Job 1

Chinese TTVR (現代台語譯本羅馬字版)

Jump to: Chapter 2 →

1O͘-su tōe-khu bat ū chi̍t ê lâng kiò-chòe Iok-pek, i sûn-choân chèng-ti̍t, kèng-ùi Siōng-tè, bô chòe pháiⁿ-tāi.

2I ū chhit ê kiáⁿ, saⁿ ê cha-bó͘-kiáⁿ.

3I ê châi-sán ū chhit-chheng chiah iûⁿ, saⁿ-chheng chiah lo̍k-tô, gō͘-pah tùi gû, gō͘-pah chiah lû-bú; koh ū chin chōe po̍k-jîn. I sī tang-hng tē-it hó-gia̍h--ê.

4I hiah-ê kiáⁿ siông-siông lûn-liû tī in ka-kī ê chhù pān chhe-chhau, mā chhiáⁿ in saⁿ ê chí-bē chòe-hé lim-chia̍h.

5Múi chi̍t piàn in lûn-liû pān chhe-chhau liáu, Iok-pek ōe chhe lâng kiò in tio̍h kiat-chēng ka-kī. I thàu-chá khí--lâi, chiàu in ê jîn-sò͘ thòe in hiàn sio-hòa-chè. Iok-pek chiàu-siông án-ni chòe, in-ūi i siūⁿ-kóng, i ê kiáⁿ khó-lêng ū hoān-chōe, siat-to̍k Siōng-tè.

6Ū chi̍t ji̍t, Siōng-tè ê chèng sù-chiá lâi khiā tī Siōng Chú ê bīn-chêng, Sat-tàn mā chòe-hé lâi.

7Siōng Chú mn̄g Sat-tàn, “Lí khì tó-ūi?” Sat-tàn ìn Siōng Chú, “Góa tī tōe-chiūⁿ sì-kòe kiâⁿ-lâi-kiâⁿ-khì.”

8Siōng Chú tùi Sat-tàn kóng, “Lí ū chù-ì tio̍h góa ê po̍k-jîn Iok-pek --bô? Sè-kan bô lâng chhin-chhiūⁿ i hiah-ni̍h sûn-choân chèng-ti̍t, kèng-ùi Siōng-tè, bô chòe pháiⁿ-tāi.”

9Sat-tàn ìn Siōng Chú, “ Iok-pek kèng-ùi Siōng-tè kiám bô lí-iû?

10Lí kiám m̄-sī ū ēng lî-pa kā i ûi--teh, pó-hō͘ i, i ê ka-têng, kap i só͘ ū ê it-chhè? I só͘ chòe--ê, lí sù-hok i, hō͘ i ê cheng-siⁿ chōe kah bōe-sǹg--tit.

11I só͘-ū--ê lí chhin-chhiú kā i kha̍p chi̍t-ē khòaⁿ-bāi leh, i it-tēng ōe tng-bīn kā lí chiù-chó͘.”

12Siōng Chú tùi Sat-tàn kóng, “Hó, i it-chhè só͘ ū--ê lóng tī lí ê chhiú-thâu, m̄-kú m̄-thang siong-hāi tio̍h i pún-sin.” Sat-tàn chiū tùi Siōng Chú ê bīn-chêng chhut--khì.

13Ū chi̍t ji̍t Iok-pek ê kiáⁿ cha-bó͘-kiáⁿ tú-á tī in tōa-hiaⁿ ê chhù teh chia̍h teh lim ê sî,

14ū chi̍t ê sù-chiá lâi kā Iok-pek kóng, “Gû teh lôe-chhân, lû-bú tī piⁿ--á chia̍h-chháu ê sî,

15Sī-pa -lâng hut-jiân lâi kong-kek, kā gû kap lû lóng chhiúⁿ--khì, koh ēng to thâi-sí hiah-ê po̍k-jîn; chí-ū góa chi̍t ê cháu ū lī lâi pò lí.”

16I kóng iáu-bē soah, koh ū chi̍t ê lâi, kóng, “Siōng-tè ê hé tùi thiⁿ kàng-lo̍h, sio-sí iûⁿ-kûn kap hiah-ê po̍k-jîn; chí-ū góa chi̍t ê cháu ū lī lâi pò lí.”

17I kóng iáu-bē soah, koh ū chi̍t ê lâi, kóng, “ Ka-le̍k-tí -lâng pun-chòe saⁿ tūi hut-jiân lâi kong-kek, kā lo̍k-tô lóng chhiúⁿ--khì, koh ēng to thâi-sí hiah-ê po̍k-jîn; chí-ū góa chi̍t ê cháu ū lī lâi pò lí.”

18I kóng iáu-bē soah, koh ū chi̍t ê lâi, kóng, “Lí ê kiáⁿ cha-bó͘-kiáⁿ, tī in tōa-hiaⁿ ê chhù teh chia̍h teh lim ê sî,

19hut-jiân ū tōa-hong tùi khòng-iá thàu--lâi, sàu chhù ê sì-kak-thâu, chhù tó, teh-sí hiah-ê siàu-liân-lâng; chí-ū góa chi̍t ê cháu ū lī lâi pò lí.”

20Iok-pek chiū khiā--khí-lâi, thiah-li̍h gōa-saⁿ, thì-thâu, phak tī thô͘-kha pài,

21kóng, “Góa thǹg-theh chhut bú-thai, mā ōe thǹg-theh tò--khì; Siōng Chú siúⁿ-sù, Siōng Chú the̍h--khì. Goān Siōng Chú ê miâ siū chheng-chàn!”

22Sui-jiân tú-tio̍h chiah-ê tāi-chì, Iok-pek pèng bô hoān-chōe chí-chek Siōng-tè.

Jump to: Chapter 2 →