yazra‘el, aur Yaqdi‘ám, aur Zanúah;

57Qain Jibi‘ah, aur Timnáh. Yih das shahr haiṉ, aur in ke gáṉw bhí haiṉ.

58Halhúl, aur Bait Súr aur Jadúr;

59aur Ma‘rát, aur Bait ‘Anot; aur Iltiqún. Yih chha shahr haiṉ, aur in ke gáṉw bhí haiṉ.

60Qaryat Ba‘l, jo Qaryat Ya‘rím hai, aur Rabbah. Yih do shahr haiṉ, aur in ke gáṉw bhí haiṉ.

61Aur biyábán meṉ: Bait ‘Arábah, aur Maddín, aur Sakákah;

62aur Nabsán, aur namak ká shahr aur ‘Ain Jaddí. Yih chha shahr haiṉ, aur in ke gáṉw bhí haiṉ.

63Aur Yabúsíoṉ ko jo Yarúshalem ke báshinde the, baní Yahúdáh nikál na sake; so Yabúsí baní Yahúdáh ke sáth áj ke din tak Yarúshalem meṉ base húe haiṉ.

← Chapter 14 Jump to: Chapter 16 →