bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
Joshua 11
Joshua 11
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 10
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 12 →
1
Jab Hasúr ke bádsháh Yábín ne yih suná, to us ne Madún ke bádsháh Yúbáb, aur Simron ke bádsháh, aur Iksháf ke bádsháh ko,
2
aur un bádsháhoṉ ko, jo shimál kí taraf kohistání mulk aur Kinnarat ke junúb ke maidán aur nasheb kí zamín aur mag̣rib kí taraf Dor kí murtafa‘ zamín meṉ rahte the,
3
aur mashriq aur mag̣rib ke Kan‘áníoṉ, aur Amoríoṉ, aur Hittíoṉ, aur Farizzíoṉ aur kohistání mulk ke Yabúsíoṉ, aur Hawwíoṉ ko, jo Harmún ke níche Misfáh ke mulk meṉ rahte the bulwá bhejá.
4
Tab wuh aur un ke sáth un ke lashkar, ya‘ní ek amboh i kasír jo ta‘dád meṉ samundar ke kanáre kí ret kí mánind thá, bahut se ghoṛoṉ aur rathoṉ ko sáth lekar nikle.
5
Aur yih sab bádsháh milkar áe aur unhoṉ ne Merúm kí jhíl par ikaṭṭhe ḍere ḍále, táki Isráílíoṉ se laṛeṉ.
6
Tab Ḳhudáwand ne Yashú‘ se kahá, kí Un se na ḍar, kyúṉki kal is waqt maiṉ in sab ko Isráílíoṉ ke sámne márkar ḍál dúṉgá. Tú un ke ghoṛoṉ kí kúṉcheṉ káṭ ḍálna, aur un ke rath ág se jalá dená.
7
Chunáṉchi Yashú‘, aur sab jangí mard us ke sáth Merúm kí jhíl par nágahán un ke muqábale ko áe aur un par ṭúṭ paṛe.
8
Aur Ḳhudáwand ne un ko Isráílíoṉ ke qabze meṉ kar diyá: so unhoṉ ne un ko márá, aur baṛe Saidá, aur Misrafátu’l Máim, aur mashriq meṉ Misfáh kí wádí tak un ko ragedá, aur qatl kiyá, yaháṉ tak ki un meṉ se ek bhí báqí na chhoṛá.
9
Aur Yashú‘ ne Ḳhudáwand ke hukm ke muwáfiq un se kiyá, ki un ke ghoṛoṉ kí kúṉcheṉ káṭ ḍálíṉ, aur un ke rath ág se jalá diye.
10
Phir Yashú‘ usí waqt lauṭá aur us ne Hasúr ko sar karke us ke bádsháh ko talwár se márá; kyúṉki agle waqt meṉ Hasúr un sárí saltanatoṉ ká sardár thá.
11
Aur unhoṉ ne un sab logoṉ ko, jo waháṉ the, tah i teg̣ karke un ko bi’lkull halák kar diyá; waháṉ koí mutanaffis báqí na rahá: phir us ne Hasúr ko ág se jalá diyá.
12
Aur Yashú‘ ne un bádsháhoṉ ke sáre shahroṉ ko, aur un shahroṉ ke sáre bádsháhoṉ ko lekar, aur un ko tah i teg̣ karke bi’lkull halák kar diyá, jaisá ki Ḳhudáwand ke bande Músá ne hukm kiyá thá.
13
Lekin jo shahr apne ṭíloṉ par bane húe the, un meṉ se kisí ko Isráílíoṉ ne nahíṉ jaláyá, siwá Hasúr ke, jise Yashú‘ ne phúṉk diyá thá.
14
Aur un shahroṉ ke tamám mál i g̣anímat aur chaupáyoṉ ko baní Isráíl ne apne wáste lúṭ meṉ le liyá; lekin har ek ádmí ko talwár kí dhár se qatl kiyá, yaháṉ tak ki un ko nábúd kar diyá aur ek mutanaffis ko bhí báqí na chhoṛá.
15
Jaisá Ḳhudáwand ne apne bande Músá ko hukm diyá thá, waisá hí Músá ne Yashú‘ ko hukm diyá, aur Yashú‘ ne waisá hí kiyá; aur jo jo hukm Ḳhudáwand ne Músá ko diyá thá, un meṉ se kisí ko us ne bag̣air púrá kiye na chhoṛá.
16
So Yashú‘ ne us sáre mulk ko, ya‘ní kohistání mulk aur sab junúbí qit‘a aur Jashan ke sab mulk, aur nasheb kí zamín, aur maidán, aur Isráílíoṉ ke kohistání mulk aur usí ke nasheb kí zamín
17
koh i Ḳhalaq se lekar jo Sha‘ír kí taraf játá hai, Ba‘l Jadd tak, jo wádí e Lubnán meṉ koh i Harmún ke níche hai, sab ko le liyá, aur un ke sab bádsháhoṉ par fath hásil karke us ne un ko márá, aur qatl kiyá.
18
Aur Yashú‘ muddat tak un sab báhsháhoṉ se laṛtá rahá.
19
Siwá Hawwíoṉ ke, jo Jiba‘ún ke báshinde the, âur kisí shahr ne baní Isráíl se sulh nahíṉ kí, balki sab ko unhoṉ ne laṛkar fath kiyá.
20
Kyúṉki yih Ḳhudáwand hí kí taraf se thá, ki wuh un ke diloṉ ko aisá saḳht kar de, ki wuh jang meṉ Isráíl ká muqábala kareṉ, táki wuh un ko bi’lkull halák kar ḍále, aur un par kuchh mihrbání na ho, balki wuh un ko nest o nábúd kar de, jaisá Ḳhudáwand ne Músá ko hukm diyá thá.
21
Phir us waqt Yashú‘ ne ákar ‘Anáqím ko kohistání mulk, ya‘ní Habrún, aur Dabír, aur ‘Anáb se, balki Yahúdáh ke sáre kohistání mulk, aur Isráíl ke sáre kohistání mulk se káṭ ḍálá. Yashú‘ ne un ko un ke shahroṉ samet bi’lkull halák kar diyá.
22
So ‘Anáqím meṉ se koí baní Isráíl ke mulk meṉ báqí na rahá; faqat G̣azzah, aur Ját, aur Ashdúd meṉ thoṛe se báqí rahe.
23
Pas jaisá Ḳhudáwand ne Músá se kahá thá, us ke mutábiq Yashú‘ ne sáre mulk ko le liyá; aur Yashú‘ ne use Isráílíon ko un ke qabíloṉ kí taqsím ke muwáfiq mírás ke taur par de diyá, aur mulk ko jang se farág̣at milí.
← Chapter 10
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 12 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24