bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
Joshua 7
Joshua 7
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 8 →
1
Lekin baní Isráíl ne maḳhsús kí húí chíz meṉ ḳhiyánat kí; kyúṉki ‘Akan bin Karmí bin Zabdí bin Zárah ne, jo Yahúdáh ke qabíle ká thá, un maḳhsús kí húí chízoṉ meṉ se kuchh le liyá: so Ḳhudáwand ká qahr baní Isráíl par bhaṛká.
2
Aur Yashú‘ ne Yaríhú se ‘Ai ko, jo Baitel kí mashriqí simt meṉ Baitáwan ke qaríb wáqi‘ hai, kuchh log yih kahkar bheje, ki Jákar mulk ká hál daryáft karo. Aur in logoṉ ne jákar ‘Ai ká hál daryáft kiyá.
3
Aur wuh Yashú‘ ke pás lauṭe, aur us se kahá, Sab log na jáeṉ; faqat do tín hazár mard chaṛh jáeṉ, aur ‘Ai ko már leṉ; sab logoṉ ko waháṉ jáne kí taklíf na de; kyúṉki wuh thoṛe se haiṉ.
4
Chunáṉchi logoṉ meṉ se tín hazár mard ke qaríb waháṉ chaṛh gaye, aur ‘Ai ke logoṉ ke sámne se bhág áe.
5
Aur ‘Ai ke logoṉ ne un meṉ se koí chhattís ádmí már liye, aur pháṭak ke sámne se lekar Shabarím tak un ko khadeṛte áe, aur utár par un ko márá: so un logoṉ ke dil pighalkar pání kí tarah ho gaye.
6
Tab Yashú‘ aur sáre Isráílí buzurgoṉ ne apne apne kapṛe pháṛe, aur Ḳhudáwand ke ‘ahd ke sandúq ke áge shám tak zamín par auṉdhe paṛe rahe, aur apne apne sir par ḳhák ḍálí.
7
Aur Yashú‘ ne kahá, Háe, ai Málik Ḳhudáwand, tú ham ko Amoríoṉ ke háth meṉ hawále karke hamárá nás karáne kí ḳhátir is qaum ko Yardan ke is pár kyúṉ láyá? kásh ki ham qaná‘at karte, aur Yardan ke us pár hí búdobásh karte.
8
Ai Málik, Isráílíoṉ ke apne dushmanoṉ ke áge píṭh pher dene ke ba‘d maiṉ kyá kahúṉ!
9
Kyúṉki Kan‘ání aur is mulk ke sab báshinde yih sunkar ham ko gher leṉge, aur hamárá nám zamín par se miṭá ḍáleṉge: phir tú apne buzurg nám ke liye kyá karegá?
10
Aur Ḳhudáwand ne Yashú‘ se kahá, Uṭh, khaṛá ho; tú kyúṉ is tarah auṉdhá paṛá hai?
11
Isráílíoṉ ne gunáh kiyá, aur unhoṉ ne us ‘ahd ko, jis ká maiṉ ne un ko hukm diyá, toṛá hai; unhoṉ ne maḳhsús kí húí chízoṉ meṉ se kuchh le bhí liyá, aur chorí bhí kí, aur riyákárí bhí kí, aur apne asbáb meṉ use milá bhí liyá hai.
12
Is liye baní Isráíl apne dushmanoṉ ke áge ṭhahr nahíṉ sakte, wuh apne dushmanoṉ ke áge píṭh pherte haiṉ, kyúṉki wuh mal‘ún ho gaye; maiṉ áge ko tumháre sáth nahíṉ rahúṉgá, jab tak tum maḳhsús kí húí chíz ko apne darmiyán se nest na kar do.
13
Uṭh, logoṉ ko pák kar, aur kah, ki Tum apne ko kal ke liye pák karo: kyúṉki Ḳhudáwand Isráíl ká Ḳhudá yúṉ farmátá hai, ki Ai Isráílío, tumháre darmiyán maḳhsús kí húí chíz maujúd hai: tum apne dushmanoṉ ke áge ṭhahr nahíṉ sakte, jab tak tum us maḳhsús kí húí chíz ko apne darmiyán se dúr na kar do.
14
So tum kal subh ko apne apne qabíle ke mutábiq házir kiye jáoge; aur jis qabíle ko Ḳhudáwand pakṛe, wuh ek ek ḳhándán karke pás áe, aur jis ḳhándán ko Ḳhudáwand pakṛe, wuh ek ek ghar karke pás áe, aur jis ghar ko Ḳhudáwand pakṛe, wuh ek ek ádmí karke pás áe.
15
Tab jo koí maḳhsús kí húí chíz rakhtá húá pakṛá jáe, wuh aur jo kuchh us ká ho, sab ág se jalá diyá jáe; is liye ki us ne Ḳhudáwand ke ‘ahd ko toṛ ḍálá, aur baní Isráíl ke darmiyán sharárat ká kám kiyá.
16
Pas Yashú‘ ne subh sawere uṭhkar Isráílíoṉ ko qabíla ba qabíla házir kiyá; aur Yahúdáh ká qabíla pakṛá gayá.
17
Phir wuh Yahúdáh ke ḳhándánoṉ ko nazdík láyá, aur Zárah ká ḳhándán pakṛá gayá. Phir wuh Zárah ke ḳhándán ke ek ek ádmí ko nazdík láyá, aur Zabdí pakṛá gayá.
18
Phir wuh us ke gharáne ke ek ke mard ko nazdík láyá, aur ‘Akan bin Karmí bin Zabdí bin Zárah, jo Yahúdáh ke qabíle ká thá, pakṛá gayá.
19
Tab Yashú‘ ne ‘Akan se kahá, Ai mere farzand, maiṉ terí minnat kartá húṉ, ki Ḳhudáwand Isráíl ke Ḳhudá kí tamjíd kar, aur us ke áge iqrár kar: ab tú mujhe batá de, ki tú ne kyá kiyá hai, aur mujh se mat chhipá.
20
Aur ‘Akan ne Yashú‘ ko jawáb diyá, Fi’lhaqíqat maiṉ ne Ḳhudáwand Isráíl ke Ḳhudá ká gunáh kiyá hai, aur yih yih mujh se sarzad húá hai,
21
ki jab maiṉ ne lúṭ ke mál meṉ Bábul kí ek nafís chádar, aur do sau misqál chándí, aur pachás misqál sone kí ek íṉṭ dekhí, to maiṉ ne lalchákar un ko le liyá; aur dekh, wuh mere ḍere meṉ zamín meṉ chhipáí húí haiṉ, aur chándí un ke níche hai.
22
Pas Yashú‘ ne qásid bheje; wuh us ḍere ko dauṛe gaye, aur kyá dekhá, ki wuh us ke ḍere meṉ chhipáí húí haiṉ, aur chándí un ke níche hai.
23
Wuh un ko ḍere meṉ se nikálkar Yashú‘ aur sab baní Isráíl ke pás láe, aur un ko Ḳhudáwand ke huzúr rakh diyá.
24
Tab Yashú‘ aur sab Isráílíoṉ ne Zárah ke beṭe ‘Akan ko, aur us chándí aur chádar, aur sone kí íṉṭ ko, aur us ke beṭoṉ, aur beṭiyoṉ ko, aur us ke bailoṉ, aur gadhoṉ, aur bheṛ bakriyoṉ, aur ḍere ko, aur jo kuchh us ká thá, sab ko liyá, aur wádí e ‘Akúr meṉ un ko le gaye.
25
Aur Yashú‘ ne kahá, ki Tú ne ham ko kyúṉ dukh diyá? Ḳhudáwand áj ke din tujhe dukh degá. Tab sab Isráílíoṉ ne use saṉgsár kiyá, aur unhoṉ ne un ko ág meṉ jaláyá, aur un ko pattharoṉ se márá.
26
Aur unhoṉ ne us ke úpar pattharoṉ ká ek baṛá ḍher lagá diyá, jo áj tak hai; tab Ḳhudáwand apne qahr i shadíd se báz áyá. Is liye us jagah ká nám áj tak Wádí e ‘Akúr hai.
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 8 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24