Joshua 23

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 22 Jump to: Chapter 24 →

1Is ke bahut dinoṉ ke ba‘d jab Ḳhudáwand ne baní Isráíl ko un ke sab girdágird ke dushmanoṉ se árám diyá, aur Yashú‘ buḍḍhá aur ‘umrrasída húá,

2to Yashú‘ ne sab Isráílíoṉ aur un ke buzurgoṉ, aur sardároṉ, aur qázíoṉ, aur mansabdároṉ ko bulwákar un se kahá, ki Maiṉ buḍḍhá, aur ‘umrrasída húṉ,

3aur jo kuchh Ḳhudáwand tumháre Ḳhudá ne tumháre sabab se in sab qaumoṉ ke sáth kiyá, wuh sab tum dekh chuke ho, kyúṉki Ḳhudáwand tumháre Ḳhudá ne áp tumháre liye jang kí.

4Dekho, maiṉ ne qur‘a ḍálkar in báqí qaumoṉ ko tum meṉ taqsím kiyá, ki yih un sab qaumoṉ samet, jin ko maiṉ ne káṭ ḍálá, Yardan se lekar mag̣rib kí taraf baṛe samundar tak tumháre qabíloṉ kí mírás ṭhahreṉ.

5Aur Ḳhudáwand tumhárá Ḳhudá hí un ko tumháre sámne se nikálegá, aur tumhárí nazar se un ko dúr kar degá, aur tum un ke mulk par qábiz hoge, jaisá Ḳhudáwand tumháre Ḳhudá ne tum se kahá hai.

6So tum ḳhúb himmat báṉdhkar jo kuchh Músá kí sharí‘at kí kitáb meṉ likhá hai, us par chalná aur ‘amal karná, táki tum us se dahine yá báeṉ háth ko na muṛo;

7aur un qaumoṉ meṉ, jo tumháre darmiyán hanoz báqí haiṉ, na jáo, aur na un ke deotáoṉ ke nám ká zikr karo, aur na un kí qasam khiláo, aur na un kí parastish karo, aur na un ko sijda karo;

8balki Ḳhudáwand apne Ḳhudá se lipṭe raho, jaisá tum ne áj tak kiyá hai.

9Kyúṉki Ḳhudáwand ne baṛí baṛí aur zoráwar qaumoṉ ko tumháre sámne se dafa‘ kiyá; balki tumhárá yih hál rahá, ki áj tak koí ádmí tumháre sámne ṭhahr na saká.

10Tumhárá ek ek mard ek ek hazár ko ragedegá, kyúṉki Ḳhudáwand tumhárá Ḳhudá hí tumháre liye laṛtá hai, jaisá us ne tum se kahá.

11Pas, tum ḳhúb chaukasí karo, ki Ḳhudáwand apne Ḳhudá se mahabbat rakkho;

12warna agar tum kisí tarah bargashta hokar in qaumoṉ ke baqiye se, ya‘ní un se jo tumháre darmiyán báqí haiṉ, shír o shakar ho jáo, aur un ke sáth biyáh shádí karo, aur un se milo, aur wuh tum se mileṉ;

13to yaqín jáno, ki Ḳhudáwand tumhárá Ḳhudá phir in qaumoṉ ko tumháre sámne se dafa‘ nahíṉ karegá; balki yih tumháre liye jál aur phandá, aur tumháre pahlúoṉ ke liye koṛe, aur tumhárí áṉkhoṉ meṉ káṉṭoṉ kí tarah hoṉgí, yaháṉ tak ki tum is achchhe mulk se, jise Ḳhudáwand tumháre Ḳhudá ne tum ko diyá hai, nábúd ho jáoge.

14Aur dekho, maiṉ áj usí ráste jánewálá húṉ, jo sáre jahán ká hai, aur tum ḳhúb jánte ho, ki un sab achchhí bátoṉ meṉ se, jo Ḳhudáwand tumháre Ḳhudá ne tumháre haqq meṉ kahíṉ, ek bát bhí na chhúṭí; sab tumháre haqq meṉ púrí húíṉ, aur ek bhí un meṉ se rah na gayí.

15So aisá hogá, ki jis tarah wuh sab bhaláiyáṉ, jin ká Ḳhudáwand tumháre Ḳhudá ne tum se zikr kiyá thá, tumháre áge áíṉ, usí tarah Ḳhudáwand sab buráiyáṉ tum par láegá, jab tak ki is achchhe mulk se, jo Ḳhudáwand tumháre Ḳhudá ne tum ko diyá hai, wuh tum ko nest o nábúd na kar ḍále.

16Jab tum Ḳhudáwand apne Ḳhudá ke us ‘ahd ko, jis ká hukm us ne tum ko diyá toṛ ḍálo, aur jákar âur ma‘búdoṉ kí parastish karne aur un ko sijda karne lago, to Ḳhudáwand ká qahr tum par bhaṛkegá, aur tum is achchhe mulk se, jo us ne tum ko diyá hai, jald halák ho jáoge.

← Chapter 22 Jump to: Chapter 24 →