Joshua 17

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 16 Jump to: Chapter 18 →

1Aur Munassí ke qabíle ká hissa qur‘a ḍálkar yih ṭhahrá, kyúṉki wuh Yúsuf ká pahlauṭhá thá, aur chúṉki Munassí ká pahlauṭhá beṭá Makír jo Jili‘ád ká báp thá jangí mard thá, is liye us ko Jili‘ád aur Basan mile.

2So yih hissa baní Munassí ke báqí logoṉ ke liye un ke gharánoṉ ke mutábiq thá, ya‘ní baní Abí‘azar, aur baní Ḳhalaq, aur baní Isríel, aur baní Sikm, aur baní Hifr, aur baní Samida‘ ke liye: Yúsuf ke beṭe Munassí ke farzand i narína apne apne gharáne ke mutábiq yihí the.

3Aur Siláfihád bin Hifr bin Jili‘ád bin Makír bin Munassí ke beṭe nahíṉ, balki beṭiyáṉ thíṉ: aur us kí beṭiyoṉ ke nám yih haiṉ; Mahláh, aur Nú‘áh, aur Hujláh, aur Milkáh, auṛ Tirzáh.

4So wuh Ilí‘azar káhin aur Nún ke beṭe Yashú‘ aur sardároṉ ke áge ákar kahne lagíṉ, ki Ḳhudáwand ne Músá ko hukm diyá thá, ki wuh ham ko hamáre bháiyoṉ ke darmiyán mírás de: chunáṉchi Ḳhudáwand ke hukm ke mutábiq us ne un ke báp ke bháiyoṉ ke darmiyán un ko mírás dí.

5So Munassí ko Jili‘ád aur Basan ke mulk ko chhoṛkar, jo Yardan ke us pár hai, das hisse âur mile,

6kyúṉki Munassí kí beṭiyoṉ ne bhí beṭoṉ ke sáth mírás páí, aur Munassí ke báqí beṭoṉ ko Jili‘ád ká mulk milá.

7Aur Áshar se lekar Mikmatáh tak, jo Sikm ke muqábil hai, Munassí kí hadd thí; aur wuhí hadd dahine háth par ‘Ain Taffúah ke báshindoṉ tak chalí gayí.

8Yúṉ Taffúah kí zamín to Munassí kí húí, par Taffúah shahr, jo Munassí kí sarhadd par thá, baní Ifráím ká hissa ṭhahrá.

9Phir waháṉ se wuh hadd Qánáh ke nále ko utarkar us ke junúb kí taraf pahuṉchí. Yih shahr jo Munassí ke shahroṉ ke darmiyán haiṉ, Ifráím ke ṭhahre, aur Munassí kí hadd us nále ke shimál kí taraf se hokar samundar par ḳhatm húí.

10So junúb kí taraf Ifráím kí, aur shimál kí taraf Munassí kí mírás paṛí, aur us kí sarhadd samundar thí. Yúṉ wuh donoṉ shimál kí taraf Áshar se, aur mashriq kí taraf Ishkár se já milíṉ.

11Aur Ishkár aur Áshar kí hadd meṉ Bait Shán aur us ke qasbe, aur Iblí‘ám aur us ke qasbe, aur ahl i Dor aur us ke qasbe, aur ahl i ‘Ain Dor aur us ke qasbe, aur ahl i Ta‘nák aur us ke qasbe, aur alh i Majiddo aur us ke qasbe, balki tínoṉ murtafa‘ maqámát Munassí ko mile.

12Taubhí baní Munassí un shahroṉ ke rahnewáloṉ ko nikál na sake, balki us mulk meṉ Kan‘ání base hí rahe.

13Aur jab baní Isráíl zoráwar ho gaye, to unhoṉ ne Kan‘áníoṉ se begár ká kám liyá aur un ko bi’lkull nikál báhar na kiyá.

14Aur baní Yúsuf ne Yashú‘ se kahá, ki Tú ne kyúṉ qur‘a ḍálkar ham ko faqat ek hí hissa mírás ke liye diyá, agarchi ham baṛí qaum haiṉ, kyúṉki Ḳhudáwand ne ham ko barakat dí hai?

15Yashú‘ ne un ko jawáb diyá, ki Agar tum baṛí qaum ho, to jangal meṉ jáo, aur waháṉ Farizzíoṉ aur Rifáím ke mulk ko apne liye káṭkar sáf kar lo, kyúṉki Ifráím ká kohistání mulk tumháre liye bahut tang hai.

16Baní Yúsuf ne kahá, ki Yih kohistání mulk hamáre liye káfí nahíṉ hai; aur sáre Kan‘áníoṉ ke pás, jo nasheb ke mulk meṉ rahte haiṉ, ya‘ní wuh jo Bait Shán aur us ke qasboṉ meṉ, aur wuh jo Yazra‘el kí wádí meṉ rahte haiṉ, donoṉ ke pás lohe ke rath haiṉ.

17Yashú‘ ne baní Yúsuf ya‘ní Ifráím aur Munassí se kahá, ki Tum baṛí qaum ho, aur baṛá zor rakhte ho, so tumháre liye faqat ek hí hissa na hogá;

18balki yih kohistání mulk bhí tumhárá hogá; kyúṉki agarchi wuh jangal hai, tum use káṭkar sáf kar ḍálná, aur us ke maḳhárij bhí tumháre hí ṭhahreṉge, kyúṉki tum Kan‘áníoṉ ko nikál doge, agarchi un ke pás lohe ke rath haiṉ aur wuh zoráwar bhí haiṉ.

← Chapter 16 Jump to: Chapter 18 →